الأربعاء، 29 يوليو 2009

ازاى نسامح بعض+تاج الكونتيسة

بسم الله الرحمن الرحيم



بعد الدعوة المستعجلة جدا من مدونة *البت المشمشية *حلوة بس شقية *

وماشاء الله كل الناس كتبت عن الموضوع بامتياز


وبما ان الدافع لكتابة الموضوع هو اننا داخلين على شهر رمضان ..يعنى الدافع هو اننا عايزين نستفيد من شهر رمضان ونطلع منه بعلاقات تجارية جديدة مع ربنا سبحانه وتعالى ... قلت يبقى ده وقت الكلام عن التسامح بصفته احد الطرق الموصلة للجنة


مش هقول حاجة من عندى وهكتفى بس بنقل آية قرآنية كريمة وهى قول الله سبحانه وتقدس:


وَلا يَأْتَلِ أُولُو الْفَضْلِ مِنْكُمْ وَالسَّعَةِ أَنْ يُؤْتُوا أُولِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ (22) سورة النور


وهذه الآيات نزلت في (الصدّيق) رضي اللّه عنه، حين حلف أن لا ينفع (مسطح بن أثاثة) بنافعة أبداً، بعدما قال في عائشة ما قال كما تقدم في الحديث، فلما أنزل اللّه براءة أم المؤمنين عائشة، وطابت النفوس المؤمنة واستقرت، وتاب اللّه على من تكلم من المؤمنين في ذلك، وأقيم الحد على من أقيم عليه، شرع تبارك وتعالى - وله الفضل والمنة - يعطف الصديق على قريبه ونسيبه، وهو مسطح بن أثاثة، فإنه كان ابن خالة الصديق، وكان مسكيناً لا مال له إلا ما ينفق عليه أبو بكر رضي اللّه عنه، وكان من المهاجرين في سبيل اللّه وقد زلق زلقة تاب اللّه عليه منها، وضرب الحد عليها، وكان الصديق رضي اللّه عنه معروفاً بالمعروف، له الفضل والأيادي على الأقارب والأجانب، فلما نزلت هذه الآية، قال الصديق: بلى واللّه إنا نحب أن تغفر لنا يا ربنا، ثم رجع إلى مسطح ما كان يصله من النفقة وقال: واللّه لا أنزعها منه أبداً، فلهذا كان الصديق هو الصديق رضي اللّه عنه وعن بنته.

"منقول بنصه من تفسير ابن كثير"

ده لو كنا احنا اصحاب الحق ...


اما لو كنا غلطانين فى حق حد يبقى لازم نعرف ان ربنا العفو الكريم مش هيخذلنا اذا سألناه ان يعفو عنا

لكن ربنا العدل الحكم مش هيضيع على انسان حقه ابدا ...يعنى تخيل اننا ممكن يوم القيامة نلاقى نفسنا بنتحاسب بس على اخطائنا فى حق الاخرين وساعتها لن ينفع مال ولا بنون


أما عن تاج الكونتيسة ستيتة عن عشرة اشياء صادقة فى حياتى اقول وأمرى لله:


1-بحب اسرتى اوى وبحس بحب أمى أكتر من أبويا أو اى حد تانى فى دنيتى اللى انا عايش فيها .... وبحمد ربنا دايما انه شرع لنا ان نحب امهاتنا اكتر من اى حد تانى لانه لو كان الامر غير كده كنت هتعب اوى ... ما تقلقوش عليا مش هخلى بنجا الكبير يقرا الموضوع ده هه


2-الحمد لله بتعامل مع كوووووول الناس ببساطة وتبسط مالهوش حدود لكن فى قرارة نفسى حاسس انى احسن من كووول الناس دول ...وقليل اوى لما احس ان فى حد احسن منى وغالبا بيكون انسان سابقنى بالسن والعلم وحاجات تانية لكن برضه بقول لنفسى هبقى زيه واحسن بإذن الله ههههههه


3-السعادة عندى معناها الوحيد هو الرضا ... والظروف الصعبة مش بتخلينى متضايق او متعصب ...وبحب اوى قول النبى صلى الله عليه وسلم "اخشوشنوا فإن النعمة لا تدوم"


