الأربعاء، 20 مايو 2009

شريكة العمر

بسم الله الرحمن الرحيم



فى البداية كده عاوز اقول لمونى اللى بعتت لى التاج انى إن شاء الله هرد عليه بس مش المرة دى بقى معلش

نخش بقى فى الموضوع على طول



بعد ما الدكتورة ستيتة بدأت فى عرض سلسلة عمر المصارى ما ساوت رجال وتحديدا بعد الجزء الاول وكان ما شاء الله رأى معظم الشباب والفتيات اللى علقوا على الموضوع إن أهم حاجة وأول مقياس لاختيار شريك العمر هو إنها تكون على دين ومهذبة وده برضه كان رأى الفتيات


وبما انى واحد من اللى قالوا الرأى ده والحمد لله عن اقتناع بدأت أسأل نفسى ازاى بالظبط الواحد ممكن يختار واحدة ذات دين وخلق.. ده فى حالة إن باقى المعايير لا تمثل مشكلة


وبعد تفكير وحيرة قلت لازم أفرق بين حاجتين مهمين وهما الفكر من ناحية والسلوك والاخلاق من ناحية تانية وعلى هذا الاساس هنقسم الفتيات-وكذلك الشباب-الى 3 أقسام والرابع مش معانا فى الكلام رغم انه موجود


وعلشان يكون الكلام واضح هيكون المثال هو الاختلاط وسماع الاغانى مش علشان دى قضايا وانا عاوز اناقشها وانما علشان دى أمثلة واضحة والتباين فيها واضح


الصنف الأول:بنت-أو شاب- مش بتختلط بالولاد بأى شكل من أشكال الاختلاط ولا بتسمع أغانى ولو سألتها ليه بتعملى كده تلاقى كلام من القرآن والسنة وحاجة تفرح ما شاء الله وفوق ده كمان تلاقى عندها همة عالية فى انها تكون انسانة محترمة ومتعلمة وواعية



الصنف التانى:بنت-أو شاب-تلاقيها بتختلط يالشباب بس الى حد ما عاملة حدود للموضوع وما بتعرفش غير مثلا زمايلها اللى فى الدراسة وكلامها معاهم محترم ومش عمال على بطال وكذلك تلاقيها بتسمع اغانى لكن بتحاول ما يكونش برضه عمال على بطال ومش كل حاجة أغانى ..ولو سألتها تلاقيها برضه بتقولك كلام من القرآن والسنة زى اللى قبلها بالظبط وتقولك عارفة ان اللى بعمله ده مش صح والمفروض ابقى احسن من كده شوية...والنوع ده من الشباب والبنات اصبح نسبة كبيرة



الصنف التالت:بنت-أو شاب-لا خلطة ولا أغانى ولا اى حاجة من دى خالص بس لو سألتها إنتى بتعملى كده على أساس إيه تلاقيها مش عارفة هى بتعمل كده على أساس إيه ..يعنى الحكاية كلها مجرد تقليد وتقاليد من غير وعى ولا فكر ودى الكارثة اللى بيعملها الآباء فى أولادهم وهما مفكرين انهم بيربوهم



الحقيقة إن فى صنف رابع وهو إنك تلاقى البنت -او الشاب- ولا فى دماغها أى حاجة ودى مش مستهدفة من الحوار لإن اللى بيدور عليها واحد مش من شروطه أصلا انها تكون ذات دين وخلق



السؤال بقى :

هل كل شاب -او فتاه –بيدور على شريكة عمره لازم يختارها من الصنف الأول من منطلق إن الدين والأخلاق كلها خير؟؟


أنا ليا رأى فى الموضوع ده وهو

إن الشاب لو كان من الصنف التانى واختار من الصنف التالت يبقى جاب لنفسه مصيبة وضمن إن ولاده مش هيلاقوا اللى يربيهم لأن تقويم الفكر وزرع المعتقدات بيكون صعب جدا جدا



طيب شاب من الصنف التانى وعاوز يختار من الاول –لانه دايما بيمنى نفسه انه يبقى من الصنف الأول وبالتالى عاوز بمجرد انه يقرر يبقى من الصنف الأول يلاقى زوجته بالفعل من الصنف ده وكمان بيمنى نفسه ان هى اللى تنقله معاها للصنف الاول- أعتقد ان الاختيار ده موفق من الناحية النظرية فقط أما عمليا فهيبقى جاب لنفسه الخنقة وهى مش هتاخده للخير زى ما هو معتقد



وبالتالى هيكون الأنسب لهذا الشاب إنه يختار من الصنف التانى لإنه بكده اختار واحدة هتحسن عشرته وتعرف تربى ولادها وكمان المسئولية بتخلى النوع ده من الناس يتحول للأحسن وأعتقد إنه هو لو فى أى وقت بقى من الصنف الأول هيبقى من السهل عليه نقلها معاه لان تقويم السلوك أسهل بكتيييير



من الواضح انه مش لازم ننخدع بالسلوك وننسى الفكر لإن أصحاب الصنف التالت سلوكهم احسن وأقوم من التانى لكن التانى اصلح منهم بكتيير



باقى نقطة اخيرة وهى ان الفتاة من الصنف التانى زى ما ممكن ترتبط بواحد من الصنف التانى فهى كمان ممكن ترتبط بواحد من الصنف الأول – مع انه صعب لانه غالبا بيدور على واحدة من الصنف الأول-



دى مجرد وجهة نظر متواضعة ويسعدنى جدا إنكم تختلفوا معايا وأصحاب التجارب أكيد بيكملوا الموضوع بتجاربهم


مفيش إشراف....


هناك 70 تعليقًا:

MǿиY El-Shreef يقول...

احجز اول تعليق وارجع ارد :)

MǿиY El-Shreef يقول...

رجعت ..

