الأربعاء، 6 مايو، 2009

نصر من غير سعى...؟؟؟!!!!


السلام عليكم ورحمة الله وبركاته


هذا الموضوع ليس منقولا وإنما هى أفكار وفقنى الله لها.....

الأول ازيكم ..واحشنّى ..وربنا يبارك فيكم كلكم يا رب


بقالى فترة كده وأنا ملاحظ طفل جميل ما شاء الله عليه بيحافظ على الصلوات فى المسجد معانا بما فيها صلاة الفجر-وأول حاجة جت فى بالى انه أكيد اتربى على كده-


اتعرفت عليه وقربت منه وبقينا اصحاب والحمد لله...

طفل جميل اسمه هيثم فى سنة خامسة ابتدائى


من كام يوم وأنا بتكلم مع هيثم وبهزر معاه وبعد ما عمل لى اختبار فى اللغة الانجليزية-كعادة الأطفال لما بيعرفوا حاجة- قلتله ما شاء الله يا بطل انت شاطر فى الانجليزى


ولقيته بيقولى :إن شاء الله هتعلم الفرنساوى كمان وباندفاع الأطفال من غير ما أسأله قالى:علشان ابقى أعرف أتكلم مع الأجانب بالإنجليزى والفرنساوى وأخليهم يأسلموا-يدخلوا فى الاسلام يعنى-

قلتله ما شاء الله يا بطل وروّحت وأنا بفكر فى اللى هيثم قاله


طول الليل بقول لنفسى:

-اللى يشوف حال المسلمين كمجتمعات ودول يلاقى الصورة مظلمة جدا والوضع مخزى


-واللى يشوف حال العدو الخارجى يلاقى حكومته بقت يمينية –لا يخطر ببالها فكرة السلام- وكمان يوم بعد يوم بتتقدم


-واللى ينظر فى حال غيرهم -حتى لو عايشين معانا- يلاقى صورة حية من قول ربنا سبحانه وتقدّس:

(يَا أَيُّهَا الَّذِينَ آمَنُوا لا تَتَّخِذُوا بِطَانَةً مِنْ دُونِكُمْ لا يَأْلُونَكُمْ خَبَالًا وَدُّوا مَا عَنِتُّمْ قَدْ بَدَتِ الْبَغْضَاءُ مِنْ أَفْوَاهِهِمْ وَمَا تُخْفِي صُدُورُهُمْ أَكْبَرُ)سورة آل عمران الآية118


-واللى يشوف حال جماعات كنا فاكرينهم اصدقاء زى الشيعة أو حتى على الأقل محايدين زى الاتحاد الأوروبى يلاقى إن الأقنعة الزائفة سقطت وظهرت وجوههم القبيحة


-طيب ازاى من هذا الظلام يخرج اطفال زى هيثم؟؟!!! ومين الناس دول اللى اهتموا يكون ابنهم بهذه العقلية؟؟؟؟


قلت خلاص بكرة اسأل هيثم عن بيته ومدرسته وازاى زرعوا فيه الاعتقاد ده


والمفاجأة ان هيثم طلع فى مدرسة عادية جدا يعنى مش أزهر

والمفاجأة الاكبر هى إن أسرة هيثم كل أملهم انه يكون إنسان محترم ...إنسان عادى...أسرة عادية جدا ..ويمكن ما يفهموش ايه اللى ابنهم بيفكر فيه ده


طيب مين اللى زرع فيه الاعتقاد ده؟؟؟كل الأسباب انقطعت...


الحمد لله لقيت الإجابة فى كتاب ربّنا سبحانه وتقدّس إذ يقول عن موسى عليه السلام:

(وَلِتُصْنَعَ عَلَى عَيْنِي) الآية 39 من سورة طه


نعم ..قصة موسى عليه السلام مع فرعون....الموت ينتظر موسى من قبل ولادته فكم قتّل فرعون من ولد فى طلب موسى ..حتى وإن كتب الله لموسى النجاه من القتل فمن الذى سيربيه حتى يقف فى وجه هذا المتجبر الظالم

-كل الاسباب منقطعة كحال المسلمين -

وسبحان الله ..يأبى الله أن يُربَّى موسى إلا فى حِجر فرعون..رباه عدوه


كذلك الحال مع هيثم..غاب دور من يربّيه فقضى الله ان تربّيه الأحداث ..يربيه جور عدوه وظلمه فيصنع منه رجلا..تربيه الجرائم البشعة التى يرتكبها عدوه فى حق اخوانه

هكذا يصنع الله جيلا على عينه كما صنع موسى عليه السلام..


