الجمعة، 24 يوليو، 2009

نشتاق إلى الجنة

بسم الله الرحمن الرحيم



ازيكم...يا رب تكونوا كلكم بخير .... أنا عايز أسأل سؤال


عمرك عشت فى بلد تانية أحسن من بلدك ومع ذلك اشتقت لبلدك؟؟؟

طيب عمرك اشتقت لشقتك القديمة بعد ما نقلت لشقة جديدة؟؟؟؟

طيب عمرك اشتقت انك ترجع بيتك بعد أسبوع من الغياب عنه؟؟؟


ياترى احنا ليه اشتقنا للأماكن دى مع اننا موجودين فى أماكن أحسن منها "بالمقاييس المادية"؟؟؟

ومادام احنا لسه بنعرف نشتاق ياترى ليه مش بنشتاق للجنة اوى زى ما بنشتاق للحاجات دى؟؟؟؟


هتقولى أنا بشتاق للجنة ...مين قال إنى مش بشتاق للجنة؟؟؟؟

هقولك أنا كمان بشتاق للجنة ....


بس بشتاق لها لما أكون ماشى فى الحر والدنيا شمس بفتكر ساعتها إن الجنة مفيهاش الشمس دى

وبفتكرها والدنيا برد وبقول برضه الجنة مفيهاش البرد ده

وبشتاق لها لما حد يظلمنى .. وبفتكرها ساعة الأكل ... وساعة النوم ... ولما بتمنّى زوجة جميلة.... وبشتاق لها فى مواقف تانية كتير ...


لكن من غير المواقف دى الجنة ما بتجيش على بالى.... واسأل نفسى وأقول : هو الجنة مش أحسن من الدنيا ؟؟؟

طيب ازاى بتشتاق لحاجات أقل فى الدنيا وناسى الجنة اللى هى أحسن من أى دنيا؟؟؟؟


اكتشفت إن أنا بشتاق للنعيم المادى فى الجنة فى حين انى لما اشتقت لحاجات فى الدنيا كانت الحاجات دى خسرانة بالمقاييس المادية


يبقى الظاهر اننا مش بنشتاق للأمور المادية ..... مش بنشتاق للأماكن .... ولو فضلِت دى نظرتنا للجنة يبقى عمرنا ما هنشتاق لها


الظاهر إننا بنشتاق لأهل بلدنا ... لجيرانا بتوع شقتنا القديمة.... بنشتاق لأهل بيتنا لما غبنا عنهم

بنشتاق للأشخاص مش الأماكن .... بنحب الأشخاص ونحب نشاركهم مشاعرهم وذكرياتهم ...بنحب نشوفهم ونعيش معاهم مش مع الأماكن

دلوقت أنا فهمت ليه الصحابة كانوا دايما مشتاقين للجنة....لأنهم مشتاقين لأصحابهم فى الجنة

علشان كده سيدنا بلال وهو بيموت قال : غدا نلقى الأحبة محمدا وصحبه (وحزبه)

فكر فى الجنة على إنها الصحبة مش حاجة تانية


يبقى الظاهر إن أنا مش هشتاق للجنة إلا لما يكون ليا فيها أهل وأصحاب وذكريات ومشاعر


بس هو مين أهلى فى الجنة؟؟؟؟ ومين أصحابى فى الجنة؟؟؟؟

ايه ده؟!!! ده أنا عمرى ما جاوبت على السؤال ده......... بس آن الأوان إنى أجاوب .... آن الأوان إنى أعرف أصحابى فى الجنة



أيوة أنا دلوقت عارف مين أصحابى فى الجنة وهقولكم عليهم كمان ....

أنا هصاحب بلال وهخليه يحكى لى عن أُمية بن خلف وعن تعذيبه له وازاى بلال قتله فى يوم بدر ...وهيحكى لى عن اول أذان فى الإسلام وإحساسه كان ازاى


وهصاحب مصعب بن عمير ..مصعب الخير..سفير الإسلام الأول ...وهيحكى لى ازاى حياته اتحولت الى النقيض بعد ما عرف الحق وازاى قدر لوحده انه يجهز المدينة لقدوم النبى صلى الله عليه وسلم وينشر الدعوة بين الانصار


دلوقت أنا مشتاق إنى أقعد مع النبى صلى الله عليه وسلم وأول ما هقعد معاه صلى الله عليه وسلم هاخد راسه على كتفى واخليه يحكيلى عن يوم الطائف ويوم الإفك ويوم أُحد ويوم الفتح وحاجات كتييير....بس مش عارف ازاى هايجيلى عين أعمل كده بعد ما شافنى وأنا بقرا كتابى والذنوب فيه أشكال وألوان ..........


