الثلاثاء، 2 فبراير، 2010

عفوا إنها مدونة

بعد التحية والسلام حابب اقول شوية كلام


عندى سؤالين وهجاوب عليهم من وجهة نظرى وياريت حضراتكم تشاركونى برأيكم

السؤال الأول : هل حضرتك لما بتقوم بجولة فى المدونات بتحس انك قضيت الوقت فى شئ له قيمة ؟

السؤال الثانى: هل حضرتك بعد الانتهاء من المرور على المدونات بتحس انها تركت فيك أثر نفسى طيب ؟

وقبل ما أقول رأيى هتكلم عن الأسباب اللى شكّلت رأيى ده


1- أحيان كثيرة أدخل مدونة ألاقيها اتحولت من مدونة لكتابة موضوعات الى صورة من غرفة شات نشطة جدا من خلال الشات بوكس بالرغم من ان غالب المدونين بيرفضوا فكرة غرف الشات "على فكرة أنا وقعت فى السلبية دى"

يا جماعة الخير عايز أقولكم ان غرف الشات مالية الدنيا


2-أحيان كثيرة أدخل مدونة ألاقيها تحولت من مدونة لمناقشة موضوعات الى صورة من صفحة على الفيس بوك من خلال التعليقات والرد على التعليقات "وكان ليا حظ برضه من السلبية دى"

يا جماعة الخير عايز اقولكم إن الاكونت فى الفيس بوك فرى ومش صعب والله


3-أحيان كثيرة أدخل مدونة ألاقي البوست فيها عبارة عن كلمتين او اكثر قليلا وصاحب المدونة بيعمل كده طبعا لأنه عارف ان التعليقات مهما يكون الموضوع هتكون على طريقة الفيس بوك"مجربتهاش قبل كده دى "

يا جماعة الخير الكلمتين دول ممكن تعملهم status ع الفيس بوك أو ع الياهو ميل وساعتها اصحابك اللى بيعلقوا ع البوست هما برضه اللى هيعلقوا ع الكلمتين دول


4-أحيانا أدخل مدونة ألاقى الموضوع كله موجّه لشخص معين ونص الكلام مفهوم والنص التانى مش فاهم حاجة"وقعت فيها دى برضه"

يا جماعة الخير اللى عايز يقول لحد حاجة وحشة عنده ألف طريقة يقولهاله بيها بس بعيد عننا


5-أحيانا كتييييييرة أدخل مدونات ألاقى موضوع محترم وكل حاجة بس لازم فى ذيل الموضوع ملحوظة صغيرة فيها تهنئة أو شكر أو توجيه أو اى حاجة لأحد المدونين "برضه عملتها دى قبل كده" وأحيانا بيكون الموضوع كله عبارة عن ذيييييل

يا اخوانا مش معقول كده خنقتونى


6-أحيانا تلاقى النشاط التدوينى كله متعطل لأن المدونين كلهم مشغولين بحل مجموعة من ال"تاجات"-tag -اللى أسئلتها مش واضحة ومتكررة وطبعا الاجابات لازم تكون دبلوماسية ولازم تغلب الغموض اللى فى الاسئلة"جربتها قبل كده "


7-للأسف أصبحت كثير من المدونات تمثل تكتلات وجروبات كلها تناطح بعضها وده لان اللى بقى بيربط المدونين ببعض اشخاصهم وليس مدوناتهم وما تحتويه من موضوعات"طبعا كنت كده برضه"


8-للأسف بعض المدونين أصبحوا بيناقضوا أنفسهم فى تحديد طبيعة العلاقة مع اخوانه المدونين ...يعنى مثلا تلاقى المدون أو المدونة بيستخدم اسم مستعار وصورة رمزية وتقريبا هويته مجهولة تماما لغيره من المدونين لكنه بيشوف إنه مفيش مشكلة لو يقابله فى لقاء مدونين أو غيره لمجرد انهم عندهم مدونات وانتوا عارفين بقى ايه اللى بيحصل بعد كده"أنا عمرى ما اتقابلت مع أى حد من اللى عرفتهم من التدوين لكن قبل كده مكنتش هتأخر لو ظروفى سمحت"

يا جماعة الخير هو التدوين عالم افتراضى ولا موقع تعارف؟؟؟؟؟


وعلى كل ما سبق أنا شايف انه من حق كل واحد انه يتعرف على ناس ارتبط بيهم بسبب مدوناتهم لكنه دايما فى وسيلة تانية غير الموضوعات والتعليقات لتوصيل الرسايل الخاصة


أرجو ان الكلام ده ما يكونش سبب فى زعل حد خصوصا مع وجود حالة الحساسية المنتشرة بين المدونين الكرام وأرجو ان المدونات ما تتحولش الى مسخ وان يكون التدوين بيت يجمع الأفكار أكثر من من الاشخاص

هناك 71 تعليقًا:

حفيدة عرابى يقول...

أسئلة محيرة
بس اللى أقدر أقوله
انى بحس بحاجت كتير بعد اللف على المدونات
بحس ان فى دنيا مفتوحة قدامى
ودنيا حلوة كمان
عايزة سياسة
اروح لنوارة نجم
عايزةخبرات اجتماعية وفلسفة
عايزة رقة وأسلوب جميل وقلب صافى
كتير جدا جدا جدا


بس منكرش ان جزء كبير من استمتاعى بالعالم ده
هوانه عالم افتراضى

فى الاغلب
هو فرصة حلوة بالنسبة لى
أغسل نفسى فيها من أى حاجة بتضايقنى


الشات الحمد لله ماليش فيه نهائى
الفيس بوك
عملت أكونت
وأكتر من كده مش فاهمه فيه حاجة
والاجمل كل يوم واد كده فرفور
يبعت لى طلب صداقة
وهو عنده 19 سنة وبيهوى مصادقة الفتيات :)
الحاجات الباقية
يمكن اكون بعمل جزء منها
بس انا بستريح نفسيا بالمدونات

احساس طفلة محبة للرومانسية بس واقعية يقول...

متفقة معاك يا بينجا اذا كنت بتتكلم على ان مدونة بالكامل تتحول لشات او بوستات عبارة عن كلمتين ونص او كلها تهانى او خناقات وكلام ملوش لزمة

بس اذا كنت بتتكلم على تهنئة او بوست واحد او حتى انتين اتقلبوا لشات او كدا فاية المانع من التواصل الحيوى مش لازم كله افكار افكار وبس ( هو كلة ضرب ضرب مفيش شتيمة ولا اية )على منهج الجملة دى كدا
بحس ان التدوين مش لازم يكون نقاش وحوار بس عشان نستفيد منه ممكن يكون نقاش و رومانسية وخيال و نكت وتاجات وصداقات وهزار وتهانى ممكن نستفيد عقليا او نضحك ومعنوياتنا تكون افضل او نهيم فى سماء كلمات رومانسية او نعرف معلومة جديدة او نهنى حد بمناسبة سعيدة وحتى لو مستفدناش ممكن ببساطة نكون اسعدناه بكلمه طيبة قولناها

مش شايفة ان الموضوع فى حساسية ولا زعل
انت بتعرض رأي قابل للنقاش ولا اية ؟
حمد لله على السلامة
يارب تكون الامتحانات خلصت على خير :)
ربنا يوفقك
دمت بكل خير
تقبل مرورى

ستيته حسب الله الحمش يقول...

ج1 - اه لما بقوم بجولة في المدونات بحس اني قضيت وقتي في شيء له قيمة
2- مش مهم اترك فيها أثر طيب ومش عارفة بترك اساشا اثر ولا لأ

انا أرى التدوين حرية شخصية بحتة ما لم يتعدى حرية الأخرين
ومع الوقت عملت لنفسي اماكن يا استفيد منها يا اضحك فيها يا اناقش مناقشة من وجهة نظري لها معنى

اللي عاوزها شات يشات
واللي عاوزها فيس بؤ يبقى ده احتياجه النفسي
واللي عاوز ناس حواليه يهني ويبارك ويبقى اجتماعي
واللي بيكتب لمزاجه مش هامه مين علق او معلق ومش مضطر خالص يجامل
واللي عاوز يبعت رسائل خاصة مع الوقت مش ها يدخل عنده غير اللي بيبعت له رسائل
واللي عاوز يبقى عنده نفوخ حقيقي عارف ان العلم مش بس في الكراس ولكن من خلال عشرته لعقول الناس

هي محض حرية شخصية ومجموعة من الإختيارات تناسب شخصية كل مواطن مدوني :)

تحياتي

norahaty يقول...