4-لما بشوف بنت شكلها ولبسها مستفز بلاقى صعوبة فى انى اصرف انتباهى عنها ... الحاجة الوحيدة اللى بتقوينى انى افتكر قول ربنا سبحانه وتعالى :"إن تكونوا تألمون فإنهم يألمون كما تألمون " بس مش دايما بفتكره هههههه


5-حاجة نفسى اغيرها فى نفسى وهى ان مواعيدى مضروبة خالص ...... يمكن ما بقتش كده الا بعد ما كبرت وزهقت من كتر الالتزام بالمواعيد فى ظل مجتمع يقدر غير المنضبطين اكتر من المنضبطين


6-لما حد بيقولى او يعمل حاجة تزعلنى غالبا مش بزعل فى لحظتها ومش بحس انى زعلان اصلا...لكن بعد ما افكر فى اللى حصل بقول لنفسى كان المفروض يكون لك رد فعل تنتصر بيه لنفسك ...الحاجة الوحشة فيا ان معاملتى بتتغير بعدها واكيد الشخص ده مش واخد باله انا متغير من ناحيته ليه


7-بكره الاهتمام بالكورة والفن على حساب حاجات تانية اهم ... بكره المسئولين اللى ضيعوا الامانة .... بكره أسلوب التدريس فى كليات الطب.... بكره مستشفيات الجامعة .... وبكره الفقر اللى أجبر الناس على انهم يكونوا اسرى فى مستشفيات الجامعة


8-نفسى لما الدنيا تتغير من حواليا ما اتغيرش انا من جوايا ....


9-بحب الفسيخ والسمك والرنجة وكل انواع السمك ويا سلام لو بعدها كوباية شاى سخنة مسكرة واشفط يا عم الحاج هههههههه


الاجابة العاشرة متروكة للقارئ ..............


معلش بقى مش مذاكر كويس ههههههههه...

هناك 41 تعليقًا:

*البت المشمشية *حلوة بس شقية * يقول...

شكرا بجد انك شاركت معانا فى الحملة

سمسم/سما يقول...

السلام عليكم
ربي يجزيك كل خير
والمسامحة احلى شي بالدنيا
انا شخصيا لما اسامح حد ما بفكر
اذا بستحق او لا
بسامحو لوجه الله
طمعا في انو ربنا يسامحنى انا
وانا عارفة كويس انو ربنا مسامح كريم
والجزاء من جنس العمل
وتحياتي

رحلتنا في الحياة يقول...

اولا جزاك الله خيرا على القصة الاولى كانت غايبة عن بالى وانت فكرتنى بيها
ربنا يجعل البوست دا فى ميزان حسناتك
اما العشر اجابات فدول بينوا حاجات كتييييييييييير وكويس انك جاوبت بصدق
وبخصوص انك بتكون متغير دى حقيقة لما بتزعل من حد انا متاكدة من الموضوع دا:)

العشرة اللى انت هتسيبها للقارئ اعتقد انك دمك خفيف دا شئ صادق بس مش هغيرى رايى فى الدكاترة بردو P:

ديالا يقول...

ربنا يجازيكي خير علي البوست ده

واجمل حاجه انك بجد عارف نفسك كويس وبتتكلم عنها كويس جدا

ربنا يكرمك يارب

حلم بيعافر يقول...

والله انك تعفو عن حد هو ظلمك بتحس بالراحة والطمأنينة
بوست جميل

بنجاواتى يقول...

البت المشمشية:

عفوا بجد انك عملت الحملة :)

*****************
سمسم:

ربنا يزيد نعمته عليكى
ولو الواحد فكر فى كل مرة بيزعل فيها من حد بالطريقة دى ما كنش هيتعب ابدا

تحياتى

**************

ايوشة:

وجزاكى مثله

الحمد لله جاوبت بصدق وحاولت اختار مواضيع ما تكونش اجاباتى فيها صادمة لحد (يعنى الحمد لله ان انا اللى كنت بسأل واجاوب)

انا دمى خفيف ؟؟؟ ربنا يكرمك بس راجعى نفسك :)
ومش عارف موضوع الزعل ده حلو ولا وحش بقى

تحياتى

*************

ديالا:
وجزاكى مثله

انا مش عارف نفسى اوى يعنى بس لانى انا اللى كنت بحط الاسئلة فكنت ممتحن رؤوف نفسى

منورة

**********

حلم بيعافر:

اصلا انا شايف ان فى التسامح فايدة للانسان اللى بيعفو اكتر من اللى بينال العفو ده

تحياتى

صوت من مصر يقول...

