الجمعة، 19 يونيو 2009

أين حزنى؟؟؟

بسم الله الرحمن الرحيم


انا أب رزقنى الله بطفل لكن ابتلانى ربّى بأنه يعانى من عجز فى احدى رجليه
الامر الذى طالما وضعنى فى حيرة وألم نفسى كلما نظرت اليه
ولكن كانت أمه -زوجتى- دائما معينا لى على تربيته والصبر على هذا البلاء

حتى علمنا انه يمكن لهذا الولد ان تتحسن حالته وقد يأتى اليوم الذى يمشى فيه على رجليه كأقرانه من ابناء سنّه
وتعاهدت و زوجتى أن لا نتخلّى عن هذا الأمل أبدا وأن تكون هذه رسالتنا فى حياتنا

ومرت الأيام وكلما نظرْتُ فى عينيها وجدت سؤالا طالما سمِعتْه هى من بين جفنىّ
هل يأتى اليوم الذى يتم الله علينا نعمته ويمنحه الصحه بعد ما منحه جمالا لم يسبقه اليه أحد؟؟؟؟؟

اللهم ارزقنا الصبر على هذا الخير ورضّنا به

وماتت زوجتى............

ومرت أيامى من بعدها ولا أعرف كيف مرت
يحترق قلبى شوقا اليها
بل يحترق حسرة أن ماتت ولم تر ولدها وقد تحسنت حالته
بل يحترق كلما سألت نفسى عن إذا ما كان بمقدورى أن أكمل المشوار وحدى

هل أستطيع ذلك؟؟؟؟

تمر الايام والسنوات وقد مرّت حلاوتُها
ويوما يزيد تعلقى بولدى ويوما ابكى كلما رأيته ملازما لهذا الكرسى اللعين
.....
أبكى ولكن يزداد تعلقى ..وحين لا أبكى ايضا أزداد تعلقا
......
حتى جاء هذا اليوم الذى اجتمعت علىّ فيه نفسى ودنياى وشيطانى
ونسيت ما أعد الله للصابرين من جزاء
بل نسيت نفسى

مالى لا أفكر الا فى نفسى؟؟
ما الذى حدث؟؟
لم أكن أتوقع أن يأتى علىّ يوم كهذا
كيف أتمنى أن لو لم يكن ذلك من البداية قد حدث
كيف أنقم على قدرى
كيف أضجر من ولدى... وقد أحس هذا منّى

أعرف سبيلى للخلاص منه
ولم يعد غير ذلك يشغلنى

نعم....أدّعى رغبة فى الزواج وأزيّن الإدّعاء بزينة العفاف
فينقلب الولد إلى أهل أمه

وقد تم مرادى
وفارق الولد البيت ولم يخلّف وراءه الا الكرسىّ

وأنا الآن اقضى يومى وليلتى أمام الكرسى وقد خلا من ساكنه
يعتصر قلبى حزنا على فراق ولدى
ولكن الذى يقتلنى هو أنى أشعر أحيانا ببعض الرضا عن فعلتى..
وأنسى حزنى

أين حزنى؟؟؟!!!!!!!!

ألهذه الدرجة كنت أنانياً.....

هناك 83 تعليقًا:

د/عرفه يقول...

أول تعليق

د/عرفه يقول...

حمد الله على السلامة
ومرحب بعودتك



فعلا دى انانية شديدة


لدرجة مخزية

Lady E يقول...

بجد زعلت جدا لما كنت باجي المدونة والاقيها مقفولة

عودا حميدا ومبروك ع اللوك الجديد للمدونة

هروح اقرأ البوست واجي تاني

غير معرف يقول...

عميقة جدا

الاب مش قادر يتحمل الحزن أكتر من كدة وأما أتخلص منة وجد أنة مفتقدة

معنى قاسي
لكن حقيقي

ممتاز

Lady E يقول...

لحظة بقى انا حاسة اني مش مجمعه

وأنا الآن اقضى يومى وليلتى أمام الكرسى وقد خلا من ساكنه
يعتصر قلبى حزنا على فراق ولدى
ولكن الذى يقتلنى هو احساسٌ ببعض الرضا يقطع حزنى

طب وايه المانع انه يخلي ابنه يرجع يعيش معاه هما اهل مامة الولد مش موافقين ولا ايه
---------------------
وكمان ليدى اللى كانت السبب فى انى هقفل المدونة -ما تصدقيش انا بضحك بس بالقدر كده كنتى انتى اخر حد انا رديت عليه-

عااااااااااااا انا السبب عاااااا
بريئة يا بيه انا معملتش حاجه
ده حتى انا كنت لسه هقرا البوست بتاع بنجا وزير الصحة وعملت ري فريش للصفحه لقيت المدونة مقفولة
تقريبا السبب اني مدخلتش المدونة بالكليك اليمين :)

بنجاواتى يقول...