معلش يابنجاوتى
أنا تُهت ومش فهمت
الخلاصة :اقولك كل واحد
حر فى مدونته يقلبها
شات يقلبها كافية
هو حر أنت زعلان
ليه؟فيه مدونة
تدخلها تدوخ
من كتر الكلام
ومدونة تانية
فيها كلمة أو أتنين
هم حريين فى مدوناتهم ومقابلاتهم :)

هي وظروفها يقول...

بنجا باشا اولا سلامو عليكو وده اول دخول ليا عندك وده شرف ليه اكيد

بخصوص موضوعك انا وجهه نظري البسيطه

ان كل انسان محترم حر لازم يتعامل مع المدونه بتاعته وكافه المدونات بمبدأ

(((انت حر طالما انك لم تضر)))

فاهمني طبعا؟؟؟..

ساعات تكون كاتب موضوع يحزن وجد يسبلك تعليق لذيذ ساعتها هتضحك وترد باسلوب لذيذ برده
مش معني كده انك قلبت المدونه غرفه شات لأ انت بترد وبتجامل حبايبك لان المدونه ما هي اللا مجتمع مصغر
مليان حب وشر وخخير ومجاملات ورخامه مجتمع بكل التفاصيل ومش هقدر لانا ولا انت نخليه غير كده لان الناس عمرها مهتتفق تحت لواء محدد

ساعات يا بينجا تلف تقرا وتستفيد وساعات نص نص وساعات ربع ربع حسب اللي بيكتب واللي بيطرح في مدونات انت بتحب تدخلها
العمليه نسبيه
دي وججه نظري وتحياتي ليك
وليد الدوغري

د/عرفه يقول...

متفق معاك فى المجمل يا مصطفى

خصوصا جزئية
الشات
والتعليقات الكتيرررررررر اوى وكلها تهريج
بصراحة الموضوع ده انتشر فترة وقل شوية
وكان تهريج الصراحة لانه بيفقد الموضوع قيمته

فيه مواضيع عندى قيمتها كانت بالتعليقات بتاعتها


يعنى التعليقات مهمة اوى

وانا بحترم اى مدون بيهتم بتعليقاته زى ما بيهتم بمواضيعه



بالنسبة
لمحتوى الموضوع
انا شايف ان كل واحد حر يكتب اللى فى دماغه
ويجوز من خلال مذكرات شخصية تجد الحكمة وتجد الخبرة
ولكن للاسف ممكن تلاقى مواضيع
ولا هى مذكرات ولا هى حتى حكايات ولا طرح فنى او ادبى
وبيكون اى كلام يا عبد السلام


وبالنسبة للمواضيع الصغيرة
مفيهاش حاجة يا مصطفى يجوز كلمتين يأتروا اكتر من موضوع كبير

خصوصا ان فيه ناس مش هاوية فايس بوك ومتعرفهوش اساسا



وبالنسبة بقى للجزء اللى انا معترض عليه
التنويهات اللى فى الاخر
المشاركات الاجتماعية او التويهات الصغيرة
يجوز بتكون لها اهمية
ومش عارف فى الجزئية دى بالذات حاسس انك قاصد حد معين


عموما
انا قريت كلامك اللى كان شبه ده على جروب الفايس بوك وعجبنى جدا جدا
بس كانت عندى ملاحظة
وهو انك تكتب الموضوع فى discution board
وتبعت الرسالة فيها لينك الموضوع
بحيث يكون موضوع ثابت على الجروب اى حد يدخل يشوفه


آخر شىء
انا هاخد الصورة بعد اذن سيادتك واحطها عنوان للجروب

تمام يا حبى


اشوفك بالليل متتاخرش

اقصوصه يقول...

السؤالين

ايجابتي عليهم بالايجاب :)

الشعب لابد له من حكومه تشكمه يقول...

بص انا ليا راى فى الموضوع وهو كل واااااااااحد حر فى مدونته حتى لو جاب كوره ولعب فيها:)

مش عاجب حد ميدخلوش دا ببساطه.

بسسسسسسسسسس هو كمان هيفهم انه حر بسسسس فى مدونته بمعنى حدود حريتك تنتهى عند انف الاخرين.مع نفسه لكككن ميأذيش او يضايق حد.

بالنسبه للعالم الافتراضى,
اوقات من كتر بتعجبك دماغ حد بتكون عاوز ان المعرفه دى تكمل باتصال انسانى ودا مش عيب,
بالعكس ممكن تكسبه على المستوى الانسانى والشخصى كصديق راائع,
ودول بجد بتكسبهم بجد,
بسسس المعيار هنا فى العالم ده انه زى ميكون على البلوج يكون فى الحقيقه.

شق القمر يقول...

منور يابنجا
والله يا مصطفى حاولت أدخل مدونتك الضهر كده لقيتها مقفولة.. قلت فى نفسى خييير بس لما أشوفك واسألك ليه حركة التقلبات وكل شوية تضحك علينا تقفل وتفتح وتقفل وتفتح
بس بجد لا تتخيل سعادتى لما لقيت مدونتك منورة فى جديد المواضيع عندى
مش لشىء غير انى كنت عايزة أشوف التمبليت بتاع مدونتك :D

كلامك جميل يا مصطفى.. بس معلش بقى دا رأيك الخاص

ومن هنا أحب أشيد بإنسان تعلمت منه التدوين الصادق والتعليق الطيب الذى يفيد وينفع رحمة الله عليه محمد " الفارس الملثم " والذى منعتنى تعليقاته من غلق احدى مدوناتى والتى أخيرا واليوم بالأخص أعيد ترميمات وتجديدات فيها لأفتح التدوين من جديد بأمر الله من حيث انتهى مع محمد رحمة الله عليه وغيره

بنت الأسلام يقول...

السلام عليكم ورحمتة الله وبركاتة

فى الأول أحب أجاوب على أسئلة حضرتك

بجد انا أستفدت كتير من عالم التدوين وخصوصا من مدونين ليهم فكر وأسلوب يجبرك انك تدخل وتعلق وتستفيد فأنا الوقت إللى بقضيه فى المدونات نقدر نقول بستفيد ب 80% منه
اما موضوع أنى أترك أثر فى المدونة دى صراحة مش أنا إلى أقدر أقيمها صاحب المدونة إللى يقدر يقيم الموضوع دا

أما موضوع الشات بوكس دا فأنا أتفق مع حضرتك وأرفضه بشدة لأن من خلاله ممكن تحصل تجاوزات كتير قوى

أخر حاجة موضوع أن البوست يبقى مختصر أو عبارة عن جمله .انا أعتقد ان دى حرية من المدون أنو يكتب كيفما يشاء فى مدونته .ممكن الجمله المختصرة دى عايز يوصل منها فكرة .
بس مش بتبقى مكتوبة لمجرد التعليق والمدونين يدخلوا يعلقوا وخلاص .انا لاأتفق مع حضرتك فى الجزئية دى .

عالم التدوين فى النهاية ليه سلبيات وإيجابيات .
بس انا أستفدت منه كتير قوى واتعلمت منه حاجات أكتر
عذرا على الأطاله

Bent Men ElZaman Da !! يقول...

لو تسمحلى يا بينجا اعلق على كلامك من وجهه نظرى اللى وارد اوى تكون غلط
عن نفسى لما بدخل مدونات فى اللى بستفاد منها وفى اللى لا
ومش شرط استفاد معلومه او فكره جديده
لكنى حتى بستفاد اسلوب فى التعبير عن الرأى مختلف
بستفاد اسلوب فى الحوار مختلف
ودى انا شايفاها شئ كويس بردو
اما موضوع اللى بيكتبوا تعليقات ويقلبوها شات
معاك انه حاجه تمل لان لو على الشات
مفيش اكتر منه على النت
لكن بختلف معاك فى حاجه تانيه
ان الشخص صاحب المدونه ليه كااااامل الحريه فى انه يكتب سطر واحد اوان شاء الله كلمه واحده او حتى صوره من غير كلام او رسايل غامضه موجهه لاشخاص مجهوله لان دى حريته الشخصيته
ومدونته يعمل فيها اللى هو عايزه
بحسها زى بيت كبير وواسع صاحبه بيعمل فيه اللى هو عايزه لا حد بيقوله عيب ولا انت بتعمل ايه
فى مقابل ده بقى
الناس اللى بتعدى على مدونته
ليها بردو كااااامل الحريه فى انها ترد على كلامه تقوله كويس او وحش او حتى ماتردش خالص
وانا حابه الكيان ده كعالم افتراضى اكتر من انه يتحول واقع رغم انه احيانا بيكون واقع حلو مانكرش

تقبل مرورى :)

Sonnet يقول...