اسف جدا يا بنجاوتى
رمضان كريم

ذو الوجه المبتسم يقول...

السلام عليكم

بصراحة اجاباتك كلها منطقية وتلقائية

على فكرة فيه تشابه كبير بيننا

بس خلى بالك انا اكبر فى السن

ههههههههههههههههههه

بس التفكير ؟ شكلك عبقري يا دكتور

باين عليك وعلى شعرك الابيض

واخد بالك

ايوه الصورة دى

ههههههههههههههه

ادعو الله ان يهدينا جميعا وان يتقبل منا صالح اعمالنا

تقبل تحياتى

الخبز قبل الحب أحياناً يقول...

دعوة جميلة للتسامح
وتاج اجمل
اتمنى لك التوفيق
وجزاكم الله خيرا
اتمنى الزيارة

ليس فقيرا من يحب يقول...

ايه انا شميت ريحه فسيخ قلت ادخل

امسى يمكن ينوبنى من الحب جانب

وياسلام بقه لو معاه بصلتين كده

ولمونتين وتحبس بواحده بيريل

اللهم انى صايمه

غير معرف يقول...

جميل الحديث عن التسامح ...... فتح الله عليك

أنا هغششك الحاجه العاشره الصادقه في حياتك
واضح انك بتحب الناس ومتسامح معاهم كلهم
تقبل مروري

Pink Dreams يقول...

اجاباتك كلها جميله قوى وعجبنى قوى الرد دا

-نفسى لما الدنيا تتغير من حواليا ما اتغيرش انا من جوايا ....

يا ريت كلنا كدا

تحياتى

Unknown يقول...

السلام عليكم
تحية طيبة
الزيارة دي مش خاصة قوي متأيف لو مش بتحبي الإعلان عوة خاصة لمتابعة الإقتتاح الجديد لمجلة رؤية مصرية يوم السبت القادم 1/8/2009
roaua.com
هتنور المجلة بوجودك
محتاج رأيك ومشاركتك معانا
خالص تحياتي

ستيتة يقول...

حلو موضوع التسامح
ويارب كلنا نجتهد نخلص ديوننا بشكل آجل
لأن أي شيك بدون رصيد في الآخرة مش مضمون نتيجته

وشكرا يا كونت بنجا على الإجابات دي
الإجابة رقم اتنين دي شبهي شويتين والله اعلم
وحلوة حكاية لما بتشوف بنات هيء وميء وتربيء بتقول توب علينا ياااااااااااااااب
هههههههههههههههههههههههههههههههههههه

وردة يقول...

بجد ماشاء الله عليكم
وعلي اجتماعك علي الفكرة الجميلة ديه
ربنا يجعله في ميزان حسناتكم
يارب
والاجابات جميلة وتحسها خارجة من القلب
"يعني نعتبر ده اخر كلام........"
ههههههههه
ربنا يوفقك
سلام

قلب ارهقته الاحلام يقول...

بوست هايل يابنجا

جزاك الله خيرا يارب

جعله الله في موازينك ان شاء الله

دمت بألف خيرررر

اتمني الشهادة يقول...

بجد من اجمل بوستات ازاي نسامح بعض
لانه في مفهوم التسامح ومعلومات وقرأن واحاديث
وكمان في ابتاسمه جميله
ربنا يبارك فيك وفي والديك ويحميك
وخد بالك من الغلابه ربنا يوسع رزقهم ورزقك
وكل عام وحضرتك بالف خير

بنجاواتى يقول...