وزاد يقينى بالفكرة عندما تعلمت –بفضل الله- معنى قوله جل فى علاه:

" مَنْ كَانَ يَظُنُّ أَنْ لَنْ يَنْصُرَهُ اللَّهُ فِي الدُّنْيَا وَالْآخِرَةِ فَلْيَمْدُدْ بِسَبَبٍ إِلَى السَّمَاءِ ثُمَّ لِيَقْطَعْ فَلْيَنْظُرْ هَلْ يُذْهِبَنَّ كَيْدُهُ مَا يَغِيظُ " سورة الحج الآية 15

أى أنه يا من تظن أن الله لن ينصر نبيّه ومن بعده دينه فليمدد بسبب الى السماء أى فليصعد إلى السماء ثم ليقطع أى يغلق أبواب السماء التى يتنزل منها النصر من عند الله فإن استطاع ذلك فسوف يذهب غيظه وتتحقق مكيدته


وتفسير آخر أعجبنى :ان السماء هى سقف البيت وكأن الله يقول يا من تظن أن الله لن ينصر دينه فلتربط حبلا فى سقف بيتك ثم اقطع أى اقطع سبب الحياة فيك وهى الروح وذلك بتعلّقك بهذا الحبل من عنقك حينها سيذهب غيظك-زى ما بنقول كده اخبط راسك فى الحيط نوع من التهكم من عجزه وضيق افقه-


والسؤال هو:

-هو هيثم حالة وحيده ولا نادرة ولا فى زى هيثم كتير؟؟؟؟

-السؤال بصيغة أخرى ..هو الجيل اللى هيصنع الفارق قرّب ولا لسه أوانه ما جاش؟؟؟؟


فى النهاية كنت عاوز أقول إن النصر اللى أنا أقصده مش مجرد نصر فى المعركة ولكن أنا قصدت النصر التعليمى والاقتصادى والتكنولوجى والعسكرى..


هذا البوست كان المفترض نشره غدا لانشغالى فى المذاكرة ولكن بسبب تعليق وصلنى فى البوست السابق قررت ان انشره اليوم ..وأرجو من الأخوة المدونين الأفاضل مقاطعة صاحب هذا التعليق وعدم الاندفاع وراء مشاعرنا


وحاجة أخيرة عاوز أقولها هى إنى عملت إشراف على التعليقات وإن شاء الله بكره انشرها كلها خصوصا إنى متفائل ومنتظر اللى يقولى لى انا ابنى زى هيثم ..وانا اخويا زى هيثم..وإن هيثم مش حالة وحيده ولا نادرة

هناك 58 تعليقًا:

MǿиY El-Shreef يقول...

ازيك يابنجا ربنا يصبرك ويعينك يااارب

ان شاء الله الامتحان هيجي كويس انا اصلي بدعيلك :D

وانت عارفني يعني

ع فكره نموذج هيثم ده واللهانا شايفه منه قدام عيني تلاته عمرو واحمد ومحمد وقريب اوي مصطفى

عمرو ومحمد دول اخوات وماشاءالله عليهم حافظين القران كله من بدري وهما لسه ف اعدادي بس عمرو ف اولى ثانوي وصلاه وصوم ولغه ماشاء الله عليهم تفكيرهم كبير اوي

احمد ده يبقى اخويا وبقى يتعدي منهم دلوقتي وحافظ 10 اجزاء وماشي ف ال11

وبردوا تفكيره ابتدى يتطور من كتر ما بيختلط بيهم بس مايمنعش يعني انه بيستعيلوا بردوا شويه خصوصا احمد ومحمد

مصطفى بقى ده اخو عمرو ومحمد الصغير لسه ف 2 حضانه وبيحفظ قران ماشاء الله عليه وبردوا بيتعلم انجليزي والواد دماغه حلوه اوي

لسه في ناس كتير كده الحمدلله

ونصر ربنا قريب والجيل الي بتتكلم عنه فيه منه كفايه اني في شباب كويسين اوي زيك كده

ربنا ينفع بيك يابنجا

وبالنسبه للاخ الي رد انا شفت رده وردك عيله وانا فعلا متجلاه وقلت لندى تعمل كده

ربنا يكرمك يابنجا

بوست زي الفل

:)

د. ياسر عمر عبد الفتاح يقول...