انت فعلا قسمت المدونات حسب انشغالها و عجبتني حكاية التاج
انا فضلت منتظرة حد يبعت لي تاج لفترة
و بعدين لما جاء لقيت اسئلة كثيرة و مكررة فتناسيت الامر
و اوضحت ما هو الرائج بين المدونين
انها تدوينة جيدة جدا
ددمت بود

rovy يقول...

السلام عليكم

الحقيقه أنى لو بأقوم بجوله بين المدونات أكيد بأستفيد و ده لأنى بأدخل المدونات اللى بأحترم عقل الكاتب بها و لو حصل و دخلت مدونه هايفه بالخطأ بأخرج بسرعه و مش بأضيع وقتى فيها ..
المدونه بتعبر عن صاحبها فى النهايه و برضه هو حر ما دام لم يضر أحد بتدويناته ..
تقديرى و تحياتى لك

الشعب لابد له من حكومه تشكمه يقول...

ماله البوست؟
البوست حلو جداااااا على فكره وعجبنى والا مكنتش سيبت كومنت.
ايه بتهرج علشان البوست دى:)

انت قلت كلام حقيقى وواقعى وبيحصل وممكن كلنا نقع فى بعض منه.
بس مش هنعمل مقاييس للناس تمشى عليها ونجبرهم فاهمنى,

فالحل الوحيد انك تعمل اللى انت عاوزه فى بلوجك وتختار اللى تتابعهم .
حتى تستريح:)

فتاه من الصعيد يقول...

عندك حق في كل الملاحظات

بس على فكره في ناس فعلا مفيده جدا وموضوعاتها قيمه

تحياتي

Lady E يقول...

صباح الخير

كان عندي تعليق كبير

بس تعليق د. ستيتة و د. نورا وشيما وبنت من الزمن ده قالوا اللي كنت عايزة اقوله

ويكا يقول...

بص يا بنج
اولاً : انت عندك حق فى كلام كتيير ، اللى ممكن نلخصه (على قد فهمى )الى مثال صغير.

(ما تيجى نعمل حاجه مفيده!!).
او (يا جماعه المدونات معموله ، للمواضيع الهادفه). ده لو انا كنت فهمت قصدتك صح.
اما رأى
بص يا عم الحج

اولا انت صح ، فى ان لكل مقام مكان، يعنى الشات له مكانه ، والاستظرف له مكانه ، والشتومه برده لها مكانها وطريقتها.
صــــــــــــح 100%

بس فيه حاجه كمان صح...... الا وهى ، انت وانا ايه ضررنا لو حد قلع هدومه فى مدونته وقعد يلعب فى الطين ؟!!!

الصح اننا ما ندخلش ، لو هو قاصدنا هيبطل ويغير هدومه . ولو لنفسه خلاص لا ضرر ولا ضرار وذنبه مع ربه.

انا معاك ان الموضوع بقى ممل ، والواحد كان الاول بيستمتع لانه كان بيتنقل من هنا لهنا وبيلاقى حاجات مفيده ، لكن فجأه المدونات اتحولت لقعداتى عربى ، وقهاوى ، واتوجرافات ، او تقدر تقول لما تحث انك بقيت مشهوره كده ومجرد تطلع على المصرح (الكل هيسقفلك ) وتيجى نازل تانى من غير ما تقول اى حاجه . وانا لسه كاتب عن الموضوع ده من يومين:
http://besara7aa.blogspot.com/2010/01/blog-post_31.html

كل ده انا كمان اتخنقت منه ، بس هرجع واقولك مهو فيه ناس برده بتدخل وعاجبها الكلام ده. (واقولك حاجه انيل ، كل ما كانت بنت ، كل ما كان اللى بيدخل عندها اكتر ، وكل ما كانت بتتكلم فى حاجات تافهه ) كل ما زادوا اكتر للاسف .

انا مش عايز اكتر فى الموضوع ده ، لاحسن حد بيفكر انى بتكلم عليه .

لكن عموما انت جيت على الجرح بصراحه اليومين دوووول ، لانى انا كمان اتخنقت ، بس فيه نقطه مهمه.

فيه ناس برده كتييييييييير كويسه ومحترمه ، ودماغهم فيها شئ . وبنات برده وولاد.

بس عارف ، ممكن يكونوا معذورين :
قالوا كل حاجه ومفيش حاجه اتغيرت ، فكروا واتكلموا ما حدش سمعلهم ,,,,, فى حالة خوااااااااااااا فى البلد.

وعموما ، دور على الهادف هتلاقى.

سلام.

بنجاواتى يقول...

بسم الله الرحمن الرحيم

من زمان ما ردتش على تعليقات

حفيدة عرابى

الحمد لله انك بتستريحى نفسيا فى المدونات ويا رب دايما على طول

متفقين فى ان الشات مكانه بعيد عن المدونة وكذلك فى ضرورة احتفاظ المدونة بعالمها الافتراضى

وبما ان اغلب التعليقات بتقول ان التدوين لا يزال على قيمته يبقى انا لازم اعيد النظر فيمن ازور

تحياتى واسعدنى وجودك

بنجاواتى يقول...

احساس طفلة:

بالنسبة للامتحانات الحمد لله خلصت خلاص ومستنى النتيجة اللى ممكن تطلع فى اى وقت وساعتها طبعا عاوز كل المدونين يعملوا لى بوست تهنئة هههههههههه

على فكرة انا بحب جدا المدونات اللى بترفع معنوياتى وده بيتحقق من خلال خفة الدم او جودة الموضوع المقدم لكن من ناحية تانية انا نفسيتى بتتعبنى لما الاقى الموضوع غم من غير سبب ولا فكرة او لما الاقى الموضوع مفيهوش تميز من اى جانب

عموما متفقين فى فكرة ان المدونات اللى قايمة ع التهانى دى مش لطيفة ولا بأس من موقف يستحق التهنئة اننا نعمله بوست ونشارك صاحبه الفرحة كلنا

وطبعا الموضوع مطروح للنقاش وسعيد برأيك ورأى كل المدونين الافاضل

تحياتى

بنجاواتى يقول...

ستيتة:

هستأذن حضرتك فى انى انقل قايمة المدونات من مدونة حضرتك :D ده بالنسبة لردى على اجابة السؤال الاول

اما اجابة السؤال التانى فأنا قصدت اقول هل انت كمدون لما بتمر على المدونات التانية بتحس ان المدونات دى تركت فيك انت كمدون أثر "نفسى" طيب؟؟؟

أنا أحترم فكرة حضرتك فى حرية كل انسان فى التعامل مع مدونته لكن لا زلت عند رأيى فى اننا الافضل لنا كمدونين عرفنا بعض على الخير اننا نراجع نفسنا فى بعض الامور بدلا من ان يتحول التدوين الى شلة اللى بيهيسوا وشلة السياسيين
والبوست ما هو الا مجرد دعوة لتكون الاجابة على السؤالين بالايجاب من خلال نفس المدونات التى اعتدنا المرور عليها وليست الفكرة من البوست هى دعوة لهجر او غلق او التوقف عن التدوين لان احيانا الهوت بيرد بيطلع منه حاجات حلوة :))

تحياتى

بنجاواتى يقول...

norhaty:

اكيد كل واحد حر فى مدونته لكنه كان مجرد عتاب لا يصدر الا من محب الى من يحب

تحياتى

بنجاواتى يقول...