رجاء محدش يعلق الا لما يقول عن اصحابه فى الجنة هيبقوا مين .... حتى لو مش لازم تعلق بس آن الأوان إنك تعرف "بالأسامى" مين أصحابك فى الجنة .....

هناك 36 تعليقًا:

۩۝۩ Dr. Flavio ۩۝۩ يقول...

ازيك يا واد يا بنجا

أخبارك ايه؟؟

بقي كده يا واد ... مش عايزني أبقى معاك في الجنه

ده انا أول ما سألوني السؤال ده قلن لازم بنجا يكون موجود ورجلي على رجله عشان انا واثق انه يحب يكون مع الرسول وصحابته الكرام

بس بقى اوعى يا بنجا ... انا زعلان منك

صالحني بقى وادعي ربنا يجمعنا بيهم في جنته ورضوانه

THE illusionist يقول...

فعلا كلامك صح جدا
حتى عارف
احنا مش بنشتاق لنعيم الجنه ولا بنخاف من النار
لاننا مجربناش الاتنين
بنفكر فيهم بس
واللى بنتخيله فيها
هو اللى شفناه فى الدنيا
لكن مع ذلك
انا نفسى ابقى مع خالد ابن الوليد رضى الله عنه
ويحكيلى عن معاركه
وخططه الحربيه
واقعد مع الخليفه الفاروق
عمر بن الخطاب
يحكيلى عن حياته
وعن باسه الشديد وازاى حوله لعدل بين الناس
واقعد مع جعفر بن ابى طالب
يوصفلى معركه مؤته
وازاى ايمانه كان قوى
لدرجه ان ايديه الاتنين اتقطعوا
ومسك الرايه
واخيرا
اقعد مع اسامه بن زيد
واعرف ليه كان الحب بن الحب عند رسول الله
واعرف ازاى تولى قياده جيش المسلمين فى معركه مؤته
وهو بالنسبه لسننا طفل
بس بالنسبه للرسول
كان راجل وفارس
وبس
انت قولت الصحابه
صح
لكن لو على الرسول
نفسى اشوفه بس
اى حاجه
بس اشوف وجهه الكريم

أحمد الصعيدي يقول...

السلام عليكم ورحمة الله

بإذن الله سيكون صديقي في الجنة معاذ بن جبل

روى البخاري ومسلم من حديث معاذ بن جبل رضي الله عنه قال كنت رديف النبي صلي الله عليه وسلم يوما على حمار فقال النبي لمعاذ ( يا معاذ قلت لبيك يا رسول الله وسعديك قال أتدري ما حق الله على العباد وما حق العباد على الله قال معاذ الله ورسوله اعلم فقال صلي الله عليه وسلم: حق الله على العباد أن يعبدوه ولا يشركوا به شيئا وحق العباد على الله ألا يعذب من لا يشرك به شيئا قال معاذ قلت أفلا أبشر الناس يا رسول الله قال لا ، لا تبشرهم فيتكلوا)
فأخبر بها معاذ بن جبل عند موته تأثما أي خشية من وقوعه في إثم لكتمان العلم عن رسول الله صلي الله عليه وسلم .

فنحن نعبد الله تبارك وتعالى لأنه يستحق أن يعبد .. وطلبًا لجنته وخوفًا من ناره.

أدخلنا الله وأدخلكم الجنة بغير سابقة عذاب

ستيته حسب الله الحمش يقول...

