الأحد، 12 أبريل، 2009

بنجاواتى والصرصار

بسم الله
فى البداية وقبل أى حاجة
أحب أقول ان اللى عنده المرارة (keratoconjunctivitis) مش لازم يقرا الموضوع ده
لييييييييه؟؟؟!! طبيعى علشان مرارته ما تتفقعش (rupture spleen) ويقول ان أنا المسؤول
وقد حذر من أنذر





هات ودنك..ايوة يا سيدى هات ودنك..
آآآآآآآآه مش فاهم ازاى !!!!
أنا أقولك


تعرف تمسك ودنك على 3 خطوات؟؟؟؟؟؟
افتح ايدك ‘ قربها من ودنك ‘ امسك ودنك -سهلة خالص-






طيب تعرف تمسكها بخطوتين اتنين؟؟؟؟؟؟؟
لو ايدك أصلا مفتوحة ‘ أو قريبة من ودنك -لا كده مش هينفع.. شغل مخك شوية-


مش هقول بقى ازاى تمسكها فى خطوة واحدة
آآآآآيوة بالظبط كده-يا ناااااااااااااااصح-


السؤال بقى تعرف تمسكها من غير ولا خطوة؟؟؟؟؟؟؟؟؟

اه طبعا -ازاى يا ناصح؟؟؟؟-
لو واحد ودنه مقطوعة أو حد حط له السيخ المحمى فى صرصور ودنه


الصرصوووووووووووور...... هو ده بقى

أنا - بنجاواتى- قاعد فى بيتنا اللى هو محاط -مش مخاط بلاش ارف بقى- بأراضى زراعية طبعا جميلة
ويفصله عن المقابر-الترب يعنى- طريق سريع -عايش فى قلب العاصمة باريس-


عاوز أنام يا عالم .. حد يسكت صرصار الغيط اللى عمال يزن ده
مش عارف أنااااام..
طييييييييب والله لأقوملك يا صرصار يا بن الصرصار
لبست شبشب الحمام ونزلت وعلى أثر الصوت وصلت له ومسكته


بقى انتا بقى اللى مغلبنى ومش مخلينى عارف أنام؟!!!!!
هشيل لك قرون الاستشعار اللى انتا فرحان بيها دى وابقى قابلنى لو صرصاراية عبّرتك بعد كده

الصرصار:آآآآآآه عطشااااااان

عطشان ايه يا أهبل انتا!!!! هو انا مكتفك وبصبّ الميه قدامك؟؟ ده أنا بشيل شنبك

الصرصار: بقولك عطشان ارحمنى

طيب أنا هنزلك تشرب بس تشرب وترجع على طول عشان أكمل تعذيب فيك!! اتفقنا؟؟؟!

الصرصار: اتفقنا

ونزل يشرب الجبان هرب منى وجرى ناحية المقابر........

- بنجاواتى يسمع صوت عالى ملىء بالغيظ - ولا يا بنجاواتى.. اصحى بقى يابنى
الضهر إدّن يابنى

بنجاواتى:ايييييييييه ده ؟؟؟؟ ايه الحلم اللى كله صراصير ده؟؟
هو انتا يابو بنجاواتى ما ينفعش تقرب من السرير وتصحينى بالراحة؟؟!!!
ثم إن الساعة لسه تسعة ...ضهر ايه ده اللى بيدن 9

أبو بنجاواتى:قوم يا بنى أنا عاوز أحكيلك على حلم مقرف كده

بنجاواتى:اوعى تقولى الصرصار!!!!!

ابوه:ايه ده ؟؟ انت عرفت ازاى؟!!!!!!!!!

بنجا:ده نفس الحلم اللى جالى يا حاج

أبوه:فى حاجة غريبة فى الموضوع

بنجا:بقولك ايه يا حجّوج ما تيجى ع المغربية كده ننزل الترب ونشوف الموضوع ده ايه..

أبوه:وماله يا بنى ننزل -قلبك مات أوى يا حاج وبقيت بتنزل الترب وما تخافش -



حاسب العربيات يا حاج !! حاسب حاسب آآيوة الحمد لله عدينا بسلام-أنا لو أعرف كده ما كنتش انسحبت من لسانى-

أبوه: لقيت حاجة يا بنجاواتى؟

بنجا:لا ..مش لاقى غير تربة مالهاش باب -يا ترى دفنوا الميت اللى فيها ازاى ؟؟؟؟-

أبوه :ولا أنا... طيب دور تانى

بنجا:الله ....شجرة توت أنا نفسى فيه من زمان ..أما اطلع اجيب ..عاوز يا حاج؟؟؟؟

أبوه:بص يا حبيبى هاتلى ربع ابيض وربع احمر وربع اسمر

بنجا: مش عاوز زتون وجبنة ولنشون بالمرة؟؟!!