ربنا يكثر من أمثاله
بس الأهم ربنا يثبتهم
لأن في الغالب كل الأطفال بيبقول علي افطرة السليمة ..
لكن لما بيكبروا بيتغيروا كثير

ربنا يثبتهم يارب
ويهدي كل أطفال شباب وشيوخ الأمة

ستيته حسب الله الحمش يقول...

مرة سألت زميل لي وانا في قمة الغيظ من هبل وعفرتة احمد ابني

ازاي الواد ده كده وأخته كده مع ان الاتنين لنفس الأب ونفس الأم ونفس البيئة
ده غير اني اقسم بالله ما ربيت بنتي هي - ما شاء الله لا قوة الا بالله - متربية من يوم ما اتولدت لوحدها كده وما شاء الله لها نوع من الثبات النفسي والعقدي خاص بها

رفع زميلي يده الى السماء وقال ده عادي جدا
ربنا بيربي ناس من البشر بحوله وقوته والرسول قال أدبني ربي فأحسن تأديبي

سبحان الله الراجل قال من قبل سنه ما قلته انت اليوم

الهدى هدى الله

ربنا يهدي جميع ابناء المسلمين لما يحب ويرضى

ربنا معاك ومنتظرينك بكره بليل تطمنا على التمتحان

القدر و انا يقول...

بنجواتى
يا سلام على هيثم.. وانا أقرا طول الوقت ادعى اشوف ابنى زيه ... ربنا هو القادر على هداية البشر
بس سعدت جدا بهذا المثال الموجود ودعاء من القلب ان يهدى اولادنا جميعا وينير بصيرة جيل الشباب ويصلح من احوالهم
شد حيلك فى الامتحانات يا بطل الله معك

Ahmed Talk يقول...

هل لازال من بين أطفالنا من يفكرون كذلك هل هناك من يفكر كذلك طفل راجل اي أن كان

ممن نراه ظننا أن أكثر ما يعنينا أموار لا تعني الإسلام في شئ ولكن هذه الأمة لا زال فيها ما بقيت الدنيا أمل كما قال رسول الله صلي الله عليه وسلم

و الحمد لله أن هناك مثل هؤلاء.

د/عرفه يقول...

انا برضه بقول كده
ايه اللى خلاك تدون النهاردة

بس بدات تغير اهو من ولاية همارشتا
والموز
هههههههههههه

بجد يا مصطفى بوست جميل اوى
انا برضه قابلت زى هيثم ده كتير عندنا فى المنطقة

فعلا لو كل اسرة اهتمت تربى ابنها زى هيثم
هينصلح حال الامة بشكل كبير

بالنسبة للتعليق ابقى اعرف منك بكرة ان شاء الله

ذاكر كويس يا بنجا يا كبير

شق القمر يقول...

الله عليك يا بنجاواتى
لم أتوقع منك .. سبحان الله
ربنا يبارك فيك ويزيدك
وينفعنا بما تتعلمه
ويبارك فى أولادنا وأمة الإسلام
ونرى فيهم أمثال هيثم الكثيرين
لا يهتمون ليكونوا اوائل فصولهم فقط
وانما عقولهم بنيت على اكثر من ذلك
جعلتنى بهذه التدوينة فى حالة عالية من التفاؤل
ما شاء الله
ربنا يبارك

وردة يقول...

ماشاء الله بجد حاجة تفرح
ربنا يبارك فيه ويثبته
بحلم اني ان شاء الله لما اتجوز واخلف اربي ابني او بنتي كده
بس اكتشفت مع الايام ومع اختلاطي بالناس
ان مش التربية هي اللي بخلي الولد صالح او لاء
زي ما قولت التربية من عند ربنا
ممكن حد يكرس كل حياته لتربيه وتعليم ولاده وفي الاخر واحد يفلح والتاني لاقدر الله لاء
ربنا يهدينا جميعا ويفتح لقلوبنا للهداية
سلام

يوميات شاب منوفى يقول...

امت محمد بخير الى يوم القيامة وهيثم دة خير مثال على كدة ربنا يباركلة ويجعلة خير سند للاسلام والمسلمين

بنجاواتى يقول...

