الأربعاء، 22 أبريل 2009

وأنا كمان عمرى ما نسيتَك




السلام عليكم ورحمة الله وبركاته

النهارده بن
جاواتى هيحكى لكم قصة واحد صاحبه عزيز عليه أوى اسمه مصطفى
مصطفى طالب بكالريوس طب وجراحة بجامعة طنطا

امبارح مصطفى وهو قاعد معايا لقيته متغيّر كده ومش عاجبنى
قلت له مالك يا صاصا اتكلم يمكن ترتاح ..وأحيانا كلمة من صديق بتريّح الواحد منّنا

ساعتها مصطفى بدأ يتكلم ونبرة صوته متغيرة ..

وقالى :حاسس زى ما يكون قلبى بينأح عليا

والله؟؟؟؟؟؟؟!! طيب احكى احكى..

أحكى أقول ايه ؟؟اكيد هتقول عليا عبيط لما تعرف انى بفكّر فى واحدة بقالى 3 سنين لا شفتها ولا سمعت صوتها ولا حتى أعرف أخبارها...بس لسه فاكرها ...واكتر من فاكرها ...

بنجا: أكيد اللى كان بينكم قبل 3 سنين كان حاجة كبيرة

مصطفى:الحقيقة ان اللى بينّا قبل 3 سنين كان حاجة تتوصف بإنها ولا حاجة.. وبدأ يحكى....

لما شفتها أول مرة من 5 سنين وكنت ساعتها فى تانية كلية لقيت نفسى بردّد كلمة كده كنا بناخدها فى الثانوى وهى:
الآن قد وجدت بُغيتى..الآن قد وجدت بُغيتى

المهم سنة تانية عدّت ومن وراها تالتة وكل اللى بينّا لقاءات تتعدّ على صوابع الإيد الواحدة
ومواقف وكلمات قليلة عمرى ما نسيتها

عارف انك هتقولّى ليه كده
لانى كنت متردد ودايما أسأل نفسى أسئلة :
هل دى فعلا البنت اللى نفسك ترتبط بيها؟؟؟؟؟؟؟؟؟؟
ولو كانت هى فعلا , هل ده هيكون رأيك بعد 5 سنين أو أكتر.. ولا ساعتها هتفكر بطريقة تانية؟؟؟؟

سنتين وانا بسأل نفسى السؤالين دول وكل ما أقرب من حسْم الإجابة يظهر السؤال التالت:
يا ترى هتكون مبسوط لو عرفتها دلوقت وفضلت تعرفها 5 سنين وانت مش عارف تسمى العلاقة دى ايه؟؟
ويا ترى ربنا هيكون راضى ؟؟؟؟؟؟؟؟؟؟؟؟؟؟؟؟

وقربت سنة تالتة تخلص لحد ما بدأنا الامتحانات وساعتها قالت لى انها هتحوّل بعد تالتة وهتسافر..
وساعتها ومن غير تردد قلت وانا كمان مسافر

...بس ما سافِرْتش ....
من غير ليه ...لأن ببساطة الأسئلة لسّه حايرة ومش لاقية إجابة

وبدأت الأفكار السخيفة تقولّى :
ده انت صابر بقالك سنتين وهى قدام عينك ..يبقى أكيد هتنساها لما تسافر


وآدى السنين عدّت وعمرى ما نسيتها ..والحيرة هى كمان عمرها ما نسيتنى

معرفش حاجة عنها ومش بعمل حاجة علشان أعرف غير إنى مرة واحدة سألت عنها صاحبتها
وغير إنى كل سنة لازم أعرف نتيجتها واطمّن إنها نجحت
وغير إنى كل يوم مش بروح فيه الكلية بيبقى التليفون جنبى مفتوح وبنام وأنا بتمنى أصحى على صوت يقولّى انها هنا


أنا مش عارف ايه اللى جدّ... ما أنا بقالى 3 سنين...ولا أنا تعبت ولا ايه؟؟؟؟
من يومين كان يوم ميلادى وكنت سعيد بكل أصحابى-ربنا يخليهم لى-وهما بيقولولى كل سنة وانت طيب لكن كان نفسى أسمعها منها...
علشان كده قلبى مش سايبنى فى حالى

الغريب ان مصطفى قالى: اكتب الكلام ده مع إنى عارف انه مفيش أمل انه يوصل لها ولا تقراه
لكن احساسى بيقولّى حاجة تانية.. فكم لله من تدبير أمر طوته عن المشاهدة الغيوب

وأنا عندى أمل انه هييجى اليوم اللى هتقرا فيه الكلام ده وساعتها هتكون معايا وهيكون تعليقها:

وأنا كمان عمرى ما نسيتك ...........