هى وظروفها:

وعليكم السلام ورحمة الله

مبدئيا كل واحد حر فى مدونته ما لم يضر كما تفضلت

اما عن التعليقات فلو زى ما بتقول كده فأهلا بها وسهلا لكن لما نلاقى تعليقات من نوعية "انتى فين يا بنتى مش بتفتحى الميل ليه؟؟؟" فده معتقدش انه له علاقة بالموضوع

موضوع الاستفادة بقى فأنا فى مواضيع كان ناس بتحكى فيها عن امتحاناتهم او رحلاتهم او اى حاجة من دى لكنها عجبتنى جدا وكانت لذيذة ودمها خفيف ...اقصد انه مش لازم يبقى كلها موضوعات تقيلة لكن انا قصدى لو مش هنستفيد معلومة او فكرة يبقى نستفيد ضحكة او بسمة او رفع روح معنوية والحاجات دى مش متوفرة فى بوستات من نوعية "جاتكم القرف" مثلا او بوستات "ابقى قابلنى لو فهمت انا بقول ايه " وهكذا

وجودك منورنى
وتحياتى

بنجاواتى يقول...

عرفة:
كلامك عن التعليقات جميل والله ويستحق يتحط فى البوست بس انا طول عمرى مقصر فى الرد ع التعليقات ...اوعى تكون مش بتحترمنى ؟؟؟

"ولكن للاسف ممكن تلاقى مواضيع
ولا هى مذكرات ولا هى حتى حكايات ولا طرح فنى او ادبى
وبيكون اى كلام يا عبد السلام" هو ده اللى انا اقصده وبيعصبنى

الصورة طبعا تحت أمرك وموضوع الفيس ده براحتك برضه بس كنت ممكن تقولى الكلمتين دول ع الياهو ههههههههه

تحياتى

بنجاواتى يقول...

اقصوصة:

تحياتى لكى وان شاء الله أنقل قايمة المدونين من عندك برضه :D

يمكن انتى شايفة كده لان انتى مدونتك ما شاء الله من اكثر المدونات قيمة

تحياتى

بنجاواتى يقول...

الشعب لا بد له من حكومة:

اولا رأيك على عينى وراسى لكن انا قصدت بالكلام ده ناس احنا فعلا بندخل عندهم وبنحب مدوناتهم واتعودنا ان مدوناتهم مكان بيسعدنا بما فيه من مرح او ابداع وجودة ومقصدتش الناس اللى اساسا مدوناتهم ما تستحقش الدخول

اما موضوع العالم الافتراضى ده من عدمه فأنا عرفت ناس من التدوين مكنتش هقابلهم ولا بعد عشر سنين لكن لو انا شايف ان شخصية قلان من المدونين رائعة واتمنى اننا نكون على تواصل ليه مايكونش التواصل ده بينى وبينه وفقط بدلا من ان يجمعنى التدوين فى اتصال انسانى مباشر مع اشخاص لم اخترهم فعليا؟؟

تحياتى

بنجاواتى يقول...

شق القمر:

حمد الله ع السلامة يا دكتورة ولو اعرف انك هترجعى لمدونتك من تانى ماكنتش كتبت البوست ده :)

والله يا جماعة كلامكم كله وآراءكم جميلة وكفاية انها خلتنى اقرا الموضوع ده بنظرة مختلفة وفكرت فى الامر من جديد وبدأت اراجع نفسى :(

رحمة الله على الجميع

تحياتى وانتظر تدويناتك بشغف

د. ياسر عمر عبد الفتاح يقول...

متفق معاك في شوية حاجات ,,
بس شوية قليلين بس :)


إنت مبقتش تسأل عليا ليه؟
ولا خلاص من بعد ما اتخرجت وبقيت شبه الدكاترة مبتبصش للناس الغلابة اللي زينا؟

ماشي يا عم بنجا

Pink Dreams يقول...

بصراحه فى مدونات كتيره قوى لما بدخلها بحس انى فعلا استفدت جدا منها
وبيبقى فيها مناقشات مفيده سواء بقى مشاكل مجتمع او سياسه او حتى كوره

وفى مدونات تانيه بحس انى زى ما دخلت زى ما خرجت مش استفدت منهم اى حاجه

بس فى النهايه بردو كل واحد حر طبعا يكتب اللى هو عاوزه

وبالنسبه لملاحظاتك فانا متفقه معاك تماما

وانا بردو ساعات بعمل حاجات من الانتقادات اللى كتبتها
وبحاول انى اصلح منها

دمت بكل ود

القدر و انا يقول...

بنجواتى
الحقيقة ان كل مدون يعرف بيلاقى نفسه فين .. وايه اللى يملا عقله
مين اللى يشعر براحة وهو بيقرأ له
وبالتالى بيكون اختياره على اساس شخصيته ومدى استمتاعه بما يقرأولهذا تجد بعض المدونات يقرا لها العديد ويعلق عندها العديد بموضوعية تامة
وعن نفسى استفيد تماما بتلك العقول النضرة وهذا الرقى فى التفكير لبعض المدونين فاحرص على قراءة كل حرف وكل تعليق
اما البعض الاخر الذين يحولونها لدردشة فمن المؤكد اننى اذا قرات مرة لن اقرا الاخرى
اما التهنئة فهى واردة فى المناسبات وقد اصبج كل منا قريب من الاخر نتيجة التواصل شبه اليومى لبعضنا البعض
اما اللقاءات فلست ادرى هل اثارها الايجابية اكثر ام السلبية لان الناس تختلف اختلاف كلى فى العمر والثقافة والتربية والبلد والبيئة .. فلا بد ان يكون هناك تباين واضح بينهم فى اللقاءات

يسرا يقول...

كلام محترم ...
المدونة مساحة للتعبير الحر عن الذات ... الافكار ... الأحلام
ولكل طريقة خاصة في هذا التعبير
من الطبيعي جدا ان ما يعجبك من اسلوب قد لا يعجب آخر
ما تنتقضه انت من الاسراف في استخدام الشات وغيره قد يراه غيرك انه تواصل رائع
وما تراه من اسهاب في الحديث عن الحياة الشخصية قد يراه غيرك شئ مسلي
وهكذا
احيانا اكتب اشياء غامضة وعبارات قليلة قد تصلح كما تقول status على الفيس لكني احب ان اضعها في مدونتي وانا اعلم جيدا انها غير واضحة او غير مفهومة

انا معك انتقض الشات وانتقد الاسفاف وانتقد التاجات
في النهاية هي حرية شخصية ما دامت تلقى رواجا عند البعض
ولكن الأولى بالطبع ان لا نكتب الا شئ ذا قيمة يرفع ضررا او يحدث نفعا
ولكنها مرتبة عليا لا يطالب بها العامة
وان تظل الامنية في ان يترفع شباب العرب عن سفاهات عدة تظل سبب تأخر مجتمعاتنا

تدوينة قيمة
بارك الله فيكم

حرروف يقول...

اقوللك حاجة بقا كلامك صحح جدا جدا عشان كدة انا مبعلقش علي الكومنتات عندي ابدااا من ساعه معملت المدونة

الا نادراا وبحاول ارد بزيارة عند اللي علق دة احسن من ناحية اختصارا للوقت والمجهود باني اقرا البوست عندة واعلق وارد لو في ملاحظة بدل ميرجع يقرا كومنتي عندي ويعلق وارجع اعلق وهكذااا وتوهان

بلنسبة للفيس بوك هو متوافر ودلوقتي بقا لنشر المدونات اكتر

جمت بكل خير ع موضوع الحلو دة

حلم بيعافر يقول...

7-للأسف أصبحت كثير من المدونات تمثل تكتلات وجروبات كلها تناطح بعضها وده لان اللى بقى بيربط المدونين ببعض اشخاصهم وليس مدوناتهم وما تحتويه من موضوعات"طبعا كنت كده برضه"

كلاااااااااااااامك كله مظبوط

الشموع السوداء يقول...

والله لو لم تكن تستفيد من التدوين فلمَ لازلت تدون
بالطبع هي تجربة مثيرة ومفيدة خاصة للتعرف على الناس في افكارهم ومشاعرهم وتشاركهم ببعض الاراء
وان كان لديك الحق بخصوص الشات وتخصيص بعض الكلام لبعض الناس لكننا في النهاية نستفيد بالطبع
وتقبل مروري

مصطفى أبوزيد يقول...