الأول جالي خاطرتين اتنين والأتنين حاجة واحدة بس بتفسيرين

انا بقول ايه؟

الأول ربنا سبحانه وتعالى فسر نفسنا البشرية وقال "خوفا وطمعا"
آه طبيعي لما نتلسع من نار البوتاجاز والا من حر الصيف على قفانا إننا على طول بنقول "اللهم أجرنا من النار"
وطبيعي لما حد يطلع عينا والا الدنيا تورينا العسر اننا نسأل ربنا الدرجات العلى من الجنة .. آمين

دي طبيعة النفس البشرية

الخاطرة التانية اللي متصلة بالأولانية
ان حب رابعة العدوية لربنا كل أهل العلم قالوا إن كلمها غير منطقي
لما قالت إنها بتحب ربنا حبا فيه لا خوفا من ناره ولا طمعا في جنته

الخاطرة التالتة ودي برضه مع الأتنين التانين لما حد بيقول انه بيحب واحد حب أفلاطوني برررررررررررضه بنديه على قفاه
لأن مفيش حب أفلاطوني
الحب هو خوفا من وحدة
وطمعا في بي إم دابليو من جانب الست
وطمعا في حاجات أهم من البي إم دابليو من جانب الراجل

إن شاء الله ها أدخل الجنة دون سابقة عذاب أو مناقشة حساب لأننا إن نوقشنا عُذبنا والعياذ بالله
وإن شاء الله ربنا ها يسترنا فوق الأرض وتحت الأرض ويوم العرض عليه

مين صحابي في الجنة؟ اللي لما أحب أشوفهم ربنا ها يرفعني لمكانتهم أقعد معاهم وأرجع لمكانتي تاني؟

سيدنا عمر بن الخطاب
آه لازم أشوف الراجل اللي بسهولة شديدة كان يفرق الحق من الباطل
وكان الشيطان لا يمشي معه في طريق واحد
واللي ربنا سبحانه وتعالى صَّدق على قوله للرسول أكثر من مرة
مرة ساعة أخذ الرسول للأسرى
ومرة ساعة حجاب أمهات المسلمين

اللهم صلي على رسولنا الكريم وارض عن ساداتنا الصحابة العدول

وكمان عاوزة أشوف البراء
اللي هو رب اشعث اغبر اذا اقسم على الله ابره

ربنا ما يحرمنا يا بنجا

تحياتي

ديالا يقول...

بنجاواتي

تصدق فعلا كل كلامك صح

بس بجد انا نفسي ادخل الجنه واشوف الرسول محمد صلي الله عليه وسلم الرسول العظيم الي احنا اتبعنا دينه واسلمنا بيه من غير مانشوفه

نفسي ادخل الجنه عشان ربنا لما يوقفنا ادامه ويقولنا نفسكوا في ايه نقوله نشوف وجهك يارب

يااااااااااااااه بجد انا مستنيه اللحظه دي اوي

بوست هايل بابنجا

ومرسيه علي كل سنه وانا طيبه الي انت قلتلهالي

ويارب العمر الطويل ليا وليك

ALHAYAH يقول...

اول زياره لى

انا مدون جديد واتمنى ان نتبادل الزيارت

موضوع جميل عن الجنه

اتمنى ان نكون جميعا بها

اريد ان اضيف نقطه هامه فى راى الخاص ان الله سبحانه وتعالى يريدنا ان نحب بعض وان نقاوم الكراهيه والعنف الموجودين الان

حتى تكون حياتنا جنه

يجب ان نفكر فى الحياه وليس العالم الاخر فقط

تحياتى

Somaya Kamal El Din يقول...

عاوزة اقابل السيدة مريم انا بحبها اووووى

ونفسى لو الرسول يوافق يقابلنى

احساس طفلة محبة للرومانسية بس واقعية يقول...