هناك 39 تعليقًا:

كفايـة طيبـة يقول...

الله

يارب الرسالة توصل
وترجع
عشان قلبه يرتاح
ربنا يريح قلبه وقلبك يارب
وكل الناس تلاقي بغيتها
يارب :)
سعيدة كدة انى شوفت مدونة حضرتك
اسلوبك جميل وسلس ماشاء الله :)

Ebraheem Aadam يقول...

السلام عليكم ,

ش عارف ليه يا دكتور حاسس إن ربنا رحمه من اللي في دماغه بسفر البنت دي ,

لأن اللي هو فيه ده لا قدر الله قد يكون من الشيطان ,

لأن مافيش حاجة اسمها حب من أول نظره ,
ده اسمه ( استشراف الشيطان للمرأة ) ,
كما في الحديث الشريف ( استشرفها الشيطان ) , و يخلي كل الناس تبص عليها و يخليها حلوة في عيون الناس و قلوبهم ,

خليه يحمد ربنا الذي عافاه ,

و من ترك شيئا لله أبدله الله خيرا منه إن شاء الله ,

و قول له يصبر بس , أول ما هيدخل الامتياز و يصطدم بالواقع حيحس إنه لسه بدريييييييييي قويييييييي على الجواز و سنينه ,

و ربنا يرزقنا العفاف أجمعين ..

بـِصَمتـِـ أميرة ــــى يقول...

قطعت قلبى ياعم
ايه ده
هو لسه فيه رجالة طيوبة ومخلصة كدة لمجرد طيف انسانة ماشافتش معاها ذكريات حتى عشان تتمسك بيها؟؟
ينكن
بس والله من كل قلبى
ربنا يكتبله اللى فيه الخير

ستيتة يقول...

الله
الله
مبلاش السلبية دي يا عم صاصا انت
يعني هي لو في كولالمبور متقدرش تجيب عنوانها وتليفونها
هات كورومبو يساعدك
صاحبتها اللي سألتها عنها بلغها رسالة إنك نيتك شريفة وبتحبها وناوي تأنتخ جنبها ما تبقى لك من عمر
والبنات بتخدم في الموضوع ده فوق خيالك

وان شاء الله رسائل العيون القديمة ها تلاقيها واصلة من زمان قوي
اصل جهاز الإستقبال عند البنات بيشتغل من أول نظرة

هي المشكلة الوحيدة مش الوصول لحبيبة الفؤاد
المشكلة ان فيه بنات لخبطة الشاب في حبها وانه محتاج وقت طويل علشان يحدد هو فين بيخليها تديه استمارة سته حتى لو بتحبه
فيه انواع من النساء لا تحترم داخليا الا الرجل المقتحم .. يالا اديها بدلة عسكرية بعد البكالوريوس وانزل ابحث عن الحب الضائع لحسن يتخطب وتقعد تعيط

ماشي يا بنجاواتي داخلة اضحك الاقي مأساة حب تايه يا ولاد الحلال

بنجاواتى يقول...

السلام عليكم
كلكم منورين المدونة

كفاية طيبة:
نورتى المدونة
مرسى جدا على ذوقك وكلماتك الرقيقة
ومرسى أكتر على الدعوة الجميلة دى
بس هو مصطفى اللى محتاج للدعاء مش أنا-بنجاواتى-


iBRAHiM sAllAM :
أحترم وجهة نظرك جدا ودى كانت جزء من أفكاره
و من ترك شيئا لله أبدله الله خيرا منه إن شاء الله
ودعواتك لينا فى الامتياز


ملكة بحجابى :
نورتى المدونة
من ناحية فى رجالة طيوبة فهو فى
وربنا يكتب له الخير امين يا رب
وسلامة قلبك من التقطيع ان شاء الله اللى يكرهوكى ومعاهم بنجاواتى بالمرة مع انه بيقدرك وعمره ما يكرهك

وتقبلوا جميعا فائق احترامى

بنجاواتى يقول...

تعليق خاص لأبلتى سوتيتة

أولا انتى بتكلمينى أنا وكأنى صاحب المشكلة
أنا هبلغ مصطفى اللى انتى قلتيه....