صوت من مصر:

رمضان كريم يا محمد
ومهما يكون السبب اللى بتقول اسف عليه فأنا أكيد مسامح ...والله معرف بتقول كده ليه ..اوعى تكون بتهزر يا واد؟؟؟؟

منور يا صوت

**********

ذو الوجه المبتسم:

انا اتشرف انى اكون اشبه حضرتك
وان كان على فرق السن فانت عارف مبدئى انى هبقى كويس ان شاء الله ههههه

ادينى قاعد افكر لحد ما شعرى ابيض هه

منور

**********

الحب قبل الخبز أحيانا:

شكرا جدا على كلامك الرقيق
ومدونتك جميلة

تحياتى

**************

ليس فقيرا من يحب:

تعالى تعالى يا شيخة ده الاكل ما يحلاش الا فى اللمة
شمرى وفسخى واتبسطى
بس انا مابعرفش اشرب بيريل دى خالص بس امرى لله اجيبلك واحدة واشرب انا الشاى بتاعى بس لو عندك نعناج هاتى معاكى

منورة

***********

فتاة من الصعيد:

انا نفسى بجد اعرف اذا كنت متسامح بجد ولا مش اوى ولا مش متسامح خالص

عموما جارى الكشف والبحث الدقيق فى اعماقى
بحب زيارتك يا فتاة

تحياتى

بنجاواتى يقول...

Pink Dreams :

اتشرفت بزيارتك
ويارب فعلا نكون صادقين ويارب نكون ثابتين على الحق ساعة الفتنة

تحياتى

**********

سوتيتة هانم:

هو الموضوع قلب على مكتب صرافة ليه كده ؟؟هههههه
عموما ربنا يعفو عنا ويهدى البشر انهم يعفوا هما كمان عنا

طلعتى زييى فى اكتر حاجة ممكن تتفهم غلط يا ستوتة :)

منورة يا دكتور

***************

وردة:

واحلف على الاجحابات دى

شكرا على كلامك الجميل

اجابة اخيرة ومش هغيرها ان شاء الله

تحياتى

**************

قلب ارهقته الاحلام:

انتى اللى هايلة يا اسطورة

ربنا يكرمك يا رب

**************

الحرية للجميع:

دى مجاملة رقيقة منك :)

ربنا يقدرنى واقفل مستشفيات الجامعة دى من اساسها :)

منورة الدنيا

اقصوصه يقول...

تدوينه جميله

ومبروك التاج

تقبل تحياتي :)

قلم رصاص يقول...

ما اجمل التسامح بيننا وبين بعضناالبعض

ولكن هيكون اجمل لما يصبح جزء من ثقافتنا وموروثنا الانساني

---------

اما سيادتك بقى يادوك بخصوص انك بتحب الماما اكتر من البنجا الكبيييييير فأنا عارفك من يومك بتاع مصلحتك .. يعني مش لوجه الله .. تلاقي ده كله بسبب عشاااااء
أخر الليل .. بعد كوباية شاي محترمة ..بطة حلوة كده ماشيه عند الجيران راقتبها تيجي عشان خاطر جنابك..اه

وانت بصراحة تستاهل الدبح

هههههههههههههههههههههههه

واخد بالك انت طبعا

اعمل حسابك انا هبعت رابط البوست للبنجا الكبير ويومك مش معدي وهتتحرم من المصروف وابقى خلي كلية الطب تنفعك
ههههههههههههههههه

اجاباتك حلوة يادكتوووور

ربنا يوفقك يارب

دمت في حفظ الله

Ebraheem Aadam يقول...

ما شاء الله ,
عجبتني إجاباتك الصريحة قوي ,
خاصة اللي بالي بالك :) لأن الحال من بعضه :( ,

و مش عاوز أنسى أبدي إعجابي بستايل المدونة :)

محمد المصرى يقول...

كفاية انه بعد مالحبيب محمد تعرض له من قومه يقول
اذهبوا فانتم الطلقاء
قمة التسامح النبوى
الغريب ان ديننا بحر واسع من القيم والاخلاق لكن احنا اللى مقصرين
وبالنسبة لل10اشياء اللى انت قلتهم
يبدو الصدق واضح فى كلامك
ربنا يوفقك يا بنجاواتى
منى سلام مصرى دائما

Unknown يقول...