اولا كده ربنا يبارك فيك ويقربك ليه اكتر ان شاء الله

وينفع بيك يابنجاواتي يا ابن ام بنجاواتي

ماشاء الله ع دماغك بجد تفكيرك كبير ربنا يحفظك

ثانيا عجبني التقسيم الرباعي ده وكلمتينك ف الاخر عن البنت الي مش مستهدفة اصلا

بس اشمعنى الاغاني الي دخلتها ماهو ممكن جمب الاغاني حجات تاني كتير

حكايه ان البنات الي من الصنف الاول ممكن يخنقوا ع الصنف التاني دي بيتهيألي مش دايما

لو انت عندك الاقبال ع انك تبقى صف اول

والتاني للتاني انا بردوا شايفه انهم اتنين مناسبين جدا لبعض ويقدروا يرتقوا بنفسهم للمرحله الاولى

بوست جميل جدا يا بنجا

وكلامك ماشاء الله صح

ربنا يجعله في ميزان حسناتك ان شاء الله

يلا سلام

غير معرف يقول...

أجيب لك من الاخر
وعن تجربة وخبرة
وتقدرون.....وتضحك الاقدار

شق القمر يقول...

عشان تعرف تقيم فكر اللى أدامك أمر صعب جداااا

ولو عن الأخلاق فبتكون واضحة من خلال التربية

وعن السلوك هيبقى واضح من تصرفاتها

وطبعا دا بينطبق على الولد والبنت

لكن فعلا الصعب جدا هو الفكر

وانا مش هتبع تصنيفك لان التصنيف مش بالبساطة دى :)

ولكن هقول حاول متنخدعش

ناس بتشوف ناس زى الفل ولما تناقشهم تلاقيهم من غير مبادىء وبيرددوا وبس

وناس أفكارها عال العال بس عايشة الدنيا وبعيدة عن دينها

وناس أفكارها عالية جدا بس تايهه وتتوه معاها

... الخ الخ الخ


عالَـــــــــم

سلام يا هندى
وبالتوفيق فى راوند النسا :)

محمد يقول...

السلام عليكم ورحمة الله وبركاته

دكتور

موفق والي الأمام تقدم

رؤية منطقية

رزقنا الله وإياكم الزواج الصالح

خالص مودتي وصادق دعائي

Bent Men ElZman Da !! يقول...

عاجبنى جدا التقسيم ده
بس انا يمكن شايفه ان من الممكن ان شخص من النوع الاول يختار مثلا واحده من النوع التانى او التالت و بالمحاولات هتبقى هى زيه من النوع الاول
وممكن بردو ولد يختار بنت من النوع التانى يختار بنت من النوع الاول و بالمحاولات بردو يخليها من النوع الاول
يعنى باختصار
باختلاف الانواع من الممكن انى اساعد شريك حياتى يوصل لمرتبه معينه من التدين بمساعداتى ادام هو جواه النيه
و ادينا هنكسب ثواب فى بعض يعنى
البوست حلو اوى تسلم ايدك

د/عرفه يقول...

السلام عليكم
انا شايف يا مصطفى ان التقسيم مش بالبساطة دى فعلا

الموضوع اعقد من كده كتير
بالنسبة للاختيار
اظن ان الواحد يتاكد اهم شىء من التزامها وانها تكون فهمها الدين صح مش مجرد عبادات بس
وبعد كده بتخيل ان الموضوع كيميا
وتوافق ارواح

يارب تلاقى الكيميا بتاعتك
ههههههههههههههه

ستيتة يقول...

السلام عليكم

فكر راقي جدا حقيقي

رغم إن التقسيمة حادة الزوايا
ورغم ان الحياة فيها ناس بين نفس التقسيمات الأربعة
لكن انا سعيدة جدا بالفكر ده

اقول لك الخلاصة اللي انا شايفاها

اللي ياخد واحدة عقلها بيفكر وهي من اي نوع ها ينبسط لأن العقل الشغال والنفس اللوامة يعملوا عمايل كتيرة

واللي ياخد واحدة بتطبق حلو وذات صبغة مجتمعية مظهرية مش ها يعمل شيء ويجيب لنفسه صداع مزمن
وعلى رأي المثل
اجري يابن آدم جري الوحوش غير فيل الهند لم تحوش

نومستا

غير معرف يقول...

اولا دى اول مره اعلق فيها عند حضرتك
ثانيا ايه الانواع دى
بص نصيحه من اخت اكبر بلاش الحكم من خلال المظهر ..... وايه دخل الاغانى فى الموضوع؟
المظهر مهم لكن خادع احيان كتيره
لما تختار واحده اختارها على اساس فهمها الصح للدين....موش ان الاعانى حرام
ما هى ممكن تسمع اغانى وتكون كويسه....اصلا ده موش حكم.....وممكن تكلم زملائها تكون احسن من اى واحده........بص انا اصلا لا بسمع اغانى ولا حاجه.......بس شريكه الحياه محتاجه رؤيه اكبر.....دى عشره عمر.....وتعرف الانسانه الملتزمه من بيتها موش مظهرها....تكون من اسره متقاربه لتربيه اسرتك وظروفهم....علشان ممكن تكون ملتزمه فعلا بس اختلاف التربيه هيفرق معاك
دمت بخير....تقبل مرورى

غير معرف يقول...

تقسيمات حلوة اوى الصراحه
يا ريتك كنت حاطتها ف جدول او شجره او تفريعه

احييك على هذا المجهود
و احب اقولك ان الموضوع سهل و بسيط اوى
و اتلخص ف كلمتين ان الطيبون للطيبات
و ان كانت نيتك حسنه و ربنا ابتلاك بواحده مزعجه و بتحب الاغانى و الافلام العربى التعبانه
اصبر و ما صبرك الا بالله و ليك الجنه و خمسين الف حور عين
و اعتبر نفسك ساعتها ف الدنيا عابر سبيل استظل بضل شجره و مكمل طريقه الى الاخره

و الزوجه الصالحه رزق و بنا يرزقك يا بنجا بحد يريحك على الاخر

(لالا مش ابديه) راحه مؤقته لكى تستمر ف الحياه

MaNoOoSh يقول...

