الاثنين، 1 نوفمبر، 2010

أبغى كوسة

بسم الله الرحمن الرحيم


يا عينى عليك يا بنجا ...مكنش يومك يا هندى ...ياللى ملحقتش تفرح يا حبيبى

كدهو يا جدعان ؟؟؟ هو فى كده فى الدنيا؟؟؟ واحد يعيش وشكله هيموت وعمره ما بقى له واسطة ف أى حاجة خالص كدهو؟؟؟

أنا عمرى ما كان عندى كوسة يا جدعان ... مش معقول كده

مهو لو كان حد فهمنى وأنا صغير إن الكوسة عنصر غذائى أساسى لاستمرار الحياة كنت عملت حسابى واشتريت شوية
لكن للأسف محدش فهمنى وأنا صغير
بنجا الكبير طول عمره يقولى شد حيلك وربنا معاك وهو أكيد عارف انه لازم كوسة بس مش عارف كان بيكابر بقى ولا ايه

عشت مخدوع طول عمرى ومفكر انها عادى يعنى مش مشكلة

مفكر انها بتمشى بالكوسة ومن غيرها لحد ما دخلت كلية الطب جامعة كلكتّا بولاية مهارشتا وساعتها عرفت يعنى ايه تبقى واقف فى انتظار لجنة الشفوى أو العملى وييجى واحد ياخد ولاد الكوسة من ايديهم ويدخلهم يسلموا ع الممتحن ويطلعوا فى أمان الله والمخدوعين أمثالى واقفين بيراجعوا ومتوترين وحاجات خايبة كده

وبصفتى مخدوع كبير بعد الكلية عايز اعمل انتداب لمستشفى أحمد ماهر والاقى الموظف الكتكوت اللى بيستلم منى الورق يقولى قدم فى مستشفيات تانية يا دكتور عشان هنا ممكن ما يحصلش نصيب !!! وعشان الخدعة تكتمل قالوا هنعمل انترفيو ونختار على أساسه وفعلا عملنا الانترفيو ويومها الواد العباسى الله يمسيه بالخير قعد يتكلم ألمانى مع الراجل وطالع فرحان وانا كمان كنت فرحان ومستبشر-مخدوع أصلى- وبعد ده كله كووووول ده كان تمثيلية ظريفة منهم وبرضه خدوا الكوسة بسسس

يقولك تكليف مدنى فى المستشفيات العسكرية تطلع كوسة علنى
يقولك نيابة فى مركز البحوث يطلع كوسة
يقولك تكليف فى اكاديمية البحث العلمى يطلع مجرد الاعلان عن الترشح ما يسمعش عنه الا الكوسة
يقولك نيابة فى معهد بحوث أمراض العيون -وده شئ أنا على استعداد فى سبيل تحقيقه إنى اعمل أى حاجة حتى لو ياخدوا عليا تعهد بإنى ما أخرجش منه الا ع القبر- برضه كووووووووووووووووووووووووووسة
ده غير الجيش وغيره وغيره

مش عارف بقى أكمل حياتى على ما تبقى منها بدون كوسة ولا أعمل اعادة هيكلة لحياتى وأخلى الكوسة على رأس أولوياتى؟؟؟
ومش عارف ازاى ما اكتشفتش ان الكوسة فى حياتنا مهمة زى ما الترامادول مهم كده الا متأخر أوى كده ؟؟

ماشى يا بنى آدمين

هناك 9 تعليقات:

Lady E يقول...

تصدق وانا كمان عمري ما كان عندي واسطة وأيام الكلية برضه ولاد الكوسة مكانوش بيمتحنوا أصلا وهما ماشيين الضاكطور كان بيقولهم سلمولي على بابا أو على ماما واحنا عمالين نذاكر من أول امبارح علشان الامتحان الشفوي :)

انا مش مقتنعة بموضوع الكوسة ده ودائما بقول واسطتي هو ربنا سبحانه وتعالى بس ده ميمنعش ان الواسطة والكوسة بقت كتير أوي مثلا زميلاتي اشتغلوا تاني يوم لما خلصوا امتحانات الليسانس كوسة طبعا بس لما تيجي تحسبها هتلاقي انك لما بتعمل حاجة بالاعتماد على نفسك بيبقى ليها طعم غير طعم الواسطة

دمت بخير وان شاء الله توصل ل اللي انت عايزه بواسطة رب البشر

ستيتة حسب الله الحمش يقول...

