الخميس، 30 أبريل 2009

يوم دراسى جدا


السلام عليكم ورحمة الله

أولى ابتدائى وبعد 3 أشهر من بداية الدراسة

بنّوجة..بنّوجة يا حبيبى-أكيد دى أمى اللى بتدلّعنى كده- يللا يا بنوجة اصحى وصحى أخوك-أكبر منى ب3 سنين-
والله صعبانين عليا يا ولاد تتفحفحم فى البرد ده والدنيا طول الليل ما بطّلتش شتا والشوارع تلاقيها عِيضة ولا قدّام المدرسة زمانها رُوبة
أقولكم-كاتم أنفاسى وبقول فى بالى هتقول اللى نفسى فيه من 3 شهور؟؟؟؟-يللا قوموا بسرعة علشان ما تتأخروش
اهئ اهئ اهئ


بعد نص ساعة نزلت أنا وأخويا على مدرستنا على طول

بعد 3 دقايق جرس الباب بيرن

أمى:هىىىىى وقييييييييعت؟!!!!-لا كنت بمارس رياضة التزحلق فى الطين-
بنجا:عاااااااااااااااا - مع انى ما عيطتش لما وقعت -وما وقّفش العياط إلا كلام أمى-يا ترى هتقولها بقى-

أمى:طيب ما تعيطش تعالى أما انضفك وأغيرلك بسرعة علشان ما تتأخروش على مدرستكم
عااااااااااااااااااااااااااااااااااا


وبعد ربع ساعة وصلنا المدرسة
بنجا فى خضّة لم يسبق لها مثيل واستعدادا تام للبكاء:الباب مقفول
أخويا :تعالى ندخل من باب المتأخرين-عادى كده؟!!!!!!!!!-

ملحوظة تاريخية:كان عندنا ناظر لما بتيجى سيرته الاهالى بيترعبم وكان بيعمل حاجة كده زى محكمة دنشواى لكل المتأخرين...يوقفهم تحت الجرس وياخد معاهم الاجراء اللازم-بس انا ما كنتش اعرف الموضوع ده..بعدين بقى عرفت-

داخلين من باب المتأخرين وسامع ايه بقى
مدرسة صفا..ماااااااااااااص ..مدرسة انتباه....سلااااااااااا..تحية العلم تقدم

ولأنى أول مرة أتأخر ومش عارف النظام قلت أما أجرى بسرعة وأقف مع العيال فى الطابور-هو ده اللى جه فى بالى ساعتها-

وإذا بفتى-مش باين من الارض- يشق الغبار ويخترق فناء المدرسة قاصدا طابور فصل أولى أوّل -ولا العدّاء الأثيوبى فى زمانه-..طاير من كتر الرعب اللى أنا فيه وبدأت أسأل نفسى أسئلة وأنا بجرى

*هو فين أخويا؟؟؟!!! آآآه أكيد راح على طابور فصله هو كمان


*وهو ليه الناظر بيتكلم فى المكرفون أثناء تحية العلم؟!!!
*وياترى هو ليه متعصب أوى كده وعمّال ينادى انت يا بنى..الولد اللى بيجرى ده..تعالى هنا يابنى-يا اخوانا خلّوا الواد اللى بيجرى ده يرد عليه لحسن ده شرّانى-..انت يابنى ..انت ياااااااالاااااااااااااااه-وانا ولا هنا-...هاتوا الواد اللى بيجرى ده-ولا رياض باشا فى زمانه-


*هو ليه تحية العلم وقفت فجأة ؟!!!
*وياترى هو ليه العيال كلهم بيشاوروا عليا؟!!-أكيد عجبتهم سرعتى وأنا بجرى-


وفجأة فهمت...عاااااااااااااااااااااااااااااااااا

لحد دلوقت مش فاكر أنا رجعت تانى لمكان الجرس ازاى..ماشى ولا بجرى ..ولا محمولا على الاعناق

ووقفت تحت الجرس وعرفت يومها يعنى ايه هات الفلكة يا جابر -بلاش الفلكة يا حبيبى أنا زى والدك برضه-
المهم الحمد لله هو اختار أطول واحد فى المتأخرين ومدّه وبعد كده أطلق سراحنا والحمد لله

