الاثنين، 3 أغسطس 2009

من تحت الأرض...نلتقى

بسم الله الرحمن الرحيم


شخصيات الأحداث (طبعا الأحداث لصغار السن أما الكبار فلهم السجن علطوووول):

بنجا (باللون اللى انوا شايفينه ده)

بنجا الكبير(باللون اللى انتوا شايفينه ده)

مستنيين ايه تانى؟؟؟ شخصيتين كفاية اوى .... بلاش طمع


بنجا (باللون اللى انتوا شايفينه :P): إيه يا حجوج ده يا حجوج .... أنا ملاحظ إنك اليومين دول ما بتعرفش تشوف صوابع رجلك وانت واقف .....


بنجا الكبير(باللون اللى انتوا شايفينه :P): نعم يا فقرى عايز إيه؟؟؟


بنجا: مش عايز حاجة يا عم بس انا قصدى إنك بقيت بتتعب علشان تطول زرار القميص عند بطنك .... وأنا قلبى عليك ومحبّلكش التعب


بنجا الكبير: لا ما يصعبش عليك غالى خليك فى حالك انت بس وانت عامل زى خلة السنان كده


بنجا: هو بمزاجى يعنى ما انتوا اللى ما بتأكلونيش.... وبعدين خلينى ساكت احسن لنكون متراقبين ولا حاجة وساعتها بتوع حقوق الانسان هما اللى هياخدولى حقى منكم


بنجا الكبير: ابقى خليهم ينفعوك.....(ثم يفرد ذراعه بقدر ما يستطيع فى محاول فاشلة لبلوغ منطقة السرة بغرض الهرش)


بنجا: شوفت ؟؟؟ هو ده اللى انا بتكلم عليه....مش عارف تهرش فى بطنك .....


بنجا الكبير: كده يا بنجا شمتان فيا؟؟؟؟


بنجا: ما تقولش كده يا حاج ..أشمت فيك ازاى...انا فرحان فيك بس هههههه.... بقولك ايه يا حجوج ...


بنجا الكبير: قول يا سيدى


بنجا: انا عايزك معايا كمان يومين كده فى مشوار مهم.. بس بالتضاريس دى مش هينفع خاالص


بنجا الكبير: مشوار ايه ؟


بنجا: هقولك بعدين بس فى الاول هنروح أنا وانت على بالليل كده الساحة (مركز شباب مهارشتا الكبرى) وتجرى لك لفتين كده حوالين الملعب .... على شوية جيم وكله هيبقى تمام


بنجا الكبير : موافق يا بنجا ...أما نشوف آخرتها معاك


بالليل فى الساحة


بنجا: يللا يا حجوج الملعب قدامك وكشافك فى ايدك ...عايز همة وحماس..... انطلق


بنجا الكبير يجرى بنشاط وحماس ...وفى أحد أركان الملعب يجلس بنجا الصغير وقد انشغل بالقراءة وما قطع انشغاله الا صرخة استغاثة من صوت يألفه ويعرفه جيدا ............ الحقووووووووووووناااااااااااىىىىى

وينظر بنجا فى اتجاه الصوت فى فزع فإذا بأبيه ينزلق فى حفرة الصرف(المجارى يعنى) فى أحد جنبات الملعب .... وما هى الا ثوانى حتى اقترب

بنجا من أبيه ...


بنجا الكبير: ارجع يا بنجا لتقع فى الحفرة


بنجا وكأنه لم يسمع ما قاله أبوه: هات إيدك ..ما تخافش .... امسك كويس


بنجا ينزلق فى رفقة أبيه الى قاع الحفرة ليجد نفسه بداخل اسطوانة صرف عملاقة


بنجا: انت كويس؟؟؟


بنجا الكبير: انت اللى كويس؟؟؟ ................ يقولها فى ابتسامة الاب الحانى


بنجا: انا الحمد لله كويس ومحصليش حاجة .... هنعمل ايه دلوقت؟؟؟


بنجا الكبير: مش عارف...بس مفيش غير اننا نقعد هنا للصبح لحد ما حد ييجى يطلعنا


بنجا: طيب ما تيجى نمشى كده ....يمكن نلاقى فتحة قريبة نطلع منها


بنجا الكبير: ماشى....