ثانيا انا مش عاوز حد يسخن الواد علشان هو مش ناقص ومتنيل خلقة

ثالثا كلها شهور وياخد-واخدة بالك من ياخد دى؟؟؟-البكالريوس ويبقى ميزو اد الدنيا وساعتها حتى لو فى كوالالمبورة مش لمبور بس هو مستعد يروح-هو قالى كده بس انا مرضتش اكتب-

رابعا مقتحم ايه بس ده انا مرة قلت كلمة بتوحشينى فضلت ملبوخة نص ساعة

وتقبلى فائق احترامى

ستيتة يقول...

يا عم البنجاواتي ما انا في اول التعليق قلت صاصا
انت صاصا؟
هو على اسم اخويا الباشمهندس كونتينر السيد فبدلعه
دخلت راسك في الرسالة الموجهه لصاصا ليه؟

ثانيا ايييييييييوة يا صاصا بسخنك وياتلحق يا متلحقش

ثالثا يا سي بنجاواتي هي تتلبخ نص ساعة بس انسى يا عم خالتك ست دؤرمة البنت لو مش راجل مقتحم "بتكلم عن واحده عندها شخصية" ولااااااااااا تبص له بطرف عينها
وها أديك بوست وصاية في الموضوع ده

مساؤ فل وسلم لي على ابو بنجاواتي وروح ذاكر علشان تبقى ميزو قد الدنيا وتبقى الطبيب الخاص لعائلة سوتيتة

د/عرفه يقول...

بص يا بنجا
قول لدكتور صاصا
ميخبيش عليا بعد كده
ده كل اصحابى بيجوا يحكولى على قصصهم
وبعدين مأظنش أنها ممكن تبعتلك الرسالة دى
أظن إن احنا عاطفيين اوى وحالمين بزيادة شوية
وبعدين أقولك الكلمة اللى انت قولتهالى قبل كده
مدورش على شبهها
وانا عارف ان الرومانسية حلوة
بس للاسف الواقع شىء والتمنى والرومانسية ده شىء تانى
ربنا يرزقنا واياكم بالزوجة الصالحة التى تستحق ما نكنه ليها من عاطفة
وبعدين فاتى التعليق الاولانى النهارده
بعد كده احجزهولى

۩۝۩ Dr. Flavio ۩۝۩ يقول...

اديني رمضان ...... رمضان اديني

وش بيبعت قبلات كتير لحضرتك عشان اتكلمت عنه اخيرا

مش عارف اقول ايه ... انا كنت هعيط وانا قاعد أقرا البوست

افتكرت اول يوم وهو جاي يقول لي:


يا عينيا يا قلبي جرى ايه .. الدنيا احلوت كده ليه
يا أصحابي يا أهلي يا جيارني .. انا عايز اخدكو ف احضاني

يمكن ده أكتر يوم شفته فيه سعيد خلال معرفتي بيه

ميرسي كتير أوي يا واد يا بنجا ويلا بقه استمر في حكايات اصحابنا اللي تقطع القلب .. وخصوصا حبيبنا ده

بس بلاش صاصا دي .. انت عارف اني بحب اقول له يا درش

وعندك واحد كانز فانتا وصلحه ويلا نركب اتوبيس عمك أبو ربيع وخليه يشغل (( أد الحروف اللي ف أسامي العاشقين .. بحبك ))

بنجاواتى يقول...

د/عرفة

متأخر انت النهارده-يللا مش مشكلة متعوضة-

على فكرة انا قلت لمصطفى نفس الكلام اللى انت قلته لكن هو مصمم انه احساسه بيقوله حاجة تانية

وقالى ويت اند سى

وكم لله من تدبير أمر طوته عن المشاهدة الغيوب

تقبل تحياتى

بنجاواتى يقول...

وتعليق خاااااااص جدا للدكتور فلافيو

اولا اقدر فيك تمييزك العالى وانت بتقولى اتكلمت عنه-واخدلى بالك انت-

ثانيا يا صديق عمرى مرسى جدا ليك واكيد صاحبنا درش بيشكر ربنا كل يوم انه وهبه صديق عسووووووووولة وطيووووبة جدا زيك

ثالثا انا مش متعود منك على ذاكرة فولاذية كده..ايه الحلاوة دى وفاكر الموقف بتفاصيله-مين عم او ربيع ده ههه-

رابعا الف بوسة على وجنتيك وجارى بحث اعادة تسمية صاحبنا بدرش-ده اذا النأح رجع تانى وكتبت عنه-

تحياتى ليك

hasona يقول...