بعد دقيقتين...هِىىىىىىىى عندنا حصة ألعاب

أستاذ الالعاب:يللا يا ولاد نضفوا الحوش بسرعة كده علشان نلعب...بعد التنضيف
هنختار فريقين يا ولاد والباقى يقعدوا جنب الحيطة..تعالى انت -اللى هو أنا-

بينى وبين نفسى:اخيرا فرصتى جاتلى من زمان وانا نفسى ألعب فى نادى كبير زى فريق المدرسة

وفى دقيقة واحدة الاستاذ شرحلنا ازاى نلعب كرة يد-وأنا فى اليد مش شبه حد ..أبيض يا ورد-

بينى وبين نفسى:ما فهمتش حاجة من اللى قالها ..والكورة تقيلة وكبيرة على ايدى مش عارف امسكها..هو ما ينفعش نمسكها بالايدين ونشوط بالايدين زى السلة كده؟!!!الظاهر إنه ما ينفعش

وفجأة الكورة جاتلى ...نفس عمييق هىىىىىىىىىىىىىىىء والكورة بالقوة وصلت للجول
ولأنى بفضل لله كنت أول واحد يدخّل أوبشن انك تلعب الكورة بالبوكس فى كرة اليد,الاستاذ ندَه لى
وقال:
انت بتعمل ايه ؟!!!انا قلت كده؟!!!! روح أقعد هناك مع زمايلك
الحمد لله همّ واتشال من على قلبى..الحمد لله

رحت بقى واقعدت ألعب سيجا مع العيال اللى مالهومش فى الرياضة صخرة تطحطم عليها سفينة الشهوات
وبقيت فى السيجا لعيب كبير والحمد لله-هى دى الرياضات مش تقولى كرة يد-

فى الختام انا عاوز اقول انى بحب جدا استاذ سيد بتاع الالعاب والعلوم فى نفس الوقت
وبحب جدا استاذ راشد الناظر وربنا يبارك فى عمره وصحته لو كان عايش ويرحمه لو كان توفاه الله-كان طلع كلام انه وهو ماشى وقعت عليه بلكونة فمات-
وطبعا اخويا حبيبى
وأمى حبيبتى هى أجمل حاجة فى حياتى-بس أنا مش عارف هى ليه كانت غاوية تحمّر اللنشون ...يمكن علشان تموت الفلفل الاسمر ابو عيون جريئة؟!!!-

ومعلش بقى طوّلت عليكم














هناك 47 تعليقًا:

القدر و انا يقول...

بنجواتى
يومك الدراسى مثير ويخللى كل الاولاد سعداء بالمدرسة (_وش سخرية )
بس حقيقى النظام التعليمى فيه ظلم كبير على الاطفال .. بص على طفل لم يتم الرابعة من عمره فى ك ج وشوف الكتب والواجبات والالتزامات بالاضافة للرعب من المدرسة ..
والله ابنى اولى ابتدائى كان بيصعب عليا يوميا من حمل شنطة 15 كيلو
ليه بتفكرنى.............

amany يقول...

ههههههههه .... موضوع جااااامد ودمه خفيف ... بس التعليم كان رعب ليه كده

د/عرفه يقول...

ياااااااااااه
فكرتنى بالذى مضى
انا برضه ناوى اكتب عن ايام الدراسة
النهاردة

بس فعلا لازم اضحك يا ......... نمشيها بنجا

تسلم حبيبى

ستيتة يقول...

بنجاواتي هندي صديق

نومستا ورحمة الله وبركاته
اجمل شيء انك تحكي يوميات تحفة وانا كان نفسي اضحك

تعرف اني تمنيت زمن أشوف يعني إيه واحد بيتمد دي
على السمع بس واضح انه موقف كوميدي
طيب وانت في اولى ابتدائي كان ايه شعورك وانت تطير محمولا على الأعناق؟

الغريب إن زوجي الي هو من الأرياف كان عنده ناظر الخالق الناطق اللي انت بتحكي عليه
والغريب ان كل اللي كانوا زمايله طلعوا شيء له معنى في مصر

تقريبا سر النجاح في الناظر مش فيكم

نومستا صديق

أحمد سعيد بسيوني يقول...