انا متغاظة الصراحة من موضوع الاغانى دة.. اصلة ملوش دعوة بفكر ولا أخلاق.
طب ما ممكن جدا حد من النوع التاني وبيبقى عارف حدودة مع الناس كويس.. ومش مقتنع ان الاغاني حرام.. طب وده ايه المشكله فيه بقى؟؟؟


مش عارفة ممكن اكون مفهمتش صح فياريت توضحلى أكتر بنقطة غير الأغانى الله يكرمك يا بنجا.

وكمان مفهمتش قوى ازاى حد من الصنف التالت أحسن وأقوم من الصنف التانى.. ازاى حد ماشى من غير حدود فى حياته ولا وعى بتصرفاته يبقى أحسن من حد عارف حدودة فى الحياة وواعى؟؟
وللا انت تقصد ان الصنف التانى بيعمل حاجة وهو مقتنع انها غلط وبقت بالنسبالة عادى يعنى فعلشان كدة الصنف التالت أحسن؟.. لو كدة انا ممكن اوافقك فى النقطة دى.. لان مينفعش اعمل حاجة وانا مقتنع انها حرام لانى كدة ابقى بقتل ضميرى (بس بغض النظر عن مثل الأغانى يعنى).



بس انا معاك قوي فى نقطة ان التوافق الفكرى مهم جداااااااا بعد التدين.. وبعدهم فى رأيي توافق الطباع.

تحياتى ويارب توضحلى أى لبس أو توء سفاهم من اللى انا فهمته.

غير معرف يقول...

اول ماشفت العنوان جت اجرى
قلت يكون الدكتور عملها
وبعدين لقيته موضوع فى بوست
ربنا يرزقك يابنى الزوجةالصالحة
ذات الدين والعقل والجمال والحسب
حلوة الدعوة ديه اللهم امين
يعفك انت وشباب وبنات المسلمين
لك تحياتى ومودتى

بـِصَمتـِـ أميرة ــــى يقول...

يا جاااامد يا بنجا
برافو عليك
حلو التصنيف ده
وانا بئى بعتقد ان شاب من الصنف الاول ياخد شابة من الصنف التانى ممكن يقومها ويعلى درجة الهمة الدينية عندها وتتظبط الحياة
وشاب من الصنف التانى ياخد واحدة من الصنف الاول يبقى ده بئى بركة دعا الوالدين لان كدة التزامها اكتر منه
انما الصنف التالت ده مش بينجح الا مع بعضه
اللى هو بيتصرفو صح لكن لا فاهمين ليه ولايعرفو نصوص دينية تأكد اتجاههم وبالتالى مش هينجو الا مع نفس النوعيه
عجبنى انا اوى التوبيك ده
دومت موفقا

ولزم تقول انت تنتمى لاى صنف او ليفل يعنى من اللى انت عرضتهم
؟
تقبل مرورى
:)

ملكة بحجابى

احساس طفلة محبة للرومانسية بس واقعية يقول...

جميلة التقسيمة دى

انا شايفة ان اول صنفين ممكن يتوافقوا مع بعض لان فى استعداد للتغير او المبادئ واحدة حتى لو فى اختلاف درجات قليلة يسهل تجاوزها والعقل بيكون مدرك وفاهم ان فى اساسيات غير الاغانى والالتزام وعلى قدر ما الاحتمال الاكبر ان الصنفين دول ينجحوا مع بعض

وكمان الصنف الثالث والرابع برضو ينفعوا يكونوا حياة مع بعض
لان هم الاتنين معندهم اساس ولا هدف
اداة يحركها كل شئ حولها
ورغم التناقض اللى بينهم فى المظهر الا انهم هيتوافقوا مع بعض
دا طبعا من وجة نظرى

اما لو حدث غير ذلك وحد من الصنف الثالث تزوج حد من الصنف الاول مثلا بيبقى هو دا اكبر اساس للمشاكل والخلافات والكثير من حالات الطلاق بأبشع القصص والصور اللى بنسمع عنها

ربنا يبارك فيك ويرزقك الزوجة الصالحة
تقبل مرورى

غير معرف يقول...

مبروك يا عم
المركز السادس
ومزيد من التقدم

هنتخب مرتضى
وش اخر براءة

مسدس صغير يقول...

النبى صلى الله عليه وسلم حسم المسألة منذ اكثر من اربعة عشر قرنا " فاظفر بذات الدين تربت يداك"
احييك على البوست الهادف الجميل
وجزاكم الله خيرا

قلب ارهقته الاحلام يقول...

بوست رائع جداً يابنجا

جزاك الله خيرا عليه

وربنا يارب يوفق الجميع ف اختياراته المصيرية

تحياتي ,,, ونومستووو:D

غير معرف يقول...

تصنيفك جميل جدا وعجبني والله

بس برضوا مش بالبساطة دي

في ناس تعقد معها تلاقي كلام الله ورسوله على لسانها علطول وايه ناس تبان زي الفل

وانت قاعد معهم تحس انك قاعد مع امام جامع

لكن الواااقع مصيييبة !!!مش بيصلي خالص وبيعمل كل حاجة حرام بالدنيا دا حتى بيزني لما تعاشره وتعرفه فعلا هتقرف منه ومن اليوم الي عرفته فيه انا شفت نماذج كتير من النوعية دي

كل هدفه انه يخلي الناس والي حواليه يحسوا انه اطهر راجل بالدنيا

فعشان هيك الموضوع مش بالبساطة دي

الحل الوحيد

انك تحاول قدر الامكان تعرف اخلاق ودين الطرف الاخر وتتوكل على الله و ربنا هيديك على قد نيتك

لانه معرفة جوهر الناس اصعب حاجة

وفي الاول الاخر

الجواز قسمة ونصيب

ربنا يرزقك بالزوجة الصالحة

باحييك علىالبوست الجميل

دمت بالف خير

بـسـمـــة صـــــلاح يقول...

نظريه حلوة والتقسيمه ممتازة وفي بيبقوا بينهم على فكره

حضرتك بقى من اي نوع وعايز تختار من اي نوع
ههههههههههه
تطفل
بهزر طبعا

بس بجد ماشاء الله تبارك الله
عجبتني طريقة تفكيرك جدا


تقبل مروري
مودتي

د. ياسر عمر عبد الفتاح يقول...