عرفة:

امتى بقى يا بنى هتكتب اسمك الحقيقى

تشكرات على مرورك يا دكتور

ربنا يعافينا ويعافيك
ويطهرنا من الانانية

سلام

بنجاواتى يقول...

ليدى:

ربنا ما يجيب زعل تانى وعموما انا سلمت مفاتيح المدونة لحد تانى علشان لو حبيت اقفلها معرفش

اللوك الجديد؟؟
حد يلحقنى يا عالم ...لوك ايه اللى جديد ؟؟؟
ده من زمان اوى -بس مش معنى كده انى هغيره-

بصى يا ستى
هو الولد عند اهل مامته والاب ما اتجوزش ولا حاجة وهما مش ممانعين انه ياخده تانى
طيب ايه المانع؟؟؟
المانع ان الاب ذات نفسه مش عارف يرجع ابنه ورغم حزنه الشديد على ابنه الا انه احيانا يبقى راضى عن اللى عمله

قمة الانانية

وبعد كده ابقى ادخلى المدونة برجلك اليمين وانتى تلاقيها مفتوحة على طول- مش كليك يمين:P-

منورة يا ستى

بنجاواتى يقول...

مصرى جدا

انا حاصل على لقب ممتاز؟؟؟
وكمان عميقة جدا

ربنا يكرمك
ده من تذوقك العالى بس
-مش مدح ولا حاجة بس انا قصدى ان الناس الجميلة بيشوفوا الاعمال الرائعة بأحاسيس جميلة زيهم ...شفت مش مدح ولا حاجة هههه-


فعلا الانسان الانانى هو اكتر انسان بيعانى بسبب انانيته

تحياتى

عاشقه الرومانسيه يقول...

القصه دى حقيقيه ولا من خيالك؟
لو حقيقيه فهى مؤلمه جدااااااااا
ولو من خيالك برافو عليك جداااااااا جدااااااااا
امتياز مع مرتبة الشرف

VÖltaa يقول...

حمدلله عالسلامة ياجميل
واضح انك كنت مغلب الناس وقافل المدونة

وحلو البوست وطريقة الكتابة والاسلوب جميل جدا

بس اتمنى ان الاب يرجع الولد
ويمسك فى الامل ده جامد
وان شاء الله ربنا هيمشى الامور

تحياتى

بنجاواتى يقول...

عاشقة الرومانسية:

القصة دى مش حقيقية فى أحداثها
لكن حقيقية فى احساسها-ايه الكلام الكبير ده-

القصد يعنى انك نورتى الموضوع ونورتى المدونة

والف مبروك
تحياتى

بنجاواتى يقول...

محمد:

الله يسلمك يا رب

ان شاء الله مش هقفل تانى

يا رب الاب يعرف يرجع لابنه تانى او بمعنى اصح يقدر يرجع لابنه تانى

تحياتى

ستيتة يقول...

انا جيت وسعوا شوية كده

احساس الأب طبيعي
احساس الأب انساني جدا وممكن نمثل الرضا بشكل دائم وخاصة امام الناس لكن بينا وبين ربنا عارفين ان الأنسان ده جهولا كفورا

لكن استمتاع الأب بشوية أنانية من وقت للتاني ممكنة
اللي مش ممكن انه يسيبه
ها يرجع يحضنه ويرجعه بيته

القصة ببساطة اننا مش ملايكة ولا ماشين بكتالوج
الأم تضحيتها في سبيل ابناءها شيء فطري بحت شحط محط
هي جبلت عليه

لكن الأب ده مش طبعه
هو يحب ويضحي لكن يزهق وده مش عيب قاتل

عود يا بابا خد الولد ومن وقت للتاني شارك الناس اللي بيحبوك ويحبوه في مسئوليته
وقول الحمد لله ترضى
وقول استغفر الله تعلى


جميلة قوي صياغتها يابنجا

وممنوع قفل المحل تاني الا بتصريح مني انا البلدية

MaNoOoSh يقول...

انا شايفة ان احساسه ادمي جدا


مفيش حد يقدر يتحمل المسئولية طول الوقت وهو لوحده


لكن الغلط انه سايب ابنه وهو مشتاق له

الغلط انه حسس ابنه بتعبه من المسئولية

لانه لو عرف ان احساس ابنه بالكلام ده اكيد قاتل مكنش حسسه بكده


هو من حق اى حد يتعب من المسئولية ويقرر يرتاح شوية
بس لازم يراضى ابنه ويعتذرله


اه كنت هنسي

حمدا لله على السلامة يا بنجا.. كل شوية كنت اجي اخبط والاقى الباب مقفول في وشي.

غير معرف يقول...

هلا اهلا يادكتور
طب والله منور والله لك وحشة كبيرة
ورجلى دابت من المرور على المدونة
والاقيها مقفولة ارجع حزينة ومشغولة
لانى مش عارفة السبب
الحمد لله عودا حميدا اوعى تعملها تانى
نيجى للبوست
ايه القصة الجامدة ديه
الوضع ده طبيعى للاب بعد افتقاد الام
مش المثل بيقول الام تعشش والاب يطفش
الام ربنا خلقها حمولة وخاصة على الاولادها
والاب محتاس لوحده فهذا وضع طبيعى
وحتى لو رجع الابن سعاوده شعوره مرة اخرى فهذه الطبيعة الذاتية
المهم منور يادكتور
تحياتى

غير معرف يقول...