جميلة جدا وظريفة

بس ازاي ماتكونش انت اطول واحد
هو معقولة في اطول من كده

وبعدين كرة يد اية
مالها الفيفا ولا السيجا

MǿиY El-Shreef يقول...

انت لسه فاكر من ايام اولى ابتدائي

ايه الذاكره دي :D:D

بس بصراحه مت من الضحك

ربنا يجعل ايامك كلها حصص العاب :p

والظاهر ان الراجل بتاع حصة الالعاب الي كان السبب ف انك تحترف السيجا هو السبب الي وجهك لنادي زيزي الرياضي :D

هههههههههههه

سلام يابنجا

بنجاواتى يقول...

القدر وأنا :
عندك حق فى موضوع الظلم ده
انا مش عارف هو الكلام ده لسه موجود ولا انتهى

لكن انا عاوز اقولك انى فى يوم زى ده والدنيا شاتية وبعد مرور شهور من الدراسة كنت باخد كل الكتب والكراسات فى الشنطة علشان الجدول لسه ما نزلش

ومع ذلك كنت بجرى بالشنطة دى زى الصاروخ

نصيحة : حاولى تخلى ابن حضرتك ما يشيلش كتير فى الشنطة لانه مش بفايدة

منورانى

بنجاواتى يقول...

أمانى:
التعليم كان رعب جدا
متهيألى العيال دلوقت ما بقوش زينا كده

انا فاكر انى كنت اول ما اسمع صوت امى وهى بتقول اصحى كنت فى لحظتها انسى متعة النوم وافكر بس فى انى رايح المدرسة

وافضل مخضوض وضربات قلبى زيادة

بس بقى ما تفكرينيش

منورانى

بنجاواتى يقول...

د/عرفة يا حبيب قلبى:

طبعا مستنين باقى مسلسل الرعب الدراسى اللى انت هتكتبه

منورنى يا ....نمشيها عرفة

بنجاواتى يقول...

العزيزة الغالية الخالة ستيتة:

ربنا يخليكى ..بتقولى عليها تحفة وانها ضحكتك ..ده شرف ليا

موضوع المد ده بقى ممكن يكون كوميدى للى بيمد او ماسك الفلكة..لكن اللى مستنى دوره فى المد ده ربنا ما يكتبها على حد

لا هو مش محمولا على الاعناق وهتافات وكده...لا خالص ده اكيد محمولا على الاعناق مسخسخ او برفّص

والله موضوع الشده فى التربية ده من اكتر الحاجات اللى محيرانى..وانا بستغرب ازاى انا بحب حضرة الناظر ده بالرغم من شدته ..يمكن لانه اجبرنى على حالة من الالتزام استمرت معايا طول عمرى والحمد لله

منورانى

بنجاواتى يقول...

د/ أحمد سعيد بسيونى:

والله انت ما شفتنيش وانا صغير فى اولى ابتدائى ده انا كنت صغير خالص

ثم انه اكيد اطول واحد اللى يا عينى اتمد ده كان فى سنة خامسة ..ما انساش شكله ابدا ..كان اسمرانى وطويل

وانا يا خويا مش عارف ايه كرة اليد اللى عاوزينا نلعبها دى
فى رياضات تانية احلى منها بكتير طبعا زى السيجا حبيبتى ومش عاوزة غير شوية رمل و6 ظلطات

منورنى

بنجاواتى يقول...

مونى:
الله أكبر... الله أكبر
انتى جاية تنؤى يا بنتى ولا ايه؟!!

ربنا يجعل ايامك كلها ضحك وايامى كلها حصص العاب

الراجل ده ربنا يكرمه فجر فيا طاقات كانت مكنونة فى لعب السيجا

على فكرة ما تزعليش اننا كسبناكم امبارح فى السلة..لا لا لااااااااا

منورة يا مونى

NaiRa يقول...