مظبوط الكلام
مع إن التقسيمة مش واقعية أوي
يعني هيه مش واقفة علي الإختلاط والأغاني بس
فين الأخلاق؟
أقصد الهدوء وطريقة الكلام والعصبية والذكاء الإجتماعي والثقافة والوضع الإجتماعي والفروق المادية وحتي الفروق الشخصية وطريقة التفكير

الموضوع كبير كبير كبير
عامل إيه في الإمتحانات؟
يارب متكونش مطحون زي

mimi يقول...

انا جيت أقول فرصة سعيدة اتعرفت عليك في الكونفرنس بتاع صاصا ... لقيت البوست ده عجبني رحت قريته ...

ما شاء الله عليك .. إيه التحليل المنطقي ده؟

والله فتحت دماغنا عن حاجات كتير غايبة عن تفكيرنا ...

ربنا يكرمك
وفرصة كونفرانسية سعيدة

تحياتي

بنجاواتى يقول...

بما انى اتأخرت فى الرد فهرد بالمقلوب :P

ميمايا:
اولا منورة البلوج
والكونفرنس اكيد امبارح كان هايل بس بعد ما دخلت على طول حصلت ظروف منعتنى انى اكون معاكم-ظروف بقى ربنا يسامحها-

اشكر فيكى انك تجاوزتى الامثلة علشان توصلى للمعنى المطلوب
وشكرا جدا على مجاملتك الرقيقة واتمنى فعلا ان يكون البوست يمثل بالنسبة لك معنى كويس

نورتينى

بنجاواتى يقول...

د/ياسر :

طبعا عندك حق الموضوع مش واقف على اختلاط واغانى... بس دول مجرد امثلة او صورة ممكن تعكس حال صاحبها زيها زى اى سلوك بيعمله الواحد مننا

لكن طبعا هناك اخلاق وسلوكيات تانية اهم من الامثلة دى لكن انا قصدت بيها انها امثلة ظاهرة بتتعرف من الوهلة الاولى

الامتحانات ما تفكرنيش بقى
ده الواحد شايل هم الامتحانات خالص لاسيما انها هتبدأ بعد حوالى اربع شهور :P

يعنى مفيش فى ايدى حاجة اعملها الا انى ادعى للناس اللى ظروفهم صعبة زيكم
ربنا معاكم يا رب ويوفقكم

هتبقى تدعيلى ان شاء الله ايام امتحاناتى :D

نورت يا دكتور

بنجاواتى يقول...

بسمة صلاح:
منور البلوج

اكيد طبعا فى تحت كل صنف من الاصناف المذكورة اصناف كتير تندرج تحته
ده شئ اكيد لاننا بنتكلم عن تفكير وسلوك بشر مش بنقسم المواد الكيميائية مثلا

الحمد لله ان الفكرة وصلت

اما موضوع انا مين فى دول ممكن بقى نعملها بوست وكل واحد يقول هو فين من الكلام ده

منورانى

بنجاواتى يقول...

نوارة:

انتى خضتينى لما بتقولى ان فى من الصنف اللى بتحكى عنه كتير

بس اعتقد ان المنافقين اللى زى دول مش قاعدة

اكيد الموضوع مش بسيط

وربنا يرزقنا بالزوجة الصالحة

بنجاواتى يقول...

قلب ارهقته الاحلام:

شكرا جزاكى الله خيرا

وربنا يوفقنا جميعا

تحياتى

بنجاواتى يقول...

مسدس صغير:

طبعا القضية محسومة من زمان يا صاصا ان احنا بندور على ذات الدين

ولكن هو ايه تعريفنا للدين ؟؟
اكيد اعتقاد وعمل

طيب لما هو كده ايه الاهم فيهم واللى مش ممكن نستغنى عنه ابدا
وايه اللى ممكن نتجاوز عن نقصه ونقول ممكن يتصلح بعد كده

انا اعتقد ان الموضوع اعتقاد وفكر ثم يليه العمل والسلوك
والعمل من غير اعتقاد لا قيمة له

بقول كده ليه؟؟
لان غالبا فى الواقع هتلاقى احد الضلعين لا يرضيك وساعتها لازم تختار

تحياتى

بنجاواتى يقول...

مصرى جدا:
اكيد كل شىء مقدر وعلشان كده بندعى ربنا ليل ونهار انه يوفقنا للخير اللى ممكن يخفى علينا

بس ده ما يمنعش اننا نفكر فى حالنا ونختار الاصلح

وربنا يبارك فيك يا رب عقبالكم كده لما تنالوا شرف المركز السادس وتقعدوا من غير ما تلعبوا فى بطولات -يللا يا راجل ع الاقل راحة :))-

مرتضى؟!!!
هو فى زى مرتضى
ده كان هيفرم كريم حسن شحاته بس قال يللا العفو عند المقدرة
ده عمل مؤتمر فى النادى حضره عدد جبار

ان شاء الله يبقى رئيس الزمالك الجاى وخليه بقى يا راجل يقفل حنفية الفساد فى النادى ههههه

منورنى

بنجاواتى يقول...

احساس طفلة محبة للرومانسية :

جايزة احسن تعليق
رائع

وجهة نظر هايلة
فعلا الصنفين الاولين ينفعوا لبعض
والصنفين الاخيرين برضه ينفعوا لبعض

لكن ما ينفعش ان حد من الاتنين اللى فى الاول يجتمع مع حد من الاتنين اللى فى الاخر

وجهة نظر محترمة جدا

بس تعقيب بسيط
وهو ان لو الاول هياخد التانى يبقى يكون الاول هو الزوج لانه ان شاء الله هيكون سهل عليه تغيير الزوجة

وكذلك التالت يكون هو الزوج لو هياخد من الرابع لنفس السبب

شكرا على رأيك المهم
تحياتى

بنجاواتى يقول...

