الأحد، 14 نوفمبر 2010

بس يا بابا ... بس يا حبيبى

بسم الله الرحمن الرحيم

طول عمرى شايف إن من أصعب المهن إنى أكون كاتب فى صحيفة يومية وبصراحة مش عارف إزاى ممكن واحد يطلع على الناس كل يوم بكلام المفترض إنه فيه فكرة أو له لازمة ...وبما إنى مش مقتنع إنه كل يوم هيلاقى كلام يكتبه خصوصا إنه مش هو الوحيد اللى بيكتب وخصوصا إن الكلام الهادف مش هيغيّر من الأمر شئ يبقى أكيد الكاتب ده بيبقى فى ورطة يومية

واللى بيزود الورطة دى تورطا إنه يا قلب أمه المفروض يكتب عن الشارع والناس وهو ميعرفش حاجة عن الشارع لأنه ببساطة بيقضى يومه فى بيته وسيارته ومؤسسته الصحفية وحفلاته الليلية والبرامج التليفزيونية وممكن يتابع الأخبار فى التليفزيون عشان يعرف برضه الدنيا فيها إيه

وأنا بتصور إنه ممكن يسأل أى حد من المحيطين بيه عن أى حاجة يتحفنا بيها فى مقاله...ده احتمال
لكن الاحتمال الأكبر إنه لما يغلب وما يلاقيش حاجة يطلّ علينا بيها أكيد بيطلّ على الحمام ويبدأ يستلهم أفكارا حمّامية ذات نكهة كنيفية وذات صوت يتخلله الشجن ولون العنبر الأصفر الجذاب

ساعتها بس وسط الجو الرومانسى الرهيب ده فضلا عمّا يتمتع به من حسّ مرهف ممكن يكتب ملحمتيه التاريخيتين المشتملتين على أن دعاء السفر -الوارد عن النبى صلى الله عليه وسلم - مش مناسب للسفر لأن الدعاء- يا حرام- بيوتّر أمثاله من أصحاب الحسّ المرهف لما يحويه الدعاء من استعاذة من "كآبة المنظر" و"سوء المنقلب"

ولأن الكلام أقل من إنه يترد عليه فأنا أحب أقول للأستاذ الكاتب "بس يا بابا ...اتلهى محدش فاضيلك"

لينك الوباء الأول http://www.almasry-alyoum.com/article2.aspx?ArticleID=276422&IssueID=1948

وده البلاء التانى http://www.almasry-alyoum.com/article2.aspx?ArticleID=276631&IssueID=1950

الله المستعان

هناك 29 تعليقًا:

إنسان || Human يقول...

لا حول ولاقوة الا بالله
اقول ايه بس .....هيا دماغه وصلته لكده
ربنا يشفي

بنجاواتى يقول...

اه والله عندك حق يا محمد

ربنا يشفى

Unknown يقول...

حسبنا الله ونعم الوكيل
هؤلاء باعوا دينهم بدنياهم وبئس البيع

محمد فوزى يقول...

كل سنة وانت طيب يا صاصا
ويارب عيد سعيد على الجميع ان شاء الله


المهم بس
المقدمة اللى طرحتها
ان الكاتب يلاقى فكرة جديدة فعلا صعب
بس اهو ممكن ينقل او يعيد طرح فكر جديد
او يناقش احداث جارية الموضوع ممكن وسهل
ولو قبضوك فلوس بس هتعرف وتكون كاتب كبير
ههههههههههههه


اما بالنسبة لمثال المقالين
تظن انه استفزاز بصراحة
وجهل وسوء فهم من الراجل اللى اسمه سليمان ده
ملهوش علاقة بنضوب الافكار او انه مش لاقى حاجة يقولها

ده راجل عنده قصور فى فهم دينه
وللاسف امثاله كتير
ومعندهوش اى احساس بقيمة الاحاديث الشريفة وايات القران


وكنت عايز مقدمتك للمقالات العجيبة دى تكون اقوى من كده بكتير

يلا خير
وكل سنة وانت طيب مرة تانية

Lady E يقول...

انا دمي اتحرق يا بنجا مش من المقال بس لكن كمان من التعليقات عالمقال

كاتب وصحفي ومش عارف ليه اختاروا الأية دي بالذات والدعاء ده ! مش عارف ان الدعاء ده سنة عن الرسول صلى الله عليه وسلم وبياخد كلمتين من الدعاء ويعلق عليهم نص الكلام بس !

ربنا يهديه ويفهم
------------
كل سنة وانت طيب وبخير وصحة وسعادة
عيد سعيد عليك وعلى اسرتك الكريمة

كــركــبــة دمـــاغ ㋡ يقول...

حاجه مستفزة
ايه الناس دي !!!!
بتفكر ازاي دي وبانهي عقل وانهي منطق !!!