قصة مؤلمة جداا

اصعب حاجة انه يكون ابنك عاجز وانت مش بايدك تعمله حاجة

وفي الحالتين هو مش مرتاح

حمد لله على سلامتك

تحياتي

غير معرف يقول...

هو الاب موش اناني قوي .........حقه يفكر في زوجه........ بس كمان المفروض يفكر في حل وسط بحيث يتجوز وابنه معاه
بس جميله الخاطره دي

بنجاواتى يقول...

ستيتة حسب الله الحمش:

كنت عاوز اقول ان الاب ده كتب المشاعر دى فى حالة حزن على ابنه

لكن لو كان كاتبها وهو فى الحالة التانية كان هيبقى الكلام مختلف وساعتها كان الكل هيعذره ويقول دى مش انانية

بس انتى كده بتقولى ان الراجل ده-كأب- عنده شوية انانية وده احساس طبيعى !!!!

يا ترى دى نفسية الراجل كزوج واخ وابن برضه ولا ايه؟؟؟

تحياتى

بنجاواتى يقول...

منوش هانم المخنوقه:

بتعذرى الاب ؟؟؟؟

يعنى انتى شايفة ان اللى عمله فيه جزء من التصرف الطبيعى كإنسان؟؟؟

هو علشان يتخلص من احساس الحزن واحساس انه صغير قدام نفسه بيتمنى ان ابنه يرجع له...لكن اللى مانعه انه مش قادر يتخلص من احساس الرضا اللى بيجيله وان احساس الرضا ده هو اللى هيتحول لسخط بعد عودة ابنه

هو فعلا بيتمنى لو فى حل وسط لكن صعب

ربنا يستر وماقفلش المدونة بعد الرد ده

سلام

بنجاواتى يقول...

ام مالك:

ربنا يخليكى ويحفظك

سلامة رجلك وان شاء الله ما ترجعيش حزينة تانى

هو الاب لما بيحس انه خذل ابنه بيحس بالحزن طول الوقت لكن لما بيفكر انه لو رجع تانى هيرجع لنفس الوضع والمسئولية بيخاف ياخد اى خطوة تنهى هذا الشعور بالحزن

منورة الدنيا
تحياتى

بنجاواتى يقول...

نوارة:

الله يسلمك ويحفظك

فعلا احساس ان الظروف اجتمعت على الانسان ده احساس مؤلم جدا

لكن الاب كان المفروض يقف جنب ابنه اكتر من كده شوية ولا ايه؟

تحياتى

بنجاواتى يقول...

فتاة من الصعيد:

هو للاسف الاب ما فكرش فى زوجة

الاب فكر فى انه يتخلص من العناء اللى بيواجه مع ابنه فقال اتجوز

ويمكن ما يتجوزش

عموما ما حدش هيعانى من انانيته اكتر منه هو شخصيا

شكرا ع الزيارة-فين الموز بقى والحاجات دى؟؟؟-

تحياتى

غير معرف يقول...

السلام عليكم ..

الصراحه القصة صعبة جدا في احداثها

الاب صعب لوحده كأب انه يقدر ع تربية ابناءه ف حالتهم الطبيعية فما بالك اذا كان معاق

وزوجته الي هي كانت سنده ف الموضوع دة ماتت

طبيعي جدا انه يتولد عنده شعور بالضعف اوالعجز ويبدأ يفتكر نفسه واحتياجه لانسان يكمل معاه حياته

حق الاب انه يهتم شوية بنفسه لانه فعلا صعب عليه اوي يهتم بحالة زي حالة ابنه

القصة جميله اوي تفاصيلا واحساسا

اول زيارة ومش الاخيره ..

بنجاواتى يقول...

غير معرف:

سعيد جدا بتشريفك للمدونة

وسعيد اكتر برأيك المتزن جدا

ويا رب فعلا ما تكونش المرة الاخيرة وتشرفنى دايما

تحياتى

غير معرف يقول...

عودة مرة اخرى ..

معلش يا بنجاواتي بس انا نسيت نقطة

لما قرأت القصة مرة تانية اكتشفت حاجه مهمه

انك تجاهلت الابن تماما

هو فين وايه دوره وايه مشاعره وهو عايز ايه

يا ترى مقدر الي عمله والده ولا لا

حسيت ان الجزء ده انت اهملته

فياريت لو مرة فكرت تعيد صياغتها تهتم بالجانب دة

يعني انتبه للطرف الاخر في القضية عموما

مش تعرض وجهة نظر واحدة

لانك عرضت وجهة نظر الاب فقط واللي مر بيه واحنا بالتالي اتفاعلنا معاه ونسينا الابن تماما

:)

غروب يقول...

