الأحد، 19 يوليو، 2009

من قبيل التقبيل + تحديث

بسم الله الرحمن الرحيم


تحديث: دلوقت أنا شايف ان ما شاء الله الناس اللى بتقرا الموضوع شايفين ان دى معاملة طيبة ووجودها له تأثير ايجابى على كل اللى فى البيت.....طيب الناس اللى متجوزين منكم ليه ما فكروش يعملوا كده ولا التعبير عن المشاعر بقى عيب ولا ايه؟؟؟؟ ...وانت او انتى ما تفرحش اوى وتقول الحمد لله مش متجوز.. ايوة مش متجوزين بس ربنا يخلى لكم أبهاتكم وأمهاتكم وتخلوا بينهم المشاعر الطيبة دى ... من النهاردة مش هنسيب حقنا .. آآآآنا الحكومة هههه


جهزت أمى الطعام وجلسنا جميعا على المائدة فى انتظار قيام أبى الى المائدة كى نبدأ فى الطعام وكعادته ينقل أبى كرسيه من على رأس المائدة ليضعه بجوار كرسى أمى وكعادته أيضا قبل أن يبدأ فى الطعام يضع قبلة على خد أمى ....تلك القبلة التى كأنما يضعها فى قلبى وقلب اخوتى فتملأ قلوبنا دفأ وطمأنينة ... ولكنه هذه المرة أضاف قبلة ثانية.... وقد زاغت عينه إلى أقصى يمينه ناظرا ألىّ وهو يقبل الثانية ...وما كاد يفرغ من وضعها على خد أمى فى حنان حتى دار الحوار كالآتى.....


بنجا الصغير: الله يسهله يا عم ........إيه يا حجّوج – دلع حاج- إيه الحلاوة دى؟؟ ..يعنى مزود الدوز النهاردة وعامل جو سينتمنتال آخر حاجة....ماشى يا سيدى


الحاج بنجا الكبير:شايفة ابنك يا ستى؟؟؟...أنا قلت مش هسلم من أبو لسانين ده أبدا... خليك فى حالك ومش عايزين نأ لو سمحت.....


بنجا: نأ ايه بس ... هو انت بيهمك حسد ولا اى حاجة من دى يا حجوج...ده انت ما شاء الله -اللهم لا حسد يعنى- بتبوس من خمسة وعشرين سنة ولسه شغال يعنى... وكمان النهاردة زى ماهو باين كده بتزود الجرعة وأنا مش فاهم فى ايه بالظبط...دى شقاوة آخر العمر دى ولا إيه يا حاج؟؟؟


بنجا الكبير: آخر العمر ؟؟؟؟ آخر العمر يا بتاع الطب ياللى أخوك عنده سبعة وعشرين سنة وبتقول بقالى خمسة وعشرين سنة بس


بنجا فى جملة لم يسمعها غيره: صحيح ايه التخلف اللى انا فيه ده ؟؟ربنا يشفينى ...ثم يرفع صوته قائلا بالتقريب يعنى يا حاج بالتقريب


بنجا الكبير:تعرف تقولى يا ناصح النبى- صلى الله عليه وسلم – تزوج عائشة –رضى الله عنها- وهو عنده كام سنة؟؟؟


بنجا:حوالى 52 سنة............لا ده احنا جامدين برضه يعنى ههههه


بنجا الكبير: طيب انت اللى قلت بنفسك ...يعنى كان- صلى الله عليه وسلم- أكبر من 52 سنة ويقبل زوجته وهو صائم كمان


بنجا:لا وإيه....ده كان -صلى الله عليه وسلم- يشرب من موضع شربها فى الإناء ويأكل من موضع أكلها وهى حائض ... وكمان كان يضع رأسه فى حجرها ويقرأ القرآن وهى حائض...مش بقولك ابنك جامد برضه بس انت اللى مش واخد بالك ههه


بنجا الكبير: ما انت حلو اهو...طب اعمل حسابك من دلوقت انك لو مش ناوى تبوس يبقى انا مش هتحشرلك فى اى جوازة...أنا بقول أهو