السلام عليكم يا دكتور

انا رديت على حضرتك من شوية في الديسكشن اللي في الفيس بوك في جروب ملتقى المدوين

عموما انا هقول هنا اول جملة بس

ان من سنتين كنت تحتاج لوقت طويل لتمر و تستمتع و تناقش ما تحتويه المدونات فقد كانت تحتوي ما يكفي لتكون نزهه مفيدة و جميله و لكن الان اصبحنا نرى العجائب

تحياتي يا دكتور

بنجاواتى يقول...

بنت الاسلام:
وعليكم السلام ورحمة الله وبركاته

عالم التدوين كان ولا زال وبإذن الله سيستمر عالما مفيدا ولكن ما تمنيته من هذه التدوينة ان تتوقف بعض المدونات عن فقدان قيمتها كمدونة مفيده حقا

انا لم اقصد ان تتركى حضرتك أثرا فى المدونة ولكن قصدت ان تترك المدونة فيكى اثرا نفسيا طيبا

لو حضرتك شايفة ان بوست مكون من بضع كلمات يفى بالغرض فهذا جيد ولكن ماذا لو طلبت من حضرتك نموذجا لهذه الكلمات المفيدة؟؟؟

هذه لو كانت اطالة فهى محببة الى نفسى وتحياتى

بنجاواتى يقول...

بنت من الزمن ده:

انا برضه لما بقرا بوست مفيهوش ولا معلومة ولا فكرة ولكنه يمثل مرحا لمجرد المرح لكل من يقرؤه وليس لاشخاص بعينهم ببقى سعيد وبعتبرها تدوينة نافعة

كان نفسى اخبط فى الشات براحتى لكن انا كان الشات عندى فى المدونة نشط جدااااااا قبل ما اشيله

اما عن الحرية فى الموضوع المكتوب فاختيار الموضوع طبعا هو حر فيه والاسلوب ايضا ويبدو اننى اخطأت عندما حاولت تقويم هذا الجانب بطريقة النصيحة مع انى -وكل المدونين-نملك الحرية ايضا فى التعليق من عدمه ولكن هذا لا ينفى ان انتشار مثل هذه التدوينات اصبح شيئا مستفزا

تحياتى

بنجاواتى يقول...

sonnet:

حضرتك يا دكتورة منورة المدونة بزيارتك الجميلة دى

انا مرة حليت تاج لم تكن الاسئلة فيه مفروضة عليا وبرضه اشتغرقت وقت للتفكير فى حله بشئ من الدبلوماسية والفلسفة وبعدها تناسيت اى تاج :)

تحياتى

بنجاواتى يقول...

rovy:

سأعمل بنصيحتك فى تجنب المدونات "الهايفة" وجزاك الله خيرا

زيارتك اسعدتنى

بنجاواتى يقول...

فتاة من الصعيد

شرفتى ونورتى وارجع أؤكد على أهمية التدوين وان هناك مدونات او تدوينات لها تأثير عميق

تحياتى

بنجاواتى يقول...

lady:

صباح النور

يبقى الرد موجود فى ردى على د.ستيتة ود.نورا وشيما وبنت من الزمن ده

تحياتى

بنجاواتى يقول...

ويكا:

اسعدنى تعليقك جدا
واضح ان انا ركزت على الجزء الاول وهو "ما تيجى نعمل حاجة مفيدة " والجزء التانى من ان كل واحد حر فى مدونته كان غايب عنى لكن انت عندك حق

بجد تعليقك اثرانى بشكل كبير

تحياتى

بنجاواتى يقول...

الدكتور ياسر عمر:

كان هيسعدنى اكتر انى اعرف احنا متفقين فى ايه ونتناقش فى اللى اختلفنا عليه لان رأيك يهمنى جدا

ما تقولش الكلام ده يا ياسر وانا عارف ان انا مقصر ولكن عذرا وكمان مفكر ان انت مشغول فى الشغل الجديد

سلام

بنجاواتى يقول...

pink dreams:

انا لو كان قصدى ان التدوين بقى خرابة ومعدش ينفع ولا بقى مفيد مكنتش كتبت البوست اصلا ولكن لانى شايفه سلاح قوى جدا لكل من يمله فحبيت ان السلاح ده يفضل قوى بجد

ادام الله عليكى الود والهناء
تحياتى

بنجاواتى يقول...

القدر وأنا :

نقطة ان كل انسان حر فى مدونته وما يكتب فيها وانى انا حر فى اختيار من اقرأ له كانت غائبة عنى بعض الشئ ولكن تعليقاتكم الجميلة نبهتنى لذلك

التهنئة غالبا تمثل قيمة لمن يعرف الشخص الموجهة له التهنئة ولكن احيانا نراها موجهة لانسان ليس له مدونة او غير معروف لاغلب الناس

اللقاءات ....انا بصراحة محبتش اتكلم عن اللقاءات باستفاضة لانى لم اجربها لكن ما يحدث فى توابع بعض اللقاءات تنبئ بأنها شيئا سلبيا

تحياتى

بنجاواتى يقول...

يسرا:

بارك الله فيكى ورفع شأنك ولا كلام لى بعد الذى ذكرتيه

تحياتى ومرحبا بكى فى هذه المدونة

بنجاواتى يقول...

حروف:

ادام الله عليكى نعمه ورزقكى الصواب

فكرة التعليقات دى جميلة وهفكر فيها بجدية

تحياتى

بنجاواتى يقول...

حلم بيعافر:

تعليقك هو اللى مظبوط

ربنا يكرمك
تحياتى

مصعب صلاح يقول...

السلام عليكم
طبعا هو طبيعي ان ناس كتير تزعل
ويمكن للسبب اللي حضرتك قلته ده ن مصنف المدونات
مدونة للهزار والفرفشة وكل واحد رافع فيها شعار " مدونتي وانا حر فيها " .
وغيرها مدونات جادة بستفيد كتير لما ادخل عليها
تحياتي

بنجاواتى يقول...

مصطفى أبو زيد:

اسمحلى يا باش مهندس انقل كلامك كما تفضلت وكتبته
"بسم الله

أولا كل الشكر ليكم أنكم فتحتوا الموضوع ده

و أنا هتكلم في أكتر من نقطة و استحملوني

اولا من ناحية ظهور مدونات تحمل افكار سخيفة
ده بسبب مجانية و سهولة امتلاك مدونة و ده واقع مفروض علينا و إحنا إستفدنا منه زمان لما عملنا مدوناتنا

الشيء التاني زي ما انتو وضحتو هو وجود جروبات بين المدونين و انا واجهت ده في رحلتي اتدوينيه و احيانا كنت بأدخل مدونات و اكتب تعليقات و لكن صاحب المدونة لا يرد عليها بنفس طريقة رده على فلان و فلان من اصدقائه و قد يكون تعليقي يستحق نقاش اكبر لكنه يكتفي بقوله منورني و نتمناك زائر دائم و هكذا
احيانا اشخاص تدخل ترد في اتجاه تاني و تنقلب صفحة التعليقات لجلسة ظريفه بين بعض المدونين و يصل عدد التعليقات لينجاوز الحاجز المئوي و تكتشف انه حوار بعيد عن اصل التدوينه

الشيء الثالث اللي نوصله من النقطتين اللي فاتوا و من الكلام اللي سبقتوني و قلتوه و مش عايز أكرره أن التدوين لم يصبح مثلما كان قبل عامين على الأقل..

انا أذكر انه كان يجب أن تمتلك و قتا كافيا لتمر و تستمتع و تناقش المواضيع الجميله في المدونات اما الان فلا تجد مكانا مريحا لترى فيه شيئا ابداعيا جميلا

و لذلك انا بأقترح عليكم عمل مبادرة مع الاشخاص الجادين أصحاب المدونات الراقيه التي تحمل إبداعا ما و فائدة حقيقية لـ إيجادوسيلة اخرى لإنقاذ ما يمكن إنقاذه من اجل اتدوين

ليست عندي رؤية واضحه و لكن مزيد من النقاش بيننا قد نصل لوسيلة فعاله

أعتذر عن الإطالة و انتظر تفاعلكم و اقتراحاتكم من اجل أن نصل للأفضل

شكرا ليكم مرة تانية"

تحياتى لك من اعماق قلبى

بنجاواتى يقول...

