الأحد، 14 نوفمبر، 2010

بس يا بابا ... بس يا حبيبى

بسم الله الرحمن الرحيم

طول عمرى شايف إن من أصعب المهن إنى أكون كاتب فى صحيفة يومية وبصراحة مش عارف إزاى ممكن واحد يطلع على الناس كل يوم بكلام المفترض إنه فيه فكرة أو له لازمة ...وبما إنى مش مقتنع إنه كل يوم هيلاقى كلام يكتبه خصوصا إنه مش هو الوحيد اللى بيكتب وخصوصا إن الكلام الهادف مش هيغيّر من الأمر شئ يبقى أكيد الكاتب ده بيبقى فى ورطة يومية

واللى بيزود الورطة دى تورطا إنه يا قلب أمه المفروض يكتب عن الشارع والناس وهو ميعرفش حاجة عن الشارع لأنه ببساطة بيقضى يومه فى بيته وسيارته ومؤسسته الصحفية وحفلاته الليلية والبرامج التليفزيونية وممكن يتابع الأخبار فى التليفزيون عشان يعرف برضه الدنيا فيها إيه

وأنا بتصور إنه ممكن يسأل أى حد من المحيطين بيه عن أى حاجة يتحفنا بيها فى مقاله...ده احتمال
لكن الاحتمال الأكبر إنه لما يغلب وما يلاقيش حاجة يطلّ علينا بيها أكيد بيطلّ على الحمام ويبدأ يستلهم أفكارا حمّامية ذات نكهة كنيفية وذات صوت يتخلله الشجن ولون العنبر الأصفر الجذاب

ساعتها بس وسط الجو الرومانسى الرهيب ده فضلا عمّا يتمتع به من حسّ مرهف ممكن يكتب ملحمتيه التاريخيتين المشتملتين على أن دعاء السفر -الوارد عن النبى صلى الله عليه وسلم - مش مناسب للسفر لأن الدعاء- يا حرام- بيوتّر أمثاله من أصحاب الحسّ المرهف لما يحويه الدعاء من استعاذة من "كآبة المنظر" و"سوء المنقلب"

ولأن الكلام أقل من إنه يترد عليه فأنا أحب أقول للأستاذ الكاتب "بس يا بابا ...اتلهى محدش فاضيلك"

لينك الوباء الأول http://www.almasry-alyoum.com/article2.aspx?ArticleID=276422&IssueID=1948

وده البلاء التانى http://www.almasry-alyoum.com/article2.aspx?ArticleID=276631&IssueID=1950

الله المستعان

عيد سعيد

بسم الله الرحمن الرحيم

النهاردة 8 من شهر ذى الحجة 
بكرة ان شاء الله يوم عرفة
وبعده بإذن الله عيد الأضحى المبارك 

حاسس انى اتغيرت كتير عن السنة اللى فاتت
بقيت بخطط احسن من الاول والحمد لله 
بقيت نبريص شوية برضه ما يضرش
بقيت عصبى شويتين 
بقيت عملى اكتر
مخططى لحياتى بقى شديد العقلانية قليل العاطفة
مبقتش متفائل زى السنة اللى فاتت مثلا
حاجات كتير كنت بحبها مبقتش بحبها خالص
عمرى زاد فى السنة دى حوالى اربع أخماس عمرى الحقيقى
المستشفى وأحوال الناس جابتلى اكتئاب مزمن
اكتشفت ان فى خدعة كبيرة فى بلدنا اسمها العلم
 
 ان شاء الله العيد الجاى اكون احسن 
كل سنة وانت طيب يا بنجا 
كل سنة وكل المسلمين بخير وصحة وسعادة