بنجا: إيه الورطة دى بقىىى....عموما ما تقلقش يا حجوج انا ناوى على 15 بوسة فى اليوم لكن أكتر من كده ما أقدرش أوعدك ....يعنى تقدر تقول خمسة مع كل وجبة ...ولو فاتتنى وجبة مع المودام هبقى أجمع بين الوجبتين...بس ساعتها ممكن أستخدم الرخصة وأقصر مع الجمع هههههههه يعنى سبعة حلوين اوى ساعتها...ده غير اللى بالى بالك طبعا هههههههههه


بنجا الكبير: طيب من غير تهريج كده قولى بجد انت أول مرة تكلمنى فى موضوع البوس ده وأنا ماعرفش انت ايه رأيك ...


بنجا: انت جاى بعد خمسة وعشرين سنة تقولى ايه رأيك...أقولك يا سيدى... انت عارف يا حجوج لما بشوفك بتبوس أمى ببقى فرحان أوى ومطّمّن وبحس إنى فخور بيك كده... وببقى نفسى أقوم أبوسكم انتو الاتنين


بنجا الكبير: وما بتقومش ليه يا فالح تبوسنا ؟؟ ولا هو كلام وخلاص؟؟؟ ولا فالح بس لما تشوف أى بنوتة أو طفل صغير تقعد تنزل فيه بوس لحد ما تزهقه.... وتلاقيك هارى أصحابك بوس


بنجا: لا يا حجوج عيب عليك... مش أنا اللى يبوس واحد صاحبه... ثم ان العناق والتقبيل ده بيكون للمسافر أو حد بقاله فترة غايب عنى ...مش أى حد كده.... حتة جامدة دى ها؟؟؟مش بقولك جامد... وان كان ع البوس ما تزعلش يا سيدى آدى بوسة لك ودى بوسة ليكى يا أمى يا حبيبتى....خلاص بقى عشان هعيط هههههه


تلات ملاحيظ ع الماشى:

1- الكلام على الطعام من سنة النبى صلى الله عليه وسلم

2- حسن العشرة بين الزوجين تنشر الراحة النفسية بين أفراد الأسرة

3-الحقيقة هما ملحوظتين بس مش تلاتة هههههه

هناك 50 تعليقًا:

ستيته حسب الله الحمش يقول...

ويا هل تورى المقال ده بمناسبة أني قلت لك تسلم لي على بنجا كبير المحلة جبلي؟
هههههههههههههههههههههههههه

ما شاء الله لا قوة الا بالله ربنا يخليهم لبعض ويخليهم لكم ويرزقكم خير الدنيا والآخرة

اه هي دي البوستات مش بتاع امبارح

وبالمناسبة علشان تعرف ان خالتك برضه جامدة قوي فقد ورد عن البهبهاني في صحيح "غسق الإنبلاج في شئون الأزواج" إن القصر والجمع


لا يجوووووووووووووووووووووووووووووز

خديجة عبدالله يقول...

أسلوب عرض مميز
أسلوب عرض عجيب
أسلوب عرض مختلف

أتفق مع حضرتك فى مسألة احساس الأطفال بجو الدفء والتفاهم بين الأب والأم والحمد لله على نعمة الاسلام فديننا يتيح لنا ذلك من دون اسفاف أو ابتذال ..وده طوبة فى دماغ أى واحد بيقول أى حاجة عن شمولية الاسلام ورحابته وانسانيته

وفقكم الله وتقبل منكم

GiGi world يقول...

الله عليكم
ماشاء الله اقوه الا بالله
بصراحه كل حاجه فىا لبوست تحفه مش قادره احدد ايه بالضبط اللى جميل
بس بجدكل تحفه روعه
الدنيا بخير
ربنا يسعدك ويكرمك يارب بكل خير ويخلى باباك ومامتك يارب دايما طول العمر فى سعاده وصحه يارب

Somaya Kamal El Din يقول...

