الاثنين، 11 يناير، 2010

فصل الشتاء

بسم الله الرحمن الرحيم


فصل الشتا ....... مش على هوايا خالص الفصل ده لانى بحب الصيف اكتر منه بكتيييير لكن عموما فصل الشتا له خصوصيات مش موجودة فى غيره من الفصول


أول حاجة بعرف بيها ان فصل الشتا وصل هى خطبة الجمعة الممتعة اللى اتعودت اسمعها من امام المسجد واللى فكرتها باختصار ان "الشتاء هو ربيع المؤمن...قصر نهاره فسهل صيامه وطال ليله فسهل قيامه ايضا مع نيل قسط من الراحة"




الحاجة التانية اللى بفتكر بيها الشتا دايما هى المشهد الجميل اللى بشوفه فى صلاة الفجر لما الاقى ناس فى سن جدودى نازلين للصلاة فى المسجد ......... بجد منظر رائع خصوصا انك ممكن تلاقى اللى لابس عباية الشتا "اللى هموت واشوف حد لابسها ومدخّل دراعه فى الكم... ولا هى العباية دى اصلا مصممة انها تتحط ع الكتف بس؟؟؟؟" ... وأحيانا تلاقى ناس يقلبوا النص التحتانى من العباية على النص الفوقانى وفى الاخر تبقى مجرد حاجة محطوطة ع الكتف .......


فى نوع تانى بقى من الناس بيبقوا شايفين ان العباية لوحدها مش كفاية فبيفضّلوا ينزلوا بالبطانية اللى كانوا نايمين بيها واهى يبقى منها دفا فى الصلا ولما يرجع لسريره يبقى مش محتاج يدفّى مكانه من جديد.........


فى وجود هذا العرض الرائع من العبايات والبطاطين الكل اجتمع على حاجة واحدة وهى الشال .... لازم تلبس شال وانت نازل الفجر ..لا وكمان لازم تلفه حوالين رقبتك وكمان تغطى بيه نص وشك...لدرجة انى ببقى بسلم ع الناس ومش عارف انا بسلم على مين وشكلهم بعد الصلا بيبقوا بالظبط زى ذئاب الجبل اللى بيتفقوا على صفقة سلاح ........


كل ده كوم وقفل باب المسجد وراك بعد ما تدخل ده كوم تانى ... طبعا الدنيا برد ولازم نقفل الباب عشان الهوا ما يدخلش الجامع وتلاقى دايما واحد من اهالينا الكبار واخد الكرسى اللى بيصلى عليه وقاعد جنب الباب وهمه الوحيد هو الباب ... كل اللى داخل يقوله اقفل الباب ...الصلا بدأت وهو لسه ما بدأش وقاعد للباب....الركعة الاولى قربت تخلص وهو لسه قاعد للباب لحد ما الامام يركع يقوم بسرعة يدخل فى الصلاة بس اكيد بيلاقى وسيلة يقفل بيها الباب حتى وهو فى الصلاة.....


اخر حاجة بفتكر بيها الشتا وبقيت بشيل همها قبل الشتا ما ييجى هى انى بحس ان قلبى يتمدد بالحرارة وينكمش بالبرودة..... بحس ان قلبى قبل الشتا بيبقى زى أرض كبيرة وواقف عليها ناس كتير فى النص وفى الأطراف لكن أول ما الشتا بييجى قلبى بيكش على طول زى ما يكون بردان وكل اللى ع الطرف بيقعوا وما يتبقاش الا الناس اللى ساكنين فى مركز قلبى .... المشكلة بقى انى بحس بحنين شديد اوى للناس دول واحيانا بيكونوا اصبحوا جزء من الماضى وده بيخلى فصل الشتا عندى له حالة من الشجن مش موجودة فى غيره من الفصول....مش عارف بقى الموضوع ده عندى لوحدى ولا ايه....

هناك 19 تعليقًا:

موناليزا يقول...

...لدرجة انى ببقى بسلم ع الناس ومش عارف انا بسلم على مين وشكلهم بعد الصلا بيبقوا بالظبط زى ذئاب الجبل اللى بيتفقوا على صفقة سلاح "

ضحكتنى اوى الجملة دى
بس انت ممكن تعرف كل واحد من اللى واضعه على كتفه يعنى جارك فلان بطانيته لونها ازرق وجارك التانى عبايته سودا وكده يعنى:)

انا بحب الصيف اكتر لان فى الشتا دايما عندى برد:)

فتاه من الصعيد يقول...