يكفيك حب ربك وأمك
ففيهما من الخير الكثير
ابلغ الوالدة بحبك هذا فى كل وقت
لا تكتفى بكلمـات الشكر والثناء
ولكن ابلغها حبـــك دائماً وابداً
أما ربك سبحانه وتعالى فأنه يعلم السر وأخفى ولا تكفى الكلمات لوصف
حبك بل يجب ان يقترن بالعمل.ادعو
لك الله ليقويك على العمل الصالح
وادعو لنفسى ولعموم المسلمين .

Unknown يقول...

أهنيك على ردودك الهادئة والمتزنة

ويبقى التواصل

منــار فايد يقول...

بنجواتي
ربنا يكرمك دايما يارب
على الاجابات دي
بس انا بقى ولا بطيق في حياتي الفسيخ
انا ماكلتهوش اصلا ولا مره

تقبل خالص الامنيات لك
وزادك الله
على ماانت عليه

منار

اســ الغربه ـــير يقول...

ازيك ياعم بنجواتى قولت ادخل اشوف اخويا ده طلعت بنجواتى بجد كلامك حلو بجد ومدونتك جميله اوى اخوك مشمش اسير الغربه

سمسم/سما يقول...

السلام عليكم
ازيك تاني
المرادي عندي سؤال
يعني ايه بنجواتي؟
اقصد اسم ولا تقصد بيه معنى معين

عمرو يقول...

حمله جميله و هدفها سامى ربنا يجعلها فى ميزان حسناتكم اٍن شاء الله ..
و واضح من اٍجاباتك على التاج أنك شخصيه راضيه و قانعه بما قسم الله و لكن بداخلك طموح أزعم أنك قادر بفضل المولى على تحقيقه و على بلوغ هدفك لأن الرؤيه لديك واضحه و بدون تعقيدات ..
شكرا لكم و الله على موضوع التسامح و زى ما بيقولوا البركه بالشباب :)
ربنا يسعد الجميع و تقبل تحياتى و تقديرى .ز

بنجاواتى يقول...

أقصوصة:

سعيد بزيارتك وعقبال تاجك يارب :D

***********

قلم رصاص:

ازيك يا سييى قلم يا رايق
انت الظاهر بعد ما غسلت الراجل وقطعته بقيت مرتاح نفسيا ههههههه

على فكرة الجيران بيربوا البط فى الشارع مش ع السطح (بيتحدوا الحكومة هههههه) علشان كده لا يمكن يكون ده السبب انى بحب الماما اكتر من البابا
دى عواطف (عواطف مين؟؟؟) مالهاش اسباب
والبنجا الكبير انا حبسته فى الاوضه لحد ما انزل بوست جديد ههههههههههه علشان ما يشوفش ده وساعتها انا اللى هتحبس حبس مؤبد :D

منور يا باش مهندس

************

الباش مهندس براهيم سلام:

اللى بالى بالك ده تاعب كل الناس الظاهر كده ولا ايه ههههههههه

استايل المدونة ده يا جماعة اقل حاجة عندى ههههههههههههه

منور يا باش مهندس

*****************

لنحيا فى اجواء الحب:

انا شايف ان احنا بنلاقى صعوبة فى تطبيق الاداب الدينية لضعف الدافع والرادع فى قلوبنا
يعنى لو نفكر دايما ان اى قيمة حلوة هتوصلنا الجنة واى مخالفة هتهلكنا كان زمان حالنا بقى احسن من كده

بالنسبة للاجابات انا تعبت اوى على اما لقيتهم علشان كده طلعوا تسعة بس ههه

تحياتى

بنجاواتى يقول...

