بعد التحية والسلام حابب اقول شوية كلام
عندى سؤالين وهجاوب عليهم من وجهة نظرى وياريت حضراتكم تشاركونى برأيكم
السؤال الأول : هل حضرتك لما بتقوم بجولة فى المدونات بتحس انك قضيت الوقت فى شئ له قيمة ؟
السؤال الثانى: هل حضرتك بعد الانتهاء من المرور على المدونات بتحس انها تركت فيك أثر نفسى طيب ؟
وقبل ما أقول رأيى هتكلم عن الأسباب اللى شكّلت رأيى ده
1- أحيان كثيرة أدخل مدونة ألاقيها اتحولت من مدونة لكتابة موضوعات الى صورة من غرفة شات نشطة جدا من خلال الشات بوكس بالرغم من ان غالب المدونين بيرفضوا فكرة غرف الشات "على فكرة أنا وقعت فى السلبية دى"
يا جماعة الخير عايز أقولكم ان غرف الشات مالية الدنيا
2-أحيان كثيرة أدخل مدونة ألاقيها تحولت من مدونة لمناقشة موضوعات الى صورة من صفحة على الفيس بوك من خلال التعليقات والرد على التعليقات "وكان ليا حظ برضه من السلبية دى"
يا جماعة الخير عايز اقولكم إن الاكونت فى الفيس بوك فرى ومش صعب والله
3-أحيان كثيرة أدخل مدونة ألاقي البوست فيها عبارة عن كلمتين او اكثر قليلا وصاحب المدونة بيعمل كده طبعا لأنه عارف ان التعليقات مهما يكون الموضوع هتكون على طريقة الفيس بوك"مجربتهاش قبل كده دى "
يا جماعة الخير الكلمتين دول ممكن تعملهم status ع الفيس بوك أو ع الياهو ميل وساعتها اصحابك اللى بيعلقوا ع البوست هما برضه اللى هيعلقوا ع الكلمتين دول
4-أحيانا أدخل مدونة ألاقى الموضوع كله موجّه لشخص معين ونص الكلام مفهوم والنص التانى مش فاهم حاجة"وقعت فيها دى برضه"
يا جماعة الخير اللى عايز يقول لحد حاجة وحشة عنده ألف طريقة يقولهاله بيها بس بعيد عننا
5-أحيانا كتييييييرة أدخل مدونات ألاقى موضوع محترم وكل حاجة بس لازم فى ذيل الموضوع ملحوظة صغيرة فيها تهنئة أو شكر أو توجيه أو اى حاجة لأحد المدونين "برضه عملتها دى قبل كده" وأحيانا بيكون الموضوع كله عبارة عن ذيييييل
يا اخوانا مش معقول كده خنقتونى
6-أحيانا تلاقى النشاط التدوينى كله متعطل لأن المدونين كلهم مشغولين بحل مجموعة من ال"تاجات"-tag -اللى أسئلتها مش واضحة ومتكررة وطبعا الاجابات لازم تكون دبلوماسية ولازم تغلب الغموض اللى فى الاسئلة"جربتها قبل كده "
7-للأسف أصبحت كثير من المدونات تمثل تكتلات وجروبات كلها تناطح بعضها وده لان اللى بقى بيربط المدونين ببعض اشخاصهم وليس مدوناتهم وما تحتويه من موضوعات"طبعا كنت كده برضه"
8-للأسف بعض المدونين أصبحوا بيناقضوا أنفسهم فى تحديد طبيعة العلاقة مع اخوانه المدونين ...يعنى مثلا تلاقى المدون أو المدونة بيستخدم اسم مستعار وصورة رمزية وتقريبا هويته مجهولة تماما لغيره من المدونين لكنه بيشوف إنه مفيش مشكلة لو يقابله فى لقاء مدونين أو غيره لمجرد انهم عندهم مدونات وانتوا عارفين بقى ايه اللى بيحصل بعد كده"أنا عمرى ما اتقابلت مع أى حد من اللى عرفتهم من التدوين لكن قبل كده مكنتش هتأخر لو ظروفى سمحت"
يا جماعة الخير هو التدوين عالم افتراضى ولا موقع تعارف؟؟؟؟؟
وعلى كل ما سبق أنا شايف انه من حق كل واحد انه يتعرف على ناس ارتبط بيهم بسبب مدوناتهم لكنه دايما فى وسيلة تانية غير الموضوعات والتعليقات لتوصيل الرسايل الخاصة
أرجو ان الكلام ده ما يكونش سبب فى زعل حد خصوصا مع وجود حالة الحساسية المنتشرة بين المدونين الكرام وأرجو ان المدونات ما تتحولش الى مسخ وان يكون التدوين بيت يجمع الأفكار أكثر من من الاشخاص