مصعب صلاح:

فكرة التقسيم جميلة فعلا ومدونات الهزار والفرفشة وجودها مهم زى غيرها من المدونات لكن ان يكون هذا الهزار والفرفشة موجها لفئة بعينها دون غيرها فهذا مما يثير الغضب واعتقد انى معذور فى ذلك فقد قال رسول الله صلى الله عليه وعلى آله وسلم: إذا كنتم ثلاثة فلا يتناجى اثنان دون الآخر حتى تختلطوا بالناس

مراعاة ان يشترك كل من وصله الكلام فى فهم الكلام هو ضرورة نفسية يحتاجها كل قارئ

تحياتى

شفـقــة و إحســــان يقول...

إسمحلي أعلق على نقطة واحدة..
لقاءات المدونين
يمكن يكون كلامك صح في اننا بكده خرجنا من إطار العالم الإفتراضي اللي إحنا إخترناه بالأساس
اللي هوا عالم التدوين
بس احنا برضو بني آدمين قبل ما نكون مدونين

* يعني ماكانش ينفع إننا مانزورش الجرحى الفلسطينيين هنا في المسنشفيات ونكتفي بس بالكتابه عنهم ومصمصة الشفايف لإننا مدونين (كفايه الموقف الرسمي)

* مش هتقدر تمسك نفسك عن المشاركة في يوم خيري زي زيارة الأيتام والمسنين وذوي الإحتياجات الخاصة أو للتبرع بالدم كل تلات شهور

* لما أحد المدونين يعلن عن يوم للتبرع بالملابس المستعملة (بؤجة خير)أو أي شئ في بيتك انت مش محتاجه (وما أكثر الكراكيب في بيوتنا) وده لصالح جمعية خيرية أو سكان منطقة عشوائية إزاي مانشاركش ؟؟

* وأخيرا حفلات توقيع الكتب والإصدارات الأدبية لإخواتنا المدونين هي نقطة تحول ونجاح لينا كلنا ولكل من ينضم بعدنا لهذا العالم (عالم التدوين)

ورغم كل ده فأنا معاك في إن الإفراط في اللقاءات التدوينيه تسبب تدريجيا في الشللية وتضارب المصالح الشخصية الذي يعاني منه الآن كثير من المدونين (واللي وصل لحد الشتيمه والتلقيح بالكلام والردح أحيانا)


تحياتي
إحســان

بنجاواتى يقول...

شفقة واحسان:

كل الأسباب اللى حضرتك ذكرتها للقاءات المدونين اسباب رائعة جدا وعادة بيكون التجمع فيها على قدر عالى من الالتزام لانه تجمع له هدف جميل وانا لو اقدر اشارك فى واحد من اللقاءات اللى حضرتك ذكرتها لا يمكن اتأخر ابدا لكن انا كان قصدى لقاءات جمعت بين ناس بعضهم ما يعرفش حتى مدونات الناس التانيين الموجودين

تحياتى وزيارتك اسعدتنى

قلم رصاص يقول...

السلام عليكم

ازيك يامصطفى .. من زمان يا اخي واحشني موضوعاتك الرائعه اللي دايما بتثير نقاش جاد وهاااااااادف .

انا بأحييك جدا على ملاحظاتك الرائعه في البوست دا .. انت اتكلمت عن بعض الحاجات كانت بتدور في رأسي من فتره ونفسي اتكلم عنها ومبتجيش فرصه خصوصا بعد ان تحولت بعض المدونات وباقول بعض للدقه والامانه يعني ، تحولت فعلا الى شبه جروبات زمره تحمل فكر الشلليه .. ناس بتعلق لبعضها لمجرد التعليق والمجامله .. انا شايفه دا عيب ونفس الوقت مش عيب .. عشان نكون منصفين لأن دا بيرجع للأشخاص دول نفسهم فان كان هدفهم نبيل مفيش مشكله لكن ان كانوا ناس عاملينها مجرد كوبري للانخراط في وسط المجتمع التدويني المحترم فانا ضد دا .

لكن برضه عاوز أقولك من وجهة نظري المتواضعه :

اني باستفيد من مدونات كتيره جدا بزورها واعلق واحيانا مبعلقش لكن المحصله في الاخر اني باحترم فكر ودماغ أصحابها جداااااااا.

عاوز اقول كمان ان كل واحد حر في الكتابة على مدونته ولكنننننن من غير مايتعدى على حدود الاخرين ، ومن غير ماتتحول كتاباته لمجرد اسفاف وموضوعات هدامه ملهاش اهدف غير بث الأفكار المسمومه وتعكير سفو من يمرون على مدونته

بس عارف رغم اني باتفق معاك في معظم ملاحظاتك يامصطفى ، اللي معناه اني غير راضي عن الاسلوب دا .. الا اني فعلا وقعت كتير في الحاجات دي .. زي مثلا
احيان كتيره الواحد ينسى نفسه ويهرج كتير في الرد على التعليقات وارجع اندم وضميري يأنبني جدا انا ايه اللي قولته دا رغم ان الحمدلله طول عمري ملتزم حدود الادب والاخلاق في ردودي ، بس مجرد التهريج الزائد بيخليني ارجع ازعل من نفسي واحس اني حولت مدونتي لساحة دردشه

بس اكيد الواحد بيحاول يتعلم قدر الامكان عشان المدونه تحتفظ بوقارها شويه لأن بجد التدوين هو اجمل واعمق ماهو موجود في البيئة الافتراضية على الانترنت

__________
على فكره ابقى تعالى شوف ردي المطول على أسألتك عندي عن موضوع "داستور يااخواننا"

تقبل مروري وعظيم تقديري

قلم رصاص يقول...

حاجة كمان نسيت اقولها:

فيه ناس انا باحترمهم جدا وباحترمهم تفكيرهم وعقولهم جدا جدا عرفتهم من خلال مدوناتهم ، وبأتمنى اعرفهم في الواقع لتأكيد فكرتي الرائعه عنهم .. واظن يادكتور مصطفى دامش عيب ولا حرام
طالما اللقاء لقاء افكار وليس اشخاص

والله اعلى واعلم

تقبل مروري مرة اخيره

د.آيه يقول...

السؤال الأول : هل حضرتك لما بتقوم بجولة فى المدونات بتحس انك قضيت الوقت فى شئ له قيمة ؟
مش دايما..

السؤال الثانى: هل حضرتك بعد الانتهاء من المرور على المدونات بتحس انها تركت فيك أثر نفسى طيب ؟
مش دايما بردو

باقي الكلام عايزه ؟أعمله كوبي و باست و أقول عندك حق عمدك حق

MaNoOoSh يقول...

أكيد المرور على المدونات بيسيب أثر ايجابي وأحيانا كتير بيأثر فى الشخصية

واللى مش مفيد من التدوينات مبيفضلش أكتر من ثانية جوة العقل

والمجتمع التدويني أيوة مجتمع افتراضي لكن بما انه مجتمع يحمل الكثير من الاختلافات والشخصيات والثقافات المختلفة فأكيد لن يخلو من السلبيات ولن يخلو من الاجتماعيات اللى بترفع معنويات الواحد أحيانا كتير
انا شايفة ان الاجتماعيات مش حاجة سلبية أبدا
والتفاعل أجمل ما فى التدوين

م/ محمد صالح يقول...

السلام عليكم ورحمة الله
اخبارك ايه
ادعوك للمشاركة بحمله " اسمها
فكرة من كل مصرى من أجل مصر" ياريت تشاركينى فيها وكمان تنشريها انا نفسى بجد بلدنا تبقى أحسن بينا وبأفكرنا كلنا تفاصيل الموضوع موجودة فى البوست الجديد يا ريت تقرأيها

م/ محمد صالح يقول...

السلام عليكم ورحمة الله
اخبارك ايه
ادعوك للمشاركة بحمله " اسمها
فكرة من كل مصرى من أجل مصر" ياريت تشاركنى فيها وكمان تنشرها انا نفسى بجد بلدنا تبقى أحسن بينا وبأفكرنا كلنا تفاصيل الموضوع موجودة فى البوست الجديد يا ريت تقرأها

انت تسال والكمبيوتر يجيب يقول...

سررنا بالمرور ولذلك نوجه لك هذه الدعوه
نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com

منــار فايد يقول...