مونى:

طبعا ثنائك على البوست له معزة خاصة

ربنا يبارك فى أحمد وبرضه الأمر ما يمنعش انه محتاج لشوية رعاية

وربنا يكتر من أمثال عمرو ومحمد ومصطفى

الحمد لله الامتحان كان ميسر بفضل الله ثم دعوات الحاجة بركة-وهو أصلا كان امتحان شفوى بسيط لكن كنت مشغول بيه شوية-

طبعا فتحتى نفسى لأسباب كتيرة وأهمها انك كنتى أول تعليق وانك ذكرتى نماذج بتخلى الواحد متفائل لما يسمع عنها..وحاجات تانية

بس انا أول مرة أعرف ان البوست ممكن يكون زى الفل

تعليقك هو اللى زى الفل
نومستا

بنجاواتى يقول...

د/ ياسر عبد الفتاح

دعوة جميلة منك
وكلنا بندعى معاك ان ربنا يثبت هيثم واللى زيه

بس للثبات اسباب اكيد اهمها هى الرعاية والدعم النفسى للاستمرار فى تحقيق اهدافه

وان شاء الله ما يتغيرش ولا حاجة
ده واد بطل

سلامى

بنجاواتى يقول...

الدكتورة ستيته:

ربنا يبارك فى أحمد الوزير الصغير

هو فعلا اللى بيربى الابناء هو الله وبيكون الاهل ساعتها أسباب مش أكتر
بس ده ما يمنعش ان الاهل يعملوا اللى عليهم وياخدوا بالاسباب

وما يفقدوش الامل حتى لو فقدوا الاسباب

بس هو أحمد عفرتو أوى كده؟؟!!!
كنت هقولك اربطيه فى رجل السرير بس بصراحة خفت منه

الحمد لله رجعت من الامتحان موفق بفضل الله ثم دعواتك يا دكتور

منورة يا غالية

بنجاواتى يقول...

القدر وأنا:

ربنا يا رب يصنع من ابن حضرتك من هو مثل هيثم وأفضل منه كمان

دعواتكم كلكم واصلة والله

الامتحان عدى والحمد لله
وقعدت اشد حيلى لحد ما بقيت أطول من اللازم

منورانى

بنجاواتى يقول...

ahmed talk:

منور يا أحمد

الحمد لله انه لازال فى أولاد رجالة زى هذا الولد

وان شاء الله يكون فى منه كتييير

وربنا ينفع بيه

نورت المدونة يا أبو حميد

بنجاواتى يقول...

د/عرفة:

ايه يا عم
الحمد لله أخرت الرد على سيادتك بعد الامتحان علشان ما تزعلش انى نزلت البوست امبارح -اعتبره نزل النهارده مش هيجرى حاجة-

تصدق انى ما عرفتش انت عملت ايه فى الاكزام

يللا أيا ما يكون اللى انت عملته فالحمد لله انها عدّت والشىء اللى لازم تحمد ربنا عليه ألف مرة هو انى برد عليك طبعا-متواضع أوى-

وان كان ع الموز فدى راحة ما تفتكرش انى هبطل آكل موز...هع هع على رأى المثل

وطبعا لازم تحمد ربنا كمان انى فاكر ومستنى البوست اللى انت فلقتنا بيه ولسه ما نزلش

هو الموضوع متعسر أوى كده؟؟؟

يللا بقى يا عمنا عاوزين نشوف هتقول ايه قبل ما ادخل فى غيبوبة نوم

منور

بنجاواتى يقول...

شق القمر:

منورة يا دكتورة رنا -أنا اللى لم أتوقع منك...سبحان الله-

بجد انا مبسوط انك فهمتى اللى انا قصدى عليه

هو الحكاية انى كنت عاوز احساس التفاؤل ده يوصل للى يقرا البوست...
وطبعا اللى مش هيبسطه البوست هو عارف نفسه ويخبط راسه فى الحيط....

منورة ويا رب ما تكونش الاخيرة
سلامى

بنجاواتى يقول...

ورده:

ربنا يبارك فيكى ويرزقك من أمثال هيثم ان شاء الله

بس تتجوزى الاول وبعد كده نتفاهم فى الموضوع ده-بهزر معاكى..-

فعلا عندك حق والله مش دايما الاسباب بتصيب فالاسباب مهما عظمت فهى اسباب

منورانى وناشرة ريحة الورد فى المدونة كلها

سلامى

بنجاواتى يقول...

يوميات شاب منوفى:

اولا تحية خاصة للمنوفية وأهل المنوفية

ثانيا الكلام جميل وموزون

ثالثا انت منور يا عم المنوفى وربنا يبارك فى شبابك

Lady E يقول...