ههههههههههههه

ربنا يخليهم لبعض ويخليهملك كمان يا عم

الشعب لابد له من حكومه تشكمه يقول...

ماشاء الله ولا قوة الا بالله...
بس معتقدش ان فى بيوت الشباب الصغير ممكن تلاقيها كده:( دا بتلاقى اخينا راجع من الشغل مش طايق نفسه ولو مراته قالته ياحبيبى يقولها هاااا نعععععععم حبيبى ايه وزفت ايه دلوقتى باه انا راجع قرفان تقوله انا هقولك ياحبيبى احضرلك الاكل يقولها حضرى خلينى اكلى لقمه واتخمد..:)
قمة الرومانسيه:))
سلملى على اونكل وقوله انى بغبط طنط, مش حسد والله..بس بنتمنى فى حد يكون حنون كده...

ايوشة يقول...

ههههههه ماشاء الله ربنا يدم عليهم السعادة يارب ويخليهم لك

MaNoOoSh يقول...

ماشاء الله عليهم
ربنا يديم حسن العشرة بينهم وبينكم

فعلا حسن العشرة بينشر جو المحبة بين افراد الاسرة
والكلام على الطعام بيقرب الناس من بعضهم.. علشان كده انا مقاطعة التليفزيون.. لانه خلى الناس تبطل كلام مع بعضها وتقعد تبلم قدام كلام اهبل يا اما كلام يحرق الدم.

تحياتى على البوست المنعش ده

Me7'o يقول...

والله فكرتنى بموقف حلو قوى
كان فيه واحد صاحبنا معانا فى السكن فى بنها بس كان متزمت قوى ونكدى

وصاحبنا التانى قاعد بيفرجنا على صور ليه وهو فى بيته
كان فيه صورة... والدته قاعدة على الكرسى وهو قاعد كده على الأرض بين رجليها

صاحبنا النكدى ده أستغرب قوى وقاله إيه ده يا أخى مش عيب عليك كده

قاله ليه يعنى ياض
دى امى
قاله ما يصحش برضه أنا عمرى ما عملت كده

رحت انشكيت انا بقى فى لسانى وقولتله
على كده لو أبوك دخل البيت ولقاك بتبوس أمك يضربكم بالنار

هههههههه

تحياتى

ঔღঔ نـــوارة ঔღঔ يقول...

هههههههههههههههههههه

يخرب عقلك كلامك عسل وربي

بس انا قصداك بخدمة شخصية :)

تسلفني امك وابووووك كام شهر :]

عكس الي بيحصل عندنا تمام والحمد لله :]

لو ناوي تطلع زي الوالد يبقى انت عريس لقطة تعال اجوزك اختي ^ـ* ههههههه

ربنا يخليهم لبعض ويطول بعمرهم

بوست رائع

ربنا يوفقك

ديالا يقول...

الله ايه الحلاوه دي

شايف الجيل القديم رومانسي اوي ازاي

اللهم اوعدنا يارب

بجد ربتا يحميهم ويخليهم لبعض يابنجاواتي ياصغير

وردة يقول...

ههههههههههههههههه
بجد يسلم ايدك
الموضوع حلو اي نعم بس العرض ةوالاسلوب ماشاء الله تحفة
ربنا يكرمك
واتعلم يابني
علشان لما تتجوز تشرف الحج
ههههههههههههه
ربنا يسعدك ويرزقك الزوجة الصالحة
انت وكل شباب المسلمين
بس عاوزين معاملة زي اللي بتجكي عليها ديه
ههههههههههههه
ربنا يسعدك
سلام

ঔღঔ نـــوارة ঔღঔ يقول...

معك حق والله

لازم نستفيد من البوست ونظهر مشاعرنا الجميل امام الاولاد عشان يحسوا بالجو الاسري ودفء المعيشة

معلم وربي

^ـ*

قلم رصاص يقول...

هههههههههههههه

جرى يادوك انت هتأر عليهم
ياعم سيبهم لبعض واطلع منها انت
ههههههههههههه

وبعدين ابقى احسب كويس امال في كلية الطب ازاي ههههههههههههههههه

ربنا يخليهم لك يارب ويوفقكم

دمتم في حفظ الله

ليس فقيرا من يحب يقول...