بصراحه اول مره ادخل المدونه بتاعتك يا بنجا

بس عجبتنى اوى بجد

بس على فكره اللى انت كنت فيه ده مكنش تعليم ده كان تعذيب

وربنا يخليلك مامتك خايفه على مصلحتك الست اهيه امال ظالمها ليه يا راجل

ده انتو عيال مش بتعترفو بحاجه ابدا


تحياتى ليك يا قمر ويارب دايما تبقى مبسوط

د. ياسر عمر عبد الفتاح يقول...

ههههههههههههههههه
والله فكرتني بأيام ابتدائي والمدرسين وحصة الألعاب والجو ده

بيني وبينك كده
مين اللي اتعبط بالفلكة؟
قول ومش هقول لحد ... خاااااااااالص

MaNoOoSh يقول...

فكرتنى بالذى مضى
انت زعلان ان مامتك كانت بتخليك تنزل والدنيا بتمطر؟
انا مامتى كانت بتخلينى اروح المدرسة وانا درجة حرارتى 40 وعندى اللوز وبفرفر.. وهى لا يونكن ابدا تخلينى اغيب عن الحصص.
بس صحيح كان ايه شعورك وانت شايف ابو طويلة بيتمد كدة ورجليه بتتلسوع؟

بنجاواتى يقول...

neno:

المدونة تعجبك ده شىء يسعدنى جدا ..بس انتى اللى نفسك حلوة شوية

اما موضوع التعذيب ده فكان فى اكتر من كده

ماما دى يا بنتى حبيبة قلبى ..روحى روحى روحى...بس لازم تقلى اللنشون يعنى؟؟

طيب انتى كان حد بيقلى لك اللنشون؟؟؟؟

ثم انها علشان تعملى سندوتشات اللنشون دى كان لازم تقعد تقولى كل يوم :
تاخد جبنة قريش ؟؟دى مغذية..وانا اقول لا
طيب تاخد جبنة دبل ؟؟..يا ماما لا
وتعرض عليا كل انواع الاكل الممكنة لحد ما نوصل للنشون

عذاب يا بنتى
منورانى

بنجاواتى يقول...

د/ياسر عبد الفتاح:

يا رب اكون فكرتك بحاجة حلوة ...وما يكونش ذكرياتك فى الموضوع مؤلمة مؤلمة مؤلمة

لا لا بجد اللى اتعبط واد كده كل ذنبه انه طويل يا عينى

انا لو كنت اتمديت ساعتها كان ممكن يجيلى عاهة مستديمة...ده استاذ راشد مش اى حد

منورنى

بنجاواتى يقول...

مانوووش:

يا رب اكون فكرتك بحاجة حلوة

مش عارف ايه الموضوع ده يا منوش والله ...عمرهم ما كان ييجى على بالهم ان الواحد يغيب يوم واحد بس

اما بقى موضوع والواد بيتمد كنت طبعا واقف فرحان ومبسوط ومطمن وعارف ان الدور جاى عليا لا محالة ..فكان لازم اتبسط واتطمن

بس بما انك كنتى بتنزلى ودرجة حرارتك 40 اكيد برضه فى مرة كان منتظر تنضربى علقة حلوة كده..يا ترى كان ايه شعورك ساعتها

منورانى

MaNoOoSh يقول...

ايوة انا مرة فى 2 أو 3 ابتدائى كان مدرس الدراسات قاعد يسأل الفصل كلة كلمة جيزة (بتاعة المحافظة يعنى) جت من ايه؟؟ وناس يقولهم اقعدوا وناس يفضلوا واقفين.. وانا واقفة شكلى منتهى البرود بس نسبة الادرنالين وصلت للسقف والحكيكة كنت من الناس اللى وقفوا.. واتضربت وانا بضحك بس كنت مقهورة من جوايا علشان مدناش اصلا الجزء دة.

بس سبحان الله بقى شوف اللى ييجى على الغلابة ميكسبش ابدا.. فى نفس ذات اللحظة وهو بيشرب الشاى الدبانة دخلت فى بقة وبلعها..
نياهاهاههههاهاهاهاهههاهاها
اصله كان مدرس مفترى والله

Bant EL7ag Dracula يقول...