مرتبط معايا الاشتياق للجنة والبعد عن النار بالخوف من العذاب دا اكيد فى نفوسنا كلنا بس بؤمن ان الخوف دا مش بيجى غير لما الانسان يحب ربنا اوى ويعلم مدى قدرتة سبحانة وتعالى فيخشاة

ان شاء الله لو ربنا اراد وكان عملنا صالح ودخلنا الجنة اتمنى انى اصاحب

سيدنا محمد
واسمع منه لحظة نزول الوحى علية
مش عايزة اقراها او اسمعها من حد
عايزة اشوف تعبير ووجه المصطفى صلى الله علية وسلم وملامحة وهو بيقول كل حاجة انا عرفاها وسمعتها وكل حاجة انا معرفهاش عايزة اسئلة على اصبتة فى غزوة أُحد

ماشطة بنت فرعون
يااااااه على الست دى
عايزة اعرف هى صبرت ازاى
عايزة اعرف حياتها كانت ازاى عشان ايمانها يكون بالشكل دا

سيدنا عمر بن الخطاب
عايزة اعرف منه الكثير والكثير عن حكمة وافعالة عن جلساتة هو والصحابة مع رسول الله عن اسلامة واحساسة
عايزة اسمع عن الاسلام فى الفترة دى منه ومنه كل صحابى

شكرا يا بينجا على الموضوع القيم دا
قيم بتذكرة كل واحد واثارة تفكيرة فى اشياء ايجابية وروحانية ربنا يجازيك خير

تقبل مرورى

ميمي وأحمد يقول...

عندنا حفلة

وبدأت

وأسمك مكتوب

شباك موارب يقول...

اصاحب مين في الجنه
مش عارفه مش هي المشكله
المشكله ياترى اللي هصاحبهم
هبرضوا يصاحبوني
وعلى ايه؟؟
شايفين فيا ايه
انا بتمنى ربنا يجمعني بكل اللي بحبهم في الجنه...
لو هنتكلم على مستوى الصحابه
فاكيد نفسي اشوف الرسول يااااااه



منـــــــار

لقد خلقنا الله احرارا يقول...

تدوينه رائعة
ومدخل جديد للتفكير فى الجنة
مخطرش على بالى قبل كده
معلش هى اول مرة بس اسمح لى ارغى شوية
تفكيرى فى الجنةزمان كان الاكل والشرب والشجر
ولماكبرت شوية
بقت الجنة المكان اللى مفيهوش قلق ولاخوف ولاغدر
المكان اللى هقعد فيه مع احبابى من غير ماحد يضايقنا من غير مااخاف من الموت او المرض يحرمنا من بعض
دراستى للتاريخ خليتنى نفسى اشوف فى الجنة احداث معينه مش الجنه فيها مانشتهى ؟
نفسى اشوف سيدنا الحسين وابدى له اعجابى بشجاعته
وسيدنا عثمان لما استشهد
وقطز فى عين جالوت
وام سيدنا موسى لما ربنا رجعه ليها تانى
وسيدنا موسى لما وصل مدين وقعد فى ظل الشجرة يقول رب انى لما انزلت الى من خير فقير

و عرابى مثلا وهو بيطلب طلبات الشعب من الخديوى

و سيدنا موسى لما ضرب البحر بعصاه ولما رمى الالواح

نفسى اشوف النبى صلى الله عليه وسلم يوم صلح الحديبية ويوم فتح مكةوالطائف زى ماحضرتك قلت
بس مش عايزة احضر الافك

بس كل مااسمع حد بيدع ربنا يرزقه مرافقة النبى فى الجنة
احس انى مستاهلش الحلم ده
اللى بجد نفسى اشوفه سيدنا عمربن الخطاب
عايزة اشوف شكله واحضر مواقفه المشهودة

يارب تكون التدوينة دى سبب فى تغيير نظرتى للجنة

اللهم ارزقنا الجنة ومايقرب اليها من قول اوعمل

اسفة جدا على الاطالة

د. ياسر عمر عبد الفتاح يقول...

أه الجنة
اللهم ارزقنا الجنة بغير حساب ولا سابقة عذاب
لازم طبعاً نشتاق لبيتنا
أه أصل الجنة دي بيتنا وانطردنا منها بسبب الذنوب .. ونزلنا الأرض عقاباً

طيب هصاحب مين في الجنة
طبعاً النبي صلي الله عليه وسلم
ده أنا مش هسيبه خالص إن شاء الله
وفيه بقي واحد تاني ناس كثير متعرفهوش
بس أنا بحبه في الله .. هوه مش صحابي هوه تابعي .. أسأل الله أن يجمعني به في الجنة
هوه الأحنف بن قيس