السلام عليكم

كل ده في قلبه ومخبي
وطول الفترة دي
ومافيش ولا خطوة

يمكن يكون فيه أمل
حضرتك كنت زودت الموضوع بالاسم والمعلومات الكافية حتي يحصل اللي تأمله ونأمله جيمعا

بنجاواتى يقول...

hasona
وعليكم السلام ورحمة الله وبركاته

حضرتك نورت المدونة

ان شاء الله يكون فيه أمل

أما عن الاسم والمعلومات الكافية فلا تعليق.......

تحياتى

غير معرف يقول...

بجد صعب عليي

المشكلة انه واقف بمكانه ما يتحرك ويعمل حاجة يعني عاوز البنت تيجي وتقوله بحبك دي صعبة جدا

مش يمكن تكون مشاعرهم وحدة ومستنياه ينطق ويقول حاجة

ياخرابي ازاي صبر الفترة دي كلها

مايقولها الكلام دا ويريح قلبه ويتجوزها علطول

ربنا يوفقه يارب

بوست جميل تسلم ايدك

القدر و انا يقول...

بنجواتى
الامر بسيط جدا
ان يذهب صاحبنا اليها ويعلنها حبه
واذا كانت تبادله نفس المشاعر يتحول الحلم الى اجمل حقيقة
واما لا
وساعتها صاحبنا يفوق من اوهام عاشت بداخله فقط ....

اما ان يجلس ليفكر ويفكر
ثم اخذ يفكر ويفكر
وظل يفكر ويفكر

ده مش فى هذا الزمن يا باشا
اعتذر عن صراحتى ال .....

غير معرف يقول...

يا ستير يارب
ليه كدا بس واااااااااااااااع

صراحه مصطفى غريب اوي مينفعش يفكر فيها اصلا خلاص البنت راحت واصلا مكنش في حاجه بينهم عشان يفتكرها وياعالم مش ممكن تكون مرتبطه بحد معين
مينفعش يا مصطفى تربط حياتك بحياة حد مش معاك
انتا كدا بتضيع نفسك
عيش حياتك الدووووونيا حلوة

بنجاواتى يقول...

السلام عليكم

منورين كلكم

نوارة: نورتى المدونة واسعدنى ردك

خصوصا وانتى بتقولى:

مش يمكن تكون مشاعرهم وحدة ومستنياه ينطق ويقول حاجة

هو بيتمنى ان الامور تكون على هذا النحو فعلا

بس انتى شايفة انه لو قلها الكلام ده هيتجوزوا على طول؟!!!!!!!!!

منورة الدنيا


القدر وأنا:منورة المدونة

ومفيش داعى انك تعتذرى عن صراحتك
بالعكس دى صراحة جميلة

بس انتى حطيتى احتمالين الاول والتانى
وهو يمكن اللى مانعه خوفه من التانى

لكن الخوف ده مش هيطول اكيد

شرفتينى


A.A.S:نورتى المدونة

على فكرة مصطفى فكر اكتر من مرة انه يعمل بنصيحتك ويبطل يفكر فيها ويمكن تكون هى مرتبطة بحد تانى فعلا

لكن كان بيلاقى ان التفكير ده مش بمزاجه
ودايما بيقول ليه تحكم على شىء بالفشل وهو ما فشلش

ودايما عنده امل انها تكون حاسة بيه

وتقبلوا جميعا فائق احترامى

Lady E يقول...

التردد ده مشكلة وبيضيع مننا حاجات كتير حلوة في حياتنا

ربنا ييسرلهم الخير ولو ربنا رايد لهم انهم يتجمعو تاني ويتجوزو ويعيشوف في تبات ونبات اكيد هيتجمعو

الموضوع قسمة ونصيب بس برضه هو لازم يسعى لو فعلا بيحبها ويبطل تردد

MaNoOoSh يقول...

السلام عليكم
انا اول مرة اعلق عندك فى المدونة اللى شكلها ظازة دى لسة
ندخل بقى فى الكلام
بصراحة ستوتة عندها حق البنت بينها وبين نفسها بتحترم الراجل اللى واثق من نفسة كدة ومحدد هو عايز ايه
اقولك
بس حاجة ممكن البنت تقولها بينها وبين نفسها.. اذا كان متردد كدة.. امال هيشيل مسؤولية بيت ازاى؟
انا عارفة البنات مخلوقات عجيبة وتفكيرها اعجب.. بس صدقنى دة اللى بيحصل
لازم الراجل يكون جرىء ومقدام ومقتحم وشجاع كدة ويدخل فى بق الاسد كدة ميخافش.