لا انا بعز الشتا بصراحه ... موش بحب الصيف

جميله خواطرك عن الصلاه في الشتا :)

تحياتي

ঔღঔ نـــوارة ঔღঔ يقول...

ههههههههههههه

ضحكتني يخرب عقلك لاني متصورة منظرهم هههههههههه وخصوصا بتاع الباب ههههه

عندنا العباية دي مخصصة للمخاتير والناس المهمين في البلد مش اي حد يلبسها :]

بس طبعا في ناس بتبقى حابة تبقى مهمة وبتلبسها عاتي يعني ههههههههه

بس العباية دي ليها مهمة خاصة عندنا لااااااااازم يغطوا العروسة فيها لما تخرج من بيت اهلها حتى لو شحتوها من اي حد لازم تلبسها العروسة واهو تغطيها كويسة ومحدش يشوف حاجة منها ^ـ*

وحشتني مووت كيفك وشو اخبارك

يارب تخلص الامتحانات بقى وترجع تنور البلوجر من تاني

انا بحب كل الفصول لما نكون في فصل الشتا اشتاق للصيف ولما نكون في الصيف اشتاق للشتا وهكذا

بس فعلا فصل الشتا بيكون فيه مشاعر مختلفة وحنين ودفء وذكريات وحكاااااية متفكرنيش ياخويا :]

الف الحمد لله على سلامتك

استحملني من فرحتي رغيت كتير اوووي :]

سلام بقى

ليس فقيرا من يحب يقول...

ههههههههههههههههههههههه

الله يسعدك يا بنجا

ذئاب الجبل وصفقه سلاح

هههههههههههههههههههههههههه

عسل قوى والله

طبعا انا اختلف معاك فصل الشتا

من اروع فصول السنه

المهم اخبار الانطحانات معاك ايه

ربنا يوفقك يارب

مسدس صغير يقول...

جزاكم الله خيرا
فعلا انا بحب فصل الشتا اكتر
يطول ليلة فيسهل قيامه ويقصر نهاره فيسهل صيامه
عجبتنى اوى الحتة دى
احييك على البوست
فينك يا دكتور؟

قلم رصاص يقول...

"وشكلهم بعد الصلا بيبقوا بالظبط زى ذئاب الجبل اللى بيتفقوا على صفقة سلاح ........

"
هههههههههههههههههههه

ربنا يكرمك يادكتره
والله انت واحشنا كلنا بجد
فين ايام بوستاتك الحلوة؟!!!!

بس انت في الجزء الاخير من البوست أبدعت
دي فلسفه ولا ايه بقى؟!

ربنا يوفقك ويقدرك وتخلص

في حفظ الله

Lady E يقول...

ههههههه حلو الجو ده بس بجد بينزلوا من البيت ببطانياتهم :)

الشتا السنة دي مش برد اوي زي السنين اللي فاتت

بالنسبة لموضوع ان قلبك بينكمش وبيتمدد بتحصل لا تقلق مش hopeless case

بالنسبة للنصيحة ماااااشي

سايب مذاكرتك وبتكتب بوستات جديدة مينفعش خاااالص :)

مجداوية يقول...

السلام عليكم

موضوع جميل جداااااا

أنا بأحس بالذل في الشتاء لأن الاحساس بالبرد القارص والرعشة منه بتحسسني بالذل وده إحساس صعب جدا لكن بيصحي سؤال قد إيه الانسان ده ولا حاجة الغريب إن الانسان زى الأرض لأنه من تراب ممكن البرودة الشديدة تموته وكمان شدة الحرارة عشان كده الجنة غير الدنيا لا شمس فيها ولا زمهريرا
سواء موتنا من البرد ولا موتنا من الحر فهذه هي الدنيا لا راحة فيها ولا نعيم مقيم

واقرأ معي هذا الحديث الشريف

عَنْ أَبِي هُرَيْرَة رَضِيَ اللَّه عَنْهُ قَالَ : قَالَ رَسُول اللَّه صَلَّى اللَّه عَلَيْهِ وَسَلَّمَ : ( اِشْتَكَتْ النَّار إِلَى رَبّهَا عَزَّ وَجَلَّ قَالَتْ : يَا رَبّ أَكَلَ بَعْضِي بَعْضًا , فَجَعَلَ لَهَا نَفَسَيْنِ نَفَسًا فِي الشِّتَاء وَنَفَسًا فِي الصَّيْف , فَشِدَّة مَا تَجِدُونَ مِنْ الْبَرْد مِنْ زَمْهَرِيرِهَا , وَشِدَّة مَا تَجِدُونَ مِنْ الْحَرِّ فِي الصَّيْف مِنْ سَمُومهَا )