سيدنا أبو بكر .. شايفه شيخ طيب وحكيم .. عاوز أعرف وصل للمكانة دي ازاي ,, وليه بقي أفضل البشر بعد الأنبياء والمرسلين
بعد كده سيدنا عمر بن الخطاب عاوز أعرف هوه شكله زي ما شفته في الحلم ولا لا؟ مع إني أصلاً مقدرتش أبين معالمه
وخالد بن الوليد وعلي بن أبي طالب
وسيدنا عثمان نفسي أسأله عن حادثة قتله وليه عملوا فيه كل ده؟
وأقوله متزعلش من اللي حصل
سعد بن أبي وقاص .. عاوزه يحكيلي عن فتوحاته
عاوز كمان أشوف أمنا السيدة عائشة .. وهل هيه زي ما شفتها في الحلم ولا مختلفة؟
كلهم يعني .. مش هسيب حد منهم

سمسم يقول...

السلام عليكم
اوووووول زياره
وانشالله يا رب
يجعل الكلام في ميزان حسناتك
ونشوفكم بالجنة
ربنا يدخلنا الجنة دون حساب ولا عذاب
جميعا انشاء الله
نكون مع الرسول صلى الله عليه وسلم
تحت عرش الرحمن
اللهم امييييييييييين

اتمني الشهادة يقول...

السلام عليكم ورحمة الله وبركاته

اولا جزاك الله خيرا علي هذه المدونه الرائعه ما شاء الله

ثانياً بالنسبه للي بتمني اكون معهم في الجنه باذن الله فاتمني اكون مع الصديقين والنبين والشهداء وحسن أولئك رفيقا...
ربنا يكتبلنا أن نحشر معهم ويرزقنا العمل الذي به نستحق هذا المكان ومتعنا الله بالنظر لوجهه الكريم الذي لم يذق المؤمن لذة اكبر منها

احلم أن اري سيدنا عمر بن الخطاب الفاروق وأساله كيف فتح الاقصي دون قتال

واقابل صلاح الدين واقول له عذرا فقد ضيعنا ما امنتنا عليه ضيعنا القدس

واري ابو ذر الغفاري من عاش وحيدا ومات وحيدا ويبعث يوم القيامة وحيدا

واقابل إمامي ابي حنيفة النعمان من درست مذهبه وعشقته وملأت عقلي بفكرة

اعتذر عن الاطاله فما اتمناه الكثير

لا اجد تعليقاً علي هذا الموضوع غير جزاك الله الجنة دون حساب ففكنت من نال شفاعة النبي صلح الله عليه وسلم
واسالك لا تنسانا في هذا اليوم
رزقك الله وكل مار علي مدونك السعاده والصلاح في الدنيا والأخرة

ذو الوجه المبتسم يقول...

السلام عليكم
ربنا يجمع كل المسلمين فى الجنة
بصراحة موضوع جميل
ربنا يبارك فيك
تقبلى تحياتى

عاشقة الأحزان يقول...

السلام عليكم ورحمة الله وبركاته


ربنا يارب يكرمك خير على المووضوع الجميل ده

بجد كلنا مشتقين قووووووووووووووووى

يارب اكرمنا يارب

واغفر لنا وسامحنا ونشوف اللحظه دى

احيك على ما كتبت لنا

جعلها الله بميزان حسانتك

تحياتى وشكرا على المرور الكريم

ايناس

قلم رصاص يقول...

السلام عليكم ورحمة الله وبركاته

رسالتك وصلت الى هدفها يادكتور

ومغزاها عميق جدا

بارك الله فيك

والله تعالى أسأل أن يجمعنا في الجنة بمن نحب وبكل المسلمين يارب العالمين

دمت في حفظ الله

وردة يقول...

انا بقي خفت اوووي من البوست ده
مش عارفة ليه
لاء عارفة
حسيت ان لو حان اجلي دلوقتي
مش حكون مستعدة
حعمل ايه ولا حقول ايه
ازاي حختار اصحابي من الرفقة الصالحة وان مش يعمل زيهم
مقصرة لاقصي رجة
بج خايفة اووووي
..
..
..
..
..
سلام

موناليزا يقول...