نورهاتى:

حب ربنا ده شئ ربنا فطرنا عليه وحب الام ده هو اللى هياخد بايدى للجنة

يعنى الانسان اللى حبه ده مش ظاهر عليه ولا مأثر فى حياته اكيد محتاج لتصحيح بعض افكاره

اكيد طبعا الحب عمل زى ما هو كلام
منورة

*************

معتز شاهين:

سعيد بمرورك ويبقى التواصل اكيد

**************

شباك موارب:

فى اول التعليق استغربت انك مش بتخالفينى يا دكتورة منار

بس بعد كده اطمنت ان انتى اللى كاتبه التعليق لما غلطتى فى اجمل حاجة فى حياتى "الفسيخ"

حد يكره الفسيخ؟؟؟
ده الفسيخ ده لوحده كده حيااااااااة
انا هبقى اكتب بوست عن الفسيخ بس بعد ما تجربى تاكليه ولو ريحته مش مقبولة عندك ممكن تلبسى كمامة وانتى بتاكليه هههههه
مع انى شايف ان اجمل حاجة فيه ريحته ههه

منورة يا دكتور

بنجاواتى يقول...

اسير الغربة :

منور يا عم مشمش

ايه الحلاوة دى يا عم ؟؟ هو الناس لما بتسافر بيبقوا بودى بلت كده ههههههههههههه

منورنى
****************

سمسم:

مع انه اللى بيعلق تانى بيدفع ضريبة تعليق زى ما الاستاذة ليدى ربنا يصبرها ويكون فى عونها قالت
ومع ذلك سماح المرة دى بما ان البوست عن التسامح

بنجاواتى ده يا سيدى اسم لمنتج هندى ممكن تلاقيه عندك فى البيت لو عرفته اتصل على الخط الساخن وقولى الاجابة ممكن تدخل على سحب بربع جنيه :D

*************
عمرو:

اولا احييك على انك صاحى فى هذه الساعة المبكرة من اليوم
ثانيا لو احنا كشباب بنعمل حاجة كويسة فده حصاد حاجة انتم زرعتوها فينا من زمان
ثالثا مش عارف اقول ايه مع الثناء الجميل ده ...بس هقول كلمة واحدة وهى "ده العادى بتاعى "ههههههههههههه لا بجد شكرا يا عمرو وان شاء الله اشوفك فى لقاء المدونين وتكون جايب حتتين السلاح اللى اتفقنا عليهم ;)

بحبكم كلكم فى الله وبنا يجمعنا ع الخير دايما

د. ياسر عمر عبد الفتاح يقول...

جزاك الله خيراً يا بنجا بيك
تسلم الأيادي

ربنا يجعله في ميزان حسناتك

غير معرف يقول...

احلا حاجة فى موضوع التسامح والحملة بتاعته
ان اللى كتب فيه كثير لكن كل واحد
كان له بصمة فيه
ربنا يكرمك ويجعله فى ميزان حسناتك
وبالنسبةللفسيخ والسمك وكوباية الشاى
اللى تقدر تعملوه لك وتاكل صوابعك وراه وكوباية الشاى تشرب البراد كله
خالتك ام مالك يالا انوى على الزيارة وانت تشوف
تحياتى

mimi يقول...

بنجاااااااااااا

سامحني وأسامحك لأكسر صوابعك

ههههههههههههههههههه

بجد ربنا يتقبل منكم الحملة وتبقي في ميزان حسناتكم

وأنا مش بحب السمك والفسيخ يا بنجا .... بحب المكرونة...

هنقابلك يوم السبت الجاي؟؟؟

جارة القمر يقول...

جميل احساس التسامح والاقتراب من الله

الله يجزيك الخير

وجعله الله في ميزان حسناتك

prince4ever يقول...

مبورك ع التاج يا بنجواتي يا برنس
كلامك جامد و عرضت فيه فكره حلوه

ادعيلي يا عم اتخرج و ابقى بكالريوس طب زيك كده...خلينا نخلص بقى ده حاجه هم

و لازم اهل الطب يتوحدوا و يشجعوا بعض شويه و لا ايه النظام يعني

اخوك رامي سعيد... قصاصة ورق

ghorBty يقول...

السلامـ عليكمـ

التسامح كلمة تعمـ الكثير من الحب والعطاء والنقاء فليتنا نتعلمـ ونعلمـ ان ديننا دين التسامح ..