والله انا في حيره من القصه

هو حقه يتجوز لاى سبب يراه

لكن مش المفروض انه يتخلى عن ابنه

يعنى هو عمل شئ صح واخر غلط

عموما انا اسفه انى بتاخر عليك

بس يدوب ليوم الاتنين الجاى بس وابقي خلصت الامتحانات خالص ادعيلي

جارة القمر يقول...

مؤلم ذلك الاحساس الذي يدفعك الى ان تؤذي اقرب الناس اليك


احساسك رائع وراقي


مودتي

بنجاواتى يقول...

غروب:

هو فعلا عمل شئ غلط وكانت حجته لعمل الغلط ده حاجة صح -مجرد حجة مش أكتر-

ربنا معاكى فى الامتحانات
وعقبالى

منورانى

بنجاواتى يقول...

جارة القمر:

سعيد بمرورك

وارجو ان لا اكون قد تسببت فى ايلامك

تحياتى

د. ياسر عمر عبد الفتاح يقول...

كده تقفل المدونة في وشي؟
هيه دي أخرتها؟؟؟؟
مكنش العشم


وبعدين إيه القصة دي
أنا شايف عادي لما يتجوز
بس برضه ميسبش إبنه
الأنانية إنه متيجوزش ,, ويفضل عايش تعبان وقرفان
وأرجع أقول ميسبش إبنه

بنجاواتى يقول...

د/ياسر

لا يا راجل ما تقولش كده...انا اقفل المدونة فى وشك
انا كنت قافلها فى وشى انا :)

ماهو المشكلة يا دوك انه الاهم عنده انه يتخلص من العناء اللى بيواجهه مع ابنه ..ده عنده اهم من انه يتجوز

...."أدّعى" رغبة فى الزواج وأزيّن الرغبة بزينة العفاف

انت خلصت امتحانات يا ريس ولا ايه؟؟


مستنيين ومضات الجميلة

سلام

رحلتنا في الحياة يقول...

مش انانية شديدة قوى على فكرة هو من حقه يكمل حياته ويبطل يحزن ويفكر فى الماضى من حقه يجوز تانى بس اكيد يعنى مش محاولة التخلص من الولد هى السبب اللى خلاه يفكر كده لكن كان يقدر يجوز وفى نفس الوقت يراعى ابنه يختار زوجه صالحة ترعيه معاه بس دى طبيعة الرجال عدم الصبر سبحان الله لو كانت الام هى اللى عايشة كانت استمرت لاخر لحظة فى عمرها بترعى الطفل

بنت الأسلام يقول...

عودا حميدا يا دكتور
والله انا من رأى ان الاب دا مش أنانى هو ممكن تقول مرت علية لحظة ضعف وكانت زوجتة شايلة معاة المسؤلية فحس بالوحدة من بعدها وأن المسؤلية كبيرة علية ومع لحظة ضعف ووسواس الشيطان إلى ما بيرحمش نازل زن على الودان دفعة انو يعمل كدا وبعدين دا من حقة انو يكمل حياتة بس مش من حقة يرمى أبنة بس الراجل إلى زى دا بيندم بسرعة وبيحس بغلطتة وضميرة بيوجعة.

The illusionist يقول...

الف الف مبروك على العوده
منور تانى يا بنجاواتى باشا
ممممممممم
صراحه
انانيه مفرطه
خصوصا
لما تتعلق بحكايه انك تفضل نفسك وتفكر فيها
والطفل ده موجود
وبحالته

ومساء الخير تانى

مجرد مدونة يقول...

بصراحة حاولت افهم انت عايز توصل لإيه م عرفتش ههههه بس كويس انه حاسس بالذنب! دى بداية كويسة :)

بنجاواتى يقول...

أيوشة:

اكيد هو من حقه يكمل حياته ويحاول يدورعلى سعادته

لكن جميل جدا انك واخده بالك ان مش الابن بس هو اللى كان ضحية ....لا ده الاب كمان كان ضحية رغم انه هو اللى أخد القرار بالفراق

تحياتى

بنجاواتى يقول...

همسة:

هو فعلا بيندم بسرعه وضميره بيوجعه وأكيد فكر مليون مرة انه ببساطة يرجع ابنه يعيش معاه من جديد

لكنه اكيد خايف برضه ان الموقف يتكرر تانى ويغلبه الشيطان -أو العقلانية الشديدة-ويكرر نفس فعلته مع ابنه وبالتالى هيكون الجرح أكبر

تحياتى

بنجاواتى يقول...

THE illusionist :

منور يا باشا وربنا يخليك

يمكن تكون انانية فعلا
لكن اكيد الاب شايف ان من ورا الانانية دى مصلحة اكبر للولد قبل ما يكون له

ايد فيش اب بيكره ابنه وهو روحه فيه لكن الظروف اللى خلت الحياة بينهم صعبة هى اللى دفعت الاب انه يتخلى عن ابنه خوفا من انه يضيع ابنه ويضيع معاه

تحياتى

بنجاواتى يقول...