ياااه:)
ما اجمله من موضوع
حقاً اشتاق للجنة طول الوقت
يارب اسألك رضاك والجنة

عن اصحابى ياسيدى بإذن الله سيكونوا
1- رسولنا الحبيب صلوات الله وسلمه عليه:
وهقوله ليه الناس اللى انا كنت بتعامل معاهم فى الدنيا مكنوش بيقلدوك
2- عثمان بن عفان: وهقوله كان عندى احساس غريب وانا فى الدنيا انى حفيدتك
3- فاطمة بنت محمد :وأقولها قد ايه كان عندك أعظم أب
4- السيدة مريم مش عارفة هقولها ايه بس عايزة احضنها
5-خالد بن الوليد: مش عارفة هقوله ايه بس عايزة اشوفه
6-سيدنا يوسف: هقوله كنت دايما قصادى مثال للصبر على الظلم
7-السيدة عائشة: هقولها يا بختك بحب زوجك صلى الله عليه وسلم ليكِ
8-آسيا امرأة فرعون: هقولها كنتِ شجاعة أوى
9- أصحاب الاخدود: وجعتوا قلبى فى الدنيا لما عرفت اللى حصلكم وعرفت قد ايه انتوا غاليين اوى
10-الرجل الصالح اللى ذكر فى سورة يس ولم يذكر اسمه: هقوله كنت بحب كلمتك اوى"ياليت قومى يعلمون"

سأكتفى بهذا القدر عندكم فقط حتى اعطى لغيرى المساحة فى التعليق
ففى الجنة أطمع أن ارى الكثيرين ممن أحببتهم وأخذتهم قدوة لى

ربنا يكرمك على هذا الموضوع المميز جداً

شريكة في المطعم يقول...

السلام عليكم ورحمة الله وبركاته

كلامك صحيح جدا...دايما بنفكر كده
واكيد كلنا نتمنى ربنا يجمعنا
مع النبي صلى الله عليه وسلم
في الجنة واهله والصحابة
أسأل الله أن يجمعنا في الجنة بمن نحب وبكل المسلمين يارب العالمين
ربنا يوفقك ويكرمك

أم مالك يقول...

الله الله على الجنة وروائحها
خاصة فى هذه الايام المباركة
عارف يامصطفى انا كثير بدعى ان
اكون من اهل الجنة لليس للتنعم بنعيمها من مأكل وملبس وخلافه بقدر
التنعم برؤية ربى صاحب النعم والذى
هو نعم الرب ثم رؤية رسوله امر مفروغ منه ولكن علشان احنا لسة مخلصين دراسة
السيرة فى المسجد ففيه اشخاص كثيرة نفسى اراها ومنها بنت ابيها فاطمة الزهراء
وزوجها على بن ابى طالب
كذلك حبيبة المصطفى عائشة وابيها
كذلكاكبر سند للرسول صلى الله عليه وسلم
السيدة خديجةرضى الله عنها
ومن اهل الدنيا كل الصحبة الطيبة
ويارب يامصطفى اكون انا وانت وجميع المدونين الصالحين من اهلها ونتقابل هناك
بوست مريح جدا
دمت بخير

فتاه من الصعيد يقول...

الله ..... بوست رائع
انا بشتاق للسيده مريم ..... والسيده آسيا اللي نفسي أسألها ازاي تركت كل المجد والغنى من أجل الأيمان ....وطبعا زوجات الرسول والسيده فاطمه وكل بنات الرسول

نفسي اسمع صوت سيدنا ابن مسعود في القرأن ..... وأسمع صوت سيدنا بلال في الأدآن

وأشتقت بجد لأني اشوف سيدنا أبو بكر .... والفاروق ....وعثمان .... وعلي رضي الله عنهم جميعا ..... وعندي أسأله كتيييييييييييييير ليهم.

نفسي اشوف سليمان الفارسي رضي الله عنه ..... علشان أسمع حكايته في البحث عن الحقيقه ..... وما تكبده من عناء ..... وما تركه من رغد العيش في سبيل ذلك

وطبعا أشتقت للرسول صلى الله عليه وسلم ..... بجد أشتقت أليه ....... من أضاء النيا بنوره ...... وتركنا على المحاجه البيضاء
الهم ارزقنا شفاعته وصحبته في الفردوس الأعلى ....آمين

فشكووول يقول...