بنجا:ايه ده؟!!!!
إلحق يا حاج ..التربة اللى ملهاش باب مفتوحة من فوق...!!
وايه السلم اللى طالع من الفتحة ده كمان؟؟!! لازم اشوف

أبوه :يابنى انزل بقى وتعالى نروح ع البيت احسن



بنجا:استنى يا حاج... الله أكبر!!!! استعد للمفاجأة يابو بنجاواتى يا كبير

شوف لقيت ايه جوا التربة؟؟؟؟
دى فلوس بواكى بواكى ‘ وملوخيا كمان ‘ ودقيق ‘ ومسدسات ‘ بس مش عارف هنعمل ايه بالحنّة دى؟؟؟!

أبوه:يخرب بيتك.. يا دى المصيبة اللى حلت علينا

بنجا: مصيبة ليه يا حاج؟!!!!!!!!
ده حتى احنا ممكن ناخد الحاجات دى معانا ‘ مينفعش ‘ طيب نسلمها ‘ مينفعش
طيب خلاص نسيبها ونمشى يا حاج ‘ برضه ما ينفعش يابنى

أبوه: احنا اتورطنا يا بنى خلاص انتا لسه صغير وما تعرفش... إحنا ضعنا خلاص

يا بنى فى زمانّا ده اللى يكشف مصيبة زى دى يبقى اتورط فيها

بنجا: والعمل ايه يا حاج؟؟؟

أبوه: مفيش غير حل واحد لازم نموت هنا جنب الحاجات دى بس أنا قلبى ما يطاوعنيش اقتلك
بص يابنى موتنى انتا وبعد كده ابقى موت نفسك

بنجا: ما تقولش كده يا أبويا-وهو بيتأكد ان المسدس فيه طلقات-
أنا مقدرش أعمل اللى بتقول عليه ده-ولسه بيتمّم ع الطلقات-

صوت طلق نارى مكتوم
دم يملأ المكان

-بنجا بينفخ فى المسدس علشان الدخان اللى طالع منه-
ويقول


بنجاواتى.... عمره ما ينتهى آآآآههههاهاهاهاهااهايااههه

ومن يومها بقى المعلم بنجاواتى أكبر تاجر مخدرات فى الهند





















هناك 18 تعليقًا:

د/عرفه يقول...

هههههههههههه
موتنى من الضحك
يا بنجا
ههههههههههههههه
توهت فى كلامك شوية
بس ممكن الفكرة اللى عايز توصلها ممكن تكون موجودة
بس مش لازم يعنى يكون اكبر تاجر مخدرات
فى احتمالات تانية
فى احتمال يموت
وفى احتمال يتحط فى السجن
واحتمال اخير
بقى وهو انه يكمل حياته ولا اكنه شاف حاجة
اما الاحتمال الاخير بقى ده نادر جدا
وهو انه يبلغ عن المخدرات ويمسكوا المتهمين

بس انا موت من الضحك يا دكتور بنجا

TIMMY !! يقول...

هههههه

بصفتي أحد التائهين في ثنايا الموضوع ,

و بصفتك دكتور قد الدنيا ما شاء الله ,

أقترح أن نضحي بالجميع , من أجل رغيف العيش :)

ستيته حسب الله الحمش يقول...

هههههههههههههههههههههههههههههههه
طبعا كل اللي علقوا وها يعلقوا مخدوش بالهم من الضحية اللي انت عذبتها يا شرير

لأ مش ابو بنجواتي
الصوريييييييييصار
ده ذنب الصورييييييييييصار يا مسعود

والله العظيم انت باين عليك نفوخ
يعني الأول سمعت معانا المصطلحات وقلت تذاكر فينا
وبعدين قلت انك مخبر كرومبو خطير وعرفت تمسك الصرصار اليتيم
وبعدين اكتشفت تربة مخدرات محترمة وكنت ها تركب البي إم وتسكن التجمع الخامس وتزكي وتعمل صوان تأكل فيه الغلابة
ويبوسوا ايدك ويقولوا ربنا يخليك ياحاج بنجاواتي
وترشح نفسك للمجلس الموقر
وتقول ده انا شقيت عمر في كولالمبور لحد ما لميت فلوسي الحلال
وبعدين تختلف مع الكبار قوي على الأتاوة اللي ها يخدوها منك
يلفقوا ليك قضية لا تمت للمخدرات بصلة ويحطوك في مزرعة طرة مع اثرياء حرمية البلد الكبار
وبعدين تطلع منها تعمل لينا بطل قومي
وبعدين تطلق الولية اللي كانت عاملة فيها ام المصريين وبتدافع عنك