السلام عليكم

اول زيارة ليا للمدونه
لقيت اسلوب جميل ودم زى العسل
ربنا يخليهم لبعض ويخليك تناقر
فيهم وخلى بالك انت كده بتقر
عليهم مايحسد البوس قصدى المال الا صحابه هههههههههههههه

تقبل تحياتى

احساس طفلة محبة للرومانسية بس واقعية يقول...

وما بتقومش ليه يا فالح تبوسنا ؟؟ ولا هو كلام وخلاص؟؟؟

هاهاهاهاهاهاها هو لازم اضحك اساسا
زى ما قلتلك اسلوبك مميز فيه معنى مهم مصاغ بطريقة جميلة

اكيد المحبة بين الاب والام بتأثر على الابناء تأثير ايجابى وبتسيب فى نفسيتهم بصمة ولا اراديا بيتعلموا منهم وبيقلدوهم احيانا ان مكنش بفائض حب لانهم لقوه من وهم صغيرين

تسلم ايدك
تقبل مرورى

لاسع افندى يقول...

ربنا يخليهملك ويديهم الصحه

تحياتى

norahaty يقول...

ربنا يدمها نعمة ويحفظها لك
اسرة محبة مثل هذه تنتج انساناً
سوياً قادراًعلى العيش وسط دومات الحياة بحلوها ومرها لان عنده زاد
كبير وطويل من تاريخ اسرة
جميلة.اسرتى كانت مثلها
والحمد لله(ولكن بدون قبلات)
ولكننا كنا نعلم ونثق
فى حب كل فرد فينا للاخر
الحمد لله الحمد لله

د. ياسر عمر عبد الفتاح يقول...

ازيك يا عم بنجا
عامل إيه ,, والطب عامل فيك إيه؟
كان نفسي أقولك شد حيلك واتخرج

بس الحياة بعد التخرج ,, ولا أقلك بلاش أعقدك
بكره تشوف بنفسك

بس بجد راحة نفسية جامدة
الدراسة برضه كانت هم وقرف


المهم بالنسبة لموضوع البوس ده
فمش هقدر أفيدك ,,
لما بعد عمر طويل كده لما أتأهل تبقي فكرني بالموضوع ده بالله عليك
يمكن نجربه

ريمان يقول...

السلام عليكم

ماش اء الله

جميل بجد رائع


كل نقطه انت ركزت عليها فى البوست مهمه جدا


والاحلى من كده اسلوبك فى عرض الفكره

الله يفتح عليك

على فكره شكل مدونتك شيك اوى

ريمان ونوسه فى هاكونا مطاطا يقول...

اهلا بنجو



الله يفتح عليك يا رب


على فكره انا اللى علقت فوق

وبعلق عندك الوقتى تانى

وبقولك


مستنى ايه

يلا تعالى هاكونا مطاطا


تيمون وبويما منتظرينك

هيحكولك حكايه تفطس من الضحك


هاكونا مطاطا

مش هتقدر تغمض عنيك

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

فتاه من الصعيد يقول...

ربنا يخليك ليهم ..... ويخليهم لبعض
ويرزقك الزوجه الصالحه ..... بس تعاملها كده زي بابا

Lady E يقول...

بسم الله ما شاء الله

ياريت الروح الجميلة دي موجودة بين كل زوجين

ربنا يبارك لك في مامتك وباباك ويباركلهم في بعض

Mo7ammed يقول...

ربنا يخليهم لبعض ياريس
وان شاء الله ربنا يقدرك وترضيهم ومتزعلهمش

تسلم

mohamed ghalia يقول...

جميل وجود الروح دى بين الزوجين
المدونة بتاعتك حلوه أوى
بالاتوفيق دايما
تقبل مرورى

موناليزا يقول...

موضوع جميل جدا وبطريقة ظريفة

mimi يقول...

ميمي جت

ودي بقي الملحوظة التالتة

mimi يقول...