ويمشى بنجا الكبير بجوار ابنه الذى فاقه فى الطول ..... وبين كل خطوتين يقفز بنجا الكبير ليأخذ شهيقا يعقبه مباشرة صوت خروج النفس فى الماء (بقلله)


بنجا: طول عمرى أقولك العب عُقلة يمكن تطول شوية ههههه...خليك كده اقعد بقلل للصبح بقى


بنجا الكبير: كده يا بنجا هتسيب ابوك يمشى يبقلل كده؟؟؟؟ مش فاكر لما كنا فى المصيف وانت صغير وكنت هتغرق وانا اللى انقذتك؟؟؟؟


بنجا: خلاص بقى يا حاج الدمعة هتفر من عينى.... بس انت عمرك ما خدتنا المصيف


بنجا الكبير: آه صحيح........ بس انا كنت ناوى السنة دى نطلع المصيف وانقذك يا بنوجة يا حبيبى


بنجا: أمرى لله.... تعالى أشيلك


بنجا الكبير بعد أن استقر على ظهر ابنه: زى ما أكون تعبااااااااااااان وارتحت


بنجا : يا رب صبرنى


بنجا الكبير: زى ما اكون تعباااان وارتحت..... زى ما أكون راكب فوووووق وابنى تحت


بنجا: على فكرة صوتك جميل اوى يا بابا ...بس ممكن تشغل الكشاف علشان مش شايف ...وياريت لو كفاية غُنا علشان أركز فى الطريق


بنجا الكبير: ركز يا خويا فى الطريق وماله... محسسنى انك سايق توك توك ههههه... زى ما أكون تعبااااااااان وارتحت.. زى ما أكون راكب فووووووووو...... مالك يا بنجا مش ماشى على بعضك ليه يا حووووووووبى؟


بنجا: مش عارف ايه اللى تحت رجلى ده ...كل ما آخد خطوة الاقى تحت رجلى حاجة زى الطظاظ كده (اللى هو البلى يعنى)


بنجا الكبير: ايوة يا بنجا دى طظاظيظ.... الظاهر ان الناس بقت بتحطه ع الأكل ...بيقولوا بيخلى طعم السلطة تحفة... وزى ما أكون تعبااااااااا.....


ومرت الساعات وانطفأ الكشاف وأصبحا لا يريان الا الظلام ...ظلام بالليل وظلام بالنهار ...يمشيان ولا يعرفان أبالليل هما أم بالنهار... لكنهما لم ييأسا ...وظلا يمشيان حينا ويستريحان حينا آخر ... وبعد وقت لا يستطيعان تقديره إذا بشعاع يُرى من بعيد ...... وانطلقا تجاه الشعاع وإذا بفتحة يطل منها نور الشمس الذى غاب عنهم طويلا



المرة دى بنجا الكبير هو اللى هيشيل ابنه ...وهينجح بنجا انه يرفع غطا التفتيش(فتحة المجارى يعنى واللى يعرف ليه سموه تفتيش يقولى) ويطلع بنجا ويشد أبوه بس اسمعوا كده..... سامعين اللى بنجا سامعه؟؟

سامعين الضحك والهزار؟؟؟ سامعين اللى بيقول ما كنش اللقاء ده يبقى متأخر شوية؟؟؟ سامعين حد بيقول هو فين بنجا؟؟؟؟ طيب بصوا معايا كده مين دول..... أنا بشبّه على الشاب ده...حاسس انى شفته قبل كده ...مش ده صلاح؟؟ أيوة بيقولوا له يا مسدس



بنجا: أبو صلاااااااااااااااااح ..... حضن يا بو صلاااااااااح......وبعد العناق الشديد بنجا قال لأبوه : هى دى بقى الزيارة المهمة اللى كنت عايزك معايا فيها يا حجوج .......