سيبت كل ده وقتلت ابو بنجواتي "خواطر نفسية شوريرة جدا لو عرفها الوالد ها يعمل فيك اللي معرفتش تعمله في الصرصار"
وصحيت الساعة كام بقى بعد الحلم ده كله؟
تسلم ايدك

iBRAHiM sAllAM يقول...

طيب هو الكلام عن الصراصير ..

لزمتها إيه القرود ؟؟ :) :)

تحيتي

بنجاواتى يقول...

نورتونى
د/ عرفة تسلم يا صاحب التعليق الاول دايما.. بس لازم تعرف ان بنجاواتى ما يموتش ولا يتحط فى السجن ومش من اخلاقه انه يسكت وما يبلغش -هو يقتل ابوه بس-

بنجاواتى يقول...

نورتونى
timmy لو انت شايف ان لازم نضحى بحاجة يبقى لازم نضحى بنفسنا علشان صوت الوطن يفضل مسموع-اى كلام-

بنجاواتى يقول...

نورتونى
سوتيتة ..
اولا الصوريصار كان يستاهل اكتر من كده..

ثانيا لو ما كنش الحاج ابو بنجاواتى بيصحيه الساعة 9 على انها لبضهر ما كنش اتعمل فيه كده...

ثالثا: مش بنجاواتى اللى يضحك على الناس ويقول انه سافر كوالالمبور-مش اخلاق بنجا-هو يقتل ابوه بس

بنجاواتى يقول...

نورتونى

ibrahim sallam..تصدق عندك حق بنجا بيعذب الصوريصار يبقى مين القرد اللى فى النص ده....!!!

لو عرفت الاجابة ابقى قولى بلييييز...

۩۝۩ Dr. Flavio ۩۝۩ يقول...

""وش أخضر عنده هرنيا في بؤه""

بنجاواتى يقول...

السلام عليكم

الدكتور العزيز الغالى ‘فلافيو‘

يسعدنى جدا تشريفك للمدونة لكن للاسف انا لم افهم ما تعنيه من وراء تعليقك هذا

وتقبل فائق احترامى

محمود ابوالعزم يقول...

زي ما توقعت يا مصطفي مدونتك لذيذه ودمها خفيف جدا
صحيح لازم تخنق شوية كالعادة
بس خنقتك برضو جميلة زيك
يارب بالتوفيق ليك وللمدونة

بنجاواتى يقول...

نورت يا حوده

المدونة اتشرفت النهارده بزيارة شاعرنا الكبير...محمود ابو العزم

ومرسى خالص على موضوع الخنقة اللى انا بعملهالكم .. انتم كده بتحرجونى يا جماعة

وتقبل فائق احترامى

قلم رصاص يقول...

السلام عليكم

دي اول زيارة لي لمدونتك الرائعة دي بجد

تلم ايدك

وجميل اوي البوست ده

ههههههههههههههه

تقبل مروري

قلم رصاص

semsema يقول...

أول زيارة للمدونة الرائعة
الحمد لله تهت جااااااااامد في الموضوع أكيد طبعا العيب في انا
بس ضحكتني جاااامد وفرحت اوي لما عذبت الصرصور لاني مش بحبهم
تقبل مروري وتحياتي

بنجاواتى يقول...

نورتى يا سمسمة

۩۝۩ Dr. Flavio ۩۝۩ يقول...

أنا مش هارد عليك


أنا هاسيب مصر كلها ترد عليك


وأكبر رد عليك لما بلوجر يموت مخنووووووق قريب ان شاء الله

قول يا رب

بنجاواتى يقول...

ياااااا رب

انت حبيبى يا فلافيو

بس لو البلوغغغغغر هيموت مخنوق انا مش هيرضينى كده

ساعتها يبقى نكلم غوغل يشوف حل للموضوع ده

وانى احبك

۩۝۩ Dr. Flavio ۩۝۩ يقول...

كل سنه وانت طيب يا واد وعقبال مليون سنه


متسألنيش عرفت ازاي




الإجابة معرروفه طبعا يا حبي













عملت بحث على محرك البحث غوغل

هههههههههههههههههههههههههههههههههههههههه