ما شاء الله بجد بوست رائع ومعنى جميل جدا جدا اللي شوفته في هيثم

ربنا يوفقك في الامتحانات ويوفقنا جميعا

موناليزا يقول...

ربنا يحميه ويبارك فيه

بنجاواتى يقول...

lady E:

منورة يا ليدزى

انا عارف ان المعنى جميل والحمد لله انه وصل ما دام اللى كاتبه واحد بنجاواتى ما لهوش حل-تواضع يا ابنى ه ه هاها-

ربنا يبارك فى هيثم ويكتر من امثاله

منورة يا ليدزى

بنجاواتى يقول...

موناليزا:

دعوة جميلة
آمين يا رب

مرسىىىىىى

مدونتك جميلة اوى على فكرة

منورانى وربنا يجعل بيت المحسنين عمار

أحمد سعيد بسيوني يقول...

بجد

انا سعيد جدا اني قرات موضوعك الجميل ده

انهم صغار ولكنهم عمالقة

http://ana-elbahr.blogspot.com/2009/01/21.html

دمتم بسعادة

بنجاواتى يقول...

أحمد باشا

الحمد لله انك سعيد من البوست

الولاد دول والله بيخلوا الواحد يستصغر نفسه

يعنى احنا بينا وبينهم فارق محترم جدا جدا

Bent Men ElZaman Da !! يقول...

ماشاء الله بجد
ربنا يحرص الاطفال اللى من النوع ده
يمكن انا قليل لو شوفت نموذج زى ده من الاطفال
بس لو الاطفال دلوقتى بقوا كده
بكره اكيد هيبقى احسن بكتير من النهارده وامبارح
واحتمال يبقى فى امل
وربنا يثبت اللى زى الطفل ده ويكون احسن واحسن كمان لما يكبر

ربنا معاك فى امتحاناتك ويوفقك :)

بنجاواتى يقول...

بنت من الزمن ده:
الحمد لله هو كان امتحان بسيط كده والحمد لله عدى على خير

ان شاء الله انتى اللى تعملى ولاد امثال هيثم

ان شاء الله يكون فى كتير زى هيثم وان شاء الله بكرة احسن بكتير

منورة الدنيا

شق القمر يقول...

على فكرة يا مصطفى
التغيير جميل جدا فى مدونتك
وذوقك جميل ما شاء الله
بس هى حاجة واحدة اللى مش متوافقة
I luv Zamalek
:D

وكمان عايز تضبط التاريخ
مع انى بفضل شهر فبراير جداااااااا

سلام عليكم :)

بنجاواتى يقول...

شق القمر:
وعليكم السلام ورحمة الله

منورة يا دكتورة رنا
والله انتى اللى عينك حلوة فبتشوفى الحاجة حلوة

انا بقالى ساعة ببص ع التاريخ ومتهيألى انه صح

اما الزمالك فده بقى الحاجة اللى صعب نتفق عليها لانى زملكاوى من زمان وعشت مع الزمالك ايام اصعب من اى ايام ممكن تيجى

منورة المدونة وسعيد بمرورك

ঔღঔ نـــوارة ঔღঔ يقول...

البوست رائع جدا ويشرح القلب

الحمد لله الدنيا لسه بخير وفي اطفال زي هيثم وماشاء الله عليهم ربنا يثبتهم على ايمانهم

ولسه اليوم كنت فرحانة بابن اخت جوزي ربنا يباركله بيحفظ بالقران وحافظ اجزاء منه وامه ست مثال للاخلاق والتدين وبتربي ولادها على القران والدين والحمد لله معظمهم متمسكين بالدين جدا ربنا يوفقهم

مع انه زوجها راجل مش بيعرف ربنا ومش بيصلي واسوء اب اشوفه بحياتي ربنا يهديه او يريحهم من عذابه

ربنا يوفقك بدراستك ويحققلك امنياتك

بالتوفيق يارب

أم مالك يقول...

بارك الله فى هيثم وامثاله
بس الاهم اننا ندعى ان ربنا يحفظهم
ويحميهم من الفتن اللى حتمر عليه
اللهم احفظك واحفظ اولادنا من فتن
المحيا والممات
وشد حيلك فى الامتحانات ربنا ينجحك انت وابنى وامثالكم جميعا
ودمت بالف خير

محمد عبد الباسط يقول...