كده عُصت لى هدومى مية مجارى يا بو صلاح .....؟؟؟؟


هذا البوست مهدى إلى جميع المدونين واتمنى يكونوا بخير كلهم واشوفهم فى اللقاء يوم السبت وأخص بالذكر العزيزة الغالية الخالة والعمة والأخت الكبيرة اللى عايزة تغيب عننا شوية الدكتورة ستيتة هانم حسب الله الحمش

هناك 37 تعليقًا:

قلب ارهقته الاحلام يقول...

ايه ده انا اول تعليق ههههههه

مش منكن ^^

قلب ارهقته الاحلام يقول...

بجد البوست هاااايل جميييل جدا بجد

تسلم ايديك :)

بس للأسف مش هقدر اكون موجودة :(

وبعدين نضفوا المكان ده بأة الريحه دي :((

ياااااه انا ماشيه الريحه خنقتني ههههههههههه

يارب بألف خيرر دايما

ويارب يكون لقاء جميييل بجد وتستمتعوا بيه كان نفسي اكون معاكم اووي

سلمولي عليكوا بأة بجد (:

(حلـم) يقول...

اول مرور


مدونة رائعة


وبوست معبر


تحياتي

قلم رصاص يقول...

هههههههههههههه

معقولة انا اول تعليق

تجاااااااااهل تجاهل لكل اللي علقوا خصوصا قلب هههههههههههههههه

ايه يادوك الشغل العالي اوي ده

طب والله انا فكرت ان المشوار ده حاجة

تانية خالص

عارف فكرت في ايه ؟ ههههههه مش هتصدق

فكرت انك عاوز البنجا الكبير يجي معاك

يخطب لك وانت بتجرجره بحداقه ، توريط

يعني هههههههههههههههههه

وعجبني اوي الحتة دي :

"بنجا الكبير: آه صحيح........ بس انا كنت ناوى السنة دى نطلع المصيف وانقذك يا بنوجة يا حبيبى"

دا باعتبار ماسيكون يعني

والله فكرة حلوة حلوة

المهم بقى بخصوص اللقاء

انا بصراحة نفسي احضره جدا بس دايما

كده انا مقصر في لقاءات المدونين طول

عمري التدويني ومن نفس احضر ولو مرة

بس هنقول ايه بس .. قدر الله وماشاء

فعل


وخد بالك من الروائح الكريهه يا ابوصلاااااااااااح
ههههههههههههههههههه

مشكور جدا يادكتووور على فكرة البوست

الفظيييييييعه

دمت في حب وود مع بنجا الكبير

ودمتم في حفظ الله

عديني بقى عشان مش فاضي ورايا مشوار
ههههههههههههههه

سلام

ليس فقيرا من يحب يقول...

هههههههههههههههههه

انا كمان فكرت انك عايز

الحاج بنجا يجى يخطبلك ولا حاجه

هههههههههههههههههههههههههههه

بوست زى العسل

مستنيين بوست 10/8 باذن الله

تقبل تحياتى

د. ياسر عمر عبد الفتاح يقول...

كويس إنك قلتلي علي موضوع المجاري ده
بص لو حصل إني جيت
هجيب معايا جوانتي لاتكس
وخلي السلام بينا بالإيد يا عم بينجا
:)

إن شاء الله يبقي لقاء كويس
وتستمتعوا بيه

سمسم/سما يقول...

السلام عليكم
ما شاء الله
ربنا يديم المحبة
بس قلي انتو بتطلعو المشاوير
دي كتير
هههههههههههههه
اسمع ابقى افتكرنا لما تروحوا المصيف السنادي

ستيتة يقول...

الله يسعد قلبك يا درش ويكرمك ويراضيك ويفرح قلبك ويحفظك واقول ايه بس والا ايه
الواد عفرتو دخل علي لقاني فطسانة من الضحك وفرح قوي اني بضحك من قلبي
هههههههههههههههههههههههههههه

بس لي مجموعة ملاحيظ "جمع مؤنث مشكل لملحوظة"

اولا لقيت شوية تبكيت على كرش وطول بنجا الكبير وكمان على المصييف اللي قال لك عليه في الظروف "ام ريحة حلوة" دي

ثانيا قال انت اللي شايل بنجا الكبير قال "مش تشوف عودك من عوده ما شاء الله عليه

ثالثا ياعم تعالوا اللقاء تحت أي بند واحنا علينا البرفان

شكرا على تعبيراتك الحلوة يا بنجا واضحك الله سنك

وبطل حقد دفين على بنجا الكبير
والا علشان انت عودك زي خلة السنان وطلع ليها زيتونة؟
وعلى رأي الواد أخويا

فيه كرش يبقى فيه قرش يا "قرش لس"
هههههههههههههههههههههههههههههه

*البت المشمشية *حلوة بس شقية * يقول...