مجرد مدونة:

انا مش عاوز اوصل لحاجة :)

كل الحكاية انها مشاعر اب مش بيحب يلوم على الظروف كتير فبيلوم نفسه

تحياتى

ma7amd 22 يقول...

ماجاوبتنيش !!

هو سؤالي صعب للدرجة دي

بنجاواتى يقول...

ma7amd 22 يقول...
ماجاوبتنيش !!

هو سؤالي صعب للدرجة دي



سؤال ايه؟؟؟
معلش اعذرنى الذاكرة ضعيفة شوية فلو حضرتك تفكرنى بالسؤال أوعدك انى اجاوب عليه

الحمد لله انا معنديش حاجة اتكسف منها:D


تحياتى

ma7amd 22 يقول...

اه صحيح انا كنت غير معرف ..

عودة مرة اخرى ..

معلش يا بنجاواتي بس انا نسيت نقطة

لما قرأت القصة مرة تانية اكتشفت حاجه مهمه

انك تجاهلت الابن تماما

هو فين وايه دوره وايه مشاعره وهو عايز ايه

يا ترى مقدر الي عمله والده ولا لا

حسيت ان الجزء ده انت اهملته

فياريت لو مرة فكرت تعيد صياغتها تهتم بالجانب دة

يعني انتبه للطرف الاخر في القضية عموما

مش تعرض وجهة نظر واحدة

لانك عرضت وجهة نظر الاب فقط واللي مر بيه واحنا بالتالي اتفاعلنا معاه ونسينا الابن تماما

صوت من مصر يقول...

دى انانيه
لكن ممكن يقدر يرجع فى قراره نجده لولديه وللقدر

عمرو يقول...

أولا أحييك من كل أعماق قلبى على خلو البوست تقريبا من الأخطاء النحوية و الاٍملائية التى لا يخلو منها بوست فى البلوجر .. و ده شىء يحسب لك كثيرا ..
ثانيا أيوه فعلا ممكن أن يعتاد الاٍنسان على وجود الحزن و المنغصات فى حياته حتى يعتاد عليها و يفتقدها حالة غيابها عنه ..
تقبل تحياتى و تقديرى و متواصلين دائما اٍن شاء الله ..

ديالا يقول...

حلوه اوي بس حزينه جدا

اتلي بيحب حد ميتخلاش عنه كده

ده رايي مقدرش اقول مش بيحبه

بس اقدر اقول انه اناني جدا

بنجاواتى يقول...

صوت من مصر

نظريا هو ممكن يرجع نجدة لولده ولنفسه
لكن الواقع حاجة تانية

منور وتحياتى

بنجاواتى يقول...

أستاذ عمرو:

ده شئ يسعدنى ان حضرتك تثنى على سلامة البوست من الاخطاء --تقريبا--:D

يمكن الطبيعى فى الدنيا اللى احنا عايشينها دى ان الانسان يعيش فى حزن دائم ويفتقده لما يغيب عنه الحزن ده


تحياتى

بنجاواتى يقول...

ديالا:

منورة الدنيا

انا اللى مزعلنى انها حزينة شوية
بس انا كده لما ببقى متضايق بحب اسود الدنيا فى وش كل اللى اعرفهم :(

ما حدش يقدر ينكر انه بيحب ابنه
لكن كونه انانى دى حاجة مش الكل يتفق عليها
واكيد هو لما شاف ان ابنه من بعده عاش حياته اللى بيتمناها من غير ما يحتاج الى انه يضحى او يتحمل المسئولية مع الاب اكيد ساعتها الاب عرف انه ماكنش انانى وان اللى عمله هو الصح رغم الالم اللى اصبح هو السمة المميزة لحياته

تحياتى

۩۝۩ Dr. Flavio ۩۝۩ يقول...

انا مش قريت حاجه ومش فاضي أقرا

بس انت مش كنت قفلت المدونه


ايه اللي رجعك تاني؟؟؟

حبيب ألبي يا درش

بنجاواتى يقول...

حبيب قلبى يا فلافيو يا حبيبى

انا مش عارف المفروض ازعل ولا افرح لما تقولى كده

ربنا يكون فى عونك ياعم وييسر لك امورك
يعنى مشش فاضى تقرا البوست وفاضى تدخل على مدونتى وهى مقفولة هع

المهم انا دلوقت نفسى فى العسل اللى كان معاك لو سيا\دتك تعدى عليا وتلافينى شوية هكون شاكر -أبو هانى هع هع -

برضه من غير ما تقرا منور الدنيا يا حبيب قلبى

خلاص بقى انا قرار قوى
زمان جالك هيديك :P

مشخبطاتي يقول...

جميلة القصة وكمان معانيها موجودة فى واقعنا..أنانية وحزن فى نفس الوقت..(بجد جميلة جداً)

بنجاواتى يقول...