بجد خسارة ان الواحد يغلط فيهم حتى

الأهم

كل سنه وانت طيب وبالف خير وصحة وسلامة وربنا يعود عليك الايام بكل خير وانت في احسن حال يارررررب

عيد سعيد عليك وعلى كل اللي بتحبهم

(f)

جايدا العزيزي يقول...

كل عام وانت بخير

كل عام وانت الى الله اقرب

وعلى طاعته ادوم

عيد اضحى مبارك

اعاده الله عليك وعلى امة نبينا محمد

بالخير واليمن والبركات

عيد سعيد

تحياتى

قلم رصاص يقول...

كنت بفكر بنفس ما انت قلت يادرش على جزئية انه كاتب المقال اليومي دا مؤكد في ورطه وعايش تحت ضغط خصوصا ان روافد معلوماته في يومنا هذا لاتزيد عن ما لدينا نحن القراء بل يمكن الشباب بيعرفوا حاجات اكتر منهم بحكم اتقان التكنولوجيا وعلى رأسها النت

المهم

كاتب المقال سليمان جوده دا فعلا حاجة مستفزه بس لاتستغرب يابنجا
فهو مجرد وجه لنموذج منتشر اليومين دول ..كل من هب ودب بقى بيفتي في الدين بغير علم .. لأ والأدهى ان دا وامثاله بيهاجموا رجال الدين اللي وهبوا حياتهم للبحث والفحص والدراسه في دين الله

طرح متميز يابنجا

كل سنه وانت طيب وعيد سعيد عليك يارب وعلى كل الأسره
^_^

حفيدة عرابى يقول...

اولا كل سنة وأنت طيب وبخير
ثانيا انا اتخضيت من وصفك بس ده سليمان جوده
عادى يعنى مقالش حاجة
فيها ايه لما يكتب مقالين فى صحيفة واسعة الانتشار عن موضوع زى ده
وفيها ايه لما يكون الملك الحسن هو قدوته والدعاء اللى قاله علشان أجله كان لسه ماجاش مايتعمم علينا كلنا

على فكرة انت ظلمته هو مش مضايق من كآبة المنظر هو خايف من سوء المنقلب
وتعباه قوى (وإنا الى ربنا لمنقلبون )
مع انى بظلم نفسى كتير بس الحمد لله بقالى فترة مابحاولش أبص على مقالاته من الاساس
ربنا يهدى

Baskouta يقول...

كل سنة وانت طيب
عيد اضحى سعيد

http://up.ta7a.com/ta7a/Faw89985.jpg

Dr/ walaa salah يقول...

جينا نهني بالعيد ونقول :

الله يتقبل اعمالك ومبارك عليك العيد
و يعود عليك بصحه وسعاده وعمر مديد

بنجاواتى يقول...

أستاذ محمد الجرايحى أنا أتفق مع حضرتك انه بيقول كده عن قصد وده واضح فى نهاية المقال الثانى اللى بيقول فيه ان الطائرات بيركبها اجانب وغير مسلمين وبالتالى غرضه انه يكون مفيش دعاء للسفر من اساسه على متن الطائرات

حسبنا الله ونعم الوكيل
تحياتى لحضرتك

بنجاواتى يقول...

محمد فوزى

انت غيرت اسمك يا بنى ؟؟؟ :P

القصد يعنى يا دكتور لو قبضونى فلوس كتييييييير زى اللى بياخدوها دى القلم هيكتب لوحده من غير ما يفكر حتى ههههههههه

طيب يا دكتور ما دام هو ما بيفهمش يبقى يسكت بقى وبلاش قرف

كنت هكتب كلام تقيل بس انت عارف بقى الواحد كبر يا محمد وبقيت فراجيل :)))))

منور يا عم وارجع لمدونتك بقى

بنجاواتى يقول...

سلامتك يا ليدى وسلامة دمك

هو كده بلاوى بتتحدف علينا من غير ما نعرف منين

والعيال السيس اللى بيردوا ع الموضوع كأنه موضوع محل نقاش حاجة تفرس

عموما ننسى كل ده ونقول كل سنة وانتى بألف خير ومبوظين الدايت والدنيا اخر عكعكة :))

بنجاواتى يقول...

كركبة دماغ

اوعى تغلطى فيهم ارجوكى عشان طنط امال بتزعل من اللى بيغلطوا :))

اهو شوية بنى ادمين مش لاقيين حاجة يعملوها فقالوا نخنق ع البنى ادمين بقى وخلاص

يللا سيبك من كل ده وكل سنة وانتى بألف خير وطيبة دايما كده يا رب

بنجاواتى يقول...

جايدا العزيزى

جزاكى الله خيرا

عيد أضحى سعيد عليكى

بنجاواتى يقول...