لا لا
حتى في الهند بيحبوا الكوسة
وبيحتضنوا أكلها وشاربها ومطلع كارتها والواسطة اللي في النص؟

فعلا الهند شقيقة صغرى

مش عارفة اقول لك ايه

تصدق بالله

لما حد كان بيجيب لي كوسة كنت بهرب وبخاف من ربنا وباكل بامية وانا لها من الكارهين

من غير اي كلام دباجة إذا شاء الله وكتب
رفعت الأقلام وجفت الصحف

هي بس اختبارات علشان حسن التوكل

لكن رزقنا مكتوب من واحنا في بطون الأمهات رضي الله عنهن

وبكرة تقول السيدة تاج جيهان قالت لي :)

بنجاواتى يقول...

ladzy:

الظاهر ان امتحانات الشفوى دى تربة خصبة لزراعة الكوسة يا ليدى

هو انا مجربتش اعمل حاجة بالكوسة عشان اعرف طعمها مختلف عن اللى بالمجهود ولا لا لكن عموما ماشى كلامك

نورتينى

بنجاواتى يقول...

السيدة تاج جيهان:

تحية طيبة وبعد..اكتب اليكى من ارض الكمامة الهند واقولها بكل اختصار الكوسة لاهى فاكهه ولا هى خضار

والله عندك حق يا دكتورة ..هو فعلا الواحد عايش عشان يحصل رزق ربنا قدره له وهو فى بطن امه

وكلامك جاب على بالى قول النبى صلى الله عليه وسلم "أَيُّهَا النَّاسُ ، اتَّقُوا اللهَ ، وَأَجْمِلُوا فِي الطَّلَبِ ، فَإِنَّ نَفْسًا لَنْ تَمُوتَ حَتَّى تَسْتَوْفِيَ رِزْقَهَا ، وَإِنْ أَبْطَأَ عَنْهَا ، فَاتَّقُوا اللهَ ، وَأَجْمِلُوا فِي الطَّلَبِ ، خُذُوا مَا حَلَّ ، وَدَعُوا مَا حَرُمَ.

تحياتى يا جين :))))

sony2000 يقول...

هههههههههه
هي الكوووووسه كمان عندكو
طب يلا نعمل حمله عليها بقي
ونخليها صلصه طماطم احسن
علي الاقل هيبقي ليها أفاده:)

غير معرف يقول...

طبعا يا معلم ندا هسيبك تتعرف عليا لوحدك انا عارف حاسه الشم عندك قويه,, بس لو هنتكلم جد أقدر اقولك ان ما بنى على باطل فهو باطل تخيل بقى نتيجه مستقبل وعمر قائم على باطل اما لو هنتكلم هندى هقولك تعيش وتاخد موزه يا عزيزى كلنا لصوص و(أن الله لايغير ما بقوم حتى يغيروا مابأنفسهم) ده بالاضافه من أعمالهم سلط عليهم والسلام ختام... سواحلى

بنجاواتى يقول...

غير معرف

لا أرجوك خلينا فى الكلام اللى مش هندى عشان ما نطلعش لصوص فى الاخر

كان نفسى أعرفك لكن فراستى ما جابتش
معلش بقى عندى انا دى

تحياتى يا معلم غير معرف

بـسـمـــة صـــــلاح يقول...

ابغى كوسه
ههههههههههههه

انت قلبت خليجي
بصراحه انا بقول عليها فايتمن واو
واااااااااااو
فاهم ولا مش فاهم
عمري ما جربتها وربنا يكفينا شرها
بجد هي حاجه تنرفز جدا

تقبل مروري يامستر مصطفى

محمد الجرايحى يقول...

للأسف أخى الكريم
الكوسة هى المحصول الرئيسى والفعال
والحمد لله عندنا فيه فائض استراتيجى