اااااااااااه

ما تفكرنيش يا بنجا بايااااام

الدراسه دى

فعلا يا بنى

كانت فيلم رعب

هههههههههههههههههههههه

بس انت كنت مشكله

والحمد لله

كنت عماله افكر اقولك ايه غير بنجواتى

لقيت انت قولتها بنجا

ريحتنى يا راجل

NaiRa يقول...

والله يا بنجا يخويا انا كنت المهم عندى انى اكل سندوتشات اى ان كان ايه هى المهم اكل وخلاص ههههههههههههههههه
اصلى بعيد عنك طفصه
انا كنت ممكن اخسر اى حد بسبب الاكل
وربنا يخليلك مامتك الست بتخيرك اهوه مش زينا هتاكلو ده يعنى هتاكلو ده هههههههههههههههههههههه
وميرسى على تشريفك ليا

بنجاواتى يقول...

مانوش:

حد يا بنتى ما يعرفش معنى كلمة جيزة ..ما تقوليش ما كناش خدناها لسه ..

اديكى خدتيها تعرفى بقى تقولى لى يعنى ايه؟!!!!...طبعا مش عارفة...يا بنتى موضوع خدناها ومخدناهاش دى حجج مش اكتر

بس بجد انتى كنتى فى سنة تالتة او تانية كمان واتعلمتى انك تقفى وانتى خايفة ومقهورة من جوه وبتضحكى من برة؟!!!!

الحالة دى اصلا انا ما وصلتلهاش الا بعدييييييييين

على فكرة الطب الحديث اثبت ان الدبان مغذى جدا ومفيد لعضلة القلب خصوصا لما يبقى مع الشاى واللى يشربه واحد مفترى..آآآآخر قرف

نورتى

بنجاواتى يقول...

بنت الحاج دراكولا:

الحمد لله انك ارتحتى ولاقيتى حاجة تناديلى بيها

ويا رب اكون فكرتك بحاجة حلوة

بتقولى ان الدراسة كانت فيلم رعب ..وانا فكرتك بيها ..وانتى بتحبى الرعب

اى خدمة

ممكن نبقى نعمل امتحانات ابتدائى من جديد وهيبقى السؤال موحد وهو :
اكتب اسمك بالكامل

وبرضه هنبقى قلقانين وخايفين

نورتينى

بنجاواتى يقول...

NENO:

صباح الاكل

ايه موضوع الاكل ده

الاكل ده ممكن يكون دلوقت حاجة مهمة لكن وانتى صغيرة كنتى بتقاتلى علشان الاكل؟!!!!

يا شيخة ده الواحد كان بياكل بالقوة وهو صغير

بينى وبينك انا كنت بحب النشون والجبنة الرومى علشان ممكن اطلعهم من السندوتش واكلهم حااااف..بس ده بينى وبينك ما تقوليش لماما

واكتر حاجة كانت بتألمنى انها تعملّى سندوتشات حلاوة طحينية..بتسيح فى العيش ولازم اكلها زى ما هى..اهئ اهئ

منورة يا قمر

ابو المفاصل الواصل يقول...

المجد الزائف يتطلب التضحية بالاخــــــرين

فى مجتمعات لا تقيم وزنا للقتلى والمصابين

سواء كانت حروب ولا اشتباكات مع ارهابين

المهم عندنا النصر الاعلامى الهلامى المبين

وتسجيل مواقف لانفس ذات فكر مهيــــــــن

ومسنوده من اغبياء يتامى العقل الثميـــــــــن

واصحاب الفجاجة والصوت العالى اللعين

وده للاسف حالنا ………..لكن تقول لمين

بنجاواتى يقول...

ابو المفاصل الواصل:

ما تزعلش نفسك كده

سيريلاكس سيريلاكس......

غير معرف يقول...