المشخبطاتى:

زيارتك اسعدتنى

منورنى
تحياتى

جارة القمر يقول...

أشتاق لجديدك دائما

بنجاواتى يقول...

جارة القمر

وانا اشتاق لزيارتك دائما

تحياتى

ghorBty يقول...

السلامـ عليكمـ

ويا لها من انانيه سيندم عليها حتما ..

ومهما كان البلاء فان عظم الجزاء من عظم البلاء فالصبر والاحتساب كان خير له وان كان لا يري ذلك ..

الله يشفي ويعين كل مبتلي مسلمـ

سلمت يمناك ..

Dr. Kafy يقول...

أخى الحبيب ليس مطلوب من الإنسان أن يعيش حزينا و لكن مطلوب منه أن يلتزم بمسئولياته و ألا يقصر فيها و الحزن يدمر القدرة على الإنتاج فيجب علينا دوما أن نتجاوز الحزن و ننتقل إلى الواجب و لكى نستطيع القيام بواجباتنا يجب علينا أن نرعى أنفسنا كى تقوى و تصبر على أداء واجبتها و طالما حافظت على هذه المعادلة فأنت فى الطريق الصحيح.
أما أن ترعى نفسك و تترك واجباتك و تتملص من مسئولياتك فهذا هو الخطا

و السعادة دائما تكمن فى قدرتك على نفع المحيطين بك و الأقربون أولى بالمعروف.

ميرام يقول...

حزنه ...!؟
لم البحث عنه ..
والاجابة واضحة ..
حين نظلم آخرين
تخاصمنا كل المشاعر
تأبى العيش معنا ...
تنفر من وجودنا ..
فيصبح الفرح ذكرى .. والحزن ظاهره
حتى الدموع نستجديها أحيانا علها تطفئ لهيب الوجع أو تحده
لكنها تعلن غيابها هي الأخرى امعانا في التأنيب
شكرا لقلمك بنجاواتي
تقبل مروري
(:

قلم رصاص يقول...

السلامـ عليكمـ

قصة مؤلمة جدا يادكتور

بارك الله في قلمك الرفيع

مزيد من التميز والابداع

بس غير النظام بقى واحنا مش ناقصين وجع قلوب يابطل

اكتب في فنون الحياااااااه

وخلينا نفرح شوية لاحنا تعبنا من كتر الاحداث اللي بنمر فيها في مصر

بارك الله فيك ووفقك وعهلى طريق الحق سدد خطااااااااااااك

في حفظ الله

بنجاواتى يقول...

غربتى:

تشرفت جدا بزيارتك

فعلا هو لو توكل على الله وهو عنده يقين ان ربنا هيعينه ما كنش فرط فى صحبة ابنه

تحياتى
------------

دكتور كافى:

اكيد الاب ده اكتر حاجة سببت له الالم انه يكون فضل ان يرعى نفسه ويعطيها حظها عن ان يقوم بمسئولياته

لذلك سيطر الحزن عليه ومنعه عن حياته

تحياتى
------

بنجاواتى يقول...

ميرام:

اسعدنى جدا مرورك

وكالعادة كلماتك جميلة ورقيقة

فعلا احساس الاب بظلمه لولده كان اقوى من ان يشعر معه بأى مشاعر

فيشعر احيانا بحزن واخرى بالرضا واحيانا يلوم نفسه واخرى يتركها

تحياتى
-----

قلم رصاص:

اعتذر لو كانت القصة مؤلمة بعض الشئ

وان شاء الله اللى جاى يكون مبهج عن كده
وربنا يزيل الالم من صدورنا ويسعدنا كلنا

تحياتى

د.آيه يقول...

بسم الله الرحمن الرحيم

بعض الأخطاء التى يرتكبها الفرد ..
تسبب له التعاسة و الحزن طوال عمره..
ما حدث للوالد كان نتيجة لأنانيته المفرطة بحق..
تحياتى

just dream يقول...

قصة حلوة جدا بس للاسف اثبتت وبجدارة مدى انانية الاب عكس الام تماما دايما بتضحى بكل حاجه بتضحى حتى بنفسها لكن للاسف الاب مش بيعرف موضوع التضحيه ده الا فى النوادر

عمرو وجيه يقول...

الانسان مبيخدش كل حاجة


و لكن عليك بالموازنة


هو انا معرفش اذا كانت قصة حقيقية ولا مؤلفة



بس في كلتا الحالتين هي انانية فعلا

فشكووول يقول...