طريقة العرض دي مميزة جدا

برافو يا ابو المخاميخ

الي كل شاب وكل فتاء

لما تبقوا ماما وبابا بعد عمر مش طويل ان شاء الله

اعملوا كده علي رأي اونكل بنجا الكبير وبنجا الصغير وبنجا الأوسط

موضوع حلو بجد والله

ما شاء الله

mimi يقول...

لا مؤاخذة فين التحديث؟

عاشقه الرومانسيه يقول...

حلو قوى جو البوس ده؟
والله فكرررره
انا هاتفق معاه من دلوقتى على 10 بوسات فى الوجبه الوحده
اه انا هاكون ام واخاف على صحة اولادى النفسيه برضه
هههههههههههههههههههههههههه

بنجاواتى يقول...

ستيتة هانم الحمش:

الحاج بنجا لو قلتله ان عندى خالة عسولة زيك كده وكمان بتسلم عليه احتمال الموضوع يتطور لحد 20 بوسة فى الوجبة (as amaintenance dose)

على فكرة بقى البهبهائى ذات نفسه فى كتاب "القول الرشيد فى البوس المفيد" قال ان الزوج لو وجد مشقة فى الموضوع يبقى يترك الأمر بالكلية اولى....هذا والله اعلى واعلم

ربنا يحفظك ويخليكى لينا -نحن الجماهير العريضة-

بنجاواتى يقول...

خديجة عبد الله:

الحمد لله ان ربنا احل لنا كل شئ طيب
فبنستمتع بحياتنا من غير رهبانية ولا تبتل

واكيد المتاع الحلال اجمل بكتير من غيره وكمان له تأثير طيب على كل المجتمع

منورانى

************
جى جى :

كلماتك جميلة ورقيقة

وربنا يتقبل منك الدعوتين الحلوين اللى بالدنيا دول

**************

سمية كمال الدين:

شكرا جدا على دعواتك الجميلة وربنا يحفظك

بنجاواتى يقول...

الشعب لا بد له من بنجاواتى يحكمه:

ايه الصورة المظلمة دى

لا لا خالص ...الموضوع مش كده خالص
هو بس بتبقى ظروف لكن مفيش حد من الشباب حياته فيها الرومنسية الفظيعة دى خالص

عموما الفرصة لسه قدامك ...واى حد يكون من نصيبك ان شاء الله تتفقى معاه من البداية واللى اوله شرط اخره نور

تحياتى

بنجاواتى يقول...

أيوشة:

اضحكى اوى براحتك يا ستى

ان شاء الله ربنا يرزقك بواحد يسعدك اكتر من كده كمان :D

بنجاواتى يقول...

منووووووووش:

طبعا الكلام جه على هواكى علشان انتى ماسكة الاباء اليومين دول مقطعاهم :)

والله يا منوش بتبقى حاجات بسيطة لكن تأثيرها كبير اوى

والتليفزيون ده بجد مش لازم يشتغل ساعة الاكل خالص

غاويين عندنا بقى يشغلوه ساعه الفطار فى رمضان بيبقى دمه تقيل ده غير انه بيجيب تخلف عقلى

منورة

بنجاواتى يقول...

ميخو:

يا سلام

على كده ممكن فى يوم نسأل البوكس وهو معدى رايح فين يا عم يقولنا رايح امسك عيل بيبوس امه

ناس مش فاهمة حاجة والله
وبجد كلمتك جامدة

بنجاواتى يقول...

نوارة:

طبعا انا مش هقدر اسلفك اى حد من عندى

لكن اللى اقدر اوعدك بيه انى معنديش مانع لو اختك عسولة زيك كده

خصوصا لو كانت بتقول حاضر ههههههه

وما دام مفيش حاجة من دى بتعملوها يبقى انتى لازم تكونى اول من يطبق السلوك ده

سلام

بنجاواتى يقول...