كان نفسى احضر اللقاء

غير معرف يقول...

ههههههههههههههه
بوست جميل جدا وانا اول مره اعلق هنا والموضوع فكرته مضحكةولذيذو يا رب تلتقوا جميعكم على خير

حـــلـــم كـــان يقول...

ههههههههههههههههههههههههههه

الحته بتاعت المصيف ده جااااااامده

ghorBty يقول...

السلامـ عليكمـ

موفقين ان شاء الله ويارب يكون لقاء جميل وتنبستوا فيه خصوصا بنجا الكبير والصغير ..

ريمان يقول...

ههههههههههههههه


بوست هايل


لا الصوره كمان رهيبه


هههههههههههههههههههه

فظيعه



يا ريت كنت اعرف اجى معاكم يوم اللقاء

تمنياتى ليكم بيوم جميل


تحياتى

رحلتنا في الحياة يقول...

الاخر تروح اللقاء
طيب بجد بقى الحاج قرا الكلام دا معتقدش والا مكناش لقيناك تانى بعد البوست دا وياريت دا يحصل ياااااارب الحاج يقرا البوست دا :))
بس على فكرة طلعت شهم وجدع ابقى روح بقى خد دش علشان الريحة اللى ملت المدونة دى :)









على فكرة بحقد على اللى هيروحوا اللقاء دا p:

وحي القلم يقول...

السلام عليكم
أنا بعشق لقاء للمدونين
بس العين بصيرة والايد قصيرة

جهاد يقول...

بجد بوست جميل اوى

انا كمان افتكرته جايبه يخطبله هههههههههه

والجزء بتاع المصيف ده حلو اوى لأ وبيتكلم بقلب جامد وكنت حنقذ وكده واتارى ده لسه باعتبار ما سيكون هههههههه

تسلم ايدك بوست جميل فعلا

ويارب يكون لقاء ممتع بين المدونين ان شاء الله

جارة القمر يقول...

بنجا الكبير وبنجا الصغير لخبطوووووووني بينهم

بس بوست حلو تسلم ايدك

احترامي

وردة يقول...

والله يا دكتور بنجا انت ليك مستقبل كبير في كتابة المواقف الكوميدية
ومش بعيد نفتح التليفزيون نلاقيك عامل مسلسل لرمضان
ههههههههههه
البوست جميل بجد
ودهم خيفيف جدااااا
ربنا يباركلك
بس لما ترجع عاوزين تفاصيل التفاصيل
ولا تفوت حاجة
ربنا يكرمك
سلام

fL0weR-giRL يقول...

السلام عليكم
*********
ايه القصه الغريبه والعجيبه ديه بجد غريبه
ههههههههههههههههههههههههه
بس حلوه

**تقبل مروري **

غير معرف يقول...

هههههههههههههههههههههه
هههههههههههههههههههههههه

يخرب عقلك شو مهضووووووم

بمووت من الضحك على اسلوبك بالكلام

اسم الله عليك وعلى بنجا الكبير بقى تعمل فيه كدا !!

انا قلت يمكن عاوز تاخده معك للقاء المدونين ^ـ*

ربنا يطول بعمره يارب

ويابختك هتروح اللقاء و تسبني مكنش العشم يا بنجا

هقعد اقر عليكم واحد واحد مليش دعوة

عاوزة طيارة اسبشل :(

يارب تقضوا يوم راااائع

تحياتي يا اخف دم في الدنيا

غير معرف يقول...