بنجاواتى يقول...

مانوش:

انا سعيد جدا بزيارتك للمدونة
مدونتك جميلة جدا والتاج الاخير جميل جدا

اما عن موضوع التردد والاقتحام
اقولك ان الواد صاصا مش متردد زى ما انتى فاهمة

الحكاية كلها انه عامل بووووووووووز -pause-للموضوع لحد ما ييجى الوقت المناسب -اللى هو قرب جدا-

بس اثناء هذا البوووز هو يا عينى بيجيله نوبات حادة تزود من اشتياقه وتخليه متنيل بالشكل ده

وبرضه اقولك زى ما قلت لستوتة ما تسخنوش الواد ما تسخنوش الواد ما تسخنوش الواد

وتقبلى تحياتى

غير معرف يقول...

السلام عليكم
مقدر انا شعور الاخ مصطفى هوا خايف يتصدم يا عينى و الاستاذه تصده بس هو لازم يخوض التجربه يا ينجح و ينال ما يريد يا اما يتصدم ف حبه و دي نوبه ن تستمر اكتر من ايام و هاينسي و انتهى الامر
فان كان عارف يوصل لها يتك عى الله و يقتحم الاسوار و يعيش و ان اتصدم بالحقيقه امره يخد الامر بباساطه و يقول انها خسرت فرصه عمرها لانها لن تعوضه و لن تجد احد احسن منه عادى يعنى مش معضله
و متشكرين على زيارتك يا برنس

غير معرف يقول...

بص يابنجاواتى
موضوعك قصدى موضوع صاحبك فكرنى بواحدة صاحبتى برضه بقوله لك علشان لاتفقد الامل هوطويل شوية بس صاحبك حياخد منه جرعة امل خطيرة
صاحبتى ديه حبت بن الجيران وده اثناء الدراسة وهو لم يشعر بذلك وكنش فيه اى لقاء او كلمات بل اكثرها نظرات من جانب واجد
وكانت صاحبنى بتكتب كل احساسيها وماتشعر بيه لابن الجيران
وفجاة عزل ابن الجيرانوانقطعت اخباره
ومرت الستين وصاحبتى لايعرف قلبها حبيب
سواهومش حتصدق ان كان فيه خطاب بيتقدموا اثناء الدراسة وهى ترفض
على امل اللقاء بالحبيب والذى لاتعرف عته شىء من سنوات
مجرد مخلصت الراسة نزلت اشتغلت
وهى واقفة فى انتظار ركوب عربة الشركة
وجدت الحبيب امامها
وفاكر اغنية وردة نسيت الدنيا وجريت عليه اهو ده اللى حصل ساعتها
طبعا هى جريت عليه ولكن لم تصرح بشىء
سلمت بحكم الجيرة وعرفت ان خلص الراسة وقضى
الجيش وتم تعيينه فى الشركة
شوف الاقدار صاحبتى لم تضيع الفرصة او بمعنى اصح حلم عمرهاولكن بحياء ولكن تواجدوهم جعله يلقى عليها الضوء من قريب
وتحقق الحلم المستحيل وتزوجا وهما الان على مقربة من ان يصيحا جدود لاول ابنائهم
القصة ديه لها اكثر من ثلاثين سنة ديه فترة بعد الخطوبة والزواج مش حنحسب قبلهاوفى الوقت ده كان منعدم كل وسائل
التكنولوجيا ووالواسطات وصاحبتى وصلت لحبيبها مابالك انت والباب على مصرعيه
امسك فى خيط صاحبتها وتتبع الاثر وستصل
باذن الله
ولاتنسى ان الموضوع ده بتاع صاحبتى علشان تقوله لصاحبك
ودعواتى بتقريب البعيد

ام مالك

Unknown يقول...

مدونة رائعة وهادفة

وادعوك لزيارة مدونتي

ويبقى التواصل

بنجاواتى يقول...

