الثلاثاء، 8 مارس 2011

نعم للتعديلات الدستورية

بسم الله الرحمن الرحيم

هتنزل للإستفتاء يوم 19؟؟
معدش فى حجة للامتناع عن النزول ..... عيييييييب أوى لو ما نزلتش

وانت هتقول نعم ولا لا؟؟؟
هقول نعم إن شاء الله

انت موافق على التعديلات؟؟؟
عندى بعض التحفظات عليها لكن هوافق

تحفظات زى إيه؟؟؟
1- المادة 75 تحس من صياغتها زى كلمة "متزوجا" انها تقصر حق الترشح للرجل دون المرأة.... بلاش خيابة لو سمحت
2-شرط السن وانه لا يقل عن 40 سنة 
3-شرط الزوجة لا تحمل جنسية غير مصرية 
4- شرط الجنسية اللى بتعاقب كل اللى فى يوم من الايام حمل جنسية غير مصرية حتى لو اتنازل عنها بعد كده انه ما يترشحش للرئاسة
5- لجنة الانتخابات الرئاسية هى لجنة قضائية عليا .... طيب مين هيجيب لنا حقنا منهم لو غلطوا وهم أكبر قضاة فى مصر...يعنى مين الرقيب عليهم خصوصا وإن قرارات اللجنة نافذة ونهائية ؟؟؟
6- لجنة الانتخابات الرئاسية لن تشرف على العملية الانتخابية من أولها ولكن سيبدأ عملها بدءا من فتح باب الترشيح وحتى اعلان نتيجة  الانتخاب 
7- ليه الطعون على الانتخابات البرلمانية يكون فى غضون 30 يوم فقط مع انه ممكن واحد يكتشف التزوير بعد المدة دى وكمان ممكن يكتشف ان منافسه فى الانتخابات كان مثلا عنده جريمة مخلة بالشرف او جنسية اسرائيلية مثلا بعد المدة دى ؟؟
8- فى المادة 139 ليه يعين نائب الرئيس ما دام ممكن ننتخبه أو ننتخب الاتنين مع بعض؟؟؟ خصوصا ان النائب ممكن فى أى وقت يبقى هو الرئيس مع اننا ولا اخترناه ولا بايعناه؟؟؟
9-مادة 148 ليه بتخلى سيادة الرئيس يعلن حالة الطوارئ وبعدين يعرضها على المجلس فى غضون 7 أيام فى حين انه ممكن يعرضها على المجلس فى يومين مثلا .... ما هو ممكن يستغل ال7 أيام دول فى عمل بلاوى 
10- المادة 189 صياغتها واضحة بشأن مين اللى له الحق فى طلب اصدار دستور جديد ولكن مش واضحة فى المادة 189 مكرر اللى بتقول " يجتمع الأعضاء غير المعينين لأول مجلسي شعب وشورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقًا لأحكام الفقرة الأخيرة من المادة 189" وهل هى ملزمة للمجلس الجديد إنه يشكل الجمعية دى ولا ده متروك لاختيار المجلس؟؟
11- ليه صلاحيات الرئيس مش من ضمن التعديلات ؟؟؟ وليه مجلس الشورى لسه موجود؟؟ وليه مكنش التعديل له وجهة نظر فى مسار الدولة ... برلمانية ولا رئاسية؟؟؟

كل دى تحفظات وموافق على التعديلات؟؟؟
ايوة لسه موافق على التعديلات 

ليه كده؟؟
أنا نفسى نعمل دستور جديد مفيهوش العكّ القديم ولا العكّ الجديد وهو إن شاء الله هيتعمل يعنى هيتعمل .... بس دلوقت الاختيار بين انه يتعمل دلوقت ولا بعدين؟؟؟ أنا شايف إنه عمل دستور جديد دلوقت يضر أكثر مما يصلح فالأفضل نعمله بعدين

بعدين امتى؟؟ وإيه ضماناتك إنك تعرف تعمله بعدين؟؟؟
إمتى.... بعد سنة من انتخابات مجلس الشعب بإذن الله
ضماناتى يا سيدى 3 حاجات ....
أول حاجة إنى فهمت زى ما المستشار طارق البشرى قال إن "المادة 189 مكرر" تلزم مجلسى الشعب والشورة بإعداد مشروع دستور جديد لمصر ... يبقى دى قوة قانونية ملزمة

تانى حاجة هى قوة الشعب اللى هينتخب أعضاء مجلسى الشعب والشورى بنفسه وهو فى إيده يختار النائب اللى معتنق فكرة الدستور الجديد ويرفض بتاع الوطنى.... أما إنك مش واثق فى الشعب المصرى واختياره فأنت بذلك تسلب الناس حقهم فى المشاركة بدعوى أنهم مش فاهمين والديمقراطية لا تميز بين الخبير السياسى والإنسان الأمّى ... ولو المشكلة مشكلة وعى فده دورك إنك تنزل وتوعّى الناس بدل ما تبقى وصى عليهم

تالت ضمانة هى قوتى أنا وأنت كشباب نزلنا فى الشوارع وميدان التحرير ويمكننا تكرار ذلك مرارا وتكرارا إذا خذلتنا القوة الأولى والثانية

طيب أنت شايف إيه؟؟؟
شايف إننا ننزل ونعرّف الناس إن فى تعديلات وإن الدستور قبل التعديلات كان كيان ميت وبعد التعديلات كيان سقيم ولا مناص من دستور جديد بس الفترة دى تعدى على خير خصوصا ان مفيش تصوّر ممكن وواضح لو قلنا لا للتعديلات

وإيه تصورك لو قلنا نعم؟؟
نقول نعم وبعدها ننتخب للبرلمان ناس عايزة دستور جديد وكمان يقولولنا تصورهم للدستور الجديد ويقعدوا ستة شهور يشكلوا جمعية تأسيسية للدستور الجديد وتقعد الجمعية 6 شهور تانيين لحد ما تعمل دستور جديد وتطرحه علينا لمدة 15 يوم ونستفتى عليه ساعتها هيكون الرئيس بقاله حوالى 10 شهور فى الرئاسة بيحكم بالدستور القديم لكنه مش هو اللى شكّل الجمعية التأسيسية للدستور الجديد  

هناك تعليق واحد:

TIMMY !! يقول...

أنا هشارك إن شاء الله ... أو " ناوي " أشارك ,
المشكلة إن شغلي بعيد جدا عن محل إقامتي اللي في البطاقة , و لو كنت في الشغل ساعتها و مش في اجازة يبقى مش هعرف أصوت ,
كان نفسي يعملوا التصويت من أي مكان و يدخلوا البيانات على أجهزة كمبيوتر بقاعدة بيانات واحدة بحيث يقدر الواحد يصوت من أي مركز تصويت في مصر
ربنا يسهل إن شاء الله