طبعا دى لازم تكون قصه
... حتى لو مش قصه ... طبيعى والراجل ما عملش حاجه غلط .. ودائما قناعات الانسان تتغير من وقت الى وقت وبتغير الزمن وبتغير الحاجات .. والانسان بيتمنى حاجات كتير وروحه ونفسه بتنكسر من حاجات كتير لكن ما بيقدرش يعمل حاجه ... يا اخى الانسان دا غريب قوى
هذه الكتله من المشاعر المتناقضه لا يعلم الا الله كيفية تسيرها

كتير كنت بشوف بنجاواتى فى التعليقات وكنت امشى وامر عليه مرور الكرام
اليوم وعند ستيته الحمش قلت لازم اروح اشوف بنجواتى واشوف اخباره ايه
يا دود قريت البوست الاخير وندمت على انى لم آتى من زمان
تحياتى بنجواتى

جلال كمال الجربانى يقول...

السلام عليكم

أهم شىء الرضى بالمقسوم
وده بيعتبر إختبار
وكم من الحالات المشابهه
ولأن كل ذى عاهه جبار ربنا بيعوض فى ملكات تانيه بس الصبر والرضا مطلوب

ودمت بخير

Lola يقول...

مع كل الترحيبات بالعوده بعد الغياب اجدنى اقول لك .. رغم انها المره الأولى لى هنا..
بصدق
افتقد هذا الأسلوب القصصى الراقى المحبوك والسلسل فى الكتابه لإيصال فكره ذات عمق لا محدود..
الأنانيه..
تعرف النفس البشريه احيانا تفاجأنا جدا بما هى قادره على فعله من الشرور فى حق نفسها احيانا قبل الآخرين !!

هاهو ذا يعيش فعل االأنانيه..
لكنه معذب مهما تظاهر بالتناسي
احيانا لحظة كثيفه من الغذاب وتأنيب الضمير كفيله بهدم اكوام من سعاده نظن لننل نهرب بها من مواجهه نحن !!


سعيده لصدفه معرفتى بك..
وقلمك اكبر من حدود ثنائى عليه.

كن بخير
ومبدعا دوما حتما.


لولا

موناليزا يقول...

الرجل بطبعه ملول

ابو المفاصل الواصل يقول...

النت
كانما خلق النــــــــــــــــت لدول العالم التالت
لفضح مخازيه وتخلفه واحـــواله وما الــت
المتمسك بجهله المعادى للعلوم وما قالـــــت
المحب للدماء !وغير مهم ليه اريقت وسالت
ولا يستوعب اى دروس وعبر اتقالــــــــــت
وجه النت وجات معاه الحقيقة اللى زالــــــت
وابتدأ الناس تفهم والمعلومات توالــــــــــــت
=========

غير معرف يقول...

الابن الغالى دكتور مصطفى
جزاك الله كل الخير على السؤال
ويكفينى جدا شعورك هذا ويكفى
انك لاحظت هذا
معذرة ياابنى فغيابى كان اضطرارى
فجاة ارتفع الضغط وتطلب دخولى عناية مركزة لمدة يومين والحمد لله انخفض ولكن
ارتفاعه خلف بعض التوابع اللى اسال الله ان تمر على خير وبمجرد التحسن عدت لكم مرة اخرى ولكن الامور لسة مش منضبطة فاسالك الدعاء فى هذه الايام وبشدة
لاكن انت متعرفش فرحتى قد ايه بسؤالك
ربنا يحفظك ياابنى من كل سوء او مكروه
ودمت بخير

TIMMY !! يقول...

مش عارف ليه م ابحبش القصص اللي بتدور حول الآباء و الأبناء !! :( :(

بحس إن الفجوة بين كل جيل و التاني بتوسع أكثر فأكثر ,

و طبيعي إن العملية تبوظ !! :(

بلاش أتكلم أكتر و أقلبها تشاؤم

فشكووول يقول...

ازيك يا دكتور بنجاواتى
اشكرك على التعليق فى فشكول
انا ناوى احذفه عشان انا مش متعود علىالكلام ده ... بس جات لى لحظه حبيت افضفض عن نفسى وافتكر الايام الخوالى حين رأيتها وتذكرت ايامها وكنا على وشك احداث فتنه طائفيه

تحياتى بنجواتى

بنجاواتى يقول...

د/آية:

فعلا اكتر انسان بيعانى من نتيجة الانانية هو الشخص الانانى ذات نفسه

تحياتى

------------
وكيلة نيابة مع وقف التنفيذ:

كل جنس فيه النماذج الطيبة والغير طيبة
لكن انا معاكى ان المرأة اكثر عطاء من الرجل فيما يخص الاطفال

تحياتى
-------------
فشكول:
مش عارف اقول ايه مع كلام حضرتك الجميل ده

لكن عموما الانسان ده تركيبة ما حدش فاهمها الا خالقها
وسبحان الله ازاى نلاقى فى الصفة الواحدة تفاوت كبير جدا بين البشر رغم ان نوع المعرفة اللى وصل لها الانسان تقريبا واحدة

تحياتى العميقة
-----------
واحد من العمال :
اتفق تماما مع حضرتك
وهو فعلا الرضا والصبر كانوا القوة الوحيدة اللى ممكن تخلى هذا الاب يقوم بدوره وما يتخلاش عن ابنه

تحياتى
------------
لولا :
مفيش كلام اقوله مع ثنائك الجميل ده لكن شكرا وسعيد بزيارتك

فعلا اول من يحترق بالنار حاملها
تحياتى
------------
موناليزا:

الراجل صبره اقل من المرأة فى احيان كثيرة

تحياتى .....

mahasen saber يقول...