فسبحان الله العظيم


ضحكتني جدا مثل أختي الحبيبة موناليزا نفس الجملة


...لدرجة انى ببقى بسلم ع الناس ومش عارف انا بسلم على مين وشكلهم بعد الصلا بيبقوا بالظبط زى ذئاب الجبل اللى بيتفقوا على صفقة سلاح "

:))))

لكن مقولتش بتصلي بالبطانية ولا بالعباية ؟

لكن السر في قول حط حاجة على كتفك في البرد

لكن بصراحة مهما حطيت ولبست لو الأطراف صاقعة ولا كأنك متلفع بأى حاجة

اللهم قنا جميعا شر الحر والبرد وشر النار بسمومها وزمهريرها ,, اللهم آمين

الشعب لابد له من حكومه تشكمه يقول...

هههههههههههههههههه تصدق وانا كمان عمرى مشوفت حد مدخل ايده فى كم العبايه دى هههههههههههههه..
والموضوع ده محيرنى:)

بس كله كوم واللى قاعد جمب الباب اققفل الباب.:)

اقصوصه يقول...

صوره جميله

وصلتها لنا

عن تفاصيل صلاة الفجر عندكم

عجبني تشبيه وضع القلب

في الشتا والصيف

عن نفسي احب الشتا

وافضله كثيرا على الصيف :)

ستيته حسب الله الحمش يقول...

بذمتك بينزلوا بالبطاطين؟
بتهزر؟
اصل دي جديدة خالص
هههههههههههههههههههههههههه

اقول لك انا بقى

اعشقك يا فصل الشتاء
اعشق عباءته التي يرتديها داخل البيت وخارجه
أكره لبس الرجال للجلباب او العباءة
الا هو
عباءته تزيد جماله وبهاءه في نظري
ربما لأنها تضمني وتحتضني دائما في فصل الشتاء
اعشقك يا فصل الشتاء
اعشقك



المشكلة بقى انى بحس بحنين شديد اوى للناس دول واحيانا بيكونوا اصبحوا جزء من الماضى وده بيخلى فصل الشتا عندى له حالة من الشجن مش موجودة فى غيره من الفصول
----------------------------
بتحصل في احسن العائلات :)

أم .. بوبه يقول...

أنا بردت

بس وصف جميل لمشاهد حقيقية

تامر علي يقول...

انا لما كبرت في السن جبت عبايه من دول "التقيلة" وبقيت بعمل زي الناس دول ... الصحة مش بعزقة :)

بصراحة كل فصل له مزاياه لكل الشتا فعلاً مثير للأشجان "كان في واحده جارتنا اسمها مدام اشجان" وأحلى حاجه في الشتا انك ممكن تنام فيه كتير :)

جارة القمر يقول...

شعرت بدفئ الشتاء هنا

؛)

MǿиY El-Shreef يقول...

تؤتؤتؤ

انا بحب الشتا اكتر بكتير من الصيف

وبحس بقى بعكس ان كل اللي ف قلبي بيتجمعوا ف النص يدفوا بعض بقى وكده :D

العبايه بتاعت الشتا دي فعلا عمري ماشفت حد لابسها عادي سبحان الله

بس خلصت كلام

أم مالك يقول...

لابقى يامصطفى
انا بعز الشتا عارف ليه
لان فيه كانت عودتك الحميدة
سعدت جدا بظهورك ورسالتك وعودتك
وربنا يطمنى عليك دايما

مشخبطاتي يقول...

سلام عليك :)

كمان أحياناً بتوضى بمياه مرت على لهيب السخان وانت عارف لما اللي بيحصل لما بتخرج في الرصاص اللي بره..

الناس في الجامع عاملة زي القنافد من كتر الشيل اللي هما شايلينها..ووصفك صراحة للحظة دي جيد جداً :)


لكني بحب الشتاء..رغم إني دايما تعبان فيه !!

:)

د. ياسر عمر عبد الفتاح يقول...

هوه البوست ده عن الشتا
ولا عن صلاة الفجر؟
ركز بقى
بس جبت شوية مواقف دايماً بتحصل

إنت بقيت خلاص دكتور ,, ولا لسه يا بنجا؟
على ما أظن لسه شوية على الموضوع ده :)

مجتش اللقاء ليه يا بنجا
كنت عاوز أشفوفك .. يلا مشفش وحش :)

يوميات شحات يقول...

شكرا على البوست