هو انا تقريبا كل اللي انت كتبته حصل عندي يادكتور في مدونتي...
باستثناءات بسيطه جدا

يعني عمري مارحت لقاء تدوييني
وشكلي مش هاروح خلاص...

وعمري برضو مالقحت كلام على مدون في مدونتي او غيره....

جايز اكون بهني حد على صفحاتي
ساعات بشكر حد
ساعات بنطالب في وسط كلامنا
برجوع واحد من المدونين الهاربانين
............
انما من واقع التدويينه اللي قرينها
اكتشفت ان مدونتي تعتبر وبدون اي فخر
مدونه اي كلام
من ناحيه كلمه مدونه
بس انا اخدت قرار في اللي هاكتبه قبل كدا
عايزاها تعبر عني فقط لاغير
او تنقل احساسي في كل بوستت للي بيقراه
..........
من ناحيه صياغه الكلام واتقان الجمل
فمدونتي مش كدا
بس مش عارفه برضو هي المونات مفروض تبقى نمطيه اوي يعني بالشكل اللي انت عايزها تكون بيه؟؟؟؟؟؟؟
......
في مدونات تدخلها تحس انك عارفها من زمان..وجايز دي بتكون اول مره
وفي مدونات بالنسبه لي بدخلها باستمرار ادور على الجديد قبل ماينزل
.....
ارجو طبعا ليك وليا اننا نحاول نحسن
في مدوناتنا مش عشان تعجب كل القراء..
عشان على الاقل ندي فكره او راي صح للناس من خلالها....

شكرا اااااااا دكتور بنجا

أحمد عاطف يقول...

السلام عليكم

بادئ ذي بدء أحييك تحية طيبة على صراحتك

احيانا كتيرة ندخل مدونات ونحس اننا دخلنا مدونات لاشخاص فاضية ... وانا من الناس اللي ممكن تحس دا فيها

واحيانا تانيه ممكن تدخل مدونة تحس انك دخلت قريت كلام عايز يتفهم صح عشان تعرف ترد عليه صح والنتيجة محدش بيقراه ... ونا بردو من نفس الناس

احيانا تدخل مدونات وتحس انك استفدت

واحيانا تحس انك ضيعت وقت

وفي النهاية

التدوين عالم افتراضي فقط عند بعض الناس

وعالم حقيقي عند البعض

وعالم افتراضي مافيش مشكلة انه يتحول لحقيقي بس في حدود عند ناس تالته

وممكن يكون افتراضي ويتحول الى حقيقي من غير اي حدود وسداح مداح عند ناس رابعه

وفي ناس مكرثه كل جهدها التدويني لهدف معين ربما يكونوا بيتقاضوا عليه اجر

المهم ان التدوين في مصر زيه زي اي شيء

من وجهة نظري تحول الى مسخ

تحياتي

بنوتة مصرية جداجدا يقول...

بصراحة فى مدونات
لما ادخلها بتمخمخ معاياوبفضل اتابعها
ومدونات بتخنقنى جدا
بس يمكن لانها اسمها مدونات
كل واحد بيعبرعن اللى جواة بوقت معين
فاهمنى
يعنى ممكن اكتب بيوم كلام ملهوش لازمة مايهمش حد بس بكتب عشان افك عن نفسي
وساعات المزاج بيكون عالى اوى اوى

z!zOoOo يقول...

السلام عليكم

ازيك يارب تكون بخير

مش عارف إذا كانت اول زياره ليا ولا لا

علي فكره الموضوع ده بجد حيوي وياريت الناس تاخد بالها منه

بس علي قد كده مش عارف إذا كنت فهمت مجمل قصدك ولا لا بس هحاول افسر الي فهمته

وبلاحظ كتير من الي بتقول عليه

بس هذكر كام حاجه كده ساعات بتضايقني وساعات بطنش

يعني مثلا ممكن اعلق عند ناس كتير قوي
وولا واحد من الناس ديه فكرت مره حتي تدخل تشوف الي بيعلق ده بيفكر ازاي

وناس بعلق عندها بإستمرار ومش عارف إذا كنت هتصدقني ولا لا إذا قلتلك إني ماشوفتش منها ولا تعليق عندي

ناس ممكن اعلق عندها ألاقيها بتعلق علي الناس الي تعرفها وهزار وفيه روح في الكلام

وتجي عند تعليقي تقولي شكرا علي مرورك وغيره او ما تردش اصلا

رغم إني شايف حريه كل واحد في إنه يكتب الي هو عايزه

لكن ساعات بلاقي مدونات محتوي مدوناتها قمه في الفراغ واللافائده

والمشكله الاكبر إن فيه ناس بالفعل من ناس معنيه بتلاقيها بتقل علي المدونين هايفين رغم إنه ماشافش الكل

لكن زي ما انت عارف الحسنه تخص والسيئه تعم

وطبعا تحول صفحه التعليقات إلي شات وأبعد ما تكون التعليقات عن الموضوع وفحواه

موافق جدا مصطفي ابو زيد في تعليقه لأنه جمع حاجات كتير

بالنسبه للقاءات المدونين انا ماحضرتش ولا لقاء بس بصراحه سمعت إن فيه ناس كتير مش كويسه إتكلمت عن ناس تاني وبقي فيه نميمه وحاجه تحزن وتزعل فعلا

لأني اعتقد إن المقابلات ماهي إلا تحويل العالم الافتراضي لواقع وإنعكاس للعلاقات الافتراضيه لعلاقات واقعيه

يبقي حتي ديه خليناها سخيفه

هو فكره الكلمتين الي ممكن يكتبهم حد وإنت شايف إنه ممكن يكتبهم علي الفيس بوك يمكن يكون عندك حق

بس انا شايف إن ساعات فعلا كلمه او جمله او مجموعه كلمات بسيطه بتوصل معني احسن من عشر صفحات

يعني خير الكلام ما قل ودل بس الاهم إنه يدل مش يقل من غير ما يدل


اما كلام الالغاز ده بقي وإن الكلام موجه لشخص تاني ديه حاجه مش هتكلم عليها اساسا

ام التنويه او الملحوظات او التحديث ده بيكون عشان شيء ضروري كما لو كان لينك اتنسي يتحط وهيفيد ويثري الموضوع

يعني الموضوع الي قبل الاخير عندي عملت عزاء لأخ عزيز عشان اعرف الي ماعرفش ويعزيه

وكلها حاجات أكيد ليها لازمه
ولو هتقولي فيس بوك هقولك مش كل الناس الي ممكن تشوف المدونه هتعرفني علي الفيس بوك او حتي انا ضايفها

والتاجات عمري ما حليتها ولا جاتلي والحمد لله

موافقك جدا في النقطه رقم سبعه وتمانيه

فيه حاجه كمان هقولك عليها

ساعات تلاقي مدون مش عايز يزور حد عشان مش عارف يلاحق ما بين كل الناس الي يعرفها ف مش عايز يزود عليهم حد جديد حتي بغض النظر عن إذا كان الجديد ده مفيد ولا لا

وسعات مدون يطلع يقولك معلش يا جماعه إني مش بزور حد عشان كذا وكذا

وابص بالصدفه ألاقيه تاني يوم عند واحد يعرفه

ساعات احس بقله ذوق إني ازور حد وكمان لما اكرر الزياره ومحدش يزورني

علي فكره مش علشان يردلي الزياره او إني مستني زيارته

بس كل الي بييجي في دماغي بقول طيب إنت إتأكدت منين او عرفت منين محتوي المدونه بتاعتي عشان تحكم عليها بعدم الزياره من قبل ما تزورها

كمان ساعات تبص في مدونات تلاقي محتواها هايف او اقرب ما يكون لكلام اقل من العادي وتلاقي عدد التعليقات مهول فده فعلا بيأكد فكره إرتباط الناس بالشخص مش بالافاده او المحتوي

ومدونات تانيه تبص تلاقيها مفيده قوي قوي قوي فوق ما تتخيل وتلاقي عدد التعليقات قليل

ابص واقول إيه المعايير المعكوسه ديه

يعني المفيد الناس بعيد عنه

والهايف الناس بتتهافت عليه


ام عن حكايه جوله المدونات

انا عندي زاهيمر بدخل ممكن ابص علي كام حاجه جديده لكن مش بلف علي الناس كلها كل ما بقعد بدخل عند حد محاوله لسد ثغرات التقصير

لكن بصراحه فيه اماكن ببقي داخلها وعارف إني هفيد واستفيد

بس هو الظاهر إن الناس بتحول كل حاجه لمسخ
وشان بتحاول تستمتع بيها وخلاص من غير ما تراعيها بتفقدها جمالها ي الورده الي بدل ما تهتم بيها عشان تفضل تشم ريحيتها

تقعد تقطع في ورقها وبعد كده تشيلها من الجدر لا هتفضل جميله ولا هيفضل عطرها

الظاهر إني رغيت كتير قوي

لامؤاخذه علي الكلام ده كله بس توضيح مش أكتر

أتمني ماكونش صدعتك

ومستني ردك عليا

وشكرا علي الموضوع ده بجد

يارب ناخد بالنا من الاشياء قبل ما نملاها سخافه وإبتذال ويبقي اصلاحها مستحيل وجوها خانق وكريه

تحياتي

فاتيما يقول...