هههههههههههههههه
هههههههههههههههههههه
فكرتني بايام الدراسة اني اصحي بدررررررري دا بالنسبالي دمااااااااااااار وكنت احاول اغيب باي طريقة واقعد اتحجج بقى آي ياماما بطني وجعاني تروح تعملي مرمية اي حاجة اشتكي منها تعملها حل مفيش فايدة الغياب عن المدرسة مرفووووووووض مكنتش بغيب خالص مالص زيك كدا لما وقعت بالطينة وبرضوا غيرتلك وروحت المدرسة هههههههههههههه

وبالنسبة للتاخير عن المدرسة كارثة لو اتاخرت ارجع عالبيت ارحملي كنت مؤدبة اووووووي واخاف مين من الضرب هههههههههههه

بووست تحفة وذكرني بالذي مضي ^ـ^

تحياتي

Kimmo Alahlaoy يقول...

http://bantel7agdracula.blogspot.com/2009/05/blog-post.html


لازم نقف مع بعض ونعرفهم الا بيغلطه فيه دا اد ايييييه

غالى

فداك روحى يارسول الله

MǿиY El-Shreef يقول...

بنجاواتي عايزين شات بوكس عشان نيجي نغلس عليك

بنجاواتى يقول...

نوارة:

منورة يا نوارة
الظاهر ان ايام الدراسة المرعبة كانت متشابهة عند معظم الناس مع بعض الاختلافات البسيطة
لا للغياب ولا للتأخير

بس انتى تلاقيكى كنتى بتاخدى الكتب والحاجات اللى هتستخدميها بس... مش كل الكتب لان الجدول لسه ما نزلش

سلامى

بنجاواتى يقول...

مونى:
بصى يا ست الكل

انا هعمل شات بوكس بس بشرط وحيد

ما اشوفكيش عليه بعد ما الزمالك ربنا يحرسه من العين يخسر من فرق مالهاش لزمة كالعادة

لو الاهلى هو اللى خسر وده نادر انه يحصل ممكن تتفضلى براحتك تنورينى وانا اللى اغلس عليكى

اتفقنا؟؟؟؟؟؟؟؟

مستنى ردك

بنجاواتى يقول...

كيمو يا أهلاوى:
منورنى ويا رب تبقى لعيب كورة كبير اوى

على فكرة الواد أحمد المحمدى -اللى جاب جول جامد اوى فى رمزى هه- كان بيلعب معانا فى المدرسة الثانوى

يللا شد حيلك انت كمان

Lady E يقول...

ربنا يسعدك يا بنجواتي البوست دمه خفيف جدا

وانا في اولى اعدادي كنت على طول بروح من باب المتأخرين ولما بيكون عندي اذاعة مدرسية كنت بدخل من باب المدرسين والمديرة حتى لو متأخرة :)

وانا كمان كنت في كرة اليد ابيض يا ورد بس كنت بحب كرة السلة

بنجاواتى يقول...

ladyE:

الظاهر ان مش كل الناس كانوا زييى

لكن بمناسبة الاذاعة المدرسية:
مرة استاذ الرياضة قالى انت اللى هتحل سؤال الحساب بكرة واعطانى المسألة والحل لكن الحل كان غلط وانا فضلت طول اليوم ولحد ساعة الاذاعة احل فى المسألة ومش مصدق نفسى انه كاتبهالى غلط

وكانت آخر مرة اقدم فيها اذاعة

شغل يا بنتى على كبير

منورة

arsenalwy يقول...

ههههههههه

حلوى يادكتور

يوم دراسى دسم جدا وحلوة فكرة كرة اليد دى مش لما نفلح فى القدم نبقى نلعب يد

حماده زيدان يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

MǿиY El-Shreef يقول...

والله يابني انا كنت جايه ارد عليك بين الشوطين من قبل حتى ماترد ف المدونه

بس لما الشوط بدأ سبت الكومنت ورحت وبعده جالي اكتئاب حاد وقفلت المدونه :(((

بجد انا عندي اكتئاب حاد هيستمر لاسبوع انا امبارح جاتلي صدمه اساسا نفسيه وعصبيه وكنت هقع من طولي

لما افوق هرجع اقولك موافقه ولا لا ع الشرط

بس بعد ماتش الترسانه

بنجاواتى يقول...

ارسنالاوى:
منور يا عم

ايه مش لاقى فرق فى مصر تحبها رايح تشجع الارسنال

عندك الزمالك فى كرة القدم ولو مش عاجبك فى القدم شجعه فى اليد والطايرة والسلة كمان

مدونتك ثورية اوى يا عم

بالتوفيق يا رب دايما

بنجاواتى يقول...