نيجاواتى
تحياتى

اللهم بلغنا الجنه واجزيك خيرا على هذا البوست

تحياتى

ليس فقيرا من يحب يقول...

السلام عليكم
الجنه انا بقه واثقة ومتاكده انى باذن الله هادخل الجنه علشان ربنا سبحانه وتعالى بيقول فى حديثه القدسى انا عند ظن عبدى بى وان شاء الله لما ادخل الجنه
اتمنى اقعد مع سيد الخلق رسولنا محمد صلى الله عليه وسلم
سيدنا ابو بكر الصديق
سيدنا يوسف نفسى اسمع منه قصته وازاى قدر يقاوم المغريات اللى ربنا ابتلاه بيها واحساسه ايه لما اخواته قالو (ان يسرق فقد سرق اخ له من قبل)نفسى اسأل سيدنا يوسف اسئله كتير جدا

السيده خديجة رضى الله عنها
السيده فاطمه الزهراء سيده نساءاهل الجنه
سيدنا ايوب وزوجته
ابو ذر الغفارى امير الزهاد
سيدنا على بن ابى طالب


اسأل الله الكريم رب العرش العظيم ان يجمعنا ومن نحب فى الجنه وان يمتعنا بلذة النظر لوجه الله الكريم

موضوع طيب وفكرة مختلفه

تقبل تحياتى

تامر علي يقول...

للأسف مقدرش أجزم بأصحابي في الجنة من اللي أعرفهم حالياً لأن ده خارج سلطاتي :)

لكن ممكن أقول إني أتمنى أن أكون مع الفاموليا كلها وبعض أصدقاء (السوق) :))

موضوع جميل ومميز

تحياتي لك دائماً وجعله الله في ميزان الحسنات

ঔღঔ نـــوارة ঔღঔ يقول...

راااااائع يابنجا كالعادة

ربنا يباركلك على كلامك الجميل الي كله حكم ومواعظ

انا عن نفسي نفسي ادخل الجنة وارتاح كدا واطمن اني دخلتها برجلي اليمين

وبعد كام سنة هفكر في الباقي :]

بجد نفسي اشووف سيدنا محمد صلى الله عليه وسلم واسمتعت بصحبته ونفسي اشوف سيدنا يوسف واشوف جماله الي بنسمع عنه دايما ونفسي كمان اشوف سيدنا عيسى رضى الله عنهم

من الصحابة عمر بن الخطاب وخالد بن الوليد

وابي بكر و السيدة خديجة وعائشة

كتير اووووووي من الصحابة الي حبيتهم من افعالهم

ربنا يجمعنا بيهم يارب ويجمعني بكل الناس الي بحبهم يارب

بوست هايل بجد

ربنا يخليك

MaNoOoSh يقول...

طبعا نفسي ربنا يكرمني برؤية وجهه ووجه المصطفي عليه الصلاة والسلام ووجوه الأنبياء كلهم
وأمهات المؤمنين كمان

عمرو يقول...

الله الله
ربنا يجعلنا من أهل الجنه جميعا آمين يا رب ..
تصدق البوست ده من أحلى و أرق البوستات اللى قريتها فى البلوجر .. و أجاش فى نفسى كده أحاسيس صعب وصفها لكنها أحاسيس شفافه و رقيقه أوى مش عارف ليه ..
طبعا أتمنى من كل أعماق قلبى أن يدخلنى المولى جنته برحمته هو سبحانه و أن أنال صحبة سيدنا النبى عليه الصلاة و السلام ..
و أطمع كمان أكون مع من أحب قلبى فى الدنيا ..
و صدقنى لو قلت لك عاوز أبقى معاك فى الجنه و نفتكر البوست ده :)
سبحان الله مين عارف ؟؟
وسعت رحمته كل شىء ..
تقبل تحياتى و تقديرى ..

صبرني يارب يقول...

والله الواحد مكسوف مكسوف يقول اتمنى رفقة الحبيب المصطفى

بس املنا فى رحمة الله بقى


موضوع هايل يا بنجاواتي فعلا ربنا يكرمك

صوت من مصر يقول...

