الاثنين، 6 أبريل 2009

الهنود والاطباق



بسم الله الرحمن الرحيم

قبل اى حاجة كده احب اقولكم سلام عليكم

طبعا انا مش محتاج اقولكم انى حظى حلو ان يكون النهارده-6ابريل-هو اول ايام التدوين البنجاواتى

لان النهاردة طبعا يوم تاريخى عند الهنود كلهم مش شعب ماهارشتا بس





ندخل بقى فى موضوعنا




امبارح بقى وانا قاعد كده بتفرج على التليفزيون لقيت فى فيلم هيبدأ قلت ماشى اتفرج عليه

انا مش هقول اسم الفيلم بس انتو هتعرفوه خصوصا انه كان تصميم المقدمة والنهاية

من تصميم ؛الشحرى ؛ أو؛ نوال؛ مش فارقة

والنجياتيف طبعا كان ؛مارسيل صالح؛




المهم الفيلم بدأ وعلى غيرعاده السينما الهندية لقيت البطل ظاهر من اول مشهد

حتى البطل مكنش فقير واغتنى بقى ولا ضعيف واستقوى ولا حاجة من دى خالص

هو كده من اول ما عرفناه فى الفيلم وهو كده -بطل-

قام البطل الهمام جمع كل اللى فى الفيلم -الكومبارسات-

وخلى كل واحد يشيل على ايده رصه اطباق كبيييييرة -كبيرة اوى -حتى كانوا ساندينها بدقنهم علشان ما تقعش

وقال الهمام فى صوت جهورى:

يا اخوانا انا عارف ان الشيلة تقيلة عليكم بس انا بوعدكم بإن فى قصر فى اخر الطريق عملته للى هيصبر منكم لحد ما يوصل

-وعلى الفوليوم شوية-هيكون القصر ده سكنه وهناك هيلاقى اللى ياخد منه الاطباق ويحط له فيها اشهى الاطعمة-مثقف اوى-

اهم حاجة مش عاوز حد يكسر اى طبق علشان دى غالية لكنها سهلة الكسر-ازى معرفش-

وكمان مش عاوز حد يبص على المطاعم اللى على الجنبين حتى لو هيموت من الجوع

-طبيعى هيبص ازاى وهو ساند الاطباق بدقنه-


وطبعا الناس فضلت ماشية بتحلم بالقصر

انا لقيت الوضع كده قام راح عليا نومة وانا قدام الفيلم





-هاااااااااااا وسع يا جدع بنجاواتى صحى من النوم-

ابص يا خويا الاقى الفيلم لسه شغال والاقى الناس لسه شايلين الاطباق




ايه ده؟؟؟؟؟؟؟

الحق يا جدع

اخينا المسكين وقع منه الاطباق

ايه ده!! دى موقعتش منه ده هو اللى رماها

ده مجنون ده ولا ايه

إلحق إلحق ده داخل المطعم

ايه ده! ده بياكل! يا بخته

يا بخته ايه يا عم ده بيعمل كده علشان معهوش اطباق زيّنا

على رأيك خلينا ماشيين



بصراحة انا زهقت من الفيلم ده وقمت اعمل اى حاجة لقيت ابويا فى وشى -الحاج أبو بنجاواتى-

سلام قولا من رب رحيم!!!

قالى ياه هو الفيلم ده!!

الفيلم ده احنا بنشوفه من يوم ما اتولدنا

بس لازم كل ما ييجى نشوفه

انت عارف يا بنجاواتى يا ولدى-بصوت حنون-

لا مش عارف يا أبو بنجاواتى-بصوت غلس-

الفيلم ده اول ما نزل سقط وقلنا انه بعد يومين مش هيبقى له وجود لان السيناريو بتاعه فاشل

الغريب انه لسه موجود يا ولدى-الله عليك يا بو بنجاواتى وانت حكيم كده-

بس سيبك انت يا حاج مفيش أحلى من ركوب الفيل

هناك 11 تعليقًا:

د/عرفه يقول...

ألف مبروك يا بنجاواتى يا كبير على المدونةالجديدة
وان شاء الله تكون فى ميزان حسناتك
بجد يا مصطفى بدايتك بتفكرنى ببدايتى
انت بدأت 6 ابريل
وانا بدات فى قمة احداث غزة
اه يمكن 6 ابريل السنة دى هادية شوية


نرجع للفيلم الهندى اللى انت حكيته
انت مقولتش الأخ اللى رمى الاطباق وراح المطعم ده حصله ايه
اتوقع ان اللى ياكل لوحده يزور
واللى بيخرج عن القطيع بيتاخد على قفاه
تخيل لو كلهم رموا الاطباق
طيب تخيل فى حد هيوصل للقصر المزعوم

د/عرفه يقول...

تعليق تانى بقى
علشان انا بحبك يا ..........
مشيها بنجاواتى
بس بنجاواتى كبيرة اوى مفيش اسم دلع شوية
تسلم يا حبيبى
اشوفك بكرة بقى ان شاء الله

محمد عبد الباسط يقول...

الف مبروك يا بنجاواتى على المدونة

وربنا يججلها لك منبر حق ولسان صدق دايما
بالنسبة للفيلم فاعتقد انى شفته برده والحاج كمان شافه تخيل بقى وجدى الله يرحمه بس فى امل كبير ان شاء الله ولادنا ميشفهوش قول يارب

لاتنسانى من صالح دعائك

حلم كبير

۩۝۩ Dr. Flavio ۩۝۩ يقول...

ولو إني مفهمتش حاجه



اوعي تفتكر إنه بصحيح .. انا بهزر

بدايه جميله يا درش ولو إنها هتحطك في دايره غير اللي انا متخيلك فيها

المهم يا درش يا حبي .. ألف ألف ألف مبروووووووووووووك


على فكره


بتحبك وعارفه اسمك

ههههههههههههههههههههههههههه

بنجاواتى يقول...

شكرا لمروركم
وعلى فكرة بتحبنى وعارفة اسمى
بس هى مين دى؟؟؟؟؟؟

ستيتة يقول...

اللهم بارك في ولاية مهاراشتا الكبرى اللي جابت نوفوخك
وسلم لي على الحاج ابو بنجواتي
تحياتي ومبروك المدونة

القدر و انا يقول...

بنجواتى الصغير
الف مبروك المدونة
وسلامنا للحاج الكبير يا درش
بداية موفقة بس من غير اضراب

بنجاواتى يقول...

القدر وانا نورتى المدونة
كلكم منورين المدونة

جارة القمر يقول...

بنجاواتي..

أسلوبك رائع جداً وأكثر من رائع ..
قلمك خفيف الظل يدخل قلوبنا بدون استئذان..
صديقي حياتنا ماهي الا مسلسل هندي أحداثه مضحكة وباكية
أنحني احتراماً هنا
شكرا

د.توكل مسعود يقول...

السلام عليكم ورحمة الله.. وبعد

فأول زيارة ... ومافهمت شيئا...

عندى مشكلة قديييييييمة جدااااااااااً
"بس لسه بتلمع" هههههههههههه

وهى إنى إذا مافهمتش.. بافصل

دمت بخير وعلفية

بنجاواتى يقول...

د/ توكل
نورت المدونة
وسعيد لمرورك