مونى:
والله ما اسمهوش كلام ده

انتى قافلة مدونتك ليه

يا بنتى الموقف لا يحتمل شماته

والله لو كان الفريق اللى كسب له لازمة او فى دور نهائى مثلا كان الواحد اتكلم وهزر

لكن اللى حصل ده مزعلنا كلنا زملكاوية وأهلاوية

بس مش مشكلة ما تزعليش نفسك كده
كبوة وهتعدى
نفسى أقولك يا رب تكسبوا الدورى بس مش قادر

اقولك :يا رب تكسبوا الترسانة وبعد كده نتفاهم

سلام

MǿиY El-Shreef يقول...

فين ياعم الشات بوكس

انا وافقت خلاص

MǿиY El-Shreef يقول...

اسمك اهو

mostafaz-cbox

والباس 123456

ومش هتستعملهم الا لو عزت تغير اي حاجه ف الاعدادات

والكود هبعتهولك ف مسج مش راضي يتكتب هنا

وردة يقول...

انا لسه بحمر اللنشون لغاية دلوقتي
هههههههههه
عندك اعتراض ولا ايه
قول وانا اروح افتن عليك
هههههههههه
بس ايه اليوم الجامد جدا ده
فكرتني بيوم المدرسة والصحيان الساعة سته
والراديو
"يا صباح الخير يالي معانا00000بصبح عليك......بالسلامة ياحبيبي بالسلامة....ياحلو صبح ياحلو طل..."
وريحة العيش الفينو السخن وبابا لسه جايبة
ايام
سلام يابنجاواتي

بنجاواتى يقول...

ورده:

منورة والله

انا حاسس انك كنتى عايشة معايا فى البيت

الراديو ده كان حاجة اساسية

وكنت مفكر ان انا لوحدى اللى كنت باكل لنشون محمر -الحمد لله مش لوحدى-

بس انا ما كنش العيش بيبقى وصل لسه

فى بعض ايام كده كان ابويا بياخدنى معاه اصلى الفجر ونجيب العيش-هئ هئ اهئ عاوز انام يا عالم-

بس كانت ايام حلوة والله

واللى احنا فيها الحمد لله احلى وان شاء الله اللى جاى احلى واحلى

نورتينى

فرعون يقول...

اذيك يا عم بنجواتى اشكرك على التنويه اللى كتبته عند بنت الحاج دراكولا عنى .. واحب اعرفك انى اسمى فرعون ليس كما فعل مع موسى النبى ولكن لانى حفيد الفراعنة الذى تفخر بهم انت ايضا من حيث العظمة والابداع وليس من حيث الكفر بالله كما قلت انت .........تحياتى

Bent Men ElZman Da !! يقول...

ههههههههه
طب والله يوم جامد
فكرتنى بالذى مضى :(
ايام المدرسه دى ماتتعوضش والله

تسلم ايدك البوست حلو اوى :)

بنجاواتى يقول...

فرعون:

على فكرة انا مش بفخر ولا انتمى للفراعنة لانهم قوم بهت وكفروا بالله وعصوا أمر ربهم

وأن فرعون استخف قومه فأطاعوه

وأنه يقدم قومه يوم القيامة فأوردهم النار وبأس الورد المورود

أفخر بناس زى دول ليه؟؟؟؟!!!!!!!

انا بقى بفخر بأجدادى الحقيقيين وهم النبى المصطفى صلى الله عليه وآله وسلم
وسيدنا عمر الفاروق
وأبى بكر صاحب الغار
وعثمان ذى النورين
وعلى أبى الحسنين
ومصعب بن عمير سفير الاسلام
وغيرهم الكثيرين.....

ويكفى أنهم نقلوا لنا دين الله من غير تحريف او زياده او نقصان

هؤلاء هم أجدادى

بنجاواتى يقول...

بنت من الزمن ده:

منورة المدونة والله

طبعا ايام المدرسة دى كانت جميلة بس زى ما قلت قبل كده كل مرحلة بنحس انها كانت جميلة لما تنتهى

علشان كده المرحلة اللى احنا فيها دلوقت اكيد جميلة هى كمان واللى جاى ان شاء الله أجمل وأجمل

تحياتى