كلام هايل مش لقيله تعليق

فشكووول يقول...

طبعا خالتك عامله تعليق محترم وكبير .. اصل حتى المدونات فيها خواطر وواسطه ولا عشان هى خالتك يعنى

وتحياتى لك ومن عندك لستيته الحمش

لنحيا فى اجواء الحب يقول...

تصدق انك عرفتنى احساساسات ماكنتش منتبه ليها فعلا احنا فى ايدينا حاجات مابنحسش بيها ولفت نظرى كلمة قالها واحد "الجنة طريقها سهل بس احنا اللى بنخليه صعب" منى السلام يابنجاواتى وبجد ربنا يوفقك ومنى سلام
مصرى مسلم دائما

آيوشة يقول...

ربنا يكرمك بالفردوس الاعلى كمان باذن الله بوست جميل وكفاية التعليقات دى كلها قالت كل حاجة

حـــلـــم كــــان يقول...

يارب انا عايزه الجنه وهما كمان عايزين الجنه ارزقنا بيها يارب

akeed يقول...

اولاً تحياتى الحارة جداً على هذا الموضوع الغاية فى الروعه جعله الله فى ميزان حسناتك انا طبعاً نفسى يكون فيه ناس كتير اصحابى نفسى اشوفم واجلس معهم و طبعاً اول انسان اريد انا اراه و ابكى من شدة الفرحة هو الحبيب رسول الله محمد صلى الله عليه وسلم وايضاً اشتاق ان ارى سيدنا ابو بكر الصديق وعمر و على و عثمان بن عفان و ايضاً اريد ان ارى الصحابى القعقاع بن عمرو الذى صوتة بالف رجل و لا يهزم جيش فيه القعقاع .
واريد ان ارى سيدنا حمزة و كيف قتله وحشى سيدنا وحشى لانه اسلم و حسن اسلامة و يحكى كيف قتل مسيلمه الكذاب بنفس الحربة التى قلت بها سيدنا حمزة و ايضاً الصحابى سالم مولى ابى حذيفة من اروع حملة القرأء الكريم و الشهيد الطيار جعفر بن بى طالب و الصحابى الجليل انس بن النضر الذى نزلت فيه اية فى غزوة احد عندما استشهد " رجال صدقوا ما عاهدو الله علية فمنهم من قضى نحبه ومنهم من ينتظر وما بدلو تبديلا "

و سيف الله المسلول سيدنا خالد بن الوليد و قائد معركة القادسية سيدنا سعد بن ابى وقاص و كثيرين اذا كتب لم تكفى سنوات لاكتب عن هذا الجيل الذى حافظ لنا على الاسلام و اوصلة لنا بدماؤهم .



و لاكن نقف وقفه هامة جداً ان الجنة غالية الا ان سلعة الله غالية فيجب العمل بكل جهد للوصول اليها بالاجتهاد بالطاعات و خاصة فى هذه الايام و شهر رمضان المقبل اللهم بلغنا رمضان .


ادعوك لزيارة مدونتى واخذ المسابقة الموجودة بها لتستفيد منها و توزعها على الاصدقاء والاهل و الاقارب

وجزاك الله خيراً اخى فى الله

نيوز فلسطين يقول...

اعـــلان هـــام >>>
للأصحاب المواقع والمنتديات والمدونات الالكترونية الراغبين بالمشاركة بدعم الاعلامى للحملة رمضان الخير
تعلن رابطة شباب فلسطين الخيرية للسادة أصحاب المواقع والمنتديات والمدونات الراغبين بالمشاركة
بالحملة الاعلامية الداعمة للحملة رمضان الخير.
اعلامنا بذلك كى يتم ارسال كود البانر الخاص بالحملة اليهم ووضعه فى مواقعهم اضافة الى وضع مواقعهم فى قائمة الشرف
للاعلامنا يرجى مراسلتنا من خلال البريد الالكتروني
pals-2007@hotmail.com
pale2070@yahoo.com
http://www.rpales.com/play-188.html
معاوسوياً من أجل رسم الابتسامة على شفاه المحاصرين
رابطة شباب فلسطين الخيرية
غزة المحاصرة