الاثنين، 22 نوفمبر، 2010

سلام مربع للستات

 بسم الله الرحمن الرحيم

النهاردة تانى يوم شغل بعد أجازة عيد الأضحى المبارك وأنا مش مستغرب من احساسى بالكسل الشديد وعدم الرغبة فى الشغل والحلم بأن تمتد الاجازة لمدة سنة أو اتنين أو حتى طول العمر 
هو الاحساس ده موجود من قبل العيد طبعا لكن احساس الاجازة بيخلى الالم النفسى المترتب على الشغل شديد شويتين

طبعا الحياة هى الحياة ما اتغيرش فيها حاجة عن قبل كده...الصحيان الصبح بالقوة... المواصلات زحمة...الطرق بايظة وعشوائية...الناس بقى وما أدراك ما الناس حاجة آخر قرف ... الشغل ذات نفسه مقرف..الروتين معفن...المسؤولين زبالة وحاجة كده يعنى اللهم احفظنا بتخلى الواحد نازل من البيت بالقوة واللحظة اللى بيرجع فيها بيته بيبقى زى المسجون فى الشوارع وحريته فى البيت

المهم فى وسط هذا الوضع" الجميل طبعا" بستغرب جدا لاخواتنا البنات الله يكرمهن...بجد طاقة رهيبة ...بيتعرضوا لنفس القرف- ويمكن أكتر بحكم إن اللى بيسببوا القرف فى الغالب رجالة- ومع ذلك كلهم نشاط وموجودين فى كل حتة ومش مكتئبين ما شاء الله حتى لو كانوا نازلين أصلا لحاجة مش مهمة أوى يعنى ممكن ما ينزلوش ومع ذلك اللهم بارك نازلين وأجدع من الرجالة

بجد يا بنات ما دام عندكم الصبر والتحمل وطولة البال العظيمة دى يبقى تحيا الستات وأنا من هنا أحب أعلن رجائى الملح والطارئ بأن تتصدر البنات لكل الأعمال اليومية ويصبح ذلك أمرا واجبا عليهن وأن يتحول نشاط الرجال الى مجرد المشاركة فى وقت الضرورة 

سلام مربع للستات



هناك 12 تعليقًا:

ستيتة حسب الله الحمش يقول...

السلام عليكم يا بنجا يا مضحكني
ورايا مؤتييييمر
وبما اني ستات ونشيطة يا كسلان
ها أخلص السيشنز
ولي معك لوقاء ان شاء الله
اضحك الله سنك :)

حلم يقول...

وماله
لا اعتراض بشرط واحد ان كل امتيازات الرجالة تروح للستات
واكيد احنا قدها وقدود
هههههههههههههههههه
موضوع جميل واسلوبه روعة

كــركــبــة دمـــاغ ㋡ يقول...

هههههههههههههههههههههههههههه
لا انا مش معاهم

انا امبارح اول يوم
ورحت الجامعه بالعافيه
وكسلانه وطول اليوم عاوزة انام عشان رحت مطبقة
وكرهت الجامعه باللي فيها ومر عـ بالي فكرة مجنونه

بس مش هينفع اقولها خالص هنا

انا هركن مع صف الرجاله بقى هههههههههه

ضحكتني والله
ربنا يفرح قلبك يا دكتووور

Sonnet يقول...

سلام جميل
سلام معقول

اميره الاسلام يقول...

والله احساسى نفس احساسك وشعورى نفس شعورك
رغم انى ستات

صمت المشاعر يقول...

ههههههههههههههه فعلا والله عندك حق

الستات فيهم طاقه غريبه وخااااااة عند الخروج من المنزل علشان كدا بسغرب نفسي اني بكره الخروج وفكرت اروح لدكتور نفسي ههههههههه

احاسيس آيوشه يقول...

ههههههه الاعتراف بالحق فضيلة
بس والله فعلا الستات يمكن عندهم صبر اكتر فى تحمل القرف وكل حاجة ويمكن بردو عندهم ارادة اكبر فى انهم يثبتوا ذاتهم
بس انا معتقدش انى منهم انا مش ناقصة قرف على قرفى اليومى هههههه
انا بحب البيت والأنتخة بصراحة بس بنزل من البيت مضطرة ومجبرة

محمد الجرايحى يقول...

لقد أصبح واقعاً مقروضاً على الاثنين
فرضته الحياة القاسية.

تقبل تقديرى واحترامى
بارك الله فيك وأعزك

صوت من مصر يقول...

اللى يقول غير كده يبقى ؟؟؟؟؟؟؟؟؟؟؟

Dr/ walaa salah يقول...

هههههههههه

انت لو تلاحظ يا بنجواتي ان الستات والبنات في طبعهم الصبر

واديلك مثل بسيط

خلي راجل يرجع من شغله واول ما يدخل البيت يروح داخل المطبخ ويحضر الاكل وبعدين يستنى الولاد ويذاكرلهم ويأكلهم ويحضر ملابسهم ويصحى تاني ويعمل اللي عمله ده تاني

اكيد مش هيصبر يومين على بعض

احنا عندنا الصبر بلا حدود

تحيا الستات

ليس فقيرا من يحب يقول...

عقبالى يااااااااارب لما اتقرف ويطلع عينى واشوف المعاناه دى يا بنجا

يا اخويا قطع البيت وقطعت قعدته

بلانييييييييييييييييييله اناااااااااااااااا جبت جااااااااااااااااااااااااااااااااااااااااز

sony2000 يقول...

علشااااااااااان تقولوا الستات بعد كدااااااااااا
وتجربوا بس يوم واحد بدالنا
وهنشوف هتعملوا ايه
يللا الحمد لله
عرفتوا قيمتنا دلوقيت
احمدوا ربنا