ان شاء الله الامل موجود وان كانت عوامل الهدم والفساد كثيرة
احييك على مقالك الرائع وعاطفتك الجياشة

تقبل تحياتى ولا تنسانى من دعائك

حلم كبير

Lady E يقول...

ليدزي بهدلت اسمي يا بنجا

او يا يوسف خوري :)

MaNoOoSh يقول...

الاول مبروك على النيولوك بتاع المدونة
وبعدين فعلا
الاهل بيعملوا اللى عليهم فى التربية.. وبعد كدة الانسان بيبقى فى ايد ربنا.. يا ربنا يرضى عنه وينضف قلبة ويزرع فيه الرحمة والخير وحب تعلم الدين.. يا يحطة فى اختبارات حب الدنيا.. او ما بينهم حاجات كتير.
بس سؤال صعب قوى ان الجيل دة هو اللى هيصنع الفارق وللا لأ.. محدش يعرف.. اصل سبحان الله مقلب القلوب.. حتى القلوب العاصية واحيانا الميتة ممكن فى لحظة ربنا يريد ليها انها تبقى زي هيثم
تحياتى يا بنجا.. وربنا يرزقك الزوجة الصالحة والابناء الصالحين وتربوهم بما يرضى الله ويكونوا زى هيثم واحسن.

بنجاواتى يقول...

نوارة:

ربنا يشرح قلبك يا رب دايما

الحمد لله ان فى زى هيثم
كده يبقى فى أمل فى حاجة حلوة ممكن تتحقق فى المستقبل ان شاء الله

ايوة كده افتحوا نفسى بالاخبار الحلوة دى

أما ولاد اخت جوزك ربنا يبارك فيهم ويبقوا أحسن وأحسن-ابن اخت جوزك دى لفّة طويلة اوى:)-

ويا رب يهدى جوزها اللى هو جوز اخت جوزك
وربنا يهدينا جكيعا

منورانا

بنجاواتى يقول...

أم مالك:

والله انا بحس ان الدعوة منك بتبقى طالعة من القلب
وبجد انا سعيد انك بتدعى لى
يا رب يبارك فيكى
وينجح ابنك
ويحفظ هيثم وكل شباب المسلمين

منورة الدنيا

بنجاواتى يقول...

محمد عبد الباسط:

ربنا معاك يا ابنى

حلوة موضوع العاطفة الجياشة دى-عرفت ازاى؟؟؟:)-

علشان تعرف ان انا ما تغيرتش:)

ورغم اى هدم فربنا له تدبير يخفى عن البشر

منور يا دكتور

بنجاواتى يقول...

lady E:

ليدزى
ليدزى
ليدزى
ليدزى

ماركة عربية دى ولا ايه؟؟؟؟؟؟:)

منورة يا

ليدزىىىىى

بنجاواتى يقول...

منوووووووووش:

والله يا منوش النيو لوك ده أقل حاجة عندى :)

لو تحبى تغيرى النيولوك ممكن أخلى العبقرى اللى عمله لى يعمله لكى انتى كمان

اما عن الموضوع فأنا عاوز اقولك ان انتى ما شاء الله من أكتر الناس اللى فهمت البوست
لأن مش الغرض هو انى أقول ان فى هيثم ولكن كنت عاوز أعرف هل فى زى هيثم كتير

وكمان اللى زى هيثم ممكن يعمل حاجة ولا هيبقى امتداد لنا -طبعا مش محتاجة اقولك اد ايه احنا ناجحين-

منورة يا منوش

د.آيه يقول...

بسم الله الرحمن الرحيم

هو صح فين من عينة هيثم كتير و الحمد لله ..
بس أنا بجد اصابتنى قشعريرة من القصة دى و في كلام معين ..
يا رب ينصر الإسلام و المسلمين..
و الأطفال دول لما يكبروا يستمر عندهم الإحساس ده و الشعور بالواجب و التمسك بالدين..
لإن للأسف الواقع و لما يواجهوا مصاعب الحياة كتير بتسبب إحباط..
تحياتى

بنجاواتى يقول...

د/آية

الحمد لله ان فى زى هيثم كتير

وان شاء الله ربنا يحفظ الولاد دول

وان شاء الله ربنا ينفع بيهم

وسعيد لمرورك

قلب ارهقته الاحلام يقول...