ديالا:

الجيل القديم رومنسى دى حاجة عندك حق فيها

لكن الجيل الجديد مش رومنسى دى حاجة معندكيش حق لو فكرتى فيها

اى حد ممكن يبقى كده بشوية حنية واللذى منه

ثم انى هقولك برضه الفرصة قدامك حافظ على سنانك

يعنى ده هيبقى شرط لطيف اوى هيحبه سعيد الحظ صاحب النصيب لو تقوليله عليه

منورة الدنيا

بنجاواتى يقول...

ورده:

الحمد لله ان العرض عجبك

وماتقلقيش عليا ...ان شاء الله ناوى اكون بنجاواتى على حق

ربنا يسعدك يا رب

*********

قلم رصاص:

ياعم مش نق خالص

ثم ان حد قالك ان اللى ف طب بيعرف يحسب ؟؟هههه

منورة يا بينسيل

**********

ليس فقيرا من يحب:

انت اللى دمك زى العسل يا رانيا

وبعدين حسد على ايه يعنى...هو فى اكتر ولا اسهل من البوس

ربنا يحفظك ويحميكى
منورة الدنيا بأول زيارة

بنجاواتى يقول...

احساس طفلة محبة للرومانسية:

فعلا كل واحد فينا لو دور هيلاقى فيه كتييير اوى من الحاجات اللى اللى كان بيشوفها فى بيته حتى لو مكنش يقصد كده

وانا معاكى ان فعلا الابن لما بيتربى على حاجة بيطلع عنده الحاجة دى بزيادة ما دام شايف ان لها تأثير طيب على النفوس

وعلى هذا الاساس تقدرى تقولى ان انا ممكن اقعد فى البيت طول اليوم على الاكل علشان الحاجات اللى مع الاكل مش الاكل ذات نفسه ههههههه

منورة

بنجاواتى يقول...

لاسع افندى:

منور يا باشا وربنا يحميك ويسعدك

شكرا على الدعوات الجميلة
******

نورهاتى:

فعلا بيئة الاسرة كانت ولازالت وستكون هى المربى الاول للانسان وباقى البيئات ما هى الا عوامل مساعدة او معرقلة

عموما ربنا يسعدك يا رب
انا مش عارف ليه "كانت" لكن ان شاء الله ربنا يخلف عليكى وتكون حياتك دافئة كده واكتر

بس انتى هيكون عندك اوبشن التقبيل ده...ما تفرطيش فى حقوقك :))

منورة الدنيا ونفسى اعرف اقول اسمك صح

بنجاواتى يقول...

د/ياسر:

ايه يا عم ياسر؟؟ انا سامع انك مطحون فى الشغل...وهو ده اللى واخدك مننا بقى؟؟؟

عموما ما تقلقش ان شاء الله بعد عمر قصير تتجوز وهبقى افكرك بيه مع انى متأكد انك مش ناسيه (وش بيغمز)

منور يا دكتور

بنجاواتى يقول...

ريمان اللى هى ملائكية على هاكونا مطاطا:

مش عارف اقول ايه مع الثناء الكتير ده (وش باصص فى الارض ومش قادر يتكلم)

موضوع المدونة وشكلها ده موضوع انا حسمته من زمان وقلت ان دى أقل حاجة عندى هههه

سعيد جدا بزيارتك وبمدونة التهييس الجامدة جدا

*****

فتاة من الصعيد:

ربنا يسعدك ويبارك لك فى اسرتك
وان شاء الله اكون زيه ويمكن اكتر شوية كمان

منورة الدنيا

بنجاواتى يقول...

ليدى:

تعالى خدى لك تعليق مخصوص بما انك زميلة كفاح وبتشجعى الزمالك

وبما انى حاسس بغربة ولو عملت بوست عن فوز الحرس احتمال يهدروا دمى فهفك معاكى شوية:

شفتى بقى ياليدى المسخرة اللى كانت فى الماتش امبارح هههههههههههههههههههههه
الواد احمد عيد كان بيبص لحسام البدرى يخوفه
وطبعا من بعيد لبعيد كده يبص لأمير يقوم امير يعيط على طول

الواد مكى بقى فى اخر الماتش لما اللعيبة الكاوركات بتاع الاهلى شحرم قاعد واخدهم فحت وردم ومحدش عارف يوقفه

بس انا زعلان اوى
اتنين مش كفاية ههههههههههههه

منورة وارجعى من المكان الغريب اللى انتى فيه ده بقى

بنجاواتى يقول...