جزاك الله خيرا بنجاواتي ويسر الله لك امرك وجعل كل حياتك اشياء صادقه ونقيه ..

اما بالنسبه للسؤال المتروك لنا فانا اقول ..

هذا البوست ماشي علي نظامـ عصفورين بحجر واحد ما شاء الله ....

بنجاواتى يقول...

د/ياسر:

ربنا يتقبل منى ومنك ويجمعنا على الخير دايما

عامل ايه فى الشغل يا دكتور؟؟؟
يا رب تكون مرتاح كده وكله تمام

************

أم مالك ومصطفى (اللى هو انا ):

فعلا هى كانت حملة جميلة وربنا يجازى شيمو عنها خير

نيجى بقى للمهم ..الا وهو العزومة

بما انى كنت بتلكك انى اتعزم عندك وبتلكك انى اشوفك واقابل ابو مالك ربنا يحفظه يبقى انتى دبستى نفسك فى عزومة حلوة

وانا متأكد ان الفسيخ من ايدك هيكون له طعم تانى خالص

بس هنأجل العزومة دى شوية لحد ما آخد البكالريوس بإذن الله بعد كام شهر كده وساعتها مطلوب عزومة لشخصين مش شخص واحد او بمعنى اصح شخص وشخصاية

ان شاء الله يكون ربنا يسر لى وموضوعى ماشى واجيلك ومعايا خطيبتى(اللى انا لسه ما خطبتهاش) اللى لازم واجبارى تتعرف عليكى وتكون بنتك

ملحوظة صغننة: أحمد مش هيقعد معانا علشان هى مش بتتكشف على اغراب ...ثم ان أحمد ما شاء الله واد عسولة وانا خايف ع البنية هههههه

ربنا يخليكى يا رب

**************

ميمايا:

لا يا ستى تكسرى صوابعى على ايه
انا مسامح يا ستى

بالله عليكى فى حد مصرى يحب المكرونة وما يحبش الفسيخ؟؟؟..رومانيا غيرتك اوى

ان شاء الله اكون فى اللقاء بإذن الله

********************

جارة القمر:

منورة البوست

وربنا يتقبل منك ومن كل الناس

تحياتى

**********

زميل الكفاح وعضو جمعية صامدون حتى النهاية الدكتور الشبل رامى سعيد:

ان شاء الله تاخد بكالريوس وتبقى ضاكتور قد الدنيا
بس ماا تستعجلش اوى كده

انا على فكرة لسه فى سنة البكالريوس وان شاء الله اخلص قريب ومش قادر اوصفلك احساسى الى داخل فى بعضه...لكن عموما احساس الترقب ده مؤلم وعلى رأى المثل وقوع الحاجة اللى مش حلوة ولا اننا نقعد مستنيين انها تقع علينا هههه

سلام

****************

اميرة غربتى::

يا رب امين
دعواتك جميلة يا اميرة ربنا يتقبل منك يا رب ويرزقك التسامح

ومبروك على الوظيفة الجديدة ومستنى السبعين فى المية عمولة هههههههه

هو فعلا عصفورين بحجر بس مش بمزاجى اصل العصافير شاحة اليومين دول

غير معرف يقول...

بوست رااائع الصراحة

انا الحمد لله متسامحة مع نفسي ومع الجميع مش بحقد على حد وعلطول بنسى الاساءة

واجاباتك عرفتنا عليك اكتر واكتر

ربنا يوفقك ويسعدك يارب

تحياتي

۩۝۩ Dr. Flavio ۩۝۩ يقول...

-حاجة نفسى اغيرها فى نفسى وهى ان مواعيدى مضروبة خالص ...... يمكن ما بقتش كده الا بعد ما كبرت وزهقت من كتر الالتزام بالمواعيد فى ظل مجتمع يقدر غير المنضبطين اكتر من المنضبطين



آل زهقت من الانضباط آل هع هع هع هع

يا بني بعون الله انت عمرك ما كنت منضبط في مواعيدك ... واسألوني أنا

بس صدقني لو المجتمع بيقدر الغير منضبطين فده نتيجة خلل فيه مش فيهم

كفايه عليك كده