ماشاء الله بجد بوست أكتر من رائع

وفيه أمل في الامة للنهوض بإذن الله ولعل نصر الله قريب
وماشاء الله علي هيثم ربنا يارب يثبته هو وأمثاله
ليكون شابا ممن ينشئون في طاعة الله وربنا يارب يروقنا
ذرية صالحة تدعو إلي الله وتنصر الاسلام

فيه أمثلة كتير زي هيثم يابنجا قريبين مننا أو بعاد عننا
المهم موجودين يمكن ف نفس البيت

نفس العمارةأونفس الشارع ال ساكنين فيه
يمكن نكون قربهم لينا أكتر من قربنا لنفسنا وإحنا مش واخدين بالنا
المهم موجودين

وربنا يارب يهدي الجميع للطريق الصواب بإذن الله
جزاك الله ألف خير يارب موضوع جميل جداً

وأول زيارة ليك مني :)

تحياتي ليك ,,,

بنجاواتى يقول...

غادة:

منورة يا غادة
يا رب ما تكونش اخر زيارة منك

والله انتى اللى كلامك جميل ويبعث على التفاؤل وممكن نحطه فى بوست لوحده:)


وفيه أمل في الامة للنهوض بإذن الله ولعل نصر الله قريب

ربنا يبارك فيكى ويطمن قلبك

نومستا

z!zOoOo يقول...

السلام عليكم

اسئل الله ان يوفقك لما يحبه ويرضاه

إني رأيت كهيثم لكني أري أن كل منا بداخله هيثم لكن هذا البلد علمه كيف ينسي هذه الفطره او الشيء الذي زرع ونشأ به ومن قسوه الايام بها وإظلام رؤيتها اصبح لا يعبأ ولا يبالي بأي شيء
حتي وإن كان في صلاحه

كلن ينتظر من يتقدم أمامه حتي يفعل مثله

وبيني وبينك كده البلد ديه بتقتل اي حلم وأي نظره مستقبليه وأي عزيمه او أمل او جهد او حتي تخيل

وهيثم ده طبعا ربنا ما يكتب عليه ولا علي جيله بس اول ما هيكبر شويه هيصحي علي الواقع المر الي إحنا شوفناه قبله
هيفتكر الي كان بيفكر فيه هيعرف قد إيه إنه كان طفل ساذج

وكل القيم الي كان بيفكر فيها ديه هيلاقيها بره ده من ناحيه التقدم

ومن جميع النواحي ديه مش هيلاقيها غير في المدينه الفاضله

معلش علي التعليق اللاذع ده بس ديه الحقيقه ويارب ما تستمر حقيقه

ربنا يبارك في هيثم وفي الجيل كله يمكن هو الي يقدر يعمل حاجه

ربنا يوفقك في مذاكرتك وجميعا

دمت أخي بكل ود

في رعايه الله

بنجاواتى يقول...

zizooo:

منور يا راجل

بس ايه التعليق اللاذع ده

رغم احترامى الشديد لحضرتك لكن عاوز حضرتك تقارن نفسك واصحابك ووكل اصدقاء طفولتك وتقولى كان فينا كام واحد وهو صغير بيفكر بالطريقة دى

لكن الحمد لله اصبح فى من هيثم كتير فى الولاد الصغيرين

علشان كده ان شاء الله هما-بتوفيق الله لهم- اللى هيغيروا الصورة اللى حضرتك بتوصفها

وساعتها مش هيحتاجوا يدوروا على بلاد برة ولا اى حاجة من دى

سعيد جدا بتشريفك ليا

تأثير الفراشة يقول...

الحمد لله فى زى هيثم كتير سواء أطفال أو فى سن الشباب، و الخير بإذن الله هيفضل دايما موجود، و على فكرة والدى هيثم حتى لو كان ظاهرهم عادى لكن أكيد هم ناس صالحين فكانوا خير القدوة لولدهم، و علشان كده الولد اتعلم منهم -و ده بكرم من ربنا طبعا- و موضوع القدوة ده موضوع تانى و كبير، إنما الأكيد إن علشان يكتر الأطفال اللى زى هيثم، فلابد لنا أولا أن نكون كلنا هيثم، علشان نكون القدوة الحسنة اللى الأطفال يقلدوها

جزاك الله خيرا على البوست
تحياتى لحضرتك
و بالتوفيق إن شاء الله فى الامتحانات

بنجاواتى يقول...