قلم رصاص

على فكرة ساعات أقرا لواحد من دول وتحس انه ما بيعرفش حاجة فضلا عن انه ما بيفهمش حاجة وساعتها بييجى ف بالى تصور انه مثلا ما بيعرفش يفتح الكمبيوتر اساسا وحتى لو كان بيعرف فى التكنولوجيا فده برضه لن يكفيه لانه ما يعرفش الشوارع فيها ايه والمواصلات والمستشفيات والافران لانه ما بيتعرضش للحاجات دى ويقولك كاتب صحفى ...على ايه يا حسرة


كون انه اصبح نموذج متكرر فانا أتفق معاك ان التصرفات دى أصبحت متكررة واحنا بنحكم على التصرفات وما يصدر عن الاشخاص وليس الاشخاص انفسهم ...يعنى لما يخبط فى أسياده من العلماء نعرفه انه ما بيفهمش حاجة لكن القلوب الله وحده المطلع عليها

زيارتك بتسعدنى
تحياتى

بنجاواتى يقول...

حفيدة عرابى

على فكرة انتى سلختى الراجل بالادب :)))

اوعى تكونى سلختى قبل ما تدبحى هههههه

كل سنة وانتى طيبة يا حفيدة عرابى باشا

منورة الدنيا

بنجاواتى يقول...

بسكوتة

كل سنة وحضرتك طيبة

شرفتينى

بنجاواتى يقول...

د/ولاء صلاح

كل عام وانتى الى الله اقرب

تقبل الله منكم

Soul.o0o.Whisper يقول...

كل عام و انت بخير

و عيد سعيد على الجميع ان شاء الله


أما بالنسبة للمقالات
فالحقيقة انى اول مرة اقرأ لسليمان دا
عشان كدا مقدرش أقول كلامه دا عن جهل و لا عن عمد

بس فيه نا فعلا كدا

دا واحد بعت يسأل ان والدته حجت و هى حامل فيه
فهل بكدا سقطت عنه فريضة الحج؟؟


ربنا يعلمنا

دمت بود

د. ياسر عمر عبد الفتاح يقول...

ازيك يا بنجا

يخرب عقلك يا راجل

انت لسه عايش؟

روحت فين كده واختفيت

زاحشني والله :)

كل عام وانت بخير

مجداوية يقول...


السلام عليكم
كل عام وأنتم بخير

جزاك الله كل خير لطرح المقالتين لكي نرد على أمثاله ونقيم عليه الحجة فسوف يسأل أمام الله على هذا الطرح الذي يدل على جهل رغم أنه متعلم !!
والحقيقة أنه آخر واحد المفروض يتحدث عن كآبة المنظر لأنه لا يبتسم مطلقا ومتجهم وكئيب وحديثه يبعث على الملل والكآبة لرتمه البطىء ولعبوسه الدائم ولعل هذا لأنه غير مقتنع بترديد هذا الدعاء الذي يستعيذ بالله مما يعانيه ولو فعل فقد يرتسم على وجهه علامات البشر والقبول التي يفتقر إليها !
لكني أختلف معك أن سبب هذه المقالات هو من أجل أن يملاً مقالة يومية مطالب أن يخطها فمحاولة البعض المستمرة للي الدين كما يريدون لم تتوقف ولن تتوقف وهي مقصودة ولم تأتِ من فراغ

ستيتة يقول...

كل سنة وانت طيب يا بنجا

فتن كقطع الليل المظلم
ربنا ينجينا منها يارب
تحياتي

Unknown يقول...

أخى الكريم
السلام عليكم ورحمة الله وبركاته
كل عام وأنت بخير بمناسبة حلول عيد الأضحى المبارك أعاده الله علينا وعليكم وعلى جميع المسلمين باليمن والخير والبركة وكل عام وأنتم من الله أقرب

sony2000 يقول...

سيبك منهم دي ناس عوذا ال........
كل سنه وانت طيب

Unknown يقول...
أزال المؤلف هذا التعليق.
Unknown يقول...
أزال المؤلف هذا التعليق.
Unknown يقول...

ماجد القاضي يقول...
حقيقي عجبتني مقدمتك..

وعامة يمكن أن نعتبر هذه أيضا وسيلة أخرى من وسائل إيجاد ما نكتب عنه: أن نكتب عما يكتبه الآخرون :)

بجد جزالك الله خيرا على التنبيه.. وصراحة ذهبت إلى المقالة فوجدت ولله الحمد التعليقات هناك كاااافية تماما، ومعظمها يوضح أن الناس ما زالت على وعي بمن يحاول النيل من الدين (بشياكة) حتى لو كان كاتب كبير!! ولم تنفع المقدمة غير الذكية التي بدأ بها الكاتب مقاله (موضوع لا اعتراض على الآية ولا الحديث...!!! أمال كل البلاوي اللي بعد كده تبقى إيه إن لم تكن اعتراضا!!!!!)..

شكرا أخي الكريم، وسامحني على التقصير معك.
كل عام وأنت بخير.

-----------
معذرة قمت بالحذف مرتين لحدوث خطأ أدى إلى إرسالي التعليق أكثر من مرة!!!