بيبرس:
منور يا نجم

اجمل حاجة اتقالتلى من زمن:
(ان اتصدم بالحقيقه امره يخد الامر بباساطه و يقول انها خسرت فرصه عمرها لانها لن تعوضه و لن تجد احد احسن منه)

ربنا يخليك يا رافع معنوياتنا -انا طبعا عارف موضوع انها مش هتعوضه ومش هتلاقى احسن منه بس انا اللى مش بحب اتكلم عن نفسى

هاااااااااا...وقعت بلسانى

----------------
ام مالك :
انا تشرفت بزيارتك للمدونة

والقصة الجميلة اللى حكيتيها

وهو كده خد جرعة امل خطيرة
يا رب الايام دى تعدى على خير والواد ما يتهورش

وربنا يسعدك ..قصدى يسعد صاحبتك

MǿиY El-Shreef يقول...

ياااااااااارب ترجع يامصطفى وتلاقيها

انا بكره الفراق وبكره الي بيدور ع حد ومش بيعرف يلاقيه

:(

احساس صعب ان الحاجه تكون ف ادينا وتضيع

ومانعرفش كده الا لما خلاص تضيع فعلا

بس باذن الله احساسك يكون صح

اول زياره ومش الاخيره ان شاء الله

محمد عبد الباسط يقول...

اسال الله لنا ولكم راحه البال والسعاده ماحيينا وان يمن علينا بحسن الخاتمة

وربنا يجمع بينكم فى خير


حلم كبير

غروب يقول...

ااااه يا قلبي

ياااااااااااااارب
ياااااااااااااارب
يااااااااااااااارب

تشوف الكلام وتعرف انه بيحبها ولو انه غلطان انه سابها

وان شاء الله ترجع ويكملوا المشوار سوا

والله بجد بدعى من قلبي

الكلام حسيته صادق اوووووى

بنجاواتى يقول...

منورينى كلكم
*******
مونى:
والله كلامك زى النسمة بس لو ما كنتيش تبع حزب هالة كنتى تبقى ما لكيش حل

****
محمد عبد الباسط:
دعوة رقيقة ربنا يتقبل منك
وشكرا على مرورك
***
غروب:
منورة المدونة
وسلامة قلبك

Bant EL7ag Dracula يقول...

اوبببببببببببببببس


بجد والله العظيم انت صعبان عليه جداااااااا

يا مصطفى ودا نادره لما بيحصل


بس الموضوع وجعنى اوى والله

يارب
ياارب
يارب
تقرها

ربنا معاك

amany يقول...

هو فى كده .. ممكن بس انا مش مقتنعه ان الاحساس ده واقعى وحقيقى .. احييك على طريقتك فى الصياغه

بنجاواتى يقول...

السلام عليكم

***
بنت الحاج دراكولا:
منورة المدونة

طبعا انا مش مصدق نفسى انه صعب عليكى بعد ما شفت مدونتك وعرفت اد ايه انتى طيبة وقلبة حونين

وسلامتك من الوجع يا ستى

***
أمانى:

منورانى

بس عاوز أقولك ان فى كده فعلا ...والله فى كده وأكتر من كده كمان بس اللى اتقال هو اللى ممكن يكون مقبول واللى ما اتكتبش كان هيكون زياده لكنه فى كده

مرسى لمرورك

جارة القمر يقول...

أولاً سأشكرك لمساندتك لي هناك ..

بعدين بالنسبة لصاصا هو اللي ضيعها من ايدو ..
البكاء على الأطلال مش حينفع التردد والحيرة تقتل الانسان وتضيع الفرص من يده ليحيا سعيدا
وتفتح أبواب الندم وتأخذ كلمة لو مجراها

سعيدة أن بصداقتك

اسلوبك رائع جدا بالعامية وجميل فعلا

مودتي

ميرام يقول...

تفتكر !

بنجاواتى يقول...

جارة القمر :
طبعا منورة الدنيا

وان شاء الله تكون نتيجة التحاليل مطمئنة وما يكونش فى حاجة خطيرة

وشكرا على مرورك

****
ميرام:

ايوة افتكر

Kimmo Alahlaoy يقول...

ونبى قوله الحال من بعض

ربنا يعينه

ويعنى

حسام غانم يقول...

لا بس أنا أحب أحيي فيك زمالكاويتك :)

Bant EL7ag Dracula يقول...

http://7abebyyarasolalah.blogspot.com/

بنجاواتى يقول...

كيمو :
منور يا عمنا
ان شاء الله ربنا يفك ضيقتك

****
حسام باشا غانم:
الزمالك ده روحى روحى روحى
وان شاء الله البوست الكبير شايلينه ليوم ماتش الحرس
**

بنجاواتى يقول...

طبعا كلكم منورينى

انتهى هذا البوست

فى انتظار التعليق الاربعين المنتظر