انتا فين يا بنجا ؟؟؟

طمنا عليك يا بن الحلال

يا ريت يعنى

ممكن؟

زهرة يقول...

أنا شايفة إن المدونة دى صوت صاحبها ..

شخصية صاحبها .. وصحيفتة اللى بيكتبها فى كل بوست ..وبيتة الصغير

وع فكرة بتكون البوستات اللى كلمة ونص دى أو صور بس أو بوست بيتحول لشات بتكون نادرة

بمعنى إن مش كل المدونة كدة من اول بوست
وحتى لو كلها كدة ..بتكون هى دى هوية صاحبها وهو دة صوته اللى قادر يوصله .. مريت عليه ومعجبنيش .. مش مجبرة إنى أتابعة تانى

نرجع للسؤال إذا كان فيه إفادة من لفة على المدونات ولا لاء؟؟

أنا بستفاد بشكل كويس ..وبكتسب حاجات كتير قبل اللفه دى مبتكونش موجودة :)

بحييك على طرح الفكرة دى فى موضوع

Dr. Mohammed Ali يقول...

هناك مواضيع شيقة ومواضيع عادية في الكثير من المدونات..
تحياتي لك. وتقبل مروري

كــركــبــة دمـــاغ يقول...

طب والله العظيم

والله العظيم

والله العظيم

وحشتنا


وابقى نزل حاجه عشان خاطر الجمهور والمعجبين الغلااااابه

قال اي كلام قال

مجرد مدونة يقول...

والله ده كله بيفرق على حسب تعريفك انت للتدوين :)
فى ناس بتعتبر التدوين فضفضة وفى ناس بتعتبر التدوين منبر ليهم يقولوا فيه اللى مش قادرين يقولوه وفى ناس بيعتبروه فرصة فعلا لتكوين صداقات وده قليل عموما وفى ناس بتنشر قصص وأشعار على مدونتها أو اخبار، فالموضوع واسع يعنى ومش لازم يكون بصورة محددة!
كل عام وأنتم بخير
:)

فتافيت يقول...

كنت عند مسدس صغير
قريت تعليقك.. قصدي سمعت ضحكتك.. وعجبني الاسم المستعار بتاعك قولت اجي اشوف مدونتك....

دخلت لاقيت فيه اسئلة .. وتحليل وتمحيص في عالم التدوين.. ومش عارفة اصلا ينفع اول مرة ادخل عندك اديها اجابات ومناقشة وتحليل زيك.. وانت اصلا ما تعرفش مدونتي.. بس قررنا الرد ^_^

السؤال الأول : هل حضرتك لما بتقوم بجولة فى المدونات بتحس انك قضيت الوقت فى شئ له قيمة ؟

اي نعم.. والا يوم والتاني ومش هاعملها اصلا.. وانا ايه اللي هاستفيده من جولة بين عشرتاشر مدونة الا لو فعلا هاستفاد.. هستفاد بضحكة عند حد.. ومعلومة عند حد.. وفكرة عند حد.. وتعليق عجبني عند حد عرفني على مدونة حد.. عجبني فيها حاجات.. وكتير جدا بعمل الجولة بدون اي تعليق .. يعني انا مش داخلة انتشر بالجولة .. فاهمني طبعا

السؤال الثانى: هل حضرتك بعد الانتهاء من المرور على المدونات بتحس انها تركت فيك أثر نفسى طيب ؟

المدونات اللي متعودة اتابعها.. بدخلها وانا متأكدة من اني هلاقي الأثر الطيب ده.. لاني ما بتابعش حد زي ما قولت لك للانتشار.. بتابع عشان ابقى مبسوطة ومستفيدة.. وبحب اوي لما حد يعمل كومنت عندي والاقي اثر كلماتي عليه واضح

تعرف يا دكتور ان دلوقتي في اروبا والدول المتقدمة بيدرسوا المدونات في العلاقات الدولية عشان هي سلاح فعال في التأثير على الرأي العام... يعني هي حاجة مهمة بجد

لكن مش معنى كده اننا نفرض على الناس طريقة تدوين...

اللي بيذيل موضوعه بتهنئة.. سبحان الله وماله.. ديه اجتماعيات.. وساعات بيكون فرحان لحد وعايز يفرح الكل

اللي بيعمل شات بوكس عنده.. يا سيدي سيبه الناس تتعرف على شخصيته اكتر وتعرفه اكتر.. ويا تحبه اكتر يا تبعد عنه خالص

واللي عايز يروح لقاءات تدوينيه يروح.. وهي بتكبر دايرة المعارف والاصدقاء.. والناس محتاجة ناس جديدة في حياتها كل فترة.. ده الجسم ساعات بينزل دم فاسد عشان يجدد دم

واصلا اصلا يعني من اهم عوامل نجاح مدونة انك تكون عارف المدون اسما وشكلا وسنا ونوعا وكل حاجة.. ده لتواصل اكتر.. بس طبعا لظروف امنيه معظم الناس بتعيش دور اللهو الخفي..

وبعدين موضوع الكلمتين.. ده ساعات كلمتين ابرك من مليون سطر.. بس هاقولك مثال.. وطبعا لله المثل الاعلى.. هي مش جملة ((الدين المعاملة)) كلمتين.. لخصت حياة مسلم كاملة.. فاهم قصدي

مش عارفة انا صدعتك بالكومنت اكيد
وخايفة يكون دمي كان تقيل جدا.. عشان طولت وجاوبت وكمان اعترضت من اول زيارة :$

بس يلا اهو يجعل بوستات المدونين عمار

Sonnet يقول...

دعوة للمشاركة
الفكرة إنك تكتب تدوينة تقيم فيها مدونتك
http://shayunbiqalbi.blogspot.com/2010/10/blog-post_12.html

زى الهوا يقول...

مع احترامى التام لوجهة نظرك

بس انا ليا رأى تانى

انا باحس إن مدونتى دى مملكتى ,, وصحبتى كمان

بأحكى فيها وبافضفض وبارتاح اوى لما باكتب احاسيسى جواها , او جمله شدتنى أو موقف لفت انتباهى أو كمية كأبه شيلاها جوايا

ومع احترامى طب لأى زائر بيدخلها

انا عمرى مافكرت هوه وجهة نظره ايه ولا رأيه ايه فى كتاباتى ولا موضوعاتى

المهم اكتب وارتاح

وبالتالى لو لاحظت هتلاقينى قافله التعليقات ,,مش مهم كانت بتوصل ل 100 او 200 تعليق

المهم انى ساعة لما يكون عندى حاجة محتاجه اكتبها ,,, تتكتب من غير ماافكر تعليق الناس هيبقى ايه

وبرده لما بأزور مدونات للناس التانيين ,, عمرى ماقولت دا بيتكلم عن نفسه كتير او دا بيتكلم فالسياسه اوى ولا دا عمال يحل فى تاجس .. لأن دى مملكته ليه الحرية كامله يكتب فيها ما يشاااااااااء وبأى شكل

وانا ساعة ما اقرأ هازود لمعلوماتى او هاستمتع بقراءة شيىء شيق او هاضحك , او ممكن مايعجبنيش واقرأ نص البوست واخرج

يارب وجهة نظرى تكون وصلتك

:)