يا الله

انتا احساسك عالى
وصفت حال واحساس الاب تجاه ابنه بطريقه صادقه ومش مبالغ فيها

كراكيب يقول...

بنجاواتي..
ايه القصة المؤثرة اللي انا قريتها وانا داخله انام دي
ليه كدة
ده انا من امبارح مش نايمة وقولت ابص على بلوجات كدة قبل ما اتقلب ع السرير

المهم بقى يا سيدي اني مبسوطة اني جيت هنا
بلوجك لذيذة خالص
;)

miro el niro kwanirooo

محمد عبد الباسط يقول...

تاسيا باللى بيدخلوا ويكتبوا اول تعليق فتقريبا انا بكتب

اخر تعليق

ولا فخر طبعا ههههههه

قصة مؤثرة وومكن الغلطى تتصلح لكن اللى مش ممكن ان اب يفرط فى ابنه مهما حصل

اسالكم الدعاء

حلم كبير

بنجاواتى يقول...

أبو المفاصل الواصل:

ردك كان فى صميم الموضوع هههههههههههه

*************
أم مالك:

أن بحبك فى الله
وبتمنى لك دوام الصحة يا رب
اعذرينى على تقصيرى

************
timmy:
منورنى يا سيدى ورأيك على عينى وراسى

*********
فشكول :

منور المدونة بتشريفك لها

*******
محاسن صابر:

انا بحاول اكون صادق على قدر المستطاع واشد ما اكرهه هو الكدب والخداع

شكرا على ذوقك العالى

**********
كراكيب:

بعد كده هحاول اعمل تصنيف لاى حاجة انا كاتبها وهسمى النوع ده من القصص ممنوع قرائتها قبل النوم :D

تشرفت بالزيارة يا كراكيب ويا ريت تنظمى الدنيا شوية ههههههه

**********

صديقى العزيز محمد عبد الباسط :

اهنيك على التعليق الاخير وكفى بالمء نبلا ان يكون تعليقه الاخير ههههه

فعلا الانسان الموفق هو اللى ربنا بينور بصيرته ويكشف له الخطأ قبل ما يتمادى فيه وكل خطأ يمكن الرجوع عنه اكيد

تحياتى لكم كلكم

رحلتنا في الحياة يقول...

سؤال ملح انت ليه مش بتنزل بوستات جديدة ؟؟؟؟؟

MaNoOoSh يقول...

لا انا مبعذرش الاب على فكرة
بس شايفة ان الغلط الكبير اللي عمله انه حسس ابنه انه عالة وعبء عليه وعلى المجتمع
وهو مكنش ينفع ابدا يعمل كده

لكن بقول ان اى انسان فى الدنيا ميقدرش يتحمل مسئولية كبيرة لوحده
وبيبقى اكيد محتاج اوقات راحة من المسئولية دي


المهم
انت بقى ليه مش بتنزل مواضيع جديده؟

غير معرف يقول...

انا اول مره ادخل مدونتك

هترحب بيا ولا امشى :(

بس بجد احييك على البلوجر الرائع دا

حنين

hasona يقول...

السلام عليكم

هل يتبدد الجزن أمام المسئولية ؟
هل يموت الامل علي عتبة الصبر ؟

لم تكن أنانية بقدر ما هي مدخل للشيطان لكي ينفذ الي قلب الانسان
ويعده ويمنيه بكل كذبة ممكنة

حتي يغير قناعاته
ويبدل رضاه
فتتغير نظرته للحياة

غروب يقول...

اللوك الجديد حلو خالص

بس ايه الغيبه دى كنت فاكره انى هاجى الاقي كاااااام بوست

Unknown يقول...

قصة مؤلمة
وتحتاج إلى التدبر
أحييك وبارك الله فيك ونفع بك

ويبقى التواصل

احساس طفلة محبة للرومانسية بس واقعية يقول...

من وجهة نظرى
هى مش انانية على قد ما هى قله صبر وشعور بالشفقة طول الوقت
يعنى هو حس ان ابنة عبء علية محاولش يشاركة حياته او يتجاوب معاه
بس حس بالشفقة نحيتة واحساسة دا ادى بية للشعور بالملل من الحزن والشفقة
وكان عايز يتخلص من المشاعر دى مش من ابنة بس للاسف طلعت المشاعر دى هو اللى صنعها وخلاها مرتبطة بأبنة

مش عارفة بس احساسى بالقصة كدا
سوء تصرف وسوء احساس
اسلوبك في القصة يحسس اللى بيقراها انها حقيقية تسلم ايدك

سؤال ملح زى بتاع ايوشة
هو انت مختفى كدا لية ؟
يارب تكون بخير

تقبل مرورى