هههههههههههه

انا افتكرتك برضه هتاخده للعروسه ...... المهم ربنا يوفقك وتروحوا اللقاء على خير ...... وابقى احكي بقا عملتوا ايه ......... لاني لولا بعد المسافات كنت حضرت ..... على الاقل اتعرف على بنجا الكبير

ذو الوجه المبتسم يقول...

السلام عليكم

ازيك يا دكتور

جميل الحوار يا بنجا يا صغير وبنجا الكبير

ان شاء الله لما انزل مصر هازورك انت وبنجا الكبير واشوف المكان الحلو ده

مجارى مجارى بس نعيش
ولا ايه رايك
هههههههههههههههههه

تحياتى

الشعب لابد له من حكومه تشكمه يقول...

ههههههههههه حلوه جدااا الصوره عجبتنى..
كان نفسى اكون موجوده بس للاسف مش هينفع بس ربنا معاكو فى الازهر بارك وفى القاهره وصباحااا كان نفسى اتفرج والله:))
متنساش تصوره وتعمل دفتر حضوره وانصراف علشان نعرف مين جيه :)

mimi يقول...

نصاااااااااااااااااب

أنت عارف البوست معناه إيه

وبتمثل

mimi يقول...

عاوزين نعمل قايمة بأسماء الناس اللي هتشرف اللقاء

mimi يقول...

ربع جنيه ورق يا بنجاواتي يا معطر

Ebraheem Aadam يقول...

ياااااااه مجاري ؟؟!!

فين أيامك يا سلاحف النينجا :)

اسماء واحلام فى وجدانى يقول...

الشاى بتاع حضرتك جاهز عند ميمى

حلم بيعافر يقول...

انا دماغى باظت ومفهمتش حاجة

بس كل الناس اللى ردت فهمت يبقى العيب فيا بقى

يللا بقى حظى كده وااء وااء وااء

فشكووول يقول...

بنجاواتى ... تحياتى ... على السجعه

بنجا الكبير وقع فى البير

بنجا الصغير عايز يطلع ابوه م البير

النبنجاوين الاثنين وقعوا فى البير

كلنا هذين البنجاوين كلنا فى البير .. وبير المجارى ...


نتقابل على خير ان شاء الله يوم السبت بكره فى الازهر

تحياتى

لاسع افندى يقول...

خضيتنى عليك افتكرتك رايح تخطب
الحمد لله طلع حاجه تانيه




تحياتى اللاسعه

EMMY BABY يقول...

هههههههههههههههههههههههههه طب كويس انى مشفتش البوست ده قبل ماروح اللقاء لحسن كنت خفت اقع انا كمان ومرحتش


بس جميل اوى والله خيالك وقعدت اضحك اوى على حاسس انى فوق وابنى تحت دى هههههههه عنده عقدة نقص

احب اهنيك على مدونتك واشكرك على الاناشيد الحلوة اللى فيها ربنا يكرمك

كان نفسى تكون معانا فى اللقاء واتعرف على حضرتك بس تتعوض ان شاء الله فى لقاء تانى

اول زيارة وان شاء الله بجد مش الاخيرة

تحياتى
ايمى

(Joudy) يقول...

ههههههههه حلوة بجد مع انى لسه جديدة هنا بس عجبتنى هى ايه الحكاية هنا صحيح...

دمت بكل الخير والسعادة

۩۝۩ Dr. Flavio ۩۝۩ يقول...

ايه ياد كمية الأرف دي

انت عارف لو انت مش صاحبي كنت ولعت فيك بجاز على ام البوست اللي هيخليني اطرش دهه

بس للأسف مش هاعرف اقول لك حاجه غير قول الشاعر
يـل..ن تـهـ..يأك .. كمل انت النقط

همسة ايمان يقول...

بجد البوست لذيذ واسلوبه حلو اوى

وفكرة لقاء المدونين تحفة

يارب تكونوا اتبستطم

وعايزين بقى بوست تقولونا عملتم ايه

تقبـــــ مرورى واحترامى ــــل

همس الاحباب يقول...

ههههههههههه
بوست دمه خفيف
وبيحمل معنى ومغزى هادف
تحياتى

-_- يقول...

الراجل اللى في الصورة ده صعبان عليا اوي

.