تأثير الفراشة:

ربنا يباركلك رفعتى من روحى المعنوية

وفعلا حضرتك لمحتى لحاجة مهمة جدا
وهى اننا لو ما كناش زى هيثم فلايزال علينا دور لازم نقوم بيه علشان نطلع اطفال زى هيثم

منورة المدونة
وسعيد بزيارتك

ملكة بحجابى يقول...

الله
عارف يا بنجا
فكرتنى بطفل اتشهر اوى بعد ماقرأ جزء من سورة يس وبدأت الناس تتناقل الفيديو ده على الموبايل .. ملاك ربنا يثبته يارب .. انا حطيته عندى على المدونة الدينية وبتمنى ابنى يطلع زيه.. لما ربنا يأذنلى بالجواز والخلفه

الموضوع جميل اوى
بارك الله فيك

Abo 7anf يقول...

ألسلام عليكم
فيه منه كتير
وممكن تلاقيك كنت زيه
لما كنت بتقرا قصص الصحابه
و تتمنى فى يوم تمسك سيفك زيهم
بس بعد كدا بتلاقى نفسك دخلت فى مشاغل كتير
المهم ان الذى هيثم دا ندافع عنه
و نحافظ عليه

بنجاواتى يقول...

ملكة بحجابى:
يا رب ربنا يأذن لك بالجواز والخلفة
ويرزقك الذرية الصالحة يا رب

فعلا الطفل اللى بتتكلمى عنه ده انا شفته وهو رائع فعلا ربنا يبارك فيه وفيكى ويرزقك بمثله او افضل منه

منورانى

بنجاواتى يقول...

ابو حنف

منور الدنيا علشان حاجات كتير

طبعا كونك زملكاوى ده اول سبب:D

وتانى سبب انك فكرتنى فعلا واحنا صغيرين كانت امنياتنا كلها تناطح السحاب بس
اللى حصل لما كبرنا اننا ما بقيناش كده

وزى ما انت بتقول كده لازم ما نخليش الولاد دول يوصلوا للكسل اللى احنا وصلنا له

منورة يا عمنا

غروب يقول...

هالوووووو

ازيك يا بنجاواتى

انا هربت شويه من الكتاب

قولت اسلم على اصحابي اللى مقصره في حقهم

بس طبعا مش قريت كتير علشان اعلق سامحنى

بزور ناس كتير

ادعيلي علشان اخلص

وجهز تورته بقه بعد الامتحانات

سلام

Bant EL7ag Dracula يقول...

اولا المدونه الجديده تحفاااااااااا

يا بنجا

وميرسى ليييييك جدااااااااااا

على الكومنت الا كتبته على المصتنرين

دول

نعلق بقا

بـــــــــــــــــجد ربنا يحميه للاهلو

لو فى عشره زى دا البلد دى هتبقا زى الفل والله يابنى

واكيد فى والله يا مصطفى

بنجاواتى يقول...

بنت الحاج دراكولا:
حمد الله ع السلامة يا بنتى

فين الغيبة الطويلة دى

مفيش داعى للشكر..الحمد لله انك بخير

اما هيثم ده بقى ده حبيب قلبى ربنا يكرمه ويرفع قدره كمان وكمان

منورة وبلاش موضوع قفل المدونة ده
امال مين اللى هيرعبنا

سلام

mimi يقول...

السلام عليكم

الطفل المصري من أذكي أطفال العالم حتي سن دخول المدرسة

وبعد كده العقد والكلاكيع وعدم الاهتمام .. يهدموا مستقبل الأطفال ..
مفيش رعاية بالأطفال ولا حتي الكبار..

ربنا يتولاهم برحمته

شكرا لموضوعاتك الجميلة

تحياتي

Mo7ammed يقول...

للأسف انا اعرف امثلة كتير لهيثم واغلبهم اتغيرو اما كبرو
وانا اولهم


قلبت علينا المواجع يابنجاوتى
ربنا يهدى الجميع

بنجاواتى يقول...

محمد

مش مشكلة يا محمد ما دام عشت الحالات دى قبل كده يبقى اصل الايمان عندك وان شاء الله ترجع زى ما كنت واحسن كمان

كلنا هذا الرجل

سلام

مجرد مدونة يقول...

ما شاء الله اللهم بارك
موضوع جميل جدا تسلم ايدك يا دكترة :)

بنجاواتى يقول...

مجرد مدونة:

نورت البلوج

وشكرا على مرورك

تحياتى