محمد :

ربنا يخليهم لى يا رب يا زعيم
ما تقلقش ده عنيا الاتنين ليهم

*************

محمد غاليه:

اهلا بيك يا محمد

يا رب الروح دى دايما تكون موجودة بين كل الازواج

المدونة حلوة علشان انت اللى عنيك جميلة

منور يا عم

*******

موناليزا :

شكرا على مرورك

تحياتى

بنجاواتى يقول...

ميمى:

تصدقى ان دى الملحوظة اللى كانت تايهة عن بالى...مش عارف اشكرك ازاى

يا رب بس الولاد الصغيرين يستفيدوا من خبرات عمهم بنجا الصغير قبل الكبير

بالنسبة للتحديث فلا تعليق ههههه
التحديث عندك فى الاول خالص ...هعمل ايه بقى قلت احطه فى الاول علشان اللى قرا الموضوع يقراه وما يتعبش نفسه فى البحث عنه

مش عارف اعمل ايه فى طيبة قلبى دى ههه

منورة يا ميمى

بنجاواتى يقول...

عاشقة الرومانسية::

بعد ما تعبت وهنجت من كتر الكتابة اقدر اقولك ربنا يوفقك
بس افتكرى ان انا مش مسئول عن العواقب اللى ممكن تحصل ههههههههه

حرام عليكى عشرة ايه بس؟؟؟؟
ما تزهقيش أحمد منك

اتنين كفاية وممكن بعد كده نبقى نزود الجرعة شوية بشوية علشان نحس بمفعول الدوا لحد ما نوصل لمية فى الوجبة وبعدها ممكن يحصل تسمم من البوس هههههههههه

ياااااااه...انزل اصلى الفجر بقى...معدتش هكوم تعليقات عليا بعد كده تانى

سلام يا أجمل ناس عرفتهم

أم مالك يقول...

ابنى الغالى دكتور مصطفى
ربنا يبارك فى والديك ويحفظهم لك
وفعلا يامصطفى ان مثل هذه التصرفات
وغيرها بتعمل جو دفء واستقرار
فى البيت والعيال بيكون امامهم
قدوات وهل يوجد افضل من الام والاب قدوة ربنا يحفظهم يارب
بس قولى هو بابا قريب عمك ابو مالك ولا ايه اصل شيهو فى التصرفات
تحياتى

انت تسال والكمبيوتر يجيب يقول...

ندعوك للأشتراك فى برنامجنا الأذاعى من الأذاعه الرئيسيه لمصر اى أذاعة البرنامج العام ويذاع يومياالتاسعه وعشر دقائق صباحا عدا الجمعه.

التفاصيل فى
المدونه
http://netonradio.blogspot.com
الموقع
http://return.to/cairo

تحاتنا وامنياتنا لك بالتوفيق

بنجاواتى يقول...

العزيزة جدا على قلبى "أم مالك"

الله اكبر فوق كيد المعتدى ....هييييييه عمى ابو مالك طلع قريبنا وانا معرفش

ربنا يسعدك ويسعده ويخليكوا لبعض ويبارك فى ذريتكم

ويارب تكونى بخير والصحة تمام مع انى حاسس انك لسه شوية بعافية ...عموما ربنا يعافيكى ويتم شفاكى

بحبك فى الله

۩۝۩ Dr. Flavio ۩۝۩ يقول...

ايه الحلاوه دي يا واد يا بنجا

بوست جميل اوي والله

نفسي ده يتحقق في كل بيت مصري .. بس بيني وبينك لما ابوك هيوصل الستين كل ده هيتغير

حاول تثبته بقه على كده

بوركت يا حبي .. ومنتظر منك بوسه لما اشوفك