ملكة بحجابى:

برافو عليكى والله
جايزة احسن تعليق بالمناصفة مع احساس طفلة

واضح ان كلنا متفقين ان التالت ما ينفعش الا مع شبيهه

وان كل صنف اكيد هيرتاح مع نفس درجته

الشئ اللى يحير بقى هو هل زى ما بتقولى كده ان الاول والتانى متوافقين

ده اهم سؤال لان زى ما انتى عارفة ان عادة الاتنين بيرتبطوا ببعض الاول وبعد كده يبدأ كل منهم استكشاف التانى وساعتها بيلاحظ القصور وبيبقى محتار هل يتنازل علشان زى ما بتقولى كده ممكن يكونوا متوافقين ولا ما يتنازلش علشان زى ما بقول مش هيبقوا متوافقين

ولا ارتباطهم ببعض هيخيهم متوافقين؟؟

اللى يعرف يقولنا بقى

تحياتى

بنجاواتى يقول...

ام مالك :
ربنا يسمع منك يا رب
ويكون قريب
بإذن الله وبدعواتك

منورة
والله انا بحبك فى الله من غير ما اشوفك

سلام

بنجاواتى يقول...

منوش الغالية:

اولا منورة
ثانيا انا هقولك مثال تانى
الصنف الاول ممكن تكون مش بتحب تجيب فى سيرة الناس بالسوء لان ده حرام

الصنف التانى ممكن تكون بتجيب فى سيرة الناس بالسوء مع انها عارفه انه حرام ..دى بقى لو زوجها فى يوم قالها بلاش نجيب فى سيرة الناس لانه حرام هتقوله حاضر وانا عارفة بس كنت عاوزة اللى يذكرنى

الصنف التالت ممكن تكون مش بتجيب فى سيرة حد علشان كده ظاهرها اقوم واحسن من الصنف التانى بس هى بتعمل كده لمجرد ان صاحبتها ما بتفتحش معاها فى سيرة الناس او مثلا تكون ما بتجبش فى سيرة حد علشان ما يزعلش منها لو الكلام وصله

هو ده قصدى من الكلام ويا رب يكون اى تتتتتوء تفاهم راح

وشكرا على مرورك
نومستا

بنجاواتى يقول...

بيبرس:

شوية دعوات وكلام جامد
ربنا يخليك يا رب

فكرة التفريعة حلوة
ان شاء الله لما يبقى الموضوع مكعبل كده هبقى احطه فى تفريعة


فعلا لو الواحد طيب ودعا ربنا يرزقه بواحدة طيبه ربنا هيستجيب له

ولو الواحد مش طيب ودعا ربنا يرزقه بواحدة طيبه ربنا مش هيوفقه للطيبة

اما بقى اللى ما بيدعيش اصلا ان ربنا يوفقه للطيبة فده محتاج انه يصلح نيته فى الزواج وبعد كده ربنا هيوفقه للخير

وفى استثناء وحيد وهو ان الانسان يكون طيب وربنا يبتليه وده مفيش قدامه غير الصبر ع البلاء ويحتسب

وربنا يوفقنا للى يحبه لنا

تحياتى

بنجاواتى يقول...

فتاة من الصعيد:
منورة البلوج
ويا رب ما تكونش اخر مرة

شوفى انا وضحت الموضوع شوية فى الرد على منوووش

ممكن تقريه وبعد كده نشوف ايه وجه اعتراضك ع التقسيم

وكنت احب اننا ما نقفش عند المثل ونسيب الفكرة

منورة وتحياتى

بنجاواتى يقول...

ستيتة :

يا خبر انا ازاى ما قلتش ان ده احسن تعليق :D

بس حضرتك قلتى الخلاصة

وهو ده اللى كان نفسى الكل يفهمه

هو اننا لو هنضحى بحاجة يبقى لا يمكن نضحى بالفكر
وما ننخدعش بالصبغة المظهرية المجتمعية

اما عن ان فى اصناف اخرى ففى كتييير جدا لكن اعتقد انها تندرج تحت هذا التصنيف-احنا مش بنصنف العناصر الطبيعية يا دكتور ده سلوك وافكار بشر-

نومستا فيليّه

بنجاواتى يقول...

د/ عرفة:

انا قلت انك اكيد هتفهم الموضوع -لو انت ما فهمتهوش يبقى مين ؟؟-

فعلا زى ما بتقول الاتنين مهمين جدا الفكر والسلوك

ولو هنقبل عنصر من الاتنين دول على نقصه يبقى اكيد مش هنقبل ان يكون الفكر والاعتقاد مختل

ولا انت ايه رأيك؟؟

موضوع الكيميا ده تسأل فيه الدكتورة ستيتة بقى وهى تقولك

سلام

ريمان يقول...

بصراحه مش عارفه اقولك ايه

بس صعب اننا نقيم اى حد من الناس

لان اى حد وكل حد كل يوم بتغير وبيبقى بشكل تانى غير اللى كان عليه فى اليوم اللى قبله

ودى طبيعه النفس البشريه


وبعدين مش تنسى ان كتير اوى من الناس لابسين اقنعه

للاسف يعنى

دول صعب اوى انك تكشفهم الا مع مرورو كتير من الوقت

ريمان يقول...

انا مش بتكلم عن البنات بس


لاء كمان الشباب طبعا

مجرد مدونة يقول...

كلام جامد جدا
ومع الأسف هو ده فعلا اللى بيحصل
بس الحل مش ان الصنف التانى يتجوز من الصنف التانى
لا الحل ان الصنف التانى يظبط نفسه كويس وبعدين يتجوز من الأولانى :)
ولا ايه رأيك يا حاج؟

وعلى فكرة انا اعرف شباب كتييييييير فى طب طنطا انت فى سادسة؟

ساره يقول...

سبحان الله هو النصيب
انت ممكن تدور على ذات الدين وطبعا لها مقايس معينه لا اختلاط ولا اغانى ولا ولا .. بس توصل لحد عندها وما تقدر تظفر بيها لانها مش نصيبك

انت تدور وتستخير وربي راح يدلك على الخير

جارة القمر يقول...

رائع يادكتور

قضية مهمة جدا


بوست رائع استمر

شكرا

بنجاواتى يقول...

جارة القمر:

شكرا جدا لحضرتك

ان شاء الله هستمر :D

شكرا لمرورك

بنجاواتى يقول...

سارة:

هو فعلا الموضوع فى الاول وفى الاخر نصيب
بس الواحد بيعمل اللى عليه

ولو الواحد مننا صدق الله فى نيته ربنا هيوفقه للخير

منورة

بنجاواتى يقول...

مجرد مدونة:
نورتنى

ما هو لو الشاب بتاع الصنف التانى عارف يبقى من الاولانى كان بقى وريح نفسه

بس احنا بنشوفله حاجة مناسبة له وقابلة للترقية معاه

والمجتمع لا يمكن يبقى كله من الصنف الاول
ولا انت ايه رأيك يا حاج

انا فى سادسة طب سيدهم-مش سيدى انا طبعا- احمد البدوى
لو تعرفنى ابقى قولى :D

سلام

بنجاواتى يقول...

ريمان:

مش عارفة تقولى لى ايه ليه...قولى كل اللى فى نفسك :D

هو فعلا الناس بتتغير مع الزمن بس اللى عنده مخ كويس بيتغير للاحسن

واعتقد انى علشان اعرف هو عنده مخ كويس ولا لأ مش محتاج عشرة طويلة اوى

الناس اللى لابسين اقنعة بقى دول من الخبيثين وبيكونوا ابتلاء من ربنا لو كانوا من نصيب حد كويس مع ان الغالب بيكونوا من نصيب اشباههم

نورتينى

بنجاواتى يقول...

بنت من الزمان ده:
انا اساسا كنت فاهم البوست اللى انا كاتبه بالقوة تيجى انتى وتعقديها اكتر :D

بجد كلامك محترم جدا
وهو مفيش اى مانع ان الانواع المختلفة تختار بعضها لو فى نية صادقة فعلا

بس انا كان قصدى ان الواحد يختار الاصلح والانسب له

وكمان اعتقد ان النوعين الاولانيين يعتبروا مجموعة مختلفة عن النوعين الاخيرين وان الاختلاط بينهم هيكون صعب شوية او كتير

نومستا

بنجاواتى يقول...

هذه حياتى

شكرا جدا ربنا يخليك

وربنا يرزقنا جميعا الزوجة الصالحة
ومن بعدها الذرية الصالحة

تحياتى يا باش مهندس

بنجاواتى يقول...

شق القمر:

نبدأ بالعكس ونقول يا رب روند النسا يكون موفق فعلا وجزاكى الله خيرا على ورق العضم اللى انقذنى فى الامتحان -مع انه مكنش موجّه ليا شخصيا لكن كنت انا اكتر المستفيدين بيه :D-

اعتقد ان دى التقسيمة الكبيرة اللى ممكن يندرج تحتها اصناف البشر مع تفاوت درجاتهم

ولاننا بنتكلم عن القاعدة مش الاستثناء فأعتقد ان الانسان بيبان سلوكه مع أقل مخالطة وكمان بيبان اعتقاده وفكره مع القليل من المواقف

(ناس بتشوف ناس زى الفل ولما تناقشهم تلاقيهم من غير مبادىء وبيرددوا وبس)
تصنيف تالت

(وناس أفكارها عال العال بس عايشة الدنيا وبعيدة عن دينها
وناس أفكارها عالية جدا بس تايهه وتتوه معاها)
تصنيف تانى

اسعدنى مرورك واعذرينى مش عارف ارد ع البوست عندك لاسباب

تحياتى الهندية

Lady E يقول...

الموضوع مهم فعلا والصورة جميلة بجد ههههه صعبان عليا العريس

وكذلك تلاقيها بتسمع اغانى لكن بتحاول ما يكونش برضه عمال على بطال ومش كل حاجة أغانى

يعني ايه اغاني عمال على بطال ومش كل حاجه اغاني ؟؟

شق القمر يقول...

هو الرد جاى فى الآخر خالص كده :D

الحمد لله يا مصطفى
وعلى فكرة الورق دا ينفع فى النظرى اوى

خلاصة قبل الامتحان فى السريع كده

نيجى عالتصنيفات فصدقنى من معرفتى البسيطة جدا وتعاملى مع الناس اكتشفت صنوف كتيييييييييييير


اما بقى عن أسباب عدم الرد فأتمنى تكون أسباب تقنية انا عارفة ان المدونة تقيلة حبتين :)

وردة يقول...

انت عارف يا بنجاواتي اكتر حاجة عجبتني ايه
انك واقعي
بعدت عن المثالية الجوفاء وكنت واقعي في اختيارك
التوافق شئ مهم جدا
وكمان انك تختار حد يفهمك
ويساعدك تكمل
تكونو تقريبا "مش بالظبط"في نفس المستوي
ولكن
لكل قاعده شواذ
يعني ممكن فاجأة تلاقي التقسيمة كلها اختلفت
وكانت النتيجة غير متوقعة
سواء بالفشل او النجاح
بس ده بيكون طفرات مش قاعده
بحييك علي الموضوع عجبني جداا
وانا موافقة علي رأيك
ومقتنعة بيه
سلام

بنجاواتى يقول...

وردة:

مع ان الساعة 3 بالليل الا ان ده مش هيمنعنى انى ارد على تعليقك الجميل ده

شوفى بقى انا هقولك كلام كنت شايله لاخر تعليق وهو :
انا اعتقد ان اللى مش عاجبه الكلام مش عاجبه لانه
1-يمكن مش عارف يحط نفسى فى اى مجموعة من المجموعات
2-يمكن عرف يحط نفسه لكن لقى موقعه مش كويس
3-يمكن ميال اكتر انه يسيب الامور على ربنا من غير ما يدقق فى اختياراته
4-يمكن الظروف حكمت عليه يعيش مع احد الاستثناءات وعلشان كده مش شايف ان الكلام ده له لزمة

ويمكن حاجات تانية الله اعلم
لكن ده اللى انا شايفه
وانا لما كنت بكتب البوست ده افتكرت النعامة اللى بتدفن راسها فى التراب وقررت انى ما اكونش نعامة

على فكرة انا بتكلم بهدوء جدا والله بس هو تعليقك اللى فتح نفسى على الكلام

نورتينى
ونومستا مخصوصة

Lady E يقول...

ماشي يا بنجا مردتش على سؤالي

يعني ايه اغاني عمال على بطال ومش كل حاجه اغاني ؟؟

بنجاواتى يقول...

lady:

الصورة جميلة بجد ؟؟
طمنتينى على العريس :))

القضية مش قضية اغانى بقدر ماهى قضية ان اللى الاغانى عنده حاجة مهمة جدا غالبا بتكون حياته كلها على هذا المستوى من الاهتمامات

تحياتى

Lady E يقول...

الصورة لايقة على الموضوع يا بنجا ده قصدي عاااااااااا

وبعدين انا واحدة من الناس بحب الموسيقى جدا وكنت بفكر ادرسها كدراسة اكاديمية لأن لو فكرنا شوية هنلاقي الكون كله متناغم وماشي بموسيقى معينة وكمان من وجهة نظري المتواضعة جدا ان مش كل الموسيقى حرام
بدليل اننا لما بنقرا القران الكريم بنحاول نخلي صوتنا حلو وكمان المقامات اللي موجودة في الموسيقى في مقرئين بيستخدموها في قرائتهم للقران الكريم علشان يقدروا يوصلو معاني الكلام للمستمع لو كان بيتكلم عن الجنة تحس ان صوت المقرئ فعلا بيعبر عن الجنة صوت كله سعادة وفرحه واستبشار مثلا
ومثال تاني للموسيقى الفجر لما بنسمع صوت العصافير ولا احلى موسيقى
وكمان الأناشيد ليها ايقاع وموسيقى
وكمان الموسيقى اللي بتساعد على الاسترخاء والتأمل وهدوء الأعصاب
وفي الأغاني اللي بنسمعها بلغات تانيه علشان نتعلم النطق الصحيح للغات دي
ماشي انا عارفه ان في نوع من الموسيقى حرام زي الاغاني بتاعت بعض الكليبات بس مش كلها حرام فمش ممكن نحكم على حد انه ملوش هدف في الحياة لمجرد انه بيحب الأغاني وبيسمع موسيقى

وامتحان الحضارة بكره عااااااا
الله يسامحك يا بنجا لازم تكتب موضوع يستفزني للنقاش

بنجاواتى يقول...

ledy:

سورى ما خدتش بالى انك تقصدى الصورة :D

ما دام انتى ما شاء الله طلع عندك وجهة نظر محترمة كده يبقى لازم اتكلم لان اللى كان مانعنى من الكلام انى خايف ليكون الفجوة كبيرة بين اللى انا شايفه واللى انتى شايفاه لكن ما دام انتى ما شاء الله اسلوبك رائع جدا كده وقدرتى تخبى غضبك يبقى انا هتكلم

تعرفى ان انا فى يوم من الايام كنت بدافع عن الاغانى زيك كده واكتر بكتير :D

وكنت اكتر من انى شايفها من الامور المباحة كنت شايفها كمان من الحاجات الحلوة اللى ممكن تقرب الواحد من ربنا لكن ده كان زمان

والفكرة دى انتهت من عندى لما عرفت يقينا ان احنا طالما رضينا بالايمان بالله واتباع النبى صلى الله عليه وسلم يبقى لازم نرجع للشرع فى كل امورنا علشان نعرف فيها كلمة فاصلة

وساعتها عرفت ان وجه الحرمة فى الغناء -اللى احنا بنسمعه يعنى ما تقوليليش اغنية ولد الهدى والكلام ده-هو سببين

الاول:
وهو ان النبى صلى الله عليه وسلم نهى عن المعازف -اى الات العزف- وجمعها صلى الله عليه وسلم مع حاجات تخض الواحد فينا فى الحديث ان النبى صلى الله عليه وسلم قال:
{ ليكونن من أمتي قوم يستحلون الحر والحرير والخمر والمعازف } أخرجه البخاري
الحر : الزنى اعاذنا الله من ذلك
الحرير:لبسه للرجال


السبب التانى:
وهو ان غالب الاغانى التى نسمعها تحتوى على الفاظ اما انها مخالفة للشرع -مخالفة للعقيدة- زى (قدر أحمق الخطى) أو (مدد مدد مدد يا رسول الله )أو تشتمل على الفاظ رومانسية وجمل وعبارات نخجل جميعنا من ذكرها فى المسجد مثلا او قدام حد بيحترمنا مثلا

وسبب واحد من دول كفيل انه يجعلها حرام واعتقد ان مافيش اغنية بنسمعها الا وفيها واحدة من العنصرين دول
اتفقنا؟؟؟؟؟؟؟؟

لو بصينا بقى للامثلة اللى قلتيها يا ليدزى-اسمحيلى اهزر معاكى فى وسط الكلام - تلاقيها كلها تخلو من الشيئين دول
اتفقنا؟؟؟؟؟
يبقى انا لما ضربت الاغانى كمثال كان قصدى انه هل البنت فاهمة الكلام ده ولا لأ وهل لما فهمت نفذت ولا لأ وعلى هذا المثال ممكن نقيس باقى تصرفاتها

وبالله عليكى نصيحة من واحد ملهوش اى مصلحة لو هتحبى تسمعى اغانى اسمعيها بس ما تدافعيش عنها وبالله عليكى كمان مرة بلاش فكرة دراسة الموسيقى دى لييييييييه؟؟؟
هقولهالك فى جملة واحدة وهى :
يا بخت الانسان اللى يوم القيامة بيتحاسب على اخطاؤه اللى ارتكبها فقط ويا تعاسة الانسان اللى لما يقف يتحاسب يوم القيامة يلاقى نفسه بيتحاسب على اخطاؤه وأخطاء ناس تانيين كان سبب فى ضلالهم(طوبى لمن انتهى حسابه عند ما اقترف )
قال تعالى:
(ليحملوا أوزارهم كاملة يوم القيامة ومن أوزار الذين يضلونهم بغير علم ألا ساء ما يزرون)الاية 25 من سورة النحل

واخيرا يا رب ما تكونيش زعلتى من اسلوبى لكن انا والله ماقصدتش غير النصيحة لكى
وبحييى فيكى جدا انك كتبتى كلام لا يبدو عليه العصبية بالرغم من انى اعتقد انك كنتى متضايقة وانتى بتكتبيه-حالة كانت بتحصلى قبل كده-

ويا رب يا رب يوفقك فى مذاكرة الحضارة ويجعل الصعب سهل عليكى يا رب وينفعك باللى ذاكرتيه ويذكرك بيه عند الحاجة اليه

وانا عارف وانا بكتب الموضوع انه هيقلب فى الاخر بالنقاش ده -اعمل فيكى ايه بس دلوقت ?:D-

وربنا معاكى
واقعدى بالعافية :D

Lady E يقول...

لاااااااااا الموضوع كبير كبيييييييير وعايز كلام كتير لما اخلص الامتحان بتاع بكرة ان شاء الله

وعلى فكرة انا مش متضايقة ولا بدافع عن الأغاني انا بس بقول وجهة نظري المتواضعة جدا جدا

وعلى فكرة برضه في مقرئين للقرأن الكريم درسو المقامات الموسيقية بس للأسف مش فاكرة اسمائهم دلوقتي

الفكرة ان كل حاجه في الدنيا سلاح ذو حدين وكل حاجه ممكن تبقى صح او غلط على حسب استخدامنا ليها

arsenalwy يقول...

ازيك يادوك

صح اللى من صنف معين بيدور على اللى زيه الا فى حالة لو حد من الصنف التانى وعايز يقرب من ربنا فبيحاول يدور على حد من الصنف الاول

موفق يادوك

بنت الأسلام يقول...

السلام عليكم ورحمتة الله وبركاتة

بداية انا لاأتفق مع حضرتك فى هذة التصنيفات والفصل بين الفكر والاخلاق فهناك قاعدة وضعها الرسول فى مسألة إختيار الزوجة وهى (فظفر بذات الدين ) وعلى هذا الاساس يتم الاختيار
وذات الدين هتلاقى عندها أخلاق عليا وفكر وثقافة وهتقدر تبنى بيت مسلم صحيح وتكون زوجة وأم صالحة .
تقبل مرورى
تحياتى

z!zOoOo يقول...

السلام عليكم

ازيك يا بنجاواتي يارب تكون بخير

هو موضوع جميل بس ليا عوده لفرصه اكبر للمناقشه

ياريت تبقي تشرفني

تحياتي

غير معرف يقول...

ازيك يادكتور

ياترى فيه امتحانات ابتديت
ولوفيه ايه الاخبار
ربنا معاك فى كل خطواتك
تحياتى

المحرر يقول...

السلام عليكم
السيد بنجواتي تحية طيبة
فريق مجلة رؤية مصرية يتقدم بدوعة خاصة لشخصك الكريم للإنضمام إلى أسرة تحرير المجلة واثراء المجلة بفكركم الواسع ورؤيتكم بناء على ما وجدناه في صفحة مدونتك الكريمة
ننتظر ردك خاصة وأن المجلة تخوض معركة تغيير كبيرة جدا للانتقال من مرحلة الميلاد للنضوج الفكري بشكل جدي جدا
ننتظرك
للتواصل معنا على بريد المجلة
roaua.com@gmail.com

خالص تحيات أعضاء الفريق..

منسق أعمال المجلة

غير معرف يقول...

فينك يادكتور
والله قلقانة عليك طال غيابك
اوعى تقول الامتحانات
كنت برضه تدخل تطمنا
ارجوك ارجوك فعلا تكتب اى حاجة
تطمنى عليك
والله لك وجشة كبيرة ياابنى
تحياتى

غير معرف يقول...

فينك يادكتور
والله قلقانة عليك طال غيابك
اوعى تقول الامتحانات
كنت برضه تدخل تطمنا
ارجوك ارجوك فعلا تكتب اى حاجة
تطمنى عليك
والله لك وجشة كبيرة ياابنى
تحياتى

Lady E يقول...

يارب يكون المانع خير بنجاواتي

ربنا يوفقك في امتحاناتك

مجرد مدونة يقول...

يا ترى انت فين يا دكتور قلقتنا عليك؟؟

بنجاواتى يقول...

أم مالك ...ليدى..مجرد مدونة..

ربنا يخليكم على سؤالكم عليا ويحفظكم ويرعاكم من كل سوء

انا بخير والحمد لله

بحبكم كلكم

بنجاواتى يقول...

همسة:

معلش بقى انى اتأخرت فى الرد
لكن مفيش مشكلة انك تختلفى معايا.... ده شئ يسعدنى

كلنا متفقين على الاساس اللى وضعه النبى صلى الله عليه وسلم
ولكن انا كنت بتكلم عن الالية اللى هنختار بيها ذات الدين دى ...

بس مش اكتر يعنى
منورانى

بنجاواتى يقول...

ارسنالاوى

منور يا ارسنالاوى

كلامك مظبوط والحمد لله ان الشباب كله بيدور على الخير وبيحكم العقل فى اختياراته

منورنى

بنجاواتى يقول...

مونى:

اول تعليق منك وآخر رد منى...معلش بقى سماح المرة دى

ربنا يبارك فيكى ويحفظك

دماغى دى اللى جايبه لنفسها الوجع..يللا ربنا يتوب علينا

الحمد لله ان التقسيم عجبك
ويارب مايكونش فى حد نعرفه من الصنف الرابع

انا عارف ان مثال الاغانى ده ممكن يضايق البعض -وانتى ما شاء الله اول تعليق لفت الانتباه للموضوع ده-

يا ستى انا مش قصدى الاغانى ذات نفسها ...هى مجرد مثل وسلوك بنختلف فيه كشباب لكنه بيعكس الحاجات التانية الكتير اللى انتى بتقولى عنها

انا دلوقت فعلا مقتنع ان البنات من الصنف الاول مش هيخنقوا على الشباب اللى من التانى لان الشباب اللى فى التانى اصلا ماوصلوش للتانى الا لقربهم من الاول-متفقين-

يللا ربنا معاكى فى